Betoch part 185

"ቤቶች" የተሰኘው ተከታታይ የቴሌቪዥን ድራማ ክፍል185

ክንፉ አሰፋ

ከአጭር ግዜ እረፍት በኋላ፣ EBC ላይ ብቅ ያለው "ቤቶች" በተሰኘው ተከታታይ የቴሌቪዥን ድራማ በክፍል185 እጅግ አስደምሞናል። ተመልካቹ ሕዝብ በማኅበራዊ ድረ-ገጾች ጥላሁን ጉግሳ ላይ እየወረደበት ያለው "አሽቃባጭ፣ የወያኔ አቃጣሪ ..." ወዘተ ውግዘቶችና ስድቦችን ባልጋራም፤ ይህ አንጋፋ አርቲስት ጥበብን የፖለቲካ መደለያ ስለማድረጉ ግን ምስክር አያሻም። በአንድ ወቅት እጅግ ተወዳጅ የነበረ ይህ ድራማ በመጠነኛ የሕወሓት ልማታዊ ቅኝት እየተቃኘ መጥቶ፤ አሁን ላይ ወገን የለየ ይመስላል። ዶፍ ሲጥል ገሚሱ ይበሰብሳል፤ ሌላው ተጠልሎ ይመለከታል፤ ጥቂቱ ደግሞ ይቀልዳል። ቀልደው ሞተዋል!

ይህንን ድራማ ስመለከት፣ ገሃዱን ዓለም ከምናቡ ዓለም በቅጡ ሳይለዩ፣ ኀያልነትዋን ያልተረዱ አርቲስቶች፤ ጥበብን ለተልካሻ ጉዳይ ሲመነዝሩዋት አስተዋልኩ። ወዶ ይሁን ተገድዶ ብቻ፣ በሕዝብ ላይ የተከፈተ ጦርነት ላይ ተሰልፎ፤ በተለይ ለጥበብ ጥብቅና ቆሞ ሲገዘትላት ከኖረ ሰው ማየቱ ደግሞ የበለጠ ያምማል።

"... ምን ፍትሕ አለ እያልን እጃችንን አጣጥፈን እንቀመጣለን። ይህ ትክክል አይደለም። ..." ይለናል፣ አንጋፋው ጥላሁን ጉግሳ። ይህንን የስክሪፕት ረቂቅ ልቦናው ይንገረው ወይንም ደግሞ ሕወሓት እንጃ። ነጋዴዎች ቅሬታቸውን በአግባቡ ለሚመለከተው ክፍል እንዲያቀርቡ የሚመክረው የጥበብ ሰው፣ የመንግሥት አካላትም ሲያጠፉ እንደሚከሰሱ በዚሁ ትወና አስረግጦልናል። ግና እነዚህ ባለሥልጣናት መች እና የት እንደተከሰሱ ጨምሮ ቢነግረን ኖሮ ከውግዘቱ ይድን ነበር። "(የግብሩ) ትመና ፍትሐዊ ነው።" በሚለው ላይ ጸንቶ ሲያበቃ፤ "አንዳንድ" ያላቸው ነጋዴዎች በማጭበርበር ላይ እንደተሰማሩም ይጠቁማል።

ከሕዝብ የምንሰማው ግን ሌላ ነው። ነጋዴዎች በመገኛኛ ብዙኀን እየቀረቡ፤ የተጣለብን ግብር አግባብ አይደለም፣ ቅሬታችንን የሚሰማ አካል አጣን ነው የሚሉን። ጥበብ የገሃዱ ዓለም ነጸብራቅ እንጂ፤ ተቃራኒ የሚለውን አስተምሮት ጥላሁን በዚህ ተውኔቱ አሳየን።

ለመሆኑ ለፍቶ አዳሪውን ነጋዴውን "አጭበርባሪ" እያሉ በአደባባይ መሳደብ ጥበብ ነውን?

"መረጃ ደብቀውናል። ያለመረጃ ነው ውሳኔ የምሰጠው" እያሉ የሚያላዝኑት ኃይለማርያም ደሳለኝ እንኳን ደፍረው "በአገሪቱ ፍትሕ አለ" ብለው አይናገሩም።

"ወጣ ወጣና እንደሸንበቆ ..." አለ ያገሬ ሰው። ቀጣዩ ስንኝ አያድርስ ነው። ከአጀማመሩ አምሮ ዝናው ሲገንን፣ ነገር ዓለሙን ወዲያ ሲል የሚወርድ ዱብዳ ነገር። አያድርስ ነው። ሕዝብ "ስራህን ወደድነው" ሲለው፤ ድራማው የእስትንፋስ ያህል ያስፈለገው እየመሰለው የሚሳሳት ጥቂት አይደለም።

ወትሮውን በየመገናኛ ብዙኀን እየቀረቡ "ሀብታችን ሕዝብ ነው፣ ...!" ሲሉ የሚደመጡ አርቲስቶቻችን ከጊዜያዊ የግል ችግራቸው በዚህ መንገድ ያመልጡና፣ አንዳች ማዕበል ሲነሳ ደግሞ ከሕዝብ ሲላተሙ ማየት ሳያስተዛዝብ አልቀረም።

ወገን በኢ-ፍትሃዊ የግብር ተመን ተወጥሮ እያለቀሰ ባለበት በዚህች ቀውጢ ወቅት፣ እንደ ሙሴ "ሕዝቤን ልቀቅ!" ማለት እንኳን ባይገድደው፤ ብሶቱን በዚያች ትንሽ ቀዳዳ ማሰማት ያባት ነበር። ነገሩ ተገለበጠና ጭራሽ በዱብዳ የግብር አዋጅ እየተሰቃየ ያለውን ነጋዴ አብሮ መውጋት ጀመረ።

የቤቶች ድራማ ከጥበባዊ ይዘቱ ወደ ልማታዊ ይዘቱ ማጋደል የጀመረው መሃል መንገድ ላይ እንደነበር አስታውሳለሁ። ባልጠፋ የሙያ ሰው፣ ባልጠፋ የጥበብ አፍቃሪ፣ ጥላሁን ጉግሳ እነ ዶ/ር ቴድሮስ አድሃኖምን ጠርቶ በአደባባይ ስራውን ሲያስገመግመው ነው ቤቶች የሕወሓትን ጠረን ያያዘው። ከዚያን ጊዜ ጀምሮ ኩምክናውና ጥበቡ ለዛውን አጥቶ፣ ልማት ተኮር ሆነ።

የጥበብ ሰው ለሕብረተሰቡ ፍትሕ የሚቆም። ከፊትም ተሰልፎ መስዋዕት የሚሆን እንጂ፤ ሕዝብ አቤት ብሎ የሚተነፍስበት ቀዳዳ ባጣበት ግዜ፣ ይልቁንም በቁስሉ ላይ እንጨት የሚሰድድ አይደለም። የቤቶች ድራማም ቢሆን ከነጋዴው ትከሻ ላይ ተንጠልጥሎ ነጋዴውን መልሶ እንደ አጭበርባሪ አድርጎ ማቅረብ የጤና ነውን?

በንግዱ ማኅበረሰብ ላይ በመረጃ ሳይሆን በግምት የተቆለለው የገቢ ግብር ተገቢ አይደለም። ይህ ደግሞ በሁሉም የሕብረተሰብ ክፍል መወገዝ ያለበት ጉዳይ ነው።

“ሕዝቡ አጎብዳጆች ይለናል።” ብላ ነበር አርቲስት አስቴር በዳኔ በአንድ ወቅት። ለጥበብ ሰው ከዚህ በላይ ሞት የለም። ከምንወድዳቸው የጥበብ ሰዎች እንዲህ አይነቱን ስናይ ደግሞ ያምማል!።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!