Ethiopia Zare

ኢትዮጵያ ዛሬ

የአዲስ ዓመት ቃል - ከኢትዮጵያ ዛሬ ድረ ገጽ

መልካም አዲስ ዓመት!

ድረ ገጻችን ኢትዮጵያ ዛሬ ሚዛናዊ መረጃዎችን በማቅረብ የተለያዩ አመለካከቶች እንዲንፀባረቁና የሐሳብ ነፃነት እንዲጎለብት ባለን አቅም ባለፉት አሥራ አንድ ዓመታት ስንንቀሳቀስ ቆይተናል። ይህ የመረጃ ምንጭ (ኢትዮጵያ ዛሬ ድረ ገጽ) በውጭም ሆነ በአገር ውስጥ ለሚገኙ ኢትዮጵያውያን ሚዛናዊ የሆኑ መረጃዎችን ለማቅረብ እንዲችል የበኩሉን አስተዋጽኦ ለማበርከት ዝግጅቱን አጠናቋል። ቀደም ብሎ ዕለታዊም ሆነ ተከታታይ መረጃዎችን ለመሥጠት የነበሩብንን ውስንነቶች በማስተካከል የተሻለ ለማገልገል ተነስተናል።

የሁሉንም ወገን አመለካከትና ቅኝት ሞያዊ በሆነ አቀራረብ በማሰናዳት በአዲስ መልክ ለመጀመር የተነሳሳነውም፤ በተለይም በዚህ ወቅት ኢትዮጵያን በሚዛናዊ መረጃዎች ለማገዝ ኃላፊነት እንደሚኖርብን በማመን ጭምር ነው።

ስለዚህ በየዕለቱም ሆነ በየሳምንቱ ጨምቀን የምናሰናዳቸውን መረጃዎች ከአዳዲስ አምዶች ጋር አካትተን የምናቀርብ ይሆናል። ወቅታዊ የአገራችንን ፖለቲካዊ፣ ማኅበራዊ እና ኢኮኖሚያዊ ጉዳዮችን የምናቀርብባቸው አምዶችም እንዲኖሩን በማድረግ በሁሉም ዘርፍ የመረጃ ምንጭ ለመሆን ተዘጋጅተናል። ዜጎች በነፃነት ሐሳባቸውን እንዲገልፁም ኢትዮጵያ ዛሬ የተመቻቸ ሁኔታ የምትፈጥር እንደሆነም ከወዲሁ መግለጽ እንወዳለን።

በይበልጥ ደግሞ ከኢትዮጵያ ውጭ ያለው ዳያስፖራ ስለአገሩ ሚዛናዊ መረጃ ያገኝ ዘንድ ከምናደርገው ለየት ያለ ጥረት ጎን ለጎን፣ ትውልደ ኢትዮጵያውያንን የሚመለከቱ አዳዲስ መረጃዎችን በትኩሱ እንዲያገኙ ኢትዮጵያ ዛሬ የበኩሏን ጥረት ታደርጋለች። ዲያስፖራውንና ትውልደ ኢትዮጵያንን የሚመለከት የተለየ መረጃ ለመሥጠት በዕቅዳችን ውስጥ ትኩረት ከሰጥንባቸው ነጥቦች አንዱ ነው። ዕቅዳችን የዛሬይቱን ኢትዮጵያ እያሳየን የነገዋን ኢትዮጵያ የምናመላክትበትን የተለያዩ መረጃዎችን የምናስተናግድበት እንዲሆን የእናተም አበርክቶ እንደሚጠበቅ ልናሳስብ እንወዳለን።

በአጠቃላይ ይህንን ውጥናችንን ለማሳካት ሥራችንን በአዲስ መልክ ለመጀመር የወደድነው የኢትዮጵያውያን 2012 ዓ.ም.ን አዲስ ዓመት መግቢያ ምክንያት በማድረግ ነው። ለዚህም “የኢትዮጵያ ከራሞት በ2011 ዓ.ም.” በሚል ርዕስ ባጠናከርነውና በ2011 ከተከናወኑ አገራዊ ጉዳዮች ጎልተው የታዩትን የተወሰኑትን የሚያስቃኝ መረጃ በመሥጠት ነው።

አዲሱ 2012 ዓ.ም. ኢትዮጵያችን ከምንግዜውም በበለጠ ኹኔታ የምትታደስበት፣ የምታብብበት፣ የሕዝቧን መተሳሰር የምታጠናክርበት፣ … ፤ ለሕዝቧ ደግሞ ክብርን፣ ሰላምን፣ ነፃነትን፣ ብልጽግናን፣ ልዕልናን፣ ዴሞክራሲን፣ ፍቅርን፣ … የምትሰጥበት ይኾን ዘንድ፤ የኢትዮጵያ ዛሬ ድረገጽ ዝግጅት ክፍል ይመኛል። ምኞታችን ምኞትዎ እንደኾነ የማንጠራጠር ሲኾን፤ አገራች ኢትዮጵያ የጋራ ምኞታችንን ትሰጠንና ወደተሻለ ደረጃ ታድግ ዘንድ ኹላችን የበኩላችንን አስተዋጽኦ ልናደርግ ይገባናልና። በመኾኑም፣ በግለሰብ ደረጃ ምሉዕ ሰው ኾነን በመገኘት የበኩላችንን አንዲት የአሸዋ ፍሬ ማዋጣት ግድ እንደሚለን ልናስታውስ እንወዳለን። የኢትዮጵያ ዛሬን አንዲት የአሸዋ ፍሬ እነኾ! (“የኢትዮጵያ ከራሞት በ2011 ዓ.ም.” የሚለውን ዘገባ ለማንበብ እዚህ ይጫኑ!)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!