Lidya, Katherine and Hidden Figures

ኢዛ (ማክሰኞ ጥር ፴ ቀን ፳፻፱ ዓ.ም. Feb. 07, 2017)፦ ኢትዮጵያ የተወለደችውና የዘጠኝ ዓመትዋ ሊድያ ጀዊት፣ ኦፊስ ቦክስ ሰንጠረዥ ላይ በወጣውና እጅግ ተደናቂነትን ባተረፈው ”Hidden Figures” በተሰኘው ፊልም ላይ ተውናለች።

በእውነተኛ ታሪክ ላይ በተመሰረተው በዚሁ ፊልም ላይ ሊድያ የተጫወተችው የካተሪና ጆንሰንን የሕጻንነት ገጸ ባሕሪን መሆኑ ታውቋል።

ሕጻን ሊዲያ ትውልደ ኢትዮጵያዊ ስትሆን፣ በአራት ዓመትዋ አሜሪካዊ ለሆኑትና ለአሁን ቤተሰቦችዋ በማደጎነት መሰጠትዋ ታውቋል። በአሁኑ ወቅትም ከአሳዳጊዎችዋ ጋር በፓልም ሲቲ በመኖር ላይ ትገኛለች።

ፊልሙ የሚያጠነጥነው በሦስት አፍሪካ አሜሪካዊ በሆኑ ሴቶች ዙሪያ ሲሆን፣ እነዚሁ ሴቶች በአሜሪካ የነበረውን የቀለም እና የዘር ልዩነትን ተቋቁመው በአሸናፊነት ለመወጣት ያደረጉትን ጥረት የሚያሳይ ነው። ፊልሙ በተለይም ካተሪና ጆንሰን ከጥቁር ሴት ጓደኞችዋ ጋር በመሆን በአሜሪካ ታላቁ ተቋም ናሳ ባካሄዳቸው ታላላቅ ኦፐሬሽኖች ውስጥ ከፍተኛውን የእውቀት አስተዋጽኦ ማድረጋቸውን ያሳያል።

ሕጻን ሊዲያ የተጫወተችው ገጸባሕሪ ባለቤት ካተሪና በአሁኑ ወቅት የዘጠና ስምንት ዓመት የዕድሜ ባለጸጋ ሲሆኑ፣ የቀድሞ የናሳ የሂሳብ እና የፊዚክስ ሊቅ ከመሆናቸውም በላይ ለናሳ በዲጅታል ኤሌክትሮኒክ ኮምፒዩተርስ ባለሙያነት አገልግለዋል።

ካተሪና ጆንሰን ከቀድሞው የአሜሪካ ፕሬዝዳንት ባራክ ኦባማ ”ፕሬዝዳንታዊ የነጻነት ሜዳልያ” ኖቨምበር 24 ቀን 2015 እ.ኤ.አ. ተሸልመዋል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!