ዶ/ር ብርሃኑ ነጋ Dr. Berhanu Negaግርማ ካሳ

"የኢሕአዴግ መራሹ መንግሥት ለግንቦት ሰባት የእንደራደር ጥያቄ አቀረበ" ሲል ኢሳት ሰበር ዜና አሰማን። ዶ/ር ብርሃኑ ነጋንም በማቅረብ በጉዳዩ ላይ ሰፋ ያለ ማብራሪያ እንዲሰጡም አድርጓል። ምንም እንኳን የቀረበውን ዘገባ ከሌላ ምንጭ ማጣራት ባይቻልም፣ ዜናው እውነት ሊሆን የሚችልበት ሁኔታ እንዳለ ግን ይሰማኛል። አገዛዙ ከኦብነግ፣ ኦነግ ከመሳሰሉ ጋር ድርድር እየጀመረ፣ የማቋረጥ ልማድ እንዳለው ታሳቢ በማድረግ። የግንቦት ሰባት "እንደራደር" ጥያቄም ከዚያ የተለየ አይሆንም።

የድርድር ጥያቄውን ይዘው የመጡ መልዕክተኖች እነማን እንደሆኑ የተገለጸ ነገር የለም። ዶ/ር ብርሃኑም "ጥያቄው የመጣው ከብዙ አቅጣጫዎች ነው" ከማለት ውጭ ትንፍሽ ያሉት ነገር የለም። ከአንዳንድ የግንቦት ሰባት አመራር አባላት ጋር የቅርብ የሥራ ትውውቅ ባላቸውና፣ በቅርቡ ኢትዮጵያን በጎበኙት፣ በተከበሩ አና ጎምዜ ይሆን መልዕክቱ የመጣው? ወይንስ ብዙ ጊዜ በሽምግልና ተግባር በመሰማራት በሚታወቁት በተከበሩ ፕሮፌሠር ኤፍሬም ይስኃቅ? ወይስ በኃይማኖት አባቶች? ወደፊት የምናውቀው ይሆናል።

ድርድር መቼም ቢሆን የሚደገፍ እንጂ የሚጠላ አይደለም። እርቅና ሰላም እንዲሰፍን፣ ኢትዮጵያዊያን ልዩነቶቻችንን በውይይት እንድንፈታ የሚገልጹ በርካታ ጽሑፎችን አስነብቤአለሁ። ነገር ግን በኢትዮጵያ መልካም አስተዳደር ለማስፈንና የዲሞክራሲ ተቋማትን ለመገንባት ያስችል ዘንድ፣ ያለ አንዳች ቅደም ሁኔታ ለመነጋገር ፍቃደኛ ከሆኑ፣ ሀገር ውጥ ካሉ ሰላማዊ የፖለቲካ ፓርቲዎች ጋር፣ ኢሕአዴግ "በፍፁም አልደራደርም" እያለ፣ በሌላ በኩል "ጠብመንጃ አንስተን እንታገላለን" ለሚሉ የድርድር ጥያቄ ማቅረቡ ግን ምን ይባላል? በአንድ በኩል ብዕር አንስተው በመጻፋቸው፣ "ከግንቦት ሰባት ጋር ተነጋግራችኋል። ከሽብርተኞች ጋር አብራችኋል" እየተባሉ፣ በውሸት ክስ ዜጎች ለዕድሜ ልክ እስራት እየተዳረጉ፣ በሌላ በኩል ከ"ሽብርተኞቹ" ግንቦት ሰባቶች ጋር መነጋገር፣ ግብዝነትን አያሳይምን? አገዛዙ ሌላ ዓላማ ኖርት እንጂ በርግጥ ሰላም ፈልጎ ነው ማለት እንችላለን?

በነገራችን ላይ ኢሕአዴግ ድርድር የጠየቀው ግንቦት ሰባትን ፈርቶ እንዳልሆነ መታወቅ አለበት። በዚህ ላይ ብዙ አንሳሳት። ግንቦት ሰባትን ኢሕአዴግ አይፈራም። እስቲ ንገሩኝ ለምንድን ነው ኢሕአዴግ ግንቦት ሰባትን የሚፈራው? የድርድር ጥሪ መቅረቡ በምንም መስፈርትና መለኪያ የግንቦት ሰባት ጥንካሬንም አያሳይም። ጥንካሬ የሚለካው በፍሬና በውጤት ነው። ጥንካሬ የሚለካው በሜዳ ነው። ጥንካሬ ኢሕአዴግ በሚያወራው አይለካም። በመሆኑም ግንቦት ሰባቶች "ኢሕአዴግ ድርድር ከኛ ጋር የፈለገው ፈርቶ ነው፤ ስላሰጋ ነው፤ ጥንካሬያችንን አይቶ ነው፤ ወዘተረፈ" እያሉ ብዙ ዳንኪራ ባይመቱ ይሻላል። ሰው ይታዘባቸዋል። ይልቅስ እራሳቸውን ቢመረምሩ ውጤት በሚያመጡ እንቅስቃሴዎች ላይ ቢሰማሩ ይበጃል ባይ ነኝ። (በዚህ ርዕስ ላይ፣ ይረዳቸው ዘንድ፣ ለግንቦት ሰባቶች የተጻፈ ምክር አዘልና አቅጣጫ ጠቋሚ ግልጽ ደብዳቤ በቅርብ ጊዜ አቀርባለሁ።)

እንደሚመስለኝ ኢሕአዴጎች ለመደራደር ጥያቄ ያቀረቡት፣ የዓለም አቀፍ ማሕበረሰብን ግፊት ለመቀነስ ነው። አራት ነጥብ። ግንቦት ሰባት ከሻዕቢያ ፈቃድ ውጭ ሊደራደር እንደማይችል፣ ጥያቄያቸውን ውድቅ እንደሚያደርገው ከወዲሁ ያውቃሉ። ነገር ግን "ይኸው እናንተ ከተቃዋሚዎች ጋር ተደራደሩ ስትሉን፣ እሺ ብለን፣ በራሳችን አነሳሽነት፣ ለግንቦት ሰባት፣ ኦብነግ ጥያቄ አቀረብን። እነርሱ ግን ፍቃደኛ አልሆኑም። ከኦብነግ ጋር ተደራደርን፣ ግማሾቹ እሺ ብለው፤ የተወሰኑት ግን እምቢ አሉ። ታዲያ ምን አድርጉ ነው የምትሉን?" ለማለት ነው።

ሀገር ቤት ያሉ ፓርቲዎችን "እንደራደር" ቢሉ እሺ እንደሚሉ፤ በዚያም ድርድር የፖለቲካ ምህዳሩን በትንሹም ቢሆን መክፈት ኢሕአዴጎች እንደሚኖርባቸው፤ የፖለቲካ ምህዳሩን በትንሹ ከከፈቱና በአንጻራዊነት ዴሞክራሲያዊ ምርጫ ከተደረገ እንደሚሸነፉ ያውቃሉ። በመሆኑም ባለ አቅምና ጉልበት፣ ጠንካራ ፓርቲዎችን እያዳከሙ፣ ዋጋ ቢስና ምናምንቴ ዘጠና፣ መቶ የሚቆጠሩ ፓርቲዎችን አየለቃቀሙ፣ ዴሞክራሲ እንዳለ ለማስመሰል ይሞክራሉ። ሀገር ቤት ያሉት ጠንካራ መሪዎችን በአንድ በኩል እያሰሩ፣ እያዋከቡና እያወኩ፤ ውጭ ካሉ - ሊስማሙ ከማይችሉ ጋር እንደራደር በማለትም፣ የ"ሰላም አርበኞች" መስለው ለመታየት ይጥራሉ። አሳዛኝ!!!!!

ድርድርና ሰላም የሚጠላ የለም። ኢሕአዴግ በቅንነት ለእርቅ ተዘጋጅቶ፣ እራሱን አሻሽሎ፣ የሕዝብን ጥያቄ ሰምቶ፣ የዜጎችን መብትና ነፃነት አክብሮ፣ ለሀገራችን ልማትና ብልጽግና ከሁላችንም ጋር በጋራ ለመሥራት ቢዘጋጅ፣ ደስታዬ ገደብ አይኖረውም። ያም እንዲሆን የድርሻዬን ከመወጣት ወደ ኋላ አልልም። ፀሎቴም ነው።

ነገር ግን፣ ያ አልሆነም። ኢሕአዴግ ውስጥ ያሉ ጥሩ ሰዎች እየተዋጡ፣ ከመጋረጃ ጀርባ የተቀመጡ፣ ጥቂት ፈላጭ ቆራጭ የሆኑ፣ አክራሪዎች ድርጅቱን ወደ ገደል እየከተቱት ነው። ምንም እንኳን በአቶ ኃይለማርያም ደሳለኝ የሚመራ የመንግሥት መዋቅር ቢኖርም፣ አክራሪዎቹ የሚመሩት ሁለተኛና ምስጢራዊ የመንግሥት መዋቅር ያለ ይመስለኛል። በዚህ መዋቀር ያሉቱ የፈለጉትን ይገድላሉ። የፈለጉትን ለፍርድ ቤት ትዕዛዝ ሰጥተው ያሳስራሉ። የፈለጉትን መሬት ለውጭ ሀገር ዜጎች (ለእንደነ ሳዑዲዎች) በርካሽ ይሸጣሉ። የፈለጉትን ዕቃ ያለ ቀረጥ ያስገባሉ። የፈለጉትን ከሀገር ያስወጣሉ። ለዘመዶቻቸው ቢዝነስ ስለተፈለገ፣ ዜጎችን በግፍ አፈናቅለው፣ የዜጎችን ቤት አፍርሰው በቦታው የነርሱን ሕንጻ ያሠራሉ። የፈለገ ወንጀል ሲሠሩ አይጠየቁም። እነርሱ በዊስኪ እጃቸውን እየታጠቡ፣ ሌላው ወገናችን ግን ለስደት፣ ለጠኔ የተጋለጠ ሆኗል።

ምንም እንኳን ከኢሕአዴግ ዘንድ ሊታዩ የሚችሉ ጥቂት መልካም አዝማሚያዎች ላይ በር መዝጋት ባያስፈልግም፣ ምንም እንኳን ኢሕአዴግ ውስጥ ያሉ ጥሩ ኃይላትን ማበረታታቱ ጠቃሚ ቢሆንም፣ እንቁላሎቻችንን በኢሕአዴግ ቅርጫት ውስጥ ብቻ ማድረጉ ግን ጉዳት አለው። የአገዛዙንም ርካሽ ፕሮፖጋንዳም ሆነ የድርድር ወሬ ከቁም ነገር መውሰድ ያለብንም አይመስለኝም። ኢትዮጵያውያን አንድ ዜና በመጣ ቁጥር፣ ወደዚህና ወደዚያ እየነፈስን፣ ከዋናው ነገር ላይ ትኩረታችንን ማንሳት ማቆም ይኖርብናል። ውጤት ከማያመጣና በስሜት ላይ ብቻ ከተመረኮዘ እንቅስቃሴዎች አልፈን መሄድ ይጠበቅብናል። በተለይም ደግሞ፣ አጠንክሬ የማሰምረበት፣ ሻዕቢያ ወይንም ሻዕቢያ ጋር ያሉ ቡድኖች ነፃ እንዲያወጡን አንጠብቅ። አሜሪካና አውሮፓውያንም ጥቅማቸውን እንጂ ለኢትዮጵያና ለኢትዮጵያውያን አያስቡም። "እናንተ ለመብታችሁ ካልታገላችሁ እኛ ምን አገባን?!" ነው የሚሉት።

እግዚአብሔር በፀጋው የቸረንን፣ ጥቂቶች የሰረቁንን መብታችንን፣ ነፃነታችንን እና እኩልነታችንን የምናስጠብቀው እኛው እራሳችን ነን። በአስር ሚሊዮኖች እንቆጣራለን። እያንዳንዳች ከልባችን "በቃ!" ብንል፣ ለመብታችን ብንነሳ፣ ብንቆርጥ፣ ብንጨክን፣ የለበስነውን ፍርሃት አውልቀን ብንጥል፣ ለውጥ የማናመጣበት ምንም ምክንያት የለም። እኛን ማስፈራራትና መከፋፈል በመቻሉ እንጂ፣ ኢሕአዴግ እፍ ቢባል በቀላሉ የሚበን፣ የሞተና የበሰበስ ድርጅት ነው። እራሳችንን አሳንሰን አንመልከት። በዘር በኃይማኖት አንከፋፈል። ከአዲግራት፣ እስከ ሞያሌ፣ ከወልወል እስከ አሶሳ፣ በቆላውና በደጋው የሀገራችን መሬት የምንኖር፣ በስደት በዓለም ዙሪያ የተበተንን ኢትዮጵያዊያን ሁሉ እንነሳ። ሰላማዊ በሆነ መንገድ፣ ጥይት ሳይተኮስ፣ በሠለጠነ የፍቅር ፖለቲካ የኢትዮጵያን ትንሣኤ ማወጅ እንችላለን። ሰላማዊ በሆነ የእምቢተኝነት ዘመቻ የአገዛዙን ቀንበር መስበር እንችላለን። እየገደልን ሳይሆን እየሞትን አናሸንፋለን።

ግርማ ካሳ
This email address is being protected from spambots. You need JavaScript enabled to view it.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!