ግንቦት ሰባት Ginbot-7ግርማ ካሳ

በቅድሚያ ሰላምታዬ ይድረሳችሁ። ከአምስት ዓመታት በፊት ከአንዳንዶቻችሁ ጋር፣ በቅርበት፣ በቅንጅት ድጋፍ ማኅበራት ውስጥ አብረን ሰርተናል። አብረን ለሰላም ለዲሞክራሲ፣ ለሕግ የበላይነት መስፈን፣ ለዜጎች ሰብዓዊ መብት መከበር፣ ለሕሊና እስረኞች መፈታት ስንጮህ፣ ስንሰራ፣ ስንደክም፣ ስንመክር ነበር። መሃከል መንገድ ላይ የፖለቲካ ስትራቴጂ ልዩነቶች ተፈጠሩ።

"ሁለ-ገብ" የሚል የትግል ስልት መርጣችሁ የተለየ መስመር ያዛችሁ። እኛ ደግሞ በዚያ በሰላሙ መንገድ ቀጠልን። አንዳንዴ ልዩነቶቻችን ከረው በድረ ገጾች፣ ፓልቶክ ክፍሎች፣ ጋዜጦች፣ ሬዲዮኖች የተካሰስንበትም ጊዜ ጥቂት አይደለም።

ወቅቱ ትብብርን ይጠይቃል። በተቃዋሚው ጎራ ያለው ወገን ሁሉ በአንድነት ይሰባሰብ ዘንድ፣ እናንተም የተቃዋሚው አንዱ አካል እንደመሆናችሁ፤ እናንተ ዘንድ ያሉ መሰባሰብ እንዳይኖር እንቅፋት የሆኑ ጉዳዮችን፣ ትመረምሩና ታስተካክሉ ዘንድ ይሄን ጽፌያለሁ። ክስ ሳይሆን፣ መረጃ ላይ የተመረኮዘ ምክር አዘል አስተያየት በማቅረብ፣ ቻሌንጅ ላደርጋችሁ እሞክራለሁ።

ኤርትራና ኤርትራ የምትረዳቸው ድርጅቶች
ግንቦት ሰባት የተቋቋመው ሰኔ ወር 1999 ዓ.ም. ነው። ከስድስት ወራት በኋላ ስድስተኛ ዓመቱን ያከብራል። ድርጅታችሁ ምን ደረጃ ላይ እንዳለ ብዙ የምናውቀው ነገር የለም። ነገር ግን ከኢሳያስ አፈወርቂ ጋር የቅርብ ግንኙነት እንዳላችሁ ግን ግልጽ አድርጋችኋል። የኤርትራ መንግሥት እናንተ ወታደሮች ስለሌላችሁ፣ ከትግራይ ብሔራዊ ዴሞክራሲ ንቅናቄ (ትብዴን) ጋር አብራችሁ እንድትሰሩ እንደጠየቃችሁና እንደተስማማችሁ አንዳንድ መረጃዎች ይጠቁማሉ። እናንተ ፖለቲካውን ልትይዙ፣ እነርሱ ደግሞ ሚሊታሪውን። (ልክ ያኔ ህወሓት ሚሊተሪውን ይዞ፣ እነ ታምራት ላኔ ደግሞ ፖለቲካውን እንደያዙት)

በጎንደር፣ በወሎ፣ በሸዋ፣ ... ፊት ፊት እየቀደሙ፣ በፕሮፖጋንዳ ሕዝቡን እያሳምኑ፣ ትልቅና ወሳኝ የፖለቲካ ሥራ እየሰሩ፣ ህወሓትን አዲስ አበባ ያስገቡት እነ ታምራት ላይኔ ነበሩ። ታዲያ፣ ምናልባት የኤርትራ መንግሥት፣ ታሪክን ደግሞ፣ እናንተን ዳግማዊ ታምራት ላይኔዎች ሊያደርጋችሁ፣ የርሱን ፍላጎት ሊያስጠብቅ የፈጠራቸውን ሥልጣን ላይ ሊያስወጣ አስቦ እንደሆነ ገምታችሁ ታውቃላችሁ? እስቲ ጠይቁ፣ ኦነግ፣ የአርበኞች ግንባር የመሳሰሉ በርካታ ድርጅቶችን በልጦ፣ እንዴት ትብዴን በወታደራዊ አቅሙ ጠንካራ ሊሆን ቻለ? ምናልባትም የ"ትግራይ ሽምቅ ተዋጊዎች" የተባሉት በርግጥ የትግራይ ሰዎች መሆናቸውን የሚያሳይስ ምን ማረጋገጫ አለ? ከሰራኤ፣ ሐማሴን አኮሎ ጉዛይ የመጡ ኤርትራውያን ቢሆኑስ?

ከህወሓት በስተቀር የኤርትራ መንግሥት የረዳቸውና የደገፋቸው ድርጅቶች፣ አንዳቸውም ለቁም ነገር ሲደርሱ አላየንም። አልሻባብ እየተመታ ነው። በሶማሊያ በፑትላንድ፣ በሶማሊላንድ፣ በጁባላንድ እና ሞቃዲሾ አካባቢ ለዓመታት ታይቶ ያልታወቀ መረጋጋት እየታየ ነው። በመሆኑም ኦብነግ መሳሪያና ስንቅ የሚያሳልፍበት ቀዳዳዎች እየተዘጉበት ነው። ድርጅቱ እየተከፋፈለ፣ እየመነመነ፣ አብዛኞቹ አባላቱም ከህወሓት/ኢሕአዴግ ጋር በመነጋገር ላይ ናቸው።

ኦነግን ከተመለከትን ደግሞ፣ በአስገራሚ ሁኔታ ተፈረካክሷል። እንደ ከማል ገልቹ፣ ኃይሉ ጎንፋ የመሳሰሉ ተወዳጅና ኢትዮጵያን ወዳድ ጀነራሎች የቁም እስረኞች ሆነዋል። እንደ ዶ/ር ዲማ ነግዎ፣ ሌንጮ ለታ ያሉ አንጋፋ የቀድሞ አመራር አባልትና መስራቾችም፣ የኦሮሞዎች ጥያቄ በመገንጠል ሳይሆን በዲሞክራሲ ይፈታል ብለው፣ እራሳቸውን ከኤርትራ መንግሥት ለይተው፣ ሰላማዊ በሆነ መንገድ ለመታገል፣ የኦሮሞ ዴሞክራሲያዊ ግንባርን መስርተዋል። ብዙ አልተረጋገጠም እንጂ፣ ወደ ሀገር ቤት ገብተው ለመታገል ሃሳብ እንዳላቸውም የሚገልጹ ዜናዎች የተናፈሱበት ሁኔታም አለ።

ሌላው በኤርትራ በኩል ይንቀሳቀሳል የሚባለው የኢትዮጵያ ሕዝብ አርበኞች ግንባር ነው። ይህ ግንባር በተለያዩ ጊዜያት የተለያዩ የአመራር አባላት ነበሩት። ነገር ግን ድርጅቱ ጠንከር በሚልበት ጊዜ አመራር አባላቱ እየታሰሩ፣ ይሰወራሉ። ሻዕቢያ ጠንካራ የኢትዮጵያዊነት ስሜት ያለው ድርጅት እንዲወጣ በፍፁም ፍላጎት ስለሌለው፣ የአርበኞች ግንባርም አደግ ሲል እየተኮረኮመ፣ ይኸው ከዓመታት በፊት የነበረበት ደረጃ ነው ያለው። (እንደውም ባይብስ)

እንግዲህ ይሄን ሁሉ የምተነትነው፣ ከኤርትራ መንግሥት ጋር መስራት ታክቲክሊና ሚሊታሪሊ እንደማያዋጣ ለማሳየት ነው። በኤርትራ በኩል እንታገላለን የሚሉ አንዳቸውም፣ ይኸው ህወሓት/ኢሕአዴግ ሥልጣን ከያዘ 21 ዓመታት አለፉ፣ አንድ ቀበሌ ነፃ አላወጡም። ወኔውና ጀግንነቱ ሳይኖራቸው ቀርቶ አይደለም። ነገር ግን የኤርትራ መንግሥት መዳፍ ውስጥ ስላሉ እንጂ። እናንተንም ለጊዜው መጠቀሚያ ያደርጓችኋል። ትንሽ አደግ ስትሉ ግን መመታታችሁ አይቀርም። ከኦነግ፣ ከአርበኞች ግንባር ከመሳሰሉት መማር አለባችሁ። ግድ የለም ከሻዕቢያ ጥገኝነት ውጡ።

ኢሳያስና የኤርትራ ሕዝብ
ምን ያህል የኤርትራን ፖለቲካ እንደምትከታተሉ አላውቅም። የኤርትራን ሕዝብ ከተቀረው የኢትዮጵያ ሕዝብ ለይቼ ስለማላየው የኢትዮጵያ ድረ ገጾችን እንደማነበው፣ የኤርትራን ድረ ገጾች እከታተላሁ። እናንተም እስቲ ጊዜ ወስዳችሁ ተከታተሉ። እስቲ ኤርትራውያንን ቀረብ ብላችሁ አነጋግሩ። የሚያሳዝን፣ የሚያስለቅስ ታሪኮችን ነው የምትሰሙት። በብዙ ሺህ የሚቆጠሩ በሱዳን በኩል አድርገው፣ ኢትዮጵያ ለመግባት ሲሰደዱ፣ እባብ እየነደፋቸው፣ ተይዘው እየተገደሉ ሞተዋል። በሣዋና በተለያዩ ቦታዎች የኤርትራ ወጣቶች እየተቃጠሉ ነው። ኢሳያስ የኤርትራን ሕዝብ እያረደ ያለ እብድ ነው።

እናንተ፣ ቢያንስ ቢያስንስ "ለሰብዓዊነት፣ ለፍትህ፣ ለሰላም፣ ለዲሞክራሲ የቆምን ነን" ትላላችሁ። ለዚያም ስትሉ አንዳንዶቻችሁም በቃሊቲ ትልቅ ዋጋ ከፍላችኋል። ነገር ግን ከዚህ እብድ ጋር መስራታችሁ ምን ይባላል? ይሄስ አያሳንሳችሁምን? በጣም ያሳንሳችኋል። ከዚህ እብድ ጋር ባበራችሁ ቁጥር፣ ከኤርትራ ሕዝብ ጋር እየተጠላችሁ ነው። ኢሳያስ የጉበት በሽተኛ ነው ይባላል። እንቁላላችሁን ሁሉ እርሱ ቅርጫት ውስጥ ከከተታችሁ፣ ነገ ሰውዬው የሞተ ዕለት፣ ምን ልትሆኑ ነው?

እርግጥ ነው ኢሳያስ ጥቂት አየር መቃወሚያዎችን፣ ጥቂት ሺህ ዶላሮችን፣ የወታደር ጫማዎችን ሊወረወርላችሁ ይችላል። ኮምፖሽታቶ ዳር፣ ከፈራረሱ ፎቆች አንዱ ውስጥ ጽ/ቤት ሊሰጣችሁ ይችላል። ነገር ግን ሕሊናችሁን ከመሸጥ፣ በአፍሪካ ከነኢዲአሚን ጎን በሚሰለፍ ቡድን፣ ሰይጣናዊ የሰብዓዊ መብት ረገጣ ሲፈጸም እያያችሁ፣ እንዳላየ ሆናችሁ ዝም ከማለት፣ ከሕዝቡ ጋር በመጣላትና ታሪካዊ ጠባሳ ከመፍጠር፣ ከወዲሁ ከዚህ ያበደ አገዛዝ እንድትለዩ እማጸናቸችኋለሁ። ግድ የለም ከሻዕቢያ ጥገኝነት ውጡ።

ኤርትራና የዓለም አቀፍ ማሕበረሰብ
እንደምታውቁት ኢሳያስ በዓለም አቀፍ ማሕበረሰብ የተገለለ ነው። ከቀይ ባህር አሳዎች በስተቀር፣ ከኤርትራ አጎራባቾች ሁሉ ጋር ጦርነት ገጥሟል። የኤርትራውያን ደም ቢፈስ ምንም የማይመስለው፣ የሕዝቡን ደም በመጠጣት የሚረካ የተረገመ ሰው ነው።

በዚህም ምክንያት የተባበሩት መንግሥታት የፀጥታው ምክር ቤት፣ በኤርትራ ላይ በርካታ ውሳኔዎችን አላስልፏል። ከውሳኔዎቹ መካከል፣ ምንም አይነት የጦር መሳሪያ ወደ ኤርትራ እንዳይገባ፣ ኤርትራ የጎሮቤት ሀገሮች ላይ የምታደርሰውን "ሽብር" እንድታቆም፣ ከጎረቤት ሀገሮች ጋር ያላትን ችግር በሰላም እንድትፈታ፣ በግዛቷ ያሉ ሽምቅ ተዋጊዎችን መደገፍ እንድታቆም የሚጠይቁ ውሳኔዎች ይገኙበታል።

እንግዲህ ይሄ የሚያሳየው ከሻዕቢያ ተወዳጅቶ የሚደረግ እንቅስቃሴ ከዓለም አቀፍ ማሕበረሰብ ጋር የሚያጋጭ መሆኑን ነው። በተዘዋዋሪ መንገድ የፀጥታው ምክር ቤት ውሳኔን እየጣሳችሁ ነው። የዓለም አቀፍ ማሕብረሰብን ከበሬታ እያጣችሁ ነው። አንድ ምሳሌ ልጥቀስ። በቅርቡ ከግንቦት ሰባት አመራር አባላት ጋር የቅርብ ግንኙነት የነበራቸው የተከበሩ አና ጎሜዝ አዲስ አበባ መሄዳቸውን እና በዚያም ከነአባ ዱላ ጋር መነጋገራቸው በሰፊው ተዘግቧል። የአና ጎሜዝ ወደ አዲስ አበባ መሄድ፣ የተለያዩ ትርጓሜ ሊሰጠው ይችላል። ነገር ግን፣ ቢያንስ ቢያንስ የግንቦት ሰባት ድርጅታችሁን የዲፕሎማሲ ሽንፈትና ኪሳራ በግልጽ ያሳየ ነው። ግድ የለም ከሻዕቢያ ጥገኝነት ውጡ።

ማጠቃለያ
እንግዲህ የመከራከሪያ ነጥቦቼን በግልጽ አስቀምጫለሁ። እውነት ለመስማት ካለመፈለግ የተነሳ የቀረቡ ሃሳቦች ላይ ሳይሆን፣ ሃሳብ አቅራቢዎች ላይ ማነጠጠሩን ልትመርጡ ትችላላችሁ። እንግዲህ የእናንተው ምርጫ ነው። ነገር ግን ተስፋ አደርጋለሁ፣ ቆም ብላችሁ እንደምታስቡ።

ይሄን መረዳት አለባችሁ፣ ነፃነታችንን ኢሳያስ አፈወርቂ አይሰጠንም። ጠዋትና ማታ አገዛዙን ስለረገምን ለውጥ አናመጣም። በአሁኑ ወቅት ብቸኛው አማራጭ እኛው እራሳችን የምናደርገው የተባበረ ሰላማዊ ትግል ነው። ኢትዮጵያውያን በአንድ ላይ ተባብረን፣ ሰላማዊ በሆነ መንገድ፣ ጥቂቶች የዘረጉትን ቀንበር መስበር እንችላለን። እባካችሁ የኢትዮጵያን ሕዝብ ኃይል አሳንሳችሁ አትመልከቱ። ከሻዕቢያ ጥገኝነት ውጡ። ወደ ቀደሞው ወደ "ቅንጅት" መንፈስ ተመለሱ። ያኔ በዘጠና ሰባት የጠበቅነውን ያላገኘነው፣ በቂ ድርጅታዊ ሥራ ስላተሰራና በአመራር አባላት መካከል መከፋፈል ስለተፈጠረ፣ ሕዝቡ በአንድ ላይ በተደራጀት መልኩ፣ በሁሉም ክልሎች ማንቀሳስቀስ ስላልተቻለ እንጂ፣ የሰላማዊ ትግል ስላልሰራ ወይንም የኢትዮጵያ ሕዝብ አቅም ስለደከመ አልነበረም። ካለፈው ትምህርት በመውሰድ፣ ጥንቃቄ በተሞላበት፣ በክልሎች ሁሉ መረብን በመዘርጋት፣ አቅማችንን፣ ገንዘባችንን በሙሉ አንድ ላይ በማሰባሰብ፣ የሚደረግ ሕዝባዊ፣ ሰላማዊ የእምቢተኝነት ዘመቻ በርግጥ ውጤት ያመጣል።

ሸንጎ፣ የብሄራዊ ሽግግር ምክር ቤት፣ የኦሮሞ ዴሞክራሲያዊ ግንባር፣ የአዲሲቷ ኢትዮጵያ ሶሊዳሪቲ የመሳሰሉ በርካታ ደርጅቶች፣ በኢትዮጵያ ሕዝብ ተማምነው፣ ሀገር ቤት ለሚደረገው ሰላማዊ ትግል አጋርነታቸውን እየገለጹ ነው። የእናንተ ድርጅት፣ ግንቦት ሰባት፣ ከሻዕቢያ ጋር ያለውን ግንኙነት በአስቸኳይ በጥሶ፣ ከነዚህ ድርጅትች ጋር አብሮ ለመስራት ይሞክር። እዚህ ላይ አበቃለሁ። የሚሰማ ጆሮ ካለ እንግዲህ ይሰማል።

ግርማ ካሳ
This email address is being protected from spambots. You need JavaScript enabled to view it.
ዲሴምበር 9 ቀን 2013 እ.ኤ.አ.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!