ግርማ ካሳ

Dr Berhanu Nega. ዶ/ር ብርሃኑ ነጋ

አንዳንንድ ወገኖች በግንቦት ሰባቶች ላይ የግል ችግር ያለብኝ ይመስላቸዋል። አይደለም። ከነርሱ ጋር የዓላማ ልዩነት የለኝም። ልዩነቴ የስትራቴጂ ነው። ግንቦት ሰባት ውስጥ ያሉ ወገኖች ዳይናሚክ የሆኑ ትልቅ ፖቴንሻል ያላቸው እንደሆነ አውቃለሁ። ሊቀመንበሩ ዶ/ር ብርሃኑ ነጋ፣ በቅንጅት ጊዜ ቁልፍ ሚና የተጫወቱ መሪ ናቸው። ብዙዎቻችንን ኢንስፓየር ያደረጉ። ሆኖም በግንቦት ሰባት አመራርነት የወሰዱት ስትራቴጂ ግን ያላቸውን ፖቴንሻል እንዲጠቀሙበት የረዳቸው አይመስለኝም።

ኢትዮጵያውያንን በሙሉ እንደ መሪ አስተባብረው፣ በሠላማዊው ትግል ትልቅ ንቅናቄ የመፍጠር አቅም የነበራቸው መሪ፣ ከአረመኔው ኢሳያስ ጋር በመቆራኘት ከብዙ ደጋፊዎቻቸው ጋር ተጋጩ። ራሳቸውን አሳነሱ። ሆኖም ዶ/ር ብርሃኑ ያሉ ካለፉት ስህተቶቻቸው ተምረው፣ በጥበብ ከተንቀሳቀሱ የቅንጅቱ ዶ/ር ብርሃኑ ነጋ የማይመለሱበት ምንም ምክንያት አይኖርም።

“ግልጽ ደብዳቤ ለግንቦት ሰባት መሪዎችና አባላት” (http://ethiopiazare.com/articles/opinion/3215-g7-vs-eritrea-by-girma-kassa) በሚል ርዕስ ከሁለት ዓመታት በፊት አንጽ ጽሑፍ ለአንባቢያን አስነብቤ ነበር። ያኔ የጻፍኩት ጽሑፍ አሁን ያለውን ሁኔታ የሚያንጸባርቅ ነው። በኤርትራ በኩል የሚደረገው ትግል ውጤት እንደማያመጣና ስህተት እንደሆነ ነበር መረጃዎችን በግልጽ በማስቀመጥ ለማሳየት የሞከርኩት።

ይኸው ዶ/ር ብርሃኑ ራሳቸው ወደ ስንት ወራት ነው፣ እዚያ ከርመው መጡ። እንደ ፕሮፖጋንዳ ከሚነገረው ውጭ በተጨባጭ በትጥቅ ትግሉ ዘርፍ የታየ ውጤት የለም። አንድ ነጻ የወጣ ቀበሌ ወይንም ወረዳ እንዳለ አልሰማንም። ብዙዎች ሕይወታቸውን አደጋ ላይ በመጣል ወደ ኤርትራ ሄደዋል። ውትድርና እየሠለጠኑ እንደሆነ፣ ተመረቁ ሲባልም እንሰማለን። የተለያዩ ፎቶዎችና ቪዲዮዎችንም እናያለን። በተግባርና በተጨባጭ ግን የታየ ነገር የለም።

ይህ የሆነበት ምክንያት በግንቦት ሰባቶች ዘንድ ቁርጠኝነት ስለሌላ ሳይሆን፣ ከኤርትራ ተነስቶ ውጊያ ማድረግ በጣም አስቸጋሪ ስለሆነ ነው።

አንደኛ መዋጋት እንደ ማውራት ቀላል አይደለም።

ሁለተኛ አካባቢው በጣም ሚሊተራይዝድ የሆነ ነው። እጅግ በጣም ብዙ፣ ዘመናዊ መሣሪያ የታጠቁ፣ የአየር ኃይል የበላይነት ያላቸው የወያኔ ታጣቂዎች በዚያ አሉ። የአሜሪካን ሳተላይት መረጃም ይሰጣቸዋል። በዚህ ምክንያት ከኤርትራ ወደ ኢትዮጵያ ወታደሮች ለማስገባት በጣም አስቸጋሪ ነው የሚሆነው።

ሦስተኛ ሱዳን የወያኔዎች አጋር ናት።

አራተኛ ሻዕቢያ ውስጥ የወያኔ ሰዎች አሉ፤ መረጃ የሚያቀብሉ። አንዳርጋቸውን ያስያዙት እነዚሁ ሻዕቢያ ውስጥ ያሉ ለወያኔ የሚሠሩት ናችው።

አምስተኛና ዋናው ሻዕቢያ በመርኅ ደረጃ ከወያኔዎች ጋር ውጊያ አይፈለግም። ውጊያ ከተጀመረ፣ ወያኔዎች አስመራ ሊገቡ እንደሚችሉ ያውቃል። ሻዕቢያ በሕዝቡ እጅግ በጣም የተጠላ ነው። በመሆኑም ብዙ የኤርትራ ተቃዋሚዎች ከወያኔ ጎን ናቸው። በመሆኑም ወያኔዎች የኤርትራ ተቃዋሚዎችን ይዘው ኢሳያስን በቀላሉ የማስወገድ አቅም አላቸው። በርግጥም በኤርትራ በኩል ትግል ማድረግ እጅግ በጣም ከባድና ውስብስብ ነው።

በተለያዩ የሀገሪቷ ክፍሎች ህዝቡ ነፍጥ አንስቶ የተነሳበት ሁኔታ አለ። በወልቃይት ጠገዴ፣ በአርማጭሆ፣ ጭላጋ በመሳሰሉት ቦታዎች በቴፒ፣ በጋምቤላ፣ ... ግፍና ጭቆና የመረረው ወገናችን የትጥቅ ትግል የጀመረበት ሁኔታ አለ። በነዚህ ሁሉ ውስጥ ግን ግንቦት ሰባት እጁ የለበትም። ግንቦት ሰባት ምንም አይነት የተረጋገጠ የውትድርና እንቅስቃሴ ያደረገበት ሁኔታ የለም።

ለዚህም ነበር ግንቦት ሰባቶች በተቻለ መጠን ትኩረታቸው፣ ላለፉት 2 ወራት በኦሮሚያ እንደታየው፣ በሠላማዊ የእምቢተኝነት እንቅስቃሴ ላይ እንዲሆን ስንመክር የነበረው።

“ወቅቱ ትብብርን ይጠይቃል። በተቃዋሚው ጎራ ያለው ወገን ሁሉ በአንድነት ይሰባሰብ ዘንድ፣ እናንተም የተቃዋሚው አንዱ አካል እንደመሆናችሁ፣ እናንተ ዘንድ ያሉ፣ መሰባሰብ እንዳይኖር እንቅፋት የሆኑ ጉዳዮችን፣ ትመረምሩና ታስተካክሉ ዘንድ ይሄን ጽፌአለሁ። ክስ ሳይሆን፣ መረጃ ላይ የተመረኮዘ ምክር አዘል አስተያየት በማቅረብ፣ ቻሌንጅ ላደርጋችሁ እሞክራለሁ።” ስል ነበር ከሁለት ዓመታት በፊት የጻፍኩላቸው።

“ይሄን መረዳት አለባችሁ፣ ነጻነታችንን ኢሳያስ አፈወርቂ አይሰጠንም። ጠዋትና ማታ አገዛዙን ስለረገምን ለውጥ አናመጣም። በአሁኑ ወቅት ብቸኛው አማራጭ እኛው እራሳችን የምናደርገው የተባበረ ሠላማዊ ትግል ነው። ኢትዮጵያውያን በአንድ ላይ ተባብረን፣ ሰላማዊ በሆነ መንገድ፣ ጥቂቶች የዘረጉትን ቀንበር መስበር እንችላለን። እባካችሁ የኢትዮጵያን ሕዝብ ኃይል አሳንሳችሁ አትመልከቱ። ከሻዕቢያ ጥገኝነት ውጡ። ወደ ቀደሞው ወደ «ቅንጅት» መንፈስ ተመለሱ። ያኔ በዘጠና ሰባት የጠበቅነውን ያላገኘነው፣ በቂ ድርጅታዊ ሥራ ስላልተሠራና በአመራር አባላት መካከል መከፋፈል ስለተፈጠረ፣ ሕዝቡ በአንድ ላይ በተደራጀ መልኩ፣ በሁሉም ክልሎች ማንቀሳስቀስ ስላልተቻለ እንጂ፣ የሠላማዊ ትግል ስላልሠራ ወይን የኢትዮጵያ ሕዝብ አቅም ስለደከመ አልነበረም። ካለፈው ትምህርት በመውሰድ፣ ጥንቃቄ በተሞላበት፣ በክልሎች ሁሉ መረብን በመዘርጋት፣ አቅማችንን፣ ገንዘባችንን በሙሉ አንድ ላይ በማሰባሰብ፣ የሚደረግ ሕዝባዊ፣ ሠላማዊ የእምቢተኝነት ዘመቻ በርግጥ ውጤት ያመጣል።” ነበር ያልኳቸው።

“ሸንጎ፣ የብሔራዊ ሽግግር ምክር ቤት፣ የኦሮሞ ዴሞክራሲያዊ ግንባር፣ የአዲሲቷ ኢትዮጵያ ሶሊዳሪቲ የመሳሰሉ በርካታ ደርጅቶች፣ በኢትዮጵያ ሕዝብ ተማምነው፣ ሀገር ቤት ለሚደረገው ሠላማዊ ትግል አጋርነታቸውን እየገለጹ ነው። የእናንተ ድርጅት፣ ግንቦት ሰባት፣ ከሻዕቢያ ጋር ያለውን ግንኙነት በአስቸኳይ በጥሶ፣ ከነዚህ ድርጅቶች ጋር አብሮ ለመሥራት ይሞክር። እዚህ ላይ አበቃለሁ። የሚሰማ ጆሮ ካለ እንግዲህ ይሰማል።” ስልም በድርጅቶች መካከል መሰባሰብ እንዲኖር ጠይቄ ነበር።

ከሻዕቢያ ጋር ይላቸውን ግንኙነት፣ ከሁለት ዓመታት በፊት እንደጻፍኩት፣ በቀላሉ ሊበጥሱት አይችሉም። ቢበጥሱት ደስ ይለኛል፤ ግን ፕራክቲካልም መሆን አለብኝ። ሆኖም ሁሉንም ነገር አንድ ጆንያ ውስጥ መክተት የለባቸውም። በኤርትራ በኩል እናደርጋለን የሚሉት ያ የነርሱ ጉዳይ ነው፤ ግን በሠላማዊ ትግል እናምናለን ስለሚሉም፣ በተቻለ መጠን በሠላማዊ ትግሉ ረገድ፣ ከሌሎች ጋር በአጋርነት ቢሠሩ በጣም ጥሩ ነው የሚሆነው።

አሁን ለነ ዶ/ር ብርሃኑ የምጠይቀው፤ ቢያንስ መግባባት መፍጠር ከሚቻልባቸው እንደ ኦዴፍ፣ ሸንጎ፣ የሽግግር ምክር ቤቱ፣ ... ካሉ ደርጅቶች ጋር አስቸኳይ የሆነ፣ ትግሉን የሚያቀናጅ ግብረኃይል እንዲቋቋም ነው። አቅም፣ የመሪነትና የማሰባሰብ ችሎታው እንዳላቸው አውቃለሁ። ይሄንን ሳያደርጉ፣ ወደ አስመራ ከተመለሱ ግን (የሚመለሱ ከሆነ) ትልቅ ዕድል አመለጠ ማለት ነው። ግንቦት ሰባት ከተለያዩ ደርጅቶች ጋር እየተወያየ እንደሆነ እርሳቸውም አቶ ነዓመን ዘለቀም በይፋ ገልጸውልናል። እንግዲህ በዚህ ረገድ ቸር ወሬ ያሰማን።

ከሁለት ዓመት በፊት የጻፍኩትን ጽሁፍ ለማንበብ እዚህ ይጫኑ!

ግርማ ካሳ

This email address is being protected from spambots. You need JavaScript enabled to view it.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!