ይገረም አለሙ

SMNE announced the formation of the Ethiopian Council for Reconciliation and the Restorative of Justice (ECRRJ) at a public meeting held at the Sheraton Hotel in Silver Springs, Maryland (February 14, 2016)

በአቶ ኦባንግ ሜቶ በሚመራው ድርጅት አዘጋጅነት በተጠራ ጉባኤ ላይ የተገኙ ኢትዮጵያውያን ስብሰባቸውን ያጠናቀቁት በሀገራችን ዕርቅ አስፈላጊ መሆኑ ላይ በመተማመንና ለዚህም ተግባራዊነት ዕርቅን ከራስ መጀመር እንደሚገባ አጽንኦት በመሰጠት መሆኑን ሰምተናል። የእስከዛሬው ተሞክሮአችን ተግባራዊነቱን እንድንጠራጠር ቢያደርገንም የአሰባሳቢዎቹ ተግባርም ሆነ ተሰብሳቢዎቹ የደረሱበት ድምዳሜ የሚደነቅ ብቻ ሳይሆን ለተግባራዊነቱ ድጋፍ ሊቸረው የሚገባ ነው።

የዕርቅ ተቃራኒ ፀብ ነው። ከሁለቱ ደግሞ የትኛው ቀላል እንደሆነ ለማንም ግልጽ ነው። ዕርቅ ብዙ መንገድ መሄድ፣ ብዙ ተግባር መከወንን፤ ያሻል ብዙ መስዋዕትነትም ይጠይቃል። ለዚህም ነው ሲነገር እንጂ ሲተገበር የማንሰማው፣ ሲወጠን እንጂ ከግብ ሲደርስ የማናየው። ፀብ ግን ማሰብና መጨነቅ፣ ማመዛዘንና ረጋ ብሎ መወሰን የማይጠይቅ በደቂቃ ውስጥ ሊከውኑት የሚቻል ነው።

ቢያንስ ባለፉት ሃያ ዓመታት የዕርቅን አጀንዳ በየግዜው ቢነሳም ከንግግር ማድመቂያነት አልፎ ተግባራዊነቱ ሊታይ አልቻለም። የሚናገሩትን መተግበር ያልቻሉቱ የፖለቲካው ተዋናዮች የሚያቀርቡት ምክንያት ደግሞ አንድና የተለመደ ከቁም ነገር ሊገባ የማይችል ነው። ኮ/ል መንግሥቱ ስለ ዕርቅ ሲጠየቁ የሀገር ጉዳይ ነው፤ የባልና ሚስት ፀብ አይደለም ማለታቸውን የሰሙና መጨረሻ የሆኑትን ያዩ ወያኔዎች ከዚህ ባለመማር እነርሱ ደግሞ በተራቸው ዕርቅ ሲባሉ ማን ከማ ጋር ተጣላና ነው በማለት ይሳለቃሉ። በአንጻሩ አንዴ ብሔራዊ ዕርቅ ሌላ ግዜ ሀገራዊ መግባባት ወይንም ብሔራዊ መግባባት ያስፈልጋል እያለ የሚጮኸው ተቃዋሚ ለነገሩ ተግባራዊ አለመሆን የወያኔን እምቢተኝነት በምክንያት እያቀረበ ለዓመታት ዘልቋል።

ዕርቅን የማይፈልጉ ከፀብ የሚያተርፉ መሆናቸው እሙን ነው። ወያኔ አጣልቶ እንጂ አስማምቶና ተስማምቶ፤ አለያይቶ እንጂ አንድነትን አጠናክሮ በሥልጣኑ ሊቆይ እንደማይችል ስጋት ስላለው ዕርቅን ቢጠላ መግባባትን በሩቁ ቢል ከዓላማው የመነጨ ነው። ተቀዋሚዎቹ ግን ሃያ አራት ዓመታት ስለ ዕርቅ ሲጠይቁ እንጂ የሚችሉትን ሲያደርጉ አለመታየታቸው ለምን ይሆን የሚል ጥያቄ ያነሳል። ለዚህ መልሱ የወያኔ አምቢተኝነት ነው የሚባል ከሆነ ራስን ማታለል ይሆናል።

ዕርቅ የሚጠይቁት ፖለቲከኞች ርስ በርሳቸው አይደለም መጀመሪያ ከራሳቸው መች ታረቁ፤ብሔራዊ መግባባት ሲሉ የሚደመጡት እነርሱ በተቃዋሚነት ደረጃ ፓርቲ ከፓርቲ አይደለም በአንድ ፓርቲ ውስጥ ግለሰቦች እንኳን መች መግባባት አላቸው። ብዙ ተባዙ የተባሉ ይመስል የተግባር ሳይሆን የቁጥር ፓርቲ በውጪም በውስጥም የሞላው በዚሁ ምክንያት አይደለምን?! ከወያኔ ጋር ውይይት እንሻለን የሚሉት እነርሱ መች ለውይይት አንድ ላይ መቀመጥ የሚችሉ ናቸው። በአንድ ብሔር ስም አራት አምስት ድርጅት የመሰረቱ ስለ አንድነት እያወሩ መለያየየትን የሚተገብሩ፣ ሀገራዊ መግባባት እየጠየቁ ድርጅታዊ መናቆር የሚያካሂዱ አይደሉምን።

ወያኔ ተቀዋሚዎቹ ዕርቅ ብለው የሚጮኹት በምርጫ ያጡትን ሥልጣን በአቋራጭ እናገኛለን ብለው በማለም ነው ብሎ፤ እየሰጋ የሥልጣን ነገር ደግሞ ለርሱ የነብር ጅራት ሆኖበት ማስተዋል ነስቶት እንጂ፤ እኔ ከዚህ ሁሉ ድርጅት ተብየ ጋር ውይይት መቀመጥ አልችልም፤ መጀመሪያ ራሳችሁ ታረቁና፣ አለያም በመካከላችሁ መግባባት ፍጠሩና ከዛ በኋላ ጠበብ ባለ ቁጥርና በተወሰነ አጀንዳ መነጋገር እንችላለን ቢል ተቀዋሚዎቹ ይህን ፈተና ማለፍ ይችላሉ ብሎ በርግጠኝነት መናገር አይቻልም።

መጀመሪያ ከራሳችን እንታረቅ የሚለው የእነ አቶ ኦባንግ ስብሰባ ውጤት ተግባራዊ ቢሆን ይህን ችግር ይቀርፍ ነበር፤ መጀመሪያ ግለሰቦች ከራሳቸው ጋር፣ ቀጥሎ በአንድ ፓርቲ ወስጥ ያሉት ርስ በርሳቸው ከዛም በመቀጠል ፓርቲ ከፓርቲ እየተባለ እርቁም ይሁን መግባባቱ ቢፈጠር ፓርቲዎቹ ቁጥራቸው የተወሰነ ከወያኔ ጋር እንነጋገርበታለን የሚሉት አጀንዳ የተመጠነ ኃይላቸው የጠነከረ ይሆናል። ያኔ ወያኔ በእምቢተኝነቱ ቢጸና የማስገደድ አቅም ይኖራቸዋል። አሁን ባሉበት ደረጃ ሆኖ ስለ ዕርቅ አስፈላጊነትና ስለ ወያኔ እምቢተኝት ማውራት ከምር ዕርቅ ፈላጊነትን አያሳይም። የዓለም አቀፉ ማኅበረሰብ አካላትና የኃያላኑ መንግሥታት ተወካዮች በአንዲት ሀገር ኢትዮጵያ ጉዳይ ከስንቱ ጋር እንደሚነጋገሩ እየቸገራቸው እባካችሁ አንድ ሆናችሁ ኑ ማለታቸውን በተደጋጋሚ ራሳቸው ፖለቲከኞቹ እንደነገሩን አንዘነጋውም።

የዕርቅ አስፈላጊነትንና ጠቀሜታን የማይረዳ ሰው ይኖራል ተብሎ አይታሰብም። ችግሩ ሁሉም የሚያስበው ዕርቅ ለሀገሪቱ ስለሚያስገኘው ጠቀሜታና ለትውልድ ስለሚያቆየው በረከት ሳይሆን፤ እሱ ስለሚያጣውና ስለሚያገኘው ግለሰባዊ ጥቅም (ፕ/ር መስፍን በእያንዳንዱ ኢትዮጵያዊ ጭንቅላት ላይ አለ የሚሉት ዘውድ ሊሆን ይችላል) በመሆኑ ዕርቅ የሚናገሩት እንጂ የማይተገብሩት አጀንዳ ሆኖ ዓመታት ያስቆጠረው።

ዛሬ የተነሳው ዕርቅን ከራስ የመጀመር ጉዳይ በተለያየ ግዜ በግለሰቦችም በድርጅቶችም የተባለና ከመባል ያላለፈ ነው። ከፖለቲካው መድረክ ውጪም ያሉ በጽሁፍም በንግግርም ሃሳብ የሰጡበት ነው። ምንግዜም በኢትዮጵያ የፖለቲካ ታሪክ ውስጥ በቀዳሚነት የሚወሳው ቅንጅት በምርጫ 97 ማንፌስቶው ውስጥ “በሀገሪቱ ታሪክ ውስጥ እንደ መጥፎ ገጽታ የሚታዩ የርስ በእርስ ግጭቶችም ደም ያፋሰሱ ጦርነቶችና እልቂቶችም በተለያዩ ምክንያቶች ተከስተዋል። በሀገራችን የሚመሰረተው ዴሞክራሲያዊ ሥርዓት በማይናወጥ ዴሞክራሲያዊ መሠረት ላይ መገንባት ካለበት የእስካሁኑ የጥላቻ የበቀልና ያለመተማመን ምዕራፍ ተዘግቶ ለተከታይ ትውልድ የሚዘልቅ አዲስ ምዕራፍ መከፈት ይኖርበታል። በመሆኑም እያንዳንዳችን ከራሳችን፤ ህዝብ ከህዝብ፣ መንግሥት ከህዝብ፣ የፖለቲካ ፓርቲ ከፖለቲካ ፓርቲ ለመግባባት የሚችሉበት ብሔራዊ ዕርቀ ሰላም ከሁሉ በፊት መቅድም አለበት ብሎ ቅንጅት ይምናል” በማለት ነበር የገለጸው።

ይህን የጻፉት ሰዎች ግን ራሳቸውም አብረው መዝለቅ ሳይችሉ ቀርተው የማይሆን ሆነ። ዕርቅ አስፈላጊ ብቻ ሳይሆን በወያኔ አባባል ለመጠቀም የህልውና ጉዳይ ነው። ስለሆነም ሃያ አራት ዓመት የተነገረው ይብቃና አሁን ከምር ወደ ተግባር ይገባ። ለዚህ ደግሞ ሁሉም ከራሱ ከቤቱ ከጎረቤቱ የሚጀምርበት ሁኔታ ይፈጠር። በተመሳሳይ ስም (በአንድ ብሔር) እየተጠሩ አንድ አይነት ዓላማ እየተናገሩ አራት አምስት ሆነው የቆሙ ወደ አንድ ይምጡ፤ የሚችሉ ይታረቁ፣ የማይችሉ የአንድ ሀገር ልጅነት መግባባት ይፍጠሩ፤ ይህም የማይሆንላቸው ወያኔ ከኢትዮጵያ ህዝብ ላይ መነሳት ያለበት በመሆኑና በዴሞክራሲያዊ ሥርዓት ግንባታ ይግባቡ። ይህን ማድረግ ከተቻለ የወያኔ ምርጫ ተገዶ ወደ ዕርቅ መምጣት፤ አለያም በተባበረ ኃይል ተገፍቶ ሥልጣኑን ማጣት ይሆናል። ከወያኔ በኋላ ሥልጣን በሚይዝ ኃይል ፖለቲካዊ የበቀል ርምጃ የማይጠበቅ ቢሆንም ተገዶ ከሥልጣን መውረድ ብዙ ነገር ስለሚያስከትል ሁለተኛውን መንገድ ወያኔዎች ባይመርጡት ይመከራል።

እኔም ለማለት ያህል አልኩት እንጂ ተቀዋሚው ወገን ካለፈው ተምሮ፣ በወያኔ እብሪትና እኩይ ድርጊት ተማሮ ስለ ዕርቅ ከማውራት አለፍ ብሎ ዕርቅን ከየራሱ በመጀመር፤ በተቀዋሞው ጎራ ሀገራዊ መግባባት ሊፈጠር ይችላል ብሎ ማሰቡ ራሱ ይከብዳል። በተቃውሞው ጎራ ይህ እንደ ተዓምር የሚፈጠር ነገር ተግባራዊ ሆኖ ጠንካራ የተባበረ ኃይል መፍጠር ቢቻል ወያኔን ለዕርቅ ማስገደድ ካላሆነም ከሥልጣን ለማስወገድ የሚገድ አይሆን ነበር።

ወያኔ ንቀቱ የበረታው ጥፋቱ የከፋውና የሚፎክር የሚደነፋው የተቃውሞው ጎራ ምንነትና ማንነት እንደማያሰጋው ስላረጋገጠ ነው። አንባገነን ያሉትን ኃይል ያስገድዱታል እንጂ እንታረቅ እያሉ አይለምኑትም። ወያኔ ልመና አይሰማ፤ ተቀዋሚው ለማስገደድ አይበቃ፤ በዚህ መሃል ህዝብ አሻፈረኝ ብሎ ተነስቶ በየቀኑ የጥይት ሰለባ እየሆነ ነው። የሚያሳዝነው ይህ የዜጎች እልቂት ለወያኔ ከቁብ ያልተቆጠረ ለተቀዋሚው ያላስመረረ መሆኑ ነው።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!