ቸሩ ላቀው 
ሿሚ፣ ሻሪ፣ ሀገር መከፋፈልና መገነጣጠል የነርሱ ተግባር ሆኗል። መለስን ሾሙብን፣ ሀገርን ገንጥለው ኢሳያስ አፈወርቂን ኤርትራን ይዘህ ራስህን ቻል አሉት። ከመለስ ሹመት ጋር ኢትዮጵያን በጎሣ ከፋፍለው እያወደሟትና እያደቀቋት ነው።


በቅርቡ ደግሞ ትኩረት ተሰጥቶት በኢትዮጵያን ሪቪው ድረ ገጽ ላይ ምኒልክ ሳልሳዊ በተባለ ግለሰብ (http://www.ethiopianreview.com/forum/viewtopic.php?f=2&t=47866) እንደተጻፈው ከሆነ ኢትዮጵያን መበታተኑ አልበቃ ብሎአቸው ለወደፊቱም ከአፍሪካ ካርታ ላይ የቀድሞውን ስሟንና ቅርጿን ይዛ እንዳትታይ ተሰርዛ ለብዙ ሺህ ዓመታት የምናውቃት ኢትዮጵያ ሰሟ የማይታወቅ የጥንት ታሪክ መዛግብት ቤት ግብቶ ወያኔም እንደሚፎክርብን አዲስቱን ኢትዮጵያን ልናይ ነው። በሌላ በኩል ደግሞ የወያኔ የመገንጠልና የትግራይ ትግሪኝ መንግሥት መመስረት ሕልም ቅዠት ሆኖ ሊቀር ነው።

አዲስ አበባ ቀድሞ የጀርመን ትምህርት ቤት በአፀደ ሕፃናት ትምህርት ቤትነት ይጠቀምበት የነበረውና መንግሥት ከወረሰ በኋላ በትምህርት ሚኒስቴር ሥር የሚተዳደረው አምስት ኪሎ የሚገኘው አፀደ ሕፃናት ትምህርት ቤት ልጆቼን አስገብቼ ስለነበር ለመውሰድ ስሔድ የመውጫ ሰዓት እስኪደርስ ድረስ ኃላፊ ከነበረችው ኤርትራዊት ጋር እንጨዋወት ነበር። ከተጨዋወትናቸውም መካከል ሁለት ነገሮችን ይዤላታለሁ።

አንደኛው ሰዎች ይታሰራሉ፣ ይሰቃያሉ፣ ይገደላሉ፣ የት እንደደረሱም የማይታወቁ ሞልተዋል ብዬ ሳጫውታት ምንም ነገር ሰምታ እንደማታውቅ ስትመልስልኝ ጤነኛ ሰው ነች ወይ ብዬ ተገረምኩ። የሰው ልጆች ማኅበራዊ እንስሳት እስከሆኑ ድረስ ከሰዎች ጋር ይገናኛሉ፣ ሐሳብ ለሐሳብ ይለዋወጣሉ፣ የተለያዩ ዓይነት ያላቸውን ጭውውቶች ይጨዋወጣሉ። ጎረቤታሞች ብዙ ሐሳብ ይለዋወጣሉ። ከዚያም በተጨማሪ ሬድዮ በማዳመጥ፣ ቴሌቪዥን በማየትና በስልክም ከጓደኖች ጋር ሲነጋገሩ የተለያዩ ዜናዎችን ያገኛሉ። ይህች በመማር ማስተማሩ ሂደት ውስጥ ያለች የአፀደ ሕፃናት ትምህርት ቤት ኃላፊ ከዚህ ሁሉ ተለይታ ምንም አለመስማቷ ምን ብትሆን ነው ብዬ ምክንያቱን ጠየቅኋት። ሃይማኖቷ ስለማይፈቅድላት ምንም እንደማታዳምጥና እንደማትሰማ ነገረችኝ። በ21ኛው ክፍለ ዘመን ሰዎች የኋሊት ጉዞ ላይ መሆናቸው ገረመኝ፣ አሳዘነኝ። አታድርጉ የተባሉትን ካደረጉ "እንደሚቀሰፉ" ይፈራሉ። ራስን ማታለል ነው። ራስን አለማወቅ ነው። ይህች የ21ኛው ክፍለ ዘመን ዘመናዊ መሃይም አዲስ አበባ ከተማ ተቀምጣ እንኳን በከተማው ውስጥ ቀርቶ በመንደሯ የሚደረገውን እንቅስቃሴ የማታውቅ ከሆነች ብቻዋን ቤት ዘግታ የምትኖር ግዞተኛ ነች ማለት ይቻላል።

በጨዋታችን መካከል በሁለተኛነት የያዝኩላት ቁም ነገር በፀሎት ቤታቸው የተነገራትን የነገረችኝ ግን ወደ ዋናው ርዕሴ የሚወስድ ነው። ኢትዮጵያ የአፍሪካ መናኸሪያ ስለምትሆን አዲስ አበባ የአፍሪካ ዋና ከተማ ትሆናለች። የኢትዮጵያ ዋና ከተማ ደግሞ ባሕር ዳር ይሆናል ያለችው እነርሱ ካዘዙ ሊሆን ይችላል ብዬ ተቀብያታለሁ። የአፍሪካ ሀገሮች ከቅኝ አገዛዝ ነፃ ከወጡ በኋላ ለነፃነታቸው ታግለው የነበሩና ነፃነታቸውን እንዲጎናጸፉ አድርገው የነበሩ መሪዎች ሀገር ወዳዶች ስለነበሩና ለኃያላን መንግሥታት አንበረከክም ብለው ስለነበር በመፈንቅለ መንግሥት ተገድለዋል። አሁን ያሉት ግን በነርሱ የተሾሙና የተቀመጡ ግዑዛን ስለሆኑ ትዕዛዙ ሲሰጣቸው ከመፈጸም ወደኋላ ስለማይሉ ሴትዮዋ ያለችው ሊሆን ይችል ይሆናል። ይኸንኑ መረጃ ከነርሱ በነርሱ አማካይነት ያገኘች ስለሆነ ቀደም ተብሎ የተጠናና የታሰበበት መሆኑ ነው።

በቅርቡ ከላይ በተገለጸው ድረ ገጽ ላይ የተናፈሰው ዜና ከዚህ ጋር ቅርበት ያለው ቢሆንም የአፍሪካን ካርታ ቅርፅ የሚለውጥ ይሆናል። ምን ያህል ለውጥ እንደሚያመጣ ቀጥሎ በተመለከተው መሠረት ይገለጻል።

ሱዳን እጅ አልሰጥም ብላ ባቋሟ ስለፀናች ሀገሪቷን ለአራት ከፍለው ምዕራብ ሱዳን፣ ምሥራቅ ሱዳን፣ደቡብ ሱዳንና ሱዳን ብለው በመሰየም ሌላ ሀገር ፈጥረዋል። በዚህኛው ክፍፍል ደግሞ ከምዕራቡ በኩል ቆርሰው ዳርፉር ከቻድ ጋር ማዋኸድ ሲሆን ምሥራቁን ወስደው ከኢትዮጵያ ጋር ቀላቅለው ፖርት ሱዳንን በመንጠቅ ወደብ አልባ ትንሽ ሀገር እንድትሆንና እንድትሞት ተቀይሷል።

በአዲሱ የሰሜን ምሥራቅ አፍሪካ ወይም የአፍሪካ ቀንድ ሀገሮች ካርታ አሠራር ከሱዳን ቀጥሎ ግብፅን፣ ኢትዮጵያን፣ ጂቡቲንና ሶማሊያን የሚመለከት የሚከተለው የአከፋፈል ቅያስ ተዘጋጅቷል።

ግብፅን በተመለከተ ለጊዜው ዕቅዱ ያለቀለት ደቡባዊው የክርስቲያን ሃይማኖት ተከታዮቹ ተገንጠለው "ከአዲስቷ ኢትዮጵያ" ጋር ሊቀላቀሉ ሲችሉ የሲናይ ክልሉም እንደሚገነጠል ነው። ይኸ የሚያሳየው ግብፅ ለሦስት ቦታ መሰንጠቋን ነው።

ምሥራቅ ሱዳን ከኢትዮጵያ ጋር ትቀላቀላለች። ኤርትራና ጂቡቲ ከኢትዮጵያ ጋር ይቀላቀላሉ። ድሬ ዳዋ፣ ሰሜን፣ ደቡብና የኦጋዴን ሶማሌዎች ተቀላቅለው ታላቋን ሶማሊያን ይፈጥራሉ። ባሌ፣ ቦረና፣ ምሥራቅና ምዕራብ ሐረርጌ የኦሮሚያ ግዛት ይመሠርታሉ።

ከብዙ ዓመታት ጀምሮ የኢትዮጵያ ብሔራዊ ቋንቋ የሆነውን ዐማርኛን ለማጥፋትና የእንግሊዝኛን ቋንቋ የኢትዮጵያ ሀገር ቋንቋ ለማድረግ ሲዘመትበት እንደቆዩ ቀደምት አባቶቻችን ምን ያህል ሲታገሉ እንደነበሩ ይታወቃል። አሁን ግን ገና ዐዋጁ ሳይታወጅ በኢትዮጵያ በሁሉም ክፍለ ሀገራት ከትናንሽ መንደሮች እስከ ዋናዋ ከተማ አዲስ አበባ ድረስ በየጉራንጉሩ ነጋዴዎች የሱቆቻቸውን ስም አስጽፈው የሚለጥፉት በእንግሊዝኛ ነው። ፊደል ያልቆጠረው ሁሉ የሚያስጽፈው በባዕዱ ቋንቋ ነው። ባሁኑ አዲሱ ዕቅድም የሥራ ቋንቋ እንግሊኛ እንደሚሆን ተወስኗል።

በአዲሱ አከላለል ኢትዮጵያ ሰባት ክፍለ ሀገራት ወይም ክልሎች ወይም ምን እንደሚሉ አልተገለጸም ትከፋፈላለች።


አንደኛው ዐማራ ሲሆን፣ በዚህ ምድብ ሥር ከምሥራቅ ሱዳን እንዲቀላቀሉ የታዘዙት:-
1ኛ ከሰላ
2ኛ ገዳሪፍ
3ኛ ስናር
4ኛ ብሉ ናይል
5ኛ ሬድ ሲ ከፖርት ሱዳን ወደብ ጋርና
6ኛ ከግብፅ የክርስቲያን እምነት ተከታይ ክፍል።

ሁለተኛው፡ ትግራይ

ሦስተኛው አፋር:- ጂቡቲና ኤርትራን አጠቃሎ

አራተኛው፡ አዲስ አበባ። የሚያጠቃልላቸውም፡-
1ኛ ኢሉባቦር
2ኛ ምዕራብ ወለጋ
3ኛ ምሥራቅ ወለጋ
4ኛ ጂማ
5ኛ ሰሜን ሸዋ
6ኛ ምዕራብ ሸዋ
7ኛ ምሥራቅ ሸዋ
8ኛ አርሲ

አምስተኛው፡ ደቡብ ሕዝቦች። የሚያጠቃልላቸውም፡-
1ኛ ደቡብ ኦሞ
2ኛ ቤንች ማጂ
3ኛ ሸካ
4ኛ ከፋ
5ኛ ዳውሮ
6ኛ ባስኬቶ
7ኛ ጋሞ ጎፋ
8ኛ ደራሼ
9ኛ ኮንሶ
10ኛ ቡርጂ
11ኛ አማሮ
12ኛ ጌዴኦ
13ኛ ሲዳማ
14ኛ ወላይታ
15ኛ ሐዲያ
16ኛ አንጋጫ (አንጋቻ)
17ኛ አላባ
18ኛ ሲልጤ
19ኛ ጉራጌ
20ኛ የም።

ስድስተኛው፡ ጋምቤላ

ሰባተኛው፡ ቤኒሻንጉል-ጉሙዝ

የአፍሪካ ሀገሮች ለብዙ ዓመታት ታግለው ቅኝ ገዢዎቻቸውን አባረው ነፃነታቸውን ሲጎናጸፉ የነፃነት ጥም ተጠምተው የነበሩና ለሰው ልጅ ነፃነት ሲያስቡና ሲጨነቁ የነበሩ ሀገሮች ሕዝቦች ሁሉ ተደስተውና ፈንድቀው ነበር። በኃይል ተገፍተው ከያገሮቹ የተባረሩት ቅኝ ገዢ ሀገሮች ሲለቁ ግን ጊዜያቸውን እየጠበቁ የሚፈነዱ ፈንጂዎችን ቀብረው ነበር የሔዱት። በመሆኑም ከብዝበዛ፣ ከአስከፊ አድሎአዊ አስተዳደር፣ ከበታችነት ኑሮ፣ ከበይ ተመልካችነት ነፃ ወጣን ብለው ተደስተው የነበሩ ሀገሮች ለካ ነፃነታቸው የይስሙላ መሆኑን አላወቁም ነበር።

የተቀበሩት ፈንጂዎች ቀስ በቀስ መፈንዳት ጀመሩ። በሀገር ውስጥ አንዱ ጎሣ ከሌላው ጎሣ ጋር እንዲጣላ፣ አንዱ ሃይማኖት ከሌላው ሃይማኖት ጋር እንዲጣላ፣ ሀገሮች ከጎረቤት ሀገሮች ጋር በድንበር እንዲጋጩና እንዲጣሉ ተደርገው የነበሩ የተንኮል ዘዴዎች መከሰት ጀመሩ። በነዚህም የተንኮል ሴራዎች መገዳደልና በጦርነት መፈላለግ እስካሁንም አላባሩም። በአንድ በኩል እርቅ ወርደ ሲባል በሌላ በኩል ደግሞ የተዳፈነው እሳት መቀጣጠልና መንደድ ይጀምራል።

ኢትዮጵያ እንደ አጋጣሚም ከመሆኑም በተጨማሪ ሕዝቡም ለተገዢነት አመቺ ሆኖ ስለአልተገኘና ስለአልተመቻቸላቸው በቅኝ ግዛት ገዢነት ለመያዝ ሞክረው አልተሳካላቸውም ነበር። ኢጣሊያ ዓድዋ ላይ ተሸንፋና ተዋርዳ በመመለሷ ውርደቱ የኢጣሊያ ብቻ ሳይሆን የመላው አውሮፓ ሀገሮች ነው ብለው አፍረውበት ስለነበር በተለያዩ ዘዴዎች ለመግባትና ለማንበርከክ ሲያደቡና ሲጥሩ ቆይተው የሥልጣን ያለህ እያለ በመቅበዝበዝ ላይ የነበረውን የሀገርና የሕዝብ ስሜት የሌለውን ወያኔን ስለአገኙ በርሱ አማካይነት በጅ አዙር ቅኝ ገዢነት ኢትዮጵያን ለመያዝና ለመቆጣጠር በቅተዋል። ይኸም አልበቃ ብሏቸው የአፍሪካን ካርታ እነርሱ በሚፈልጉትና ለብዝበዛ በሚያመቻቸው መንገድ ለመቀየስ የተለያዩ ዘዴዎችን በመጠቀም ላይ ናቸው። ይህ ከላይ ያየናቸው የአፍሪካ ቀንድ ሀገሮችን መከፋፈልና አዲስ ካርታ መሥራት የዚሁ ዓላማቸው ዘዴና አካል ነው።

ከላይ እንደተገለጸው የአፍሪካ ሀገሮች ነፃነታቸውን ተጎናጽፈዋል ተባለ እንጂ እያደር ሲታይ ግን የይስሙላ ነፃነት ሆኖ ታይቷል። ሀገሮች ነፃ ናቸው ከተባለ በኢኮኖሚው፣ በማኅበራዊውና በፖለቲካው ነፃ ሆነው ራሳቸው በሚፈልጉት መንገድ መጓዝ ሲችሉ እንጂ በኋላቸው ሆነው ሌሎች የሚያዙዋቸው ከሆኑ ነፃነታቸው የስም ብቻ ይሆናል። አሁንም እኛ ራሳችን ለራሳችንና ለሕዝባችን የሚበጀውን ማድረግ ሲገባን በነርሱ ፍላጎት የምንቀሳቀስ ከሆነ ኢትዮጵያም የነበራትን ነፃነት የተገፈፈችና በነርሱ አንቀሳቃሽነት የምትታዘዝ መሆኗ የሚያሳዝንና የሚያስገርም ነው። በትግራይ ሕዝብ ነፃ አውጪ ግንባር የውርደት ካባ ተከናንበናል። ተዋርደናል። ነፃነታችንን ተነጥቀን ለእጅ አዙር ቅኝ አገዛዝ ተዳርገናል።

የኢትዮጵያ ሕዝብ ሙሉ ነፃነቱን ለመጎናጸፍ ለሚያደርገው ሁለገብ ትግል ሁሉም ኢትዮጵያዊ የበኩሉን ድርሻ ይወጣ። ዳር ቆሞ ተመልካችነት ይቁም። ለእውነተኛው ትግል ሁላችንም እንነሳ!
ቸሩ ነኝ በቸር እንገናኝ!


ቸሩ ላቀው
This email address is being protected from spambots. You need JavaScript enabled to view it. 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!