GiGiደጉ ታዬ (This email address is being protected from spambots. You need JavaScript enabled to view it.)

ለጂጂ

እጅጋየሁ (ጂጂ) ... አንቺ አሁን መብራት ሆንሽ። በወታደሮቹ ቋንቋ አብሪ የሚባል ነገር አለ። ቀዳሚ እንደማለት ነው። ድሮ በነበላይ ዘለቀ፣ በነአብዲሳ አጋ፣ በነኡመር ሰመተር እና በነኃይለማሪያም ማሞ አገር ደግሞ ዘፈኑም የሚለው ይሄንኑ ነው። የጎበዝ ወዳጅ ታስታውቃለች ይባላል። ”በቃ!” በማለትሽ “የጎበዝ ወዳጅ” ሆንሽ ማለት ነው።

 

ወንዶቹ በጠፉበት ዘመን ሴቷ ናት አሉ አፋፍ ላይ ቆማ “በለው” የምትለው። እኛ አበሾቹ ደግሞ ሴት የላከው እንላለን። ፈረንጆቹም እንደዚያ አይነት ነገር ሳይኖራቸው አይቀርም። አገር በእናት ትመሰላለች፤ ድሮ ኮሚኒስት ነን ብለው ካበዱት በቀር ሁሉም አገሩን “እናት አገር” ነው የሚለው። እናት ደግሞ ሴት ናት። የእናት ፍቅር ደግሞ የሚተካ ወይም የሚወዳደር ወይም ይቆይ ተብሎ የሚቀመጥ አይደለም።

 

 

የመከራውን ግፍ እያዩ ዝም ብለው በዳሌ እና በከንፈር ጆሮአችንን ለሚያደንቁሩት እንደ አርቲስት ተነስተሽ በቃ! ማለትሽ ጥላሁንን እንዳስብ አርጎኛል። ጥላሁን በረሃቡ ተርቦ፤ በጦር ሜዳው ሄዶ ተዋግቶ ነው ያቺን አገር የተለያት። እንደጥላሁን አይነት አርቲስቶች ስንናፍቅ አንቺ ድንገት ብቅ አልሽልን። በቃ! በማለትሽ ትከበሪያለሽ፤ እኔ አክብሬሻለሁ። ከዚህም ሌሎች ሊማሩ ይገባል።

 

እኔ በግሌ የኛዎቹን አርቲስቶች ሳይ ሁለት ኢትዮጵያ ያለች ይመስለኝ ጀምሮ ነበር። የኢትዮጵያን ችግር ለማየት ኢኮኖሚስት መሆን አያስፈልግም፤ ሰው መሆን እና መታዘብ ብቻ ይበቃ ነበር። እንደዚይ አይኑን አፍጥጦ እና ጥርሱን አግጥጦ በቆመ ኢኮኖሚ ላይ የተውሶ የአውሮፕላን አብራሪ ልብስ ለብሶ ስለ እድገት እና ትራንስፎርሜሽን ማውራት የት እንደሚያደርስ አላውቅም። የባሰበትም እንደጃንድረባ አይኑ ቅንድቡ ትከሻው እያለ ወንዱ ልጅ ስለ ወንድ ልጅ ዘፍኖልናል። አንቺ ግን በቃ! አልሽ።

 

ጂጂ አንድ ነገር ልነግርሽ እችላለሁ፤ የአምባገነኖች ቀን አብቅቷል፤ ውሸትም እንደማንኛውም ነገር ያረጃል፤ ሃቁ በመጨረሻ መውጣቱ አይቀርም። ሃቅ እና እውነትን ደግሞ አምባነኖች እና ጨቋኞች በፈለጉት መልክ ያዞሯት እና ያሽከረክሯት ይሆናል እንጂ አይቀይሯትም። የተፈጥሮን ጭለማ በመብራት መቀየር ይቻላል፤ ጭለማው ግን አለ። መብራቱ የጠፋ ዕለት ጭለማው ብቅ ማለቱ አይቀርም። በየትኛውም መልክ ያለ እውነትን መቀየር አይቻልም። ዛሬ በኢትዮጵያ ያለው እውነት ጥቂት ዘረኛ የሆኑ ሰዎች ያቺን አገር የግል ካዝናቸው ማድረጋቸው ነው።

 

የመለስ ዜናዊ እና የግብረ አበሮቹ በብዛትም የምርኮኛ መንግሥት ጊዜ እያለቀ ነው። ይህ እንዳይሆን ተደጋግሞ ተነግሯል፤ የአምባገነኖች ዋና ባህርይም ስለሆነ ጆሮአቸው ላይ ተኝተው ያሾፋሉ። ይሄን የቱኒዝያው፣ የግብፁ እና የሊቢያው መሪዎች አሳይተውናል። ለአመታት የገነቡት የጦር እና የደህንነት ኃይል ለሶስት ወር እንኳ አላዳናቸውም። ህዝብ ”በቃ!” ካለ ምንም የሚያቆመው ኃይል እንደሌለ አይተናል። ይህ ደግሞ ነገ በአዲስ አበባ፣ በናዝሬት፣ በደብረዘይት፣ በሰበታ፣ በሰንዳፋ፣ እና በአምቦ አልፎም በመላው ኢትዮጵያ የማይሆንበት ወይም የሚያቆመም ምንም ምድራዊ ኃይል የለም። የኢትዮጵያ ነፃነት ቀን መቅረቡ ይሰማኛል። አሁን እኔን ራስ ምታት የሆነብኝ ይሄን ታሪካዊ ቀን እንዴት አርጌ እንደምቀላቀል ማሰቡ ነው። አንቺ የጎበዝ ወዳጅ እንደሆንሽው ሁሉ ያንቺን ተከትለው የሚመጡ አንዳሉ ይታየኛል። ዘፈኑም እንደሚለው ይሆናል ...

 

”... የጎበዝ ወዳጅ ታስታውቃለች፣

አፋፍ ላይ ቆማ በለው ትላለች ...”

በቃ!

አዲስ አበባ እንገናኝ።


ደጉ ታየ (This email address is being protected from spambots. You need JavaScript enabled to view it.)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!