ክንፈሚካኤል ገረሱ

የሦስት ወር ክረምት ቅዝቃዜው፣

ዶፍ ውሽንፍሩ ብርቅርቅታው፣

የሞላው ጅረት ያናጠረው።

ጎደለ ወንዙ አደብ ገዛ፣

ነጎደ ግዜው እንደዋዛ።

ጭቃው መጠጠ እህል ጎመራ፣

አዕዋፍ ዘመሩ አሽካካች ጅግራ፣

ባተ አዲስ ዓመት በወግ ታጅቦ በደመራ።

ዘመን ተሽሮ ዘመን ተተካ፣

በጊዜ ቀመር ባመት ተለካ።

“የጎመን ምንቸት ውጣ የገንፎ ምንቸት ግባ” ተባለ፣

አዝርዕቱ አማረ ተዘናፈለ።

ምድር አጌጠች ባደይ አበባ፣

ደምቃ ተዋበች በዕፅዋት ካባ።

ከቀኝ ነፈሰ ጅረቱ ጠራ፣

ሜዳ ኮረብታው ጫካው ተጣራ፣

ነገሠ ፍቅር በ’ልልታ ሆታ በደመራ።

“እዮሃ አበባ መስከረም ጠባ” አሉ ሕፃናት፣

ባህል ዘከሩ በጨቅላ አንደበት፣

ጥጆች ቦረቁ ፈነጩ ባሴት።

እረኛው ካረህ አንጎራጎረ፣

ለአዲሱ ዓመት ስንኝ ቋጠረ።

አራሹ ’ረካ በሸት አዝመራ፣

ችቦ ለኮሰ ከዳር ዳር በራ፣

ብሩህ ሕልም አየ ጮራው ፈንጥቆ በደመራ፣

ደመራ።


ክንፈሚካኤል ገረሱ

መስከረም ፲፪ ቀን ፳፻፲ ዓ.ም.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!