Ethiopian Sudan border protestበደምና በአጥንት መስዋዕትነት ተከብሮ የቆየ የሀገራችንን ዳር ድንበር ለባዕድ አሳልፈን አንሰጥም!
ብርሃኔ አሰበ አለሁድረስ
ሀገራችን ኢትዮጵያ በተፈጥሮ ሀብቷ የታደለች፣ መልካም የአየር ፀባይ ያላት፣ ህዝቦቿ የራሳችን አኩሪ ባህልና ወግ ያለን፤ የራሳችን መልካም መልክዓ ምድራዊና አሰፋፈር ያለን፤ በጋራ ተሳስረን አብረን የኖርንባትና የምንኖርባት በየትኛውም ዘመን ሉዓላዊነቷ ያልተደፈረ ለአፍሪካ ተምሳሌት የሆነች ሀገር ናት።

 

በተለያየ ወቅት የተፈጥሮ ሀብቷን ለመቀራመትና ሉዓላዊነቷን ለመዳፈር የሞከሩ ሀገራት ሁሉ፣ በውድ ልጆቿ የተባበረ ክንድ አይቀጡ ቅጣት ተቀጥተው ኢትዮጵያን ዳግም እንዳይመኟት የተባረሩበትና የኢትዮጵያን አይበገሬነት በአፍሪካም ሆነ በዓለም መድረክ ያስመሰከረች ሀገር ናት። አንድነቷንና ሉዓላዊነቷን ጠብቃ በማቆየት በዓለም ታሪካዊ ስፍራ ያላት፤ በቀደምት ውድ ልጆቿ የደም መስዋዕትነት ሀገራችን ሉዓላዊነቷ ሳይደፈር ለብዙ ሺ ዓመታት ቆይታለች።

በአሁኑ ሰዓት ኢህአዴግ/ህወሓት ለግልና ለግዜያዊ የፖለቲካ ጥቅም ሲል የኢትዮጵያን አንድነት በማደብዘዝ እነሆ በእኛ ዘመን ለዘመናት ተደፍሮ የማያውቀውን የኢትዮጵያን ሉዓላዊነት በመጋፋት፤ የኢትዮጵያ የሉዓላዊነት ባለቤት የሆኑት ብሔር ብሔረሰቦችና ህዝቦች ሳይወያዩበትና ሳያፀድቁት በጓሮ በር የኢትዮጵያን መሬት ለባዕድ ሀገር/ሱዳን ቆርሶ ለመስጠት ሽርጉዱን ተያይዞታል። ከዓመታት በፊት በምዕራቡ የሀገራችን ክፍል /ድንበር በኩል/ በመሸራረፍ ለም የሰሊጥ ምርት የሚሰጥ መሬት ለሱዳን ሲሰጥ ዝም በማለታችን፤ እነሆ ዛሬ የኢትዮጵያን ሉዓላዊነት የሚጋፋ፤ የኢትዮጵያን ቅርጽ የሚያጠፋ ረጅም ርዝመት ያለው ለም መሬት ለሱዳን ለመስጠት ዝግጅቱ መጠናቀቁን ሰማን።

ዛሬ ላይ ሆነን ይህንን መሰሪ ተግባር አንድነታችንን አጠናክረን መግታት ካልቻልን ነገ ደግሞ በሌላኛው የኢትዮጵያ ጫፍ በኩል የኢትዮጵያ መሬት ተቆርሶ ለሌሎች አጎራባች ሀገራት ላይሰጥ ምን ዋስትና አለን?

አያቶቻችንና አባቶቻችን ደማቸውን ገብረው፣ አጥንታቸውን ከስክሰው ያስረከቡንን የሀገር ሉዓላዊነት ሳይሸራረፍ ለመጭው ትውልድ ማስተላለፍ የእኛ የአሁኑ ትውልድ የታሪክ ግዴታ ነው። ይህን የታሪክ ግዴታችንን ሳንወጣ፤ ችላ በማለት በመሰሪው የህወሓት/ኢህአዴግ አመራር የሀገራችን ሉዓላዊነት እየተሸራረፈ ለባዕድ ሀገራት ሲሰጥ በምን አገባኝ ስሜት ዝም ብለን ብንመለከት በዚያ ዘመን ዘመናዊ መሣሪያ ከታጠቀ የውጭ ጠላት ጋር የሀገሬን ሉዓላዊነት አላስደፍርም በማለት በዱላ፣ በጦርና ጋሻ፣ ዘመናዊ ባልሆነ የጦር መሣሪያ፣ በባዶ እግራቸው በመዝመት ደማቸውን አፍስሰው፣ አጥንታቸውን ከስክሰው የኢትዮጵያን ሉዓላዊነት ሳያስደፍሩ ያስረከቡን የአባቶቻችን አጥንት እሾህ ሆኖ ይወጋናል።

"የኢትዮጵያ ድንበሮች በኢትዮጵያውያን ደም የራሱ፣ በኢትዮጵያውያን አጥንት የተገነቡ ሲሆኑ፤ ድንበሮቻችንን ለማስከበር ከሁልቆ መሣፍርት፣ ተራ ዜጐች አንስቶ እስከ አንድ ታላቅ ንጉሠ ነገሥት አጼ ዮሐንስ አንገታቸው ሰጥተዋል። በዶጋሊ፣ በጉራዓ፣ በጉንዲት፣ በመተማ፣ በአድዋ፣ በወልወል በቅርብ ጊዜያት ደግሞ በሶማሊያና በኤርትራ የፈሰሰው የኢትዮጵያውያን ደም የሌላውን ግዛት በመቋመጥ ሳይሆን ድንበሬን አላስነካም በሚል ነበር። እንደዛሬው መኪና ወይንም ባቡር ባልኖረበት የቀደምት ኢትዮጵያውያን ከመሃል ሀገር ተነስተው በእግር ለወራት በረሃውን አቋርጠው፣ ተራራውን ወጥተው፣ ንዳዱን ተቋቁመው፣ ወባውን ደፍረው ከሙስታሂል እስከ ጋምቤላ፣ ከራስ ካሣር እስከ ሞያሌ ዘልቀው ድንበሩን ሰፍረው ኢትዮጵያን ለዚህ ትውልድ አስረክበው ሄዱ። ይህ ተረካቢ ትውልድ የተረከበውን መሬት ሳይቀነስ ለቀጣዩ ትውልድ ያስተላልፋል ይሆን ..." ዶ/ር ያዕቆብ ኃይለማሪያም /20 July 2008/።

ይህ ትውልድ ከአባቶቹ የወረሰውን አደራ ጠብቆ የሀገሩን ሉዓላዊነት ሳይሸራረፍ በማስከበር ለመጭው ትውልድ የማስተላለፍ ግዴታ ያለበት መሆኑን ለአፍታ መዘንጋት የለበትም። ህወሓት/ኢህአዴግ ከኢትዮጵያ ህዝብ እውቅና ውጭ በሚስጥር የኢትዮጵያን ሉዓላዊነት በመጋፋት ዳር ድንበራችንን ለሱዳን አሳልፎ ለመስጠት የተደረገውን የውል ስምምነት የፖለቲካ ልዩነት፣ ብሔር፣ ኃይማኖት፣ አመለካከት ሳይለያየን የፖለቲካ ፓርቲዎች፣ ድርጅቶች፣ ሲቪክ ማኅበራትና ሁሉም የማሕበረሰብ ክፍል በጋራ ተንቀሳቅሰን አሁኑኑ ማስቆም ካልቻልን፤ የኢትዮጵያን ሉዓላዊነት ከማስደፈርም አልፎ እስከ ወዲያኛው ትውልድ ድረስ ብጥብጥና ትርምስን የሚያወርስ ስውር ደባ ነው።

በመሆኑም የኢትዮጵያን የግዛት አንድነትና ሉዓላዊነት በመጋፋት ለም መሬታችንን ለሱዳን አሳልፎ የሚሰጠውን ስምምነት ሀገር ወዳድ የሆንን ኢትዮጵያዊያን ሁሉ በጋራ በመንቀሳቀስ በደምና በአጥንት መስዋዕትነት ተከብሮ የቆየ የሀገራችንን ዳር ድንበር ለባዕድ አሳልፈን አንሰጥም! በሚል መርኅ ተግባብተን ይህንን እኩይ ተግባር ለማስቆም ግዜ ሳንወስድ በያለንበት ፈጥነን መንቀሳቀስ ይጠበቅብናል።

የሀገራችንን ዳር ድንበር ለባዕድ ሀገር አሳልፎ የመስጠት ታሪክ አልወረስንም!

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!