ግንቦት 20 እንዲህ መቀለጃ ሆና ትቅር?ታዛቢ (ከአዲስ አበባ)

ሥራየ መምህርነት ነው። በአንድ የመንግሥት የ2ኛ ደረጃና መሰናዶ ት/ቤት ውስጥ አስተምራለሁ። ሰሞኑን ታዲያ የግንቦት 20 የኢትዮጵያ የነፃነት ቀን እንደመሆኑ የበዓሉን መቃረብ አስታክኬ በየምገባባቸው በርካታ ክፍሎች ትምህርቱን ከመጀመሬ በፊት “እንኳን አደረሳችሁ” እላለሁ። ይሀንን የምለው ኢህአዲግ መራሹ ዴሞክራሲያዊው መንግሥታችን ጨቋኙን የደርግ መንግሥት ደምስሶ ህዝባዊ መሠረት የተላበሰና በሀገራችን ለመጀመሪያ ጊዜ የቆመ የዴሞክራሲ ሥርዓት በመትከሉ ነው።

በግንቦት 20 ቀን 1983 ዓ.ም. የተመሠረተው ይህ በህዝቦች መፈቃቀድ የተገነባ ዴሞክራሲያዊ ሥርዓት ኢትዮጵያን ከመፈራረስና እንደሶማሊያ ከመበታተን የታደገ በመሆኑ ዕለቱ ብቻ ሣይሆን ወሩ በሙሉ በድምቀት ቢከበርና ለዚህ የላቀ ማኅበረሰብዓዊ ደረጃ ያደረሱን እንደክቡር ጠቅላይ ሚኒስትራችን መለስ ዜናዊና አባይ ፀሐዬን የመሰሉ ዕንቁ ታጋዮቻችንም ቢወደሱ አግባብ ነው ብለን የምናምን ኢትዮጵያውን እጅግ ብዙ ነን - በሀገር ውስጥም - ወላ ከሀገር ውጪም።

ይህ በእንዲህ እንዳለ ግን አንዳንድ የዴሞክራሲ ምንነት ገና ያልገባቸው ተማሪዎችና መምህራን በዚህ ታላቅ በዓላችን ላይ ሲያላግጡና ሲያሾፉ ስመለከት በጣም እበሳጫለሁ። ሀገራችን በታሪኳ ለመጀመሪያ ጊዜ ዴሞክራሲን ለማየትና በተግባር ለማጣጣም በመታደሏ መደሰትና ጮቤ መርገጥ ሲገባን ካለፉት 25 ዓመታት ጀምሮ በማቆጥቆጥና ብሎም በማበብ እንዲሁም ሥር በመስደድ ላይ የሚገኘውን የኅብረ ብሔራዊ ዴሞክራሲና የፌዴራል ሥርዓት ለማጠየም የሚደረገው የአንዳንድ የዋህና የቀድሞ ሥርዓት ናፋቂዎች ተንኮል ይገርማል፤ ያሳዝናልም። የሚወራ ነገር ቢያጡ ዴምክራሲያዊው ሥርዓታችን “የጥቂት ዘረኞች ደባ የሚንጸባረቅበት ነው” በሚል አፍራሽና መሠረተ ቢስ ክስ ህዝባዊውን ሥርዓት ለማጠልሸት በከንቱ የሚንፈራገጡ ወገኖች አሉ - ግን በጣም ጥቂት በመሆናቸው የትም አይደርሱም።

እኔ በምሠራበት ትምህርት ቤት የአንድ ሕዋስ ተጠሪ ነኝ። መሪ ድርጅታችን ኢህአዴግ ከመሰል ፓርቲዎች ጋር በእኩል ዕድልና በእኩል ሜዳ ተወዳድሮ ካሸነፈ በኋላ በሥሩ ህዝቡን አንድ ለአምስት ሲያደራጅ ከቀዳሚ ተሰላፊ መምህራን መካከል አንዱ ነኝ። ስለዚህም በትምህርት ቤቴ የበኩሌን ድርሻ እያበረከትኩ እገኛለሁ። በተቃዋሚ ሚዲያዎች ራሴን ለማስተዋወቅ ጥረት ባደርግም እስካሁን ዕድል አልተሰጠኝም። ዛሬ የሞከርኩት ከተሳካ ግን ደስ ይለኛል። በዚያውም ልዩነቶችን ለማጥበብ ይረዳል። ሰሚ አጥቶ እንጂ በህዝባዊ ማዕበል የምርጫ ሣጥን በትረ ሥልጣን የጨበጠው ኢህአዴግ ሥልጣን መረከብ የሚችል ሌላ ብቁ ፓርቲ ወይ የፖለቲካ ኃይል ካገኘና ተወዳድሮ ካሸነፈው በሠላም ለማስረከብ ብዙ ጊዜ ቃል ገብቷል፤ በተግባርም አሳይቷል። ለምሣሌ የአሁኑ ጠቅላይ ሚኒስትራችን ከደቡብ ህዝቦች መመረጣቸው የሚያሳየን የፌዴራሉ ሥልጣን ከአነሳው የትግራይ ብሔር ወጥቶ ወደብዙኃኑ የደቡብ ብሔር ብሔረሰቦች የመዛወሩን ብሥራት ነው። ይህንን የሥልጣን ሽግሽግና የኃይል ሚዛን ለውጥ አሌ የሚል ሰው ቢኖር ማር እያላሱት ጨው እንግሊዝ ነው የሚል ዳተኛ ሰው ነው። ይገርማል።

በሰሞኑ የደረሰብኝ የተማሪና የመህምራን ለበጣና ፌዝ ግን መቼም ገጥሞኝ አያውቅም። በየክፍሉ ስገባ “እንኳን አደረሳችሁ” ስል “ለምኑ?” ይሉኛል። “እንዴ! ለታላቁ የግንቦት 20 በዓል ነዋ!” ስላቸው ይስቁብኛል። “ምን የሚያስቅ ነገር ተገኘ? ‹እንኳን አደረሳችሁ› ማለት ነውር ነው እንዴ?” ስላቸው አሁንም የበለጠ ይስቃሉ። ሊገባኝ አልቻለም። የሚስቁብኝ ደግሞ አንድም ሣይቀሩ ሁሉም ናቸው። ያደሙብኝም መሰለኝ። ወደ ፓርቲ ጽ/ቤት ሄጄም እንደዚሁ ብል ሣቁብኝ። የነሱን ሣቅ ግን ከዓይናቸው ውስጥ ነው ያነበብኩት። ምክንያቱም ዋናው ሰብሳቢያችን አቶ ጎይቶም ሓጎስ አብሮን ስለነበረ ደፍረው በጥርስ በሚገለጥ ሣቅ ስሜታቸውን ሊያሳዩኝ አልቻሉም። ብቻ ከሁኔታቸው እንደተረዳሁት ግን ለምንም ነገር እንዳልደረስን የሚያሳብቅ ሁኔታ ነው። ይህ ነገር የኢህአዴግን ያጎረሰ እጅ እንደመንከስ ነው።

ግን ለምን?

ተማሪዎቼን ስጠይቅ “ጋሼ፣ ይሄ በዓል እኮ ለእናንተና ለአለቆቻችሁ እንጂ፤ ለኛ ለተራው ህዝብ ከመከራና ስቃይ ውጪ ያመጣልን ነገር የለም። ስደት፣ እስራት፣ የኑሮ ውድነት፣ ግርፋት፣ ሞት፣ ሙስና፣ ዘረኝነት፣ … ነው ያመጣብን። ስለዚህ ለኛ እርግማናችን እንጂ በዓላችን አይደለም። የናንተው በዓል ነው። እዚያው ጨፍሩ፤ ከተራበው ህዝብ አፍ እየቀማችሁ በቢሊዮን የሚቆጠር ገንዘብ ለመጠጥና ለምግብ፣ ለሴትና ለዳንኪራ አውሉት፤ ነገ ግን እንደምትጠየቁበት እወቁ፤ እናንተ በአማራ ስም የምትነግዱ ብአዴኖች ደግሞ ያላወቅንባችሁ መስሏችኋል። በሣምንታት ዕድሜ ለደረቀ የመጠጥ ውኃ ፕሮጀክት ሁለት ቢሊዮን ብር ማውጣታችሁን ሰምተናል - በስማችን ያን ሁሉ በጀት ቀረጠፋችሁት። ውኃው ለምስኪኑ ገበሬ ቢደርስ እንኳ ብትበሉትም ምንም አልነበረም፤ ግን አንዲት ቡትሌ ውኃ ሣትሰጡት በጥቂት ሚሊዮኖች ሊያልቅ በሚችል ቁፋሮ ሰበብ ሁለት ቢሊዮን ብር መዝረፍ የግፍ ግፍ ነው፤ ልጅ አይውጣላችሁ” አሉኝ በማን አለብኝነት ድፍረት፤ ደግነቱ ምን እንደተናገሩ በውነቱ አልሰማሁም፤ የኮሚቴ አባል እንደመሆኔ ስለበዓሉ ዝግጅት እያሰላሰልኩ ነበር። በግማሽ ልብ እንደሰማሁት ግን እውነቱ ይህ እንዳልሆነ ሁላቸውም ልቦናቸው ያውቃል። እንዲህ መናገራቸው ራሱ የዴሞክራሲያችን ውጤት መሆኑን ያወቁት ደግሞ አይመስሉም። ከኢህአዴጋዊ ዴሞክራሲያችን ጋር ወደፊት!

የመምህራን ማረፊያ ውስጥ ያገኘኋቸው መምህራን ደግሞ “ለምኑ ነው ‹እንኳን አደረሳችሁ› የምትለን?” በማለት በቁጣ ነው ያበሻቀጡኝ። የለውጡን ጠቃሚነት ላስረዳቸው ብሞክርም አንድም ሰው የሰማኝ የለም። እንዲያውም አንዱ በንዴት እየፎገላ፤

“ሰማህ ወንድም ጓድ ካድሬ! እንዲያውም ከነፃነት በኋላ ግንቦት 20 የሚባል ቀን ከናካቴው እንደማይኖር ካሁኑ ላርዳህ፤ ቁርጥህን እወቅ። ግንቦት 19 ይባልና በቀጥታ ወደ ግንቦት 21 ይኬዳል። ስሟን ቄስ ይጥራውና ይቺ ግንቦት 20 የሚሏት ቀን ጳጉሜ ላይ ትደረብና ከነፃነት በኋላ የምትኖረው ጭንጋፏ የጳጉሜ ወር በያመቱ 6 ቀናት ይኖራታል፤ በአራት ዓመት አንዴ ደግሞ 7 ትሆናለች። ግም-ቦት ያኔ በድምሩ 29 ቀናት ብቻ ይኖሩታል ማለት ነው። ግንቦት 20 በአሜሪካና በአውሮፓ ኃያላን ሀገራት ቡራኬ የኢትዮጵያ ውድመት ለኢትየጵያውንና ለዓለም መርዶ የተነገረበት፣ የዚህች ታሪካዊ ሀገር መፈራረስ የታወጀበት ዕለት በመሆኑ ቀኒቷ የተረገመች ናት። አሁን ለይምሰልና ለታይታ ያህል የሚያከብሯትም እንደርሷው የተረገሙ ያንተው አለቆች ብቻ ናቸው። ስለዚህ ‹እንኳን አብሮ አደረሰን› የሚል ሰው አገኛለሁ ብለህ አትድከም። …” አለና ወሽመጤን ቆረጠው። ኧረ! የራሱ ወሽመጥ ይቆረጥ፤ የኔስ ገና ነው።

ከትምህርት ቤት ውጪም የትም ሄጄ “እንኳን አደረሳችሁ” ስል የማገኘው መልስ ተመሳሳይ ነው፤ መሣቅ የሚችሉ ይስቃሉ። የፈሩ ደግሞ ገላምጠውኝ በሆዳቸው የስድብ መዓት ያወርዱብኛል። አንዱ በሆዱ ምን አለኝ “አንት አጋሰስ ሆዳም! ቆይ ታያለህ! አሁን ሆድህን ሞላህና አብረህ ታረጠርጣለህ አይደል? ይህ ክፉ ቀን የማያልፍ መስሎህ ነው አይደል?”። እኔም በሆዴ “መስሎሃል! ሆዴስ አልሞላም። ግን እንደዚህ ያለ የደስታና የድሎት ዘመን ሀገርህ ኢትዮጵያ መቼም አታገኝም። እንደ ኢህአዴግ ፍትህንና ሠላምን ከነፃነትና እኩልነት ጋር አስማምቶ በሀገር ላይ የሚያነግሥ መንግሥት መቼም አይመጣም። የደርግና የቀደሙት መንግሥታት ህዝባቸውን በውሸትና በማስመሰል ቀጥቅጠው ይገዙ ነበር። ኢህአዴግ ግን በእውነትና በትክክለኛ ፍትሃዊ የዴሞክራሲ ሥርዓት አንዱን ጎሣ ከሌላው፣ አንዱን ኃይማኖት ከአንደኛው ሳያበላልጥና እንደቀድሞዎቹ ክፉዎች መንግሥታት ለማጋጨት ሳይሞክር ያስተዳድራል። ለዚህም ነው ዓለም አቀፉ ማኅበረሰብ በሚቸግረው ነገር ሁሉ እየረዳ አቅፎና ደግፎ የያዘው” አልኩ። ሰው በወደደው ይቆርባል። የርሱን ብሶት እንደሰማሁለት የኔን ምሥክርነት ሰምቶ ከሆነ እሰዬው ነው። ምነው ሁሉንም እንደኔ ልብ ሰጥቶት ኢህአዴግን ለተጨማሪ 100 ዓመታት በመረጠው!

ግን ሰዉን ምን ነካው? “እንኳን አደረሳችሁ” ሲባል ብሶቱን የሚያሰማው በርግጥ ምን ደርሶበት ይሆን? የኔ መነጽር ተበላሽቶ ይሆን፤ ወይንስ ህዝቡ እንዳለ ተሳስቶ ነው ልበል? የትኛውን እንደምል ጨነቀኝ፤ እስኪ ማለት ያለብኝን ንገሩኝ።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!