ኤፍሬም ማዴቦ

ባለፈው ሰሞን ቻይና አፍሪካ ውስጥ ሰላሳ አመት በማይሞላ ግዜ ውስጥ ያደረገችው የኤኮኖሚና የፖለቲካ መስፋፋት ያሳሰባቸው የአሜሪካው ፕሬዚዳንት ባራክ ኦባማ ምነው ምን አድረግናችሁና ነው ፊታችሁን ያዞራችሁብን ብለው ለመጠየቅ በርከት ያሉ የአፍሪካ መሪዎችን ቤተ መንግስታቸው ድረስ ጋብዘዋቸው ነበር።

በዚህ የሃሳብ ልውውጥ፤ ምክር፤ የእራት ግብዣና የዋሺንግተን ዲሲን ጉብኝት ባጠቃለለው የፕሬዚዳንት ኦባማ ድግስ ላይ በመልካም የዲሞክራሲ ጅምራቸው የሚወደሱት የጋናና የደቡብ አፍሪካን መሪዎች ጨምሮ እንመራሀለን የሚሉትን ህዝብ በየቀኑ የሚያስሩት፤ የሚደበድቡትና የሚገድሉት የወያኔ መሪዎችም ተገኝተዋል። በዚህ የመሪዎች ስብሰባ ላይ ጠ/ሚ ደሳለኝ ኃ/ማሪያምን አጅበው ከመጡት የወያኔ ሹማምንት አንዱ የውጭ ጉዳይ ሚኒስትሩ ዶ/ር ቴድሮስ አድሃኖም ነበሩ። ዶ/ር ቴድሮስ በዋሽንግተን ዲሲ ቆይታቸው ብዙዎቻችንን እየዋለ ሲያድር ደግሞ እራሳቸውንም ግራ ያጋባ የሬድዮ ቃለ መጠይቅ ሰጥተው ነበር። 

“በአፍ ይጠፉ በለፈለፉ” የአገራችን ባለቅኔዎች አፉ እንዳመጣለትና እንዳሻው የሚናገርን ሰው ...  ዋ ተጠንቀቅ በአፍ የሚነገር ነገር ዋጋ ያስከፍላል ለማለት የተረቱት ተረት ነው።  አዎ! ባለቅኔዎቹ እውነታቸውን ነው።  የሚያዳምጡንን ሰዎች ለማስደሰት ስንል ብቻ አፋችን እንዳመጣ የባጥ የቆጡን የምንዘባርቅ ሰዎች የምንላቸው ነገሮች እኛው ዘንድ ዞረው መጥተው መጥፊያችን ሊሆኑ ይችላሉ። በቅርቡ ዋሺንግተን ዲሲ ብቅ ብለው የነበሩትን የኢትዮጵያ የውጭ ጉዳይ ሚኒስቴር ዶ/ር ቴድሮስ አድሃኖምን ያጋጠማቸው ይሄው በጋዛ አፍ ተናግሮ የመጥፋት ቅሌት ነበር። ዶ/ር ቴድሮስ እዚህ ዋሽንግተን ዲሲ ውስጥ መንግስታቸው የሰራተኛ ደሞዝና የአየር ላይ ወጪ እየከፈለ በሚያስተዳድረው ሬድዮ አፋቸውን ሞልተው የተናገሩትን ነገር አዲስ አበባ ተመልሰው በፌስ ቡካቸው በለቀቁት መልዕክት ለማስተባበል ቢሞክሩም ነገሩ “ከአፍ ከወጣ አፋፍ” ሆኖባቸው በስህተት ላይ ስህተት እየፈጸሙ ይገኛሉ።

ሬድዮ አገር ፍቅር በመባል ከሚታወቀው ሳምንታዊ ሬድዮ ጣቢያ ጋር ባደረጉት ቃለ ምልልስ ዶ/ር ቴድሮስ አድሃኖም በእስር ላይ የሚገኙት የድምጻችን ይሰማ መሪዎች የአሜሪካ መንግስት ጓንታናሞ ውስጥ ካሰራቸው የአልቃይዳ አባላት ጋር ግንኙነት እንዳላቸው ማረጋገጫ አግኝተናል ካሉ በኋላ የአሜሪካ መንግስት ይህንን ግኑኝነት አስመልክቶ የድምጻችን ይሰማ መሪዎችን ኢትዮጵያ ድረስ ሄዶ ለማነጋገር ለመንግስታቸው ጥያቄ እንዳቀረበ ተናግረዋል። ያልነገሩን ነገር ቢኖር የአሜሪካ መንግስት ባቀረበው ጥያቄ መሰረት ቃሊቲ ድረስ ሄዶ የድምጻችን ይሰማ መሪዎችን ማነጋገሩንና አለማነጋገሩን ብቻ ነው።

ዶ/ር ቴዎድሮስ ብቻ ሳይሆኑ እሳቸው በአባልነት የሚገኙበት ህወሃት የሚባው ድርጅት ሃያ ሦስት አመት ሙሉ እየዋሸ የዘለቀ ድርጅት ነውና የዶ/ር ቴድሮስ ውሸት ብዙም ላይገርመን ይችላል። ሆኖም ግን ዶ/ር ቴድሮስ ግማሽ ደቂቃ በማይሞላ ግዜ ውስጥ ሁለት ቱባ ቱባ ውሸቶችን ሲዋሹ “ከማንም ጋር አንወግንም፤ የቆምነው ለእውነት ብቻ ነው” የሚለው የአገር ፍቅር ሬድዮ ጣቢያ አዘጋጅ ካለምንም ተከታይ የማብራሪያ ጥያቄ የዶ/ር ቴድሮስን ቆሞ የሚሄድ ውሸት እንዳለ ተቀብሎ ጭራሽ ዶ/ር ቴድሮስን ማመስገኑ የወያኔ ስርዐት ውሸትና ቅጥፈትአገር ውስጥ ብቻ ሳይሆን በውጭ አገሮችም ምን ያክል ህብረተሰባችንን አንደበከለ ያሳያል።

የኢትዮጵያን የእስልምና እምነት ተከታዮች ከአልቃይዳ ጋር ማገናኘት እነዚህ ወንድሞቻችንና እህቶቻችን ያነሱትን ህጋዊ የመብትና የነጻነት ጥያቄ ላለመመለስ የሚደረግ አጉል ውጣ ውረድ ከመሆኑ አልፎ ማንም ማየትና ማሰብ የሚችል ሰው የማይቀበለው ከንቱ ቅጥፈት ነው። ደግሞም ይብላኝ ለዶ/ር ቴድሮስ አፋቸውን ላዳለጣቸው እንጂ ወጣቶቹ የድምጻችን ይሰማ መሪዎችኮ የጓንታናሞ አስር ቤት ሲከፈት ከአልቃይዳ ጋር ግንኙነት መፍጠር ቀርቶ አልቃይዳ የሚባል ነገር መኖሩን እንኳን ሰምተው የማያውቁ አንድ ፍሬ ልጆች ነበሩ።

ሌላው የዶ/ር ቴድሮስ ትልቁ ውሸት የአሜሪካ መንግስት ከአልቃይዳ ጋር  የነበራቸውን ግንኙነት አስመልክቶ የድምጻችን ይሰማ መሪዎችን የታሰሩበት ቦታ ድረስ ሄዶ ላናግራቸው ብሎ ጠየቀን ማለታቸው ነው። እኔ እንደሚመስለኝ ዶ/ር ቴድሮስ አደስ አበባ ከገቡ በኋላ “ምን ነካኝ” ብለው ውሸታቸውን በፌስ ቡክ ገጻቸው ለማስተባበል የቸኮሉት ደጋግመው ወዳጃችን ነው ብለው በተናገሩት በአሜሪካ መንግስት ስም የዋሹት ውሸት ከንክኗቸው ይመስለኛል፤ አለዚያማ ወያኔም ሆነ የውጭ ጉዳይ ሚኒስቴሩ ዶ/ር ቴድሮስ በዋሹ ቁጥር ውሸታቸውን የሚያስተባብሉ ቢሆን ኖሮ የወያኔ አገዛዝ መሪዎች ስራቸው እየዋሹ ማስተባበል ብቻ ይሆን ነበር።

የሚገርመው ዶ/ር ቴድሮስ ከአሜሪካ ተመልሰው አዲስ አበባ ከገቡ በኋላ የመጀመሪያውን አንድ ሳምንት ያሳለፉት አንድም አሜሪካ ውስጥ የዋሹትን ውሸት በማስተባበል ሌላ ግዜ ደግሞ ሌሎች አዳዲስ ውሸቶችን በመዋሸት ነበር። በእርግጥም ዶ/ር ቴድሮስ አድሃኖም በየአገሩ የሚገኙትን አምባሳደሮቻቸውን ሰብስበው የኢትዮጵያን ህዝብ ከት አድርጎ ያሳቀ ነጭ ውሸት ዋሽተዋል። ለምሳሌ አሜሪካ ውስጥ የህዳሴው ግድብ ቦንድ ሽያጭ እጅግ በጣም ዝቅተኛ መሆኑን ከተናገሩ በኋላ ምክንያቱን ሲገልጹ የአሜሪካ ህግ ለቦንድ ሽያጩ አመቺ አለመሆኑን ገልጸው ይህንን ለማሻሻል መንግስታቸው ከአሜሪካ መንግስት ጋር አብሮ እየሰራ መሆኑን ተናግረዋል። መቼም ለራሱ አገር ይህ ነው ተብሎ ሊጠቀስ የሚችል ህግ አውጥቶ የማያወቀው እንቅልፋሙ የኢትዮጵያ ፓርላማ የአሜሪካንን መንግስት የሚገዛ ህግ ካላወጣ በቀር ዶ/ር ቴድሮስ አደራ የተጣለባቸውን የቦንድ ሽያጭ እንዴት አሜሪካ ውስጥ እንደሚወጡት ባላውቅም መንግስታቸው የኢትዮጵያ ዳያስፖራ ባለበት ቦታ ሁሉ ሁሉ ቦንድ መሸጥ ያልቸለው የየአገሮቹ ህግ ችግር ፈጥሮበት ሳይሆን ለወገኖቹ መብትና ነጻነት የሚታገለው ኢትዮጵያዊ ወንድሞቼንና እህቶቼን እየገደላችሁ የምትሸጡልኝ ቦንድ ባፍንጫዬ ይውጣ ብሎ እምቢ ስላላቸው ነው። ይህንን ደግሞ መዋሸት እንጂ እውነትን ሸፍኖ ማስቀረት ያልቻሉት ዶ/ር ቴድሮስም ከተባበሩት ዓረብ ኤምሬትስ በስተቀር የሁሉም አገሮች የቦንድ ሽያጭ እጅግ በጣም ደካማ እንደነበር ለሰበሰቧቸው አምባሳደሮች ተናግረዋል።

ከዶ/ር ቴድሮስ በፊትም ሆነ እሳቸው እያሉ የውጭ ጉዳይ ሚኒስቴር ከትውልድ አገሩ ርቆ የሚኖረውን የኢትዮጵያ ዳያስፖራ በጥቅማ ጥቅም እየደለለ ከአገዛዙ ጎን ለማሰለፍ ተደጋጋሚ ጥረቶችን አድርጓል። በተለይ የህዳሴውን ግድብ ቦንድ ሽያጭና  የዕድገትና ትራንስፎርሜሺኑን ዕቅድ ተግባራዊ ለማድረግ የወያኔ/ኢህአዴግ አገዛዝ ዳያስፖራውን አንደ ከፍተኛ የውጭ ምንዛሬ ምንጭ ተመልክቶት ነበር፤ ሆኖም አብዛኛው ዳያስፖራ ከአገዛዙ ጎን ተሰልፎ ከሚያገኘው ግዜያዊ ጥቅም ይልቅ ዘላቂ የሆነውን የእናት አገሩን አንድነትና የወገኖቹን ፍትህ፤ ነጻነትና እኩልነት በመምረጡ የወያኔ/ኢህአዴግ አገዛዝ ከዳያስፖራው እዝቃለሁ ብሎ የተመኘው የውጭ ምንዛሬ ህልም ሆኖ ቀርቷል።

ሌላው የወያኔ/ኢህአዴግ አገዛዝ ከፍተኛ በጀትና የሰው ኃይል መድቦ ዳያስፖራውን ለማማለል በሙሉ ሀይሉ የተንቀሳቀሰበት አካባቢ ቢኖር የከተማ ቦታና ቤት ሽያጭ ዘመቻ ነው። በእርግጥ አንዳንድ ከህዝብና ከአገር ጥቅም ይልቅ የራሳቸውን ጥቅም ያስቀደሙ የዳያስፖራው አባላት ኢትዮጵያ ውስጥ የሚካሄደውን የመሬት ቅርምት በይፋ እየተቃወሙ የቅርምቱ ድግስ የእነሱን ቤት ሲያንኳኳ ግን በራቸውን ወለል አድርገው ከፍተው የድግሱ ተሳታፊዎች ሆነዋል። አብዛኛው የኢትዮጵያ ዳያስፖራ ግን እናትና አባቴን እያፈናቀላችሁ የምትሰጡኝን መሬትም ሆነ ቤት አልፈልግም ብሎ በቦንድ ሽያጩ ላይ የወሰደውን ጠንካራ አቋም በከተማ መሬትና ቤት ሽያጭ ላይም ደግሞታል። የወገኖቹን ነጻነትና ፍትህ ለማስከበር በህይወቱ የተወራረደውን የኢትዮጵያ ዳያስፖራ የማያወላውል አቋም ያልተረዱት ዶ/ር ቴድሮስ ግን ያንን የለመዱትን በጥቅማ ጥቅም የመደለል ሴራቸውን አሁንም እንደቀጠሉበት ነው። ለምሳሌ ዳያስፖራው በመጪው አመት በሚደረገው የምርጫ ድራማ ላይ ያለውን እይታ እንዲለውጥ ለማድረግ ሲባል ብቻ 40 በ60 በሚባለው የቤቶች መርሃግብር የታቀፉ የዲያስፖራ አባላት የከፈሉበት ቤት የ2007ቱ ምርጫ ከመጀመሩ በፊት በአስቸኳይ ተጠናቅቆ እንዲሰጣቸው ትዕዛዝ ተላልፏል። እዚህ ላይ አንድ እጅግ በጣም የገረመኝም ያሳዘነኝም ነገር ቢኖር በአንድ በኩል ግብር ከፋይ በሌላ በኩል ደግሞ ቤት አልባ የሆነውና እነ ዶ/ር ቴድሮስ አድሃኖም 99.6% መረጠን የሚሉት አገር ውስጥ የሚኖረው ኢትዮጵያዊ ተረስቶ ትርፍ ቤት ፈላጊው ዳያስፖራ ቅድሚያ እንዲሰጠው መደረጉ ነው።

ለመሆኑ ዶ/ር ቴድሮስና መንግስታቸው ሁሌም አክራሪው ዳያስፖራ እያሉ የሚያሙትን ማህበረስብ ወድደው ሊስሙት ነው ወይን ተጠግተው ሊያልቡት እንዲህ የተንሰፈሰፉለት? የዳያስፖራውን አባት፤ እናት፤ ወንድምና እህት እያሰሩ፤ እየገደሉና የመብትና የነጻነት ጥያቄ የሚያነሳባቸውን የዳያስፖራ አባል ደግሞ አገርህ አትገባም ብለው አገር እየነሱት እነሱ ግን የልመና ኮሮጇቸውን ተሽክመው አሜሪካና አውሮፓ እየመጡ አገርህን እናሳድግልሃለን ገንዘብ ስጠን ብለው የሚጠይቁት በማን አገር ማን ለሚጠቀምበት ልማት ነው? እነ ዶ/ር ቴድሮስ እነሱን ከመሰለ ፀረ ህዝብ አገዛዝ ጋር ተመሳጥረው የዳያስፖራውን አባል በህገ ወጥ መንገድ አግተው እየደበደቡና መታሰሩን ሰምታ ልትጠይቀው የሄደችውን እህቱን ተወልዳ ካደገችበትና እትብቷ ከተቀበረበት አገር በ24 ሰዐት ውስጥ ውጪ ብለው እያስገደዱ እንዴት ቢገምቱንና እንዴት ቢመለከቱን ነው ዞር ብለው እኛኑ ገንዘብ ስጡን ብለው የሚጠይቁን?

ዶ/ር ቴድሮስ ከአገር ፍቅር ሬድዮ ጋር ያደረጉትን ቃለ መጠይቅ ከማጠቃለላቸው በፊት ደጋግመው የተናገሩት ኢትዮጵያን ምን ያክል እንደሚወዱና ይህ የሚወዱት አገር ህዝብ በእድገት ወደ ፊት ከገፉ አገሮች ተርታ ተሰልፎ ማየት አንደሚቸኩሉ ነው። መልካም ምኞት ነው። ሆኖም ይህ ምኞት የዚያችን የሚወዷትን አገር ህዝብ ሲናገር አፉን እየዘጉ፤ ሲጽፍ እጁን እያሰሩ፤ ሃሳቡን ሲገልጽ ማዕከላዊ ወስደው ሰቅለው እየገረፉና  ሰላማዊ ሠልፍ ተሰልፎ መብቴንና ነጻነቴን አክብሩልኝ ብሎ የጠየቃቸውን ደግሞ ደረቱንና ጭንቅላቱን በጥይት እያፈረሱ የሚሳካ ምኞት አይደለም።  ዶ/ር ቴድሮስ በአፋቸው ብቻ የሚናገሩት ምኞት ዳያስፖራው በአፉም በልቡም ውስጥ ያለ፤ የነበረና ለወደፊትም የሚኖር ምኞት ነው። ምኞታችንና ምኞታቸው ገጥሞ ኢትዮጵያ አድጋና በልጽጋ የምናያት  ግን ዶ/ር ቴድሮስ  እኛም እንደሳቸው በአገራችን ጉዳይ እንደሚያገባን በውል ሲረዱና ይህንን ሃያ ሦስት አመት ሙሉ በችንካር ቀርቅረው የዘጉብንን በር ወለል አድርገው ሲከፍቱ ብቻ ነው።

የኢትዮጵያ ትንሳኤ በልጆቿ መስዋዕትነት ይረጋገጣል!!!!

This email address is being protected from spambots. You need JavaScript enabled to view it.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!