ክንፉ አሰፋ
ዶ/ር ቴድሮስ አድሃኖም ከሊብያ የተመለሱትን ኢትዮጵያውያኖች ሲቀበሉ

የፌስቡክ አርበኛው ቴድሮስ አድሃኖም ቦሌ ሄደው ከሊቢያ ነጻ የወጡ ዜጎችን ሲቀበሉ አየን። እፊታቸው ላይ የማፈር ሳይሆን የጀግንነት ስሜት ይነበባል። አቀባበላቸውም 90 ደቂቃ በኢንቴቤ የሚለውን ታሪክ ይመስላል። ኡጋንዳ ላይ የታገቱ ዜጎችዋን ለማስለቀቅ እስራኤል ያደረገችው ገድል። ቴድሮስ አድሃኖምም በኩራት እና በድል አድራጊነት ስሜት ነው ስደተኞቹን የተቀበሉት።

መቼም ሼም የሚባል ነገር ከነሱ ዘንድ ጠፍቷል። በሥራቸው ማፈር ሲገባቸው ዓይናቸውን በጨው እያጠቡ የሌላውን ድል እንደራስ ያጣጥሙታል። ህሊና ያለው ሰው ያሳደዳቸውን እና በባዕድ ነጻ የወጡ ዜጎቹን ሲመለከት ብርክ ነው የሚይዘው። አልገባቸው ይሆናል እንጂ ክብራቸውን የሚቀንስ ማንነታቸውን የሚፈትን ድርጊት ነው። አስቀድመን በግብጽ መገናኛ ብዙኀን ዜናውን ባንሰማ ኖሮ ደግሞ ሌላ ታሪክ ይነግሩን እንደነበር ጥርጥር የለውም።

ሁኔታቸው አባት እና እናቱን በግፍ ገድሎ ፍርድ ቤት የቀረበውን ዓይነደረቅ ያስታውሰናል። ወንጀል መፈጸሙን ያመነው ይህ ጎረምሳ የፍርድ ማቅለያ እንዲናገር በመሃል ዳኛው በተጠየቀ ግዜ እንዲህ አለ፤ "ያው አባት እና እናት ስለሌለኝ፤ ለወላጅ አልባ ልጆች እንደሚደረገው ልዩ እንክብካቤ ያስፈልገኛል።"

በዓለም አቀፍ መገናኛ ብዙኀን እንደሰማነው እነዚህን ዜጎች ነጻ ያወጣችው ግብጽ ናት። ከአይሲስ ጥርስ ወጥተው ግብጽ ምድርን ሲረግጡ አቀባበል የተደረገላቸው በሚንስቴር ደረጃ ሳይሆን በርዕሰብሔር ደረጃ ነው። ከአውሮፕላን ሲውርዱም የግብጽን ባንዲራ እያውለበለቡ ነበር። አዲስ አበባ ላይ ግን ባንዲራ አልያዙም። ይህም ትልቅ ትርጉም አለው። ባንዲራ የአገር ክብርና ፍቅር ነው። የህዝብ አንድነት እና ትሰስር በባንዲራ ይገለጻል። አንገት ላለው፤ አንገቱን የሚያስደፋ እውነታ!

በግብጽ መከላከያ ኃይል ነጻ የወጡት እነዚህ 27 ኢትዮጵያውያን ካይሮ ሲደርሱ የግብጹ ፕሬዚዳንት አብዱል ፈታህ አል ሲሲ ፕሬዝዳንታዊ አቀባበል አድርገውላቸዋል። ቅድሚያ ለሰብዓዊ ፍጡር ክብርን ከመስጠት የሚመነጭ ተግባር ነው። ትልቅ የፖለቲካ ትርፍ ቢያገኙበትም ይገባቸዋል። ክቡር የሆነውን የሰው ነፍስ አትርፈዋልና ይህ ለኛ ትልቅ ትርጉም ነው የሚሰጠን። መልካም ሥራ ለክፉ ቀን ስንቅ ነው።

አዲስ አበባ ሲገቡ ግን ኃይለማርያም ደሳለኝ ሊቀበሏቸው አልቻሉም። ምክንያቱም ግልጽ ነው። ለሳቸው ያለገደብ የተሰጠው ሥልጣን ተቃዋሚዎችን እና ዲይስፖራውን መሳደብ ብቻ ነው። ምናልባትም ለኚህ አሻንጉሊት ዋነኛው ችግር አይሲስ ሳይሆን አሜሪካ ላይ የተነሳው አልሸባብ ነው። አሜሪካ ባሸተተች የኛዎቹ ያስነጥሳቸዋል። ለዚህ የአሜሪካ ቆሻሻ ጦርነት የኢትዮጵያን ወታደር ለመላክ አላንገራገሩም። የኛ ወገን እንደ ከብት ሲታረድ ግን የመረጡት ብሔራዊ የኀዘን ቀን ማወጅ፣ ከንፈር መምጠጥ፤ ሻማና ጧፍ ማቃጠል ...። ምክንያቱ እነሱ እንደሚሉት የድንበር መዋሰን ጉዳይ አይደለም። ይህ ቢሆን አሜሪካ ሽብርተኛን ለመውጋት አፍጋኒስታን ወይንም ሶርያ አያዋስናትም። መውረር ባስፈለጋት ግዜ ፓናማንም ግሪናዳንም ወርራለች። ሶማሊያ ላይ ከሰፈረው ሠራዊት ስንቱ እንደሞተ በፓርላማ ሲጠየቁ የቀድሞው ጠቅላይ ሚንስትር ሲመልሱ፤ "ይህ ጉዳይ እናንተን አይመለከትም!" ነበር ያሉት። የፓርላማ አባላት ይህንን ወሳኝ ጉዳይ የማወቅ መብት ከሌላቸው ታዲያ ለማን ነበር ሪፖርቱ የሚቀርበው? ለአሜሪካ?

ዓለም ስለ አይሲስ ጭፍጨፋ ሲጨነቅ፣ እነሱ ግን ምርጫው ነው እንቅልፍ የነሳቸው። እናም በዜጋው ሰቆቃ ሳይሆን በሰማያዊ ፓርቲ ላይ ተጠምደዋል። አይሲስን ከመዋጋት ሰማያዊ ፓርቲን ማጥፋት ይመርጣሉ። የመከላከያ ሠራዊቱ አንበሳነት በአገር ውስጥ ብቻ መሆኑን አስመስክሯል። በዜጋው ላይ ኮማንዶ ሲለማመድ አሳዩን።

ለእነሱ ሽብርተኛው አይሲስ ሳይሆን ጋዜጠኛ ነው። የጸረ-ሽብር አዋጅ አውጥተው ጋዜጠኛ እና ተቃዋሚዎችን ያፍኑበታል። ሽብርተኛው ዜጋዋ ሳይሆን አይሲስ እንደሆነ ግብጽ ትምህርት የሰጠቻቸው ይመስላል። ከራስዋም አልፋ እኛኑ ስትታደግ አየን።

በዚህ ሰሞን የቴድሮስ አድሃኖም ፌስ ቡክ ገጽ ተጨናንቆ ነው የሰነበተው። የስደት ቀውሱ ያመጣውን ችግር ይዞ ትንሽ የፖለቲካ ትርፍ ለማግኘት የሚደረግ ጥረት መሆኑ ነው። የኝህ ሰው ሥራ ጨርሶውኑ በፌስ ቡክ ላይ ሆኗል ያስብላል። ጨጓራው የተቃጠለ ዜጋም ይህንኑ ገጽ የንዴቱ ማብረጃ አድርጎታል።

በሣምንቱ መጀመሪያ ላይ አይቴ ቴድሮስ እንዲህ ብለው ጽፈዋል። "የመጀመሪያ ዙር ከሊቢያ ተመላሽ ወገኖች አዲስ አበባ ገብተዋል። መንግሥት ጥረቱን አጠናክሮ ይቀጥላል።"

ታዲያ ሚኒስትሩ እንዲህ ይበሉ እንጂ እነዚህ ወገኖች ሲገቡም ሆነ አቀባበል ሲደረግላቸውም አልታየም። እውነት ነው በኢትዮጵያዊነታቸው ሳይሆን በዘር እየተለኩ፣ ለገዢው ፓርቲ ቅርብ የሆኑ፣ ወዘተ በሱዳን በኩል እንዲገቡ መደረጉ ተሰምቷል።

ተስፋዬ ሁሴን የተባለ ወገን በዚያው ጽሁፍ ስር እንዲህ ሲል መለሰላቸው፣ "መቸስ ውሸትህ አያልቅ፣ በቀደም ዕለት የደቡብ አፍሪካ ተመላሾች ብለህ ቀደድክ። ነገር ግን እዚህ ከደቡብ አፍሪካ የገባ አንድም ስደተኛ ባልነበረበት፣ ተመላሾች ብለህ ስትዋሸን ዝም አልን። አሁን ደግሞ ከሊቢያ ... መጥኔ ውሸትህን ለሚጋቱ አድርባዮች! ጊዜ እየጠበቅህ ብቻ የእንትን ተመላሾች በል። ነገ ደግሞ የሰማይ ቤት ተመላሾች እንደምትለን ተስፋ አደርጋለሁ። በውሸት፣ በፌዝ 24 ዓመት ..."

ቴድሮስ አድሃኖም መጻፋቸውን ቀጠሉ፣ ስለ ሁለተኛው ዙር ተመላሾች። ዙቤር ኡስማን የተባለ መላሽ ደግሞ "አገር የሌለው ሰው የሄደበት ሁሉ አገሩ ነው! ኢትዮዽያውያን ስደተኞች ከሊቢያ ወደ ግብፅ፤ የግብፅን ሰንደቅ ዓላማ እያውለበለቡ ሲወርዱ! ከሐበሻ ምድር ተሸርፋ "አገር" የሆነችው ግብፅ ዛሬ የእንጀራ እናታችን ሆነች!" ሲል ነበር ቁጭቱን የገለጸው።

እርግጥ ነው። ሥልጣን ላይ ያለው ቡድን ለዜጋው ግድ አይሰጠውም። ከአንድ ኢትዮጵያዊ ይልቅ አንድ የህንድ ወይንም የሳዑዲ ዜጋ በአገራችን ትልቅ ክብር አለው። ከዜጋው ይልቅ ለባዕዳን "ባለሀብቶች" ደህንነት የሚጨነቅ ሥርዓት ነው። ሲጀመር ዜጋው ከአገሩ እንዲሰደድ ያደረገው ብልሹ የሆነ ሥርዓቱ ነው። አርሶ አደሮችን ከቀያቸው እያፈናቀለ፣ ለም መሬታቸውን ለህንድ እና ሳዑዲ ባለሀብቶች በመናኛ ዋጋ በመቸብቸቡ የወጣቱን ተስፋ ገደለው። ወጣቱ አገር የለውም። ለመኖር ሲል፣ ፍትህ ፍለጋ፣ ሥራ ፍለጋ፣ እንጀራ ፍለጋ ይሰደዳል።

የአሜሪካ ድምጽ ራዲዮው አዲሱ አበበ ከሊቢያ ሁለት ስደተኞችን በስልክ አነጋግሮ ነበር። ሁለቱንም ወደአገር ቤት መመለስ እንደሚፈልጉ ጠይቋቸው የሰጡት ምላሽ፤ "መመለስ አንፈልግም!" የሚል ነው። እነዚህ ወገኖች በሞት ጥላ ውስጥ ሆነው እንዲህ ማለታቸው በአገር ቤት ያለው ችግር ምን ያህል የከፋ መሆኑን ይጠቁመናል።

ሰሞኑን በወገኖቻችን ላይ እየደረሰ ያለው ግፍ አዲስ አይደለም። የአይሲሱ ግድያ ዓለም አቀፍ ትኩረትን ሳበ እንጂ በሳዑዲ ዐረቢያ፣ በደቡብ ሱዳን፣ በኬንያ፣ በታንዛኒያ፣ በየመን፣ በደቡብ አፍሪካ፣ በእስራኤል ወዘተ ፍጹም ኢ-ሰብዓዊ የሆነ ድርጊት በዜጎቻችን ላይ ተፈፅሟል። ሴቶች እህቶቻችን በጎረምሶች ተደፍረዋል። በአሰቃቂ ሁኔታም ተገድለዋል። ለዜጎቹ የሚከራከር አካል ባለመኖሩም የተናቅን ህዝብ አድርጎናል።

እስራኤል አገር በፈላሽ ሙራዎች ላይ እየደረሰ ያለውን የዘር መድልኦ ዓለም ሲያወግዘው የኛዎቹ ዝም ነው ያሉት። ባለፈው ዓመት ናይሮቢ ውስጥ ሰባ የሚሆኑ ኢትዮጵያውያን እየተለቀሙ ሲታፈሱ እና ሲታሰሩ እዛ ያለው የኢትዮጵያ ኤምባሲ "ኬንያ ውስጥ ጉዳት የደረሰበት ሕጋዊ ዜጋ የለም" ሲል ነበር መልስ የሰጠው። ሊቢያ በፈራረሰች ግዜ የአፍሪካ ዜጎች በየኤምባሲያቸው ገብተው ሲጠለሉ ኢትዮጵያውያን መሄጃ አልነበራቸውም። በመጨረሻ ግን የናይጄሪያ ኤምባሲ ተቀብላ አስተናገደቻቸው።

አይሲስ ወደ የመን እየገባ መሆኑ በተሰማ ግዜ ሰይፉ ፋንታሁን አንድ ዘገባ አቅርቦ ነበር። በዘገባው ላይ የመን ያሉ ኢትዮጵያውያን መንግሥት ከወሬ ያለፈ ምንም ነገር እንዳላደረገ ይናገራሉ። ይልቁንም ዓለም አቀፍ ሞዴልና ተዋናይ የሆነችው የሐረር ወርቅ ጋሻው ስደተኛውን ለመርዳት የአቅሟን እያደረገች እንደሆነ ጋዜጠኛ ግሩም ተ/ኃይማኖት ተናግሯል።

በየመን እየታየ ያለውም ጉዳይ እርግጥ "ኢትዮጵያ መንግሥት አላት ወይ?" ... የሚለውን ጥያቄ የሚመልስ ነው። ጋዜጠኛው የመን ያለው የኢትዮጵያ ኤምባሲ "እንረዳቸዋለን ወይስ እናርዳቸዋለን?" ነው ያለው ሲል ባሰፈረው ጽሁፉ በዶቺቬሌ ቃላቸውን የሰጡት የኤምባሲው ቃል አቀባይ አቶ አምደሚካኤል ንግግር አሳፈሩን ይላል። "ኢትዮጵያዊያኑን እንረዳቸዋለን። ከአይ.ኦ.ኤም. ጋር በመተባበር ወደ አገር መመለስ የሚፈልጉትን እንመልሳለን" ብለዋል። ... "አዎ! ይረዳሉ ግን ኤምባሲ ውስጥ ላሉ ሠራተኞች ነው። ... እኛን ግን እንረዳለን ማለት ፈልገው ሳይሆን እናርዳቸዋለን ማለታቸው ነው። ሲያርዱ እንጂ ሲረዱ መቼ ታይተው ነው።" ብሎ ነበር የጻፈው።

እውነታው ይህን ይመስላል። አንዳንድ የሥርዓቱ አጨብጫቢዎች ታዲያ ይህ እውነታ አይወጥላቸውም። ዜጋ እየተሰቃየ እነሱ ግን ስለ ህንጻ ይነግሩናል፤ ስለ ታምራዊው 11 በመቶ የኢኮኖሚ እድገት ይሰብኩናል። ... ሕንጻና መንገድንማ ቅኝ ገዥዎችም ሠርተዋል። ለዚያውም እነሱ ከሚነግሩን የበለጠ።

ሕዝብ ደግሞ እያለ ያለው፣ "ከህንጻ በፊት ነጻ እንሁን!" ነው፤ አገር ማለት መሬት አይደለም። አገር ማለት ወንዙ፣ ተራራው፣ ሸንተረሩ፣ አደለም። አገር ማለት ሕዝቡ ነው። የሕዝቡ ሰቆቃ ግድ የማይለው አካል መንግሥት ሊሆን አይችልም።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!