ይገረም አለሙ

Tewodros Tsegaye and Teddy Afro
ጋዜጠኛ ቴዎድሮስ ፀጋዬ እና አርቲስት ቴዎድሮስ ካሳሁን (ቴዲ አፍሮ)

ይህ መዳቡ መልኩን ቀይሮ ብረቱ ተመሳስሎ ቆርቆሮው ቅርጹን ለውጦ ሁሉም ወርቅ ተመስሎ ሊቀርብ ይችላልና፤ ሆኖም ታይቷልና፤ ፊት ለፊት ከሚታየው ብልጭልጭ ቀለሙ በስተጀርባ ምንነቱን ማስተዋል እንደሚገባ ነው የሚያስገነዝበው። ይሁን አንጂ አባባሉ የሚነገረው ለዚህና ለዚህ ብቻ ሳይሆን ይልቁንም ለሰው ልጆች ነው።

 

አንዳንዱ በአነጋገሩ ተለሳልሶ፣ በገጽታው ፈክቶ ውስጣዊ ማንነቱንና ትክክለኛ እሱነቱን ደብቆ፣ ፍጹም መልካም ሰው መስሎ በመታየት ወዳጅ ዘመዱን ሳይቀር ይጎዳል፣ ለጥቅም አሳልፎ ይሰጣል፣ እንደውም አንዳንዱ ሊጠቀምበት ወይንም ሊያጠፋው እያደባ ቀን የሚጠብቅለትንና ቦታ የሚፈልግለትን ሰው በአፉ ፍጹም ወዳጁ መስሎ ከመቅረብ አልፎ ገበታ እስከመጋራት ሻይ ቡና እስከማለት ይደርሳል። የሆዱን ሰይጣንነት በአፉ ስብከት መልአክ አስመስሎ መስሎ ተመሳስሎ ራሱን ለመጥቀም ግለሰቦችን ሲበዛም አገርንና ሕዝብን ይጎዳሉ።

የእነዚህ ሰዎች ትክክለኛ ማንነትና ምንነት የሚጋለጥና የሚታወቀው በጣም ዘግይቶ ብዙ ጥፋት ካደረሱ በኋላ በመሆኑ ብዙዎች የእነዚህ ሰዎች ተከታይ ካልሆነም ደጋፊ በመሆን ሳያውቁ የጥፋት ተባባሪ ይሆናሉ። ብዙዎቻችንም የትናቱን ዛሬ እየረሳን ዛሬ ለሚገጥመን መልካም ነገር የምናጨበጭብ፤ ለሚያጋጥመን መጥፎ ነገር የምንጮህ፤ ለምን ብለን የማንጠይቅ፤ እንዴት ብለን ነገሮችን ለመመርመር ስንዝርም መንገድ የማንሄድ መሆናችን፤ ወርቅ ያልሆኑ ብዙዎች ራሳቸውን በአብለጭላጭ ወርቃማ ቀለም አመሳስለው እንዲያጭበረብሩ፣ ስተው እንዲያስቱ እንመቻችላቸዋለን። እናመቻችላቸዋለን።

ይህን ሁሉ በመንደርደሪያነት እንድል ያደረገኝ ሰሞኑን የተለቀቀውን የቴዎድሮስ ካሳሁን “ኢትዮጵያ” ነጠላ ዜማ እንተቻለን ብለው ወጥተው የቅናት፣ የምቀኝነትና የጥላቻ ስሜት በጉልህ ከታየባቸው ሰዎች መካከል አንድ የማውቀው የሚያብለጨልጭ ነገር ሁሉ ወርቅ አይደለም የሚለው አባባል ሊነገርለት የሚችል ሰው ማግኘቴ ነው። ዳኝነት መኮንን።

ይህን ሰው የማውቀው ከአዲስ ነገር ጋዜጣ ጋር በተያያዘ ነው። ሥራ የጀመሩበት ቦሌ መድኃኒዓለም አካባቢ በነበረው ቢሮአቸውን በተከፈተ ሰሞን ተገኝቼ ነው ብዙዎቹን የጋዜጣውን ባልደረቦች የተዋወኩዋቸው። ከዛም ብዙም ሳይቆይ በዚህ አጭር ግዜ እንዴት ሊሆን ይችላል የሚል ጥያቄ ሊያነሳ የሚችለውን እዛው አካባቢ የተከራዩትን የተሟላ ቢሮ ጎብኝቻለሁ። ከአንዳንዶቹ ጋር ደግሞ ዋናውን ባለቤት አብይ ተክለማርያምን ጨምሮ ብዙም ባይሆን በአካል ተገናኝተናል። በዚህ ምክንያት ነበር ወ/ት ብርቱካን ከሁሉም ጋር ሊባል በሚችል መልኩ የቅርብ ጓደኛ እንደነበረች ለማወቅ የቻልኩት፣ በተለይ ደግሞ ዋና ከሚባሉት ጋር አብራ ምሳ ትበላለች ቡና ትጠጣለች።

ቅርርባቸው ይህን ያህል ሆኖ ሳለ ግን ወ/ት ብርቱካን ላይ ወያኔ ፈንጂ ባጠመደበት ሰዓት እነዚህ ገበታ የተጋሯት ሰዎች ፈንጂውን በሩቅ ርቀት ማፈንጃ መሳሪያ ለማፈንዳት ነው የሞከሩት። ነገሩ የሆነው ከብዙ በአጭሩ እንዲህ ነው። ወቅቱ ብርቱካን ይቅርታ አልጠየኩም ብለሻል፣ አስተባብይ፤ አለበለዚያ መልሰን ቃሊቲ እናስገባሻለን ተብላ፤ አይደለችም እሷ ወዳጅ ዘመድና አድናቂዋቿ ይጨነቁ የነበረበት ታህሣሥ 2001 ዓ.ም. ነው። በመጨረሻ ለተጠየቀችው መልስ ብላ ያዘጋጀችውንና “ቃሌ” የሚል ርዕስ የሰጠችውን ጽሁፍ ቅዳሜ ታህሳስ 18/2001 ዓ.ም. ለንባብ ለሚበቁ ጋዜጦች ላከች፣ ከተላከላቸው ጋዜጦች አንዱ የሆነው የአዲስ ነገር ሰዎች ማለትም እነ ዳኝነት መኮንን ወ/ት ብርቱካን አላስተባበሉም በማለት እጅግ በሚያሳዝን ሁኔታ የፊት ገጽ ዜና አድርገው ወያኔ ብርቱካንን ማሰሩ እንዲመቸው መንገድ የመጥረግ ያህል ሥራ ሠሩ። በዚህ አላበቁም ወያኔ እሷን ሲያስር የአድናቂዎቿና ደጋፊዎቹ ተቃውሞና ቁጣ እንዳይነሳ ብርቱካን ዩኒቨርስቲ በነበረች ግዜ እንዲህ ነበረች፣ እንዲያ ታደርግ ነበር በማለት ብዙ አተቱ። ለምን ዓላማና ግብ እንደዛ ማለት እንዳስፈለጋቸው በአራት ነጥብ መናገር ቢቸግርም፤ ተንኮል ለመሆኑ ግን ምንም አያጠራጥርም። ብርቱካንም በሁለተኛው ቀን ታህሣሥ 20/2001 እንደ ወንበዴ ከመንገድ ታፍና ቃሊቲ ተወሰደች።

የእነ ዳኝነት ነገረ ሥራቸው በወያኔ ተባባሪነት የሚያስጠረጥር ቢሆንም ድርጅታቸውን ዘግተው አገራቸውን ጥለው ለስደት የበቁት በወያኔ በመሆኑ ለህሊና ፍርድ ያስቸግራል። የመረጃ ቋት ላይ ተቀምጠው “የሁለት ምርጫዎች ወግ” የሚል የአሉባልታ መጽሐፍ የጻፉት አቶ በረከት ስምኦን አዲስ ነገር የተቋቋመው በአሜሪካ መንግሥት ድጋፍ ነው በማለት ከሲ.አይ.ኤ. ጋር ለማገናኘት የሞከሩበት ማስረጃ ያልቀረበበት ከመሆኑ ባሻገር አዲስ ነገሮች በብርቱካን ላይ የፈጸሙት አድራጎት ለሲ.አይ.ኤ. የሚያስገኘው ፋይዳ አይታይምና የአቶ በረከትን ፍረጃ ለመቀበል ቢቸግርም፤ ማእድ በተቋረሱዋት ብርቱካን ላይ ያውም በዛ ሰው ሁሉ ስለ እሷ በተጨነቀበት ወቅት ያንን መጻፋቸው ለምንና ስለምን ማሰኘቱን ሊያስቀረው አይችልም። አንዳንድ ሰዎች በወቅቱ በአዲስ ነገር ሰዎች ማዘናቸውን ገልጠው ለምንስ አደረጋችሁት ብለው ጠይቀው ጽፈዋል።

አዲስ ነገሮች ማለትም እነ አቶ ዳኝነት ብርቱካን ከታሰረች በኋላ በጓሮ በር ገብቶ ምክትል ሊቀመንበርና የሕዝብ ግንኙነት ኃላፊ ለመሆን ከበቃው አቶ ስዬ አብርሀ ጎን ተሰልፈው ፓርቲያችን መስመሩን እየሳተ ነው በማለት አመራሩን ለማስተካከል ትግል የጀመሩትን የፓርቲውን መስራቾች ማውገዙን ተያያዙት። የጋዜጣው ባልደረባ የነበረው አቶ መስፍን ነጋሽ የዚሁ ዘመቻ አካል የሆነ “ያለዎት ቀሪ ሂሳብ” በሚል ርዕስ ሐምሌ 11/2001 ዓ.ም. ጽሁፍ አወጣ። በሳምንቱ ሐምሌ 18/2001 ሀሳብ የሌለው ሂሳብ በሚል ርዕስ ምላሽ የሰጡት ፕ/ር መስፍን፤ ርዕሱ ሂሳብ ስለሆነ መስመሮቹን ቆጠርኳቸው 183 ናቸው፣ መጣያው “በነገራችን ላይ” የሚለው ከተጨመረ 195 ይሆናሉ ... በማለት ጽሁፉን በጽሞና ማንበባቸውን የሚያሳይ መንደርደሪያ ከሰጡ በኋላ ... እንደ ስድብም ቢሆን በጋዜጠኛ ነጻነት አምናለሁ ግን ይግ ጋሬ መጫጫር ማሰብ ተብሎ እንጀራ የሚያበላ ከሆነ የዕድል ጉዳይ ካልኾነ ሥራ ፈት ለምን ይኖራል? በማለት ራሱን ከሰቀለበት ከፍታ አውርደው ትክክለኛ ማንነቱን አሳዩት አሳዩበት። በዚህም ክፉኛ ቅስሙ ተሰብሮ ያለ ቁመቱ አድጋ የነበረች ልቡ ከቦታው ተመልሳ እንደነበር ሰምቻለሁ። ርጥቡ ሬሳ ደረቅ ያነሳ ሆኖ ዛሬ መስፍን ነጋሽን በሌለበት ጉዳይ ማንሳቴ ዛሬ ዳኝነት ውስጥ የምናየው ነገር የዋለ ያደረ የሰነበተ መሆኑን ለማሳየት አብዩ ማስረጃ አዲስ ነገር በመሆኑ ሁለትም ከማን ጋር እንደምትውል ንገረኝና ማን እንደሆንክ ልንገርህ ስለሚባል ነው።

ከዛ በኋላ ብዙም ሳይቆይ አዲስ ነገር ለስደት በቃ፤ ከዛ በኋላ ዳኝነትን አልፎ አልፎ ስሙን ብሰማም ጽሁፎቹን ባነብም እንደዚህ ሰሞኑ ያለ ከመስመር የወጣና ወጥ የረገጠ የሚባል አይነት ድርጊት ሲፈጽም አልሰማሁም ነበር። በዚህ ሳምንት ግን የቴዎድሮስ ካሳሁን ነጠላ ዜማ ተለቆ ያውም ኢትዮጵያ የሚል ሙሉው አልበም የሚለቀቅበት ግዜ ተነግሮ ሳለ፤ ሙሉውን አዳምጠው ለመተቸት ወይንም እንደታየባቸው ለመዘባረቅ ትእግስት አጥተው አንድ ቴዎድሮስ ፀጋዬ ከሚባል ቴዎድሮስ ካሳሁን ምን አይነት ግጥም መጻፍና እንዴት ብሎ መዝፈን እንዳለበት ምክር አይደለም ትዕዛዝ ለመስጠት ከሚቃጣው ቢከፍቱ ተልባ ከሆነ ሰው ጋር ሆነው ራሳቸውን ያስገመቱበትንና ያጋላጡበትን ሲናገሩ ሰማን።

ለመሆኑ ጸባቸው ከማ ነው? ከኢትዮጵያዊነት፣ ከሰንደቅ ዓላማው፣ ወይንስ ከቴዎድሮስ መግነንና መታወቅ። ሰይጣን ለተንኮሉ ከመጽሐፍ ቅዱስ ይጠቅሳል እንደሚባለው፣ ኮሶአቸውን በማር ጠቅለው ሊግቱን አንደኛው እየደጋገመ ስለ ኢትዮጵያ በመዝፈኑ ደስተኛ ነኝ ሲል ሰማነው። አቶ ዳኝነት ግን ይህንንም ለማለት አልቻለም። ያኛውም ቢሆን ይህን ያለው ለማስመሰል እንጂ ከልቡ እንዳልሆነ በቃ የቴዎድሮስ ኢትዮጵያ ይህች ነች በማለት ተመጻድቆ ተጋለጠ። ኧረ ለመሆኑ ልጅ ቴዎድሮስ የአንተ ኢትዮጵያ የቷ ነች? ስንት ኢትዮጵያስ ነው ያለችው? አፍ ሲያመልጥ ... ነው የሚባለው።

የሁለቱም ሰዎች የቃላት አጠቃቀማቸው የምጸት አነጋገራቸው ቅናትና ምቀኝነት የተጠናወታቸው መሆኑን እንጂ፤ ለማሳደግ የሚተቹ ላለመሆናቸው በበቂ ያረጋግጣል። በግማሽ ቀን ይህን ያህል ሰው ያውም በአንድኛው ዩቲዩብ ብቻ ተመልከቶታል በማለት ሲናገሩ የድምጻቸው ቅላጼም ሆነ የቃላት አገላለጻቸው እርር ድብን ማለታቸውን ያሳያል። ይህ ንዴታቸውም ነው የቴዎድሮስ ተከታይ ያሉትን በሙሉ መንጋ በማለት በድፍረት ለመሳደብ የበቃቸው። ይሄ ነው ጋዜጠኝነት እንከፎች!

በቴዎድሮስም ላይ ዘመቱ፣ አድናቂ ደጋፊውንም ተሳደቡ፣ ዘለፉ፤ በአንድ ድንገይ ሁለት ወፍ እንዳይመቱ መጠንቀቅ ያስፈልጋል። ይሄውም የጥላቻ ስሜታቸውን ለማስተንፈስም ይሁን የበቀል ጥማቸውን ለማርካት ወይንም ስውር ተልእኮ ኖሮአቸው ባናውቅም፤ ጉዳዩን በጥንቃቄ ማየትና መከወን ይገባል። በቴዎድሮስ ላይ በሚወረውሩት ድንጋይ የቴዎድሮስ ደጋፊ በአብዛኛው የወያኔ ተቀዋሚ ነው ተብሎ ስለሚታመን የእነርሱ ብልግና አስቆጥቶት ለእነርሱ መልስ በመስጠት ሲጠመድ፤ ስሜቱ በዚሁ ጉዳይ ሲታሰር በወቅታዊ አገራዊ ጉዳዮች ላይ ያለው ትኩረት እንዲቀንስ ወይንም አቅጣጫ እንዲስት የማድረግ ነገርም ሊኖር ይችላል ብሎ ማሰብ ደግ ነው። ጠርጥር ከገንፎም ይኖራል ሰንጥር ይባል የለ።

ስለሆነም ይህ እንዳይሆን ሁለቱንም በአግባቡና በወጉ እንደ እነርሱም ሳይባልጉ በማስተናገድ ፍላጎታቸውን ማምከን፣ ዓላማቸውን ማክሸፍ ያስፈልጋል። ብልግናቸውን አገር አውቆት ማንነታቸውን ሕዝብ ተረድቶት ታርመው እንዲመለሱ ካልሆነም ቫይረሳቸውን እየረጩ ሰው እንዳይበክሉ ወይ መድኃኒት ልንፈልግላቸው ግድ ይላል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!