ምነው ኖርዌይ!?

ወለላዬ ከስዊድን

(ግጥሙን በፒ.ዲ.ኤፍ. አስነብበኝ!

ሀገራችን በግፍ ችንካር ተከንችራ፤

በሞት ሽረት ተውጥራ፤

የመከራ የጭንቅ ማቅ፤

ተከናንባ ስትማቅቅ፤

ከግፈኞች መዳፍ ወጥተን፤

ባንቺ ጉያ ተወሽቀን፤

ግዜ ባማጥን ቀን በገፋን፤

ምነው! ምነው! ምነው! ኖርዌይ ምነው! ኦስሎ?

ችግራችን ታየሽ ቀሎ። 

ምን አጥፍተን ጨከንሽብን፤

ምነው ፊትሽ ጠቆረብን፤

ምነው ጣልሽን ከእቅፍሽ፤

ምን አረግን ምን በደልንሽ?

ደራሽ ሆነሽ ለተጎዳ፤

አግኝተሽን ባንችው ጓዳ፤

ምነው ውጪ ወረወርሽን፤

በምን ጥፋት ተቀየምሽን?

ምነው! ምነው! ምነው ኖርዌ ምነው! ኦስሎ?

ችግራችን ታየሽ ቀሎ?

ምነው ኦስሎ ምነው ኖርዌ፤

ሀገራችን የዘር ደዌ፤

ይዟት ታማ ስትማቅቅ፤

በችግሯ ስትጨነቅ፤

የሰው ክብር ሰብዓዊነት፤

ዲሞክራሲ እኩልነት፤

ጭራሽ አጥታ ቆማ እራቁት፤

ሕግ ጠፍቶ ፍርድ ሲጎድል፤

ባንቺ ጉያ ብንጠለል፤

ጉዳጉዱን በጠረግን፤

ስርቻውን ባጣጠብን፤

ምን አጥፍተን ምን በድለን፤

ፀዳል ፊትሽ ጠቆረብን።

ጉያሽ ኖረን ለብዙ ዓመት፤

ሳንጨብጥ ትንሽ ቅሪት፤

ካንቺው ወስደን፤

ላንቺው ሰጥተን፤

አጎብሰን አንገት ደፍተን፤

ግብር ከፍለን ሕግ አክብረን፤

አለበደል አለጥፋት፤

በኖርንብሽ በመዋተት፤

ምነው! ኖርዌ ምነው? ኦስሎ፤

ችግራችን ታየሽ ቀሎ?

ደጅሽ ተርፎ ተትረፍርፎ፤

እጅግ በዝቶ ሀብትሽ ገዝፎ፤

ሆነሽ ሳለሽ ሀብታም ምድር፤

ምነው? ጣልሽን እኛን ለአሳር?

ሲቸግረው ሰው ሲከፋ፤

በሀገሩ ሲያጣ ተስፋ፤

ሁሉም ቢሆን ይሰደዳል፤

ዛሬም አለ ፊትም ደርሷል።

ሆኖም ወጥቶ ለሚጠለል፤

የታላቁ መጽሐፍ ቃል፤

ድጋፍህን ስጠው እንዲል …

እያወቅሽው እያስተማርሽ፤

በዓለም ዙሪያ እየሰበክሽ፤

ሰብዓዊ ሀገር ጥሩ እያሉሽ፤

ምነው በእኛ እንዲህ ጨከንሽ?

ምነው! ምነው! ምነው! ኖርዌ ምነው! ኦስሎ፤

ችግራችን ታየሽ ቀሎ?


ወለላዬ ከስዊድን This email address is being protected from spambots. You need JavaScript enabled to view it.

በኖርዌይ እንግልትና ችግር ለደረሰባቸው ኢትዮጵያዊያን ስደተኞች መታሰቢያ ይሁን!

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!