ይገረም አለሙ

Ginbot 20, 25th anv. ግንቦት 20፣ 25ኛ ዓመት

በእርስ በርስ ጦርነት ከሁለቱም ወገን የሚሞተው የአንድ ሀገር ልጅ ነው። አባትና ልጅ፤ ወንድምና ወንድም ከዛና ከዚህ ተሰልፈው የሚገዳደሉበት አጋጣሚም ይኖራል። ይህም በ17 ዓመቱ የርስ በርስ ጦርነት በግልጽ ታይቷል። ወያኔዎች ለድል የበቁት የኢትዮጵያን ሠራዊት ብቻ ሳይሆን ደርግን ተቃውመው ብረት ያነሱ፤ ነገር ግን ከዋሉ ካደሩ ለህወሓት ህልውና አስጊ ይሆናሉ ያሉዋቸውን ድርጅቶች ጭምር (ለምሳሌም ኢህአፓ፣ ኢዲዩ፣ …) ተዋግተው፤ ከዚህም አልፎ በህወሓትም ውስጥ የተለየ አስተሳሰብ ያራመዱ ወይንም ለሥልጣን ያሰጋሉ የተባሉትን እያሰቃዩና እየገደሉ በመሆኑ፤ መገዳደሉ በአንድ ሀገር ልጆች መካከል ከመሆን አልፎ በቤተሰብ መካከል ጭምር እንደነበር አሌ አይባልም። ለዚህ ደግሞ ሩቅ መሄድ ሳያስፈልግ በኢህአፓነቱ በወያኔ እንደተገደለ የሚነገረውን የአቶ በረከት ስምኦን ወንድም መጥቀስ ይቻላል።

በጦርነቱ ተጠቂ የሚሆነው ከሁለቱም ወገን ታጥቆ ለውጊያ የተሰለፈው ብቻ አይደለም፤ በውጊያው መካከል ሠላማዊ ዜጎች ሴት፣ ወንድ፣ ሕጻን፣ አዛውንት ሳያለይ ለጉዳት ይጋለጣሉ፤ የሀገር ሀብት ይወድማልና ይህ ሁሉ የሚያሳዝን እንጂ የሚያስፈነድቅ አይሆንም። ስለሆነም ሰዋዊ አስተሳሰብ የተላበሰ ኃይል በርስ በርስ ጦርነት አሸናፊ ሆኖ ሲወጣ የነበረውን አገዛዝ ለመለወጥ ከጦርነት ውጪ ሌላ አማራጭ ባለመኖሩ ወደንና ፈቅደን ሳይሆን ተገደን በገባንበት የርስ በርስ ጦርነት የገደልንም እኛ የሞትንም እኛ በመሆናችን ጦርነቱ ባደረሰው የሕይወትም ሆነ የንብረት ውድመት ከልብ እናዝናለን። ይህ መሰል ሁኔታ ዳግም በሀገራችን እንዳይፈጠርም ለሰብዓዊ መብቶች መከበር ለዴሞክራሲያዊ ሥርዓት እውን መሆንና ለሕግ የበላይነት መረጋገጥ አጥብቀን በመሥራት የጠፋውን እንክሳለን ማለት ነው የሚጠበቅበት።

ወያኔዎች ግን ግንቦት ሃያ ሲመጣ በየዓመቱ ለቀናት አንዳንዴም ለሳምንታት ሲተኩሱና ሲገሉ፤ ጋራ ሲቧጥጡና ሲማርኩ ወዘተ የሚያሳዩ ፊልሞቻቸውን እያሳዩን የሚያሰሙት የጀብዱ ዲስኩር፤ የሚያወርዱት የድል አድራጊነት ቀረርቶና ፉከራ የርስ በርስ ጦርነት አሸናፊ ሳይሆኑ ድንበር ተሻግሮ ሉዓላዊነት ደፍሮ የመጣን ወራሪ ድል ነስተው የመለሱ ነው የሚያስመስላቸው።

ነገሩን ይበልጥ አስገራሚ የሚያደርገው በአሸናፊነት ስሜት ሲታበዩና በጀግንነት ሲፎክሩ የምናይ የምንሰማቸው በአብዛኛው ከደደቢት እስከ ምኒልክ ቤተ መንግሥት በነበረው ትግል ድንጋይ ተንተርሰው ወዲ አኪር በልተው የታገሉት ሳይሆኑ አንድ ቀን ጠብ-መንጃ ነክተው የማያውቁት መሆናቸው ነው። እንደውም አንዳንዶቹ የድል አጥቢያ አርበኞች የወያኔን ዓላማ ተቀብለው ሳይሆን አያያዙን አይተህ ወደሚያደላው በማለት ከመጣው ተጠግቶ መኖርንና እያዘረፉ መዝረፍን የተካኑ አስመሳዮች ናቸው። እነዚህ ወያኔ ከሥልጣን ቢወርድ ሂያጁን እያወገዙ፤ መጪውን በማወደስ መስሎ ለማደር የሚቀድማቸው የለም።

ወያኔዎች ዛሬም ከሃያ አምስት ዓመታት በኋላ ራሳቸውን ከደርግ ጋር እያነጻጸሩ መሻላቸውን ለማሳየት መጣራቸውና በአሸናፊነት መፎከራቸው፣ ሠራነው የሚሉት የኢትዮጵያን ህዝብ ቀልብ የሚማርክ ውጤት ስለሌላቸውም ነው።

ይህም ሆኖ ለንጽጽር ከመረጡት ደርግ ጋር በህሊና ሚዛን በገለልተኛነት ስሜት ብናነጻጽራቸው የሚሻሉበት ጥሩ ነገር የመኖሩን ያህል የሚመሳሰሉበትም፣ የሚበልጡበትም ከዚህ አልፎ የሚያንሱበትም ብዙ መጥፎ ተግባር አለ።

ሰብዓዊና ዴሞክራሲያዊ መብትን በወረቀት በማስፈር ይበልጣሉ። በአፈናው ግን አይተናነሱም። ሰው በመግደሉም ቢሆን ከደርግ ጋር የቁጥር ሂሳብ ይገቡ ካልሆነ በስተቀር አይተናነሱም። እንደውም ደደቢት ጀምረው የገደሉት ከተቆጠረ እንደሚበልጡ አያጠራጥርም። በአገዳደል ግን ይለያያሉ፣ ደርግ ገድሎ በፍየል ወጠጤ ቀረርቶ በታጀበ መግለጫ ይፋ ያደርጋል። ወያኔዎች ገድለው ሌላ ሰበብ ይፈጥራሉ፤ አስክሬን ይደብቃሉ፤ ሲጋለጡም የቁጥር ክርክር ይገጥማሉ። ተቃውሞ ከበረታባቸውም ይቅርታ በማለት ለማለዘብ ይጥራሉ።

በቀደሙት ሥርዓቶች የብሔር ብሔረሰቦች ህዝቦች እስር ቤት በነበረችው ኢትዮጵያ በግንቦት ሃያ ድል ብሔር ብሔረሰቦችና ህዝቦች ራሳቸውን በራሳቸው የማስተዳደር መብት ተጎናጽፈዋል ነጻነታቸውን ተቀዳጅተዋል ብለው ይደሰኩራሉ። ነገር ግን በየክልሉ አስተዳዳሪ የሆኑት ድርጅቶች የህወሓት ሞግዚቶች እንጂ የህዝብ ወካዮች አለመሆናቸው ይጠቀስና በብዙ አካባቢዎች የተነሱና በኃይል ታፍናው የሚገኙ የራስ አስተዳደር መብት ጥያቄዎች በማስረጃነት ይቀርቡና ዲስኩሩን ፍሬ ቢስ ያደርጉታል።

በኢኮኖሚ እድገት ከደርግ መሻላቸውን ሲናገሩ ህዝቡ የዛሬና የትናንት ኑሮውን እያነጻጻረ፤ በገጠመው የኑሮ ውድነት እየተማረረ ኧረ የት ጋር እነማን ዘንድ ነው ይሄ እድገት የምትሉት በማለት ይጠይቃል።

ትምህርት ቤት ኮሌጅ አስፋፋን ብለው ከደርግ ጋር ሲፎካከሩ የትምህርት ጥራቱ ይሳለቅባቸዋል።

ደርግን የመናገር ነጻነት ጠር አድርገው ራሳቸውን ለመኮፈስ ሲዳዳቸው በየእስር ቤቱ በሚገኙት ጋዜጠኞች ይሳጣሉ፤ በክልል ከተሞች ቀርቶ አዲስ አበባ ላይ እንኳን የሚታዩት የህትመት ውጤቶች ከቁጥር የማይገቡ በመሆናቸው ይጋለጣሉ። ራዲዮና ቴሌቭዥኑ አልበቃ ብሎአቸው የኢንተርኔት የግንኙነት መንገዶችን ለመቆጣጠር በሚያፈሱት ገንዘብ ይሞገታሉ።

የነጻ ገበያ ኢኮኖሚ በማራመድ መሻላቸውን ሲናገሩ፤ ቴሌን የማይነጥፍ ጥገት ብለው ሙጥኝ ማለታቸው ይታሰብና፤ የወያኔ የንግድ ድርጅቶች ብዛትና የሚሠሩት ይጠቀስና፤ የሰሞኑ የሜቴክ ዝርፊያም በማስረጃት ይቀርብና የት ጋር ነው ነጻ ገበያ ይባላሉ።

ደርግን የአንድ ፓርቲ አገዛዝ ብለው እያወግዙ፤ ለቁጥር እንጂ ለተግባር እንዳይኖሩ ያደረጉዋቸውን ፓርቲዎች በማስረጃት በመጠቅሰ መድበለ ፓርቲ ሥርዓት እንደሚያራምዱ ሲናገሩ፤ የአንድ ፓርቲ ገዢነታቸውን ፓርላማው ያጋልጣቸዋል። ምርጫ አጭበርባሪነታቸው በማስረጃ ይቀርብባቸዋል። ሌላም ሌላም መጥቀስ ይቻላል። ስለሆነም ወያኔዎች ሃያ አምስት ዓመት ሙሉ ራሳቸውን ከደርግ ጋር እያነጻጸሩ መኮፈስን፣ የበረሃ ፊልማቸውን እያሳዩ ጉሮ ወሸባ ማለትን ተግባራቸው አድርገውታል። በሥልጣን ላይ እስካሉም ከዚህ ድርጊታቸው የሚላቀቁ አይመስልም።

ወያኔዎችን ሃያ አምስት ዓመት ሙሉ የሚያስፎክራቸው አምስት ሆነው ኋላ ቀር መሣሪያ ታጥቀው በጀመሩት ትግል የገበሬ ታጋይ ይዘው የሠለጠነና ዘመናዊ መሣሪያ የታጠቀውን የኢትዮጵያ ሠራዊት ማሸነፋቸው ነው። ለአሸናፊነት ለመብቃታቸው በምክንያትነት የሚጠቀሱ (ለምሳሌ በቅርቡ የተጋለጠው የእንግሊዟ ንግሥት ደብቅ ርዳታ) እንዳሉ ሆነው የተባለው እውነት ነው። ትንሽ የነበረው ትልቁን ለማሸነፍ በቅቶ እሱ በተራው ትልቅ ሲሆን፤ ግን ትንሽ ሆኜ ትልቁን ያሸነፍኩ እኔ ጀግናው የሚለው አስተሳሰቡ ላይ ቸክሎ መቆም የለበትም። እንደዛ ካደረገ ባሸነፈበት መንገድ መሸነፍን እየጠበቀ ነው። ነገር ግን ትልቅ የነበረው በእኔ ትንሽ በነበርኩት ሊሸነፍ የቻለው ለምንድን ነው ብሎ ማሰብ ግን ዛሬ ትንሽ ነው ተብለው በሚናቁት ላለመሸነፍ መፍትሄ ለመፈለግ ያስችላል። ወያኔዎች ግን የተያያዙት ደርግን በማሸነፋቸው መኩራት፣ በማንም የማይደፈሩ አድርገው በማሰብ መፎከርና የደደቢት ትልማችንን ተግባራዊ ከማድረግ የሚያቆመን አይኖርም በማለት የጀመሩትን መቀጠል ነው።

የወያኔዎችን ድርጊት አሳሳቢ የሚያደርገው በአሸናፊነት መፎከራቸው በማን አለብኝነት መኩራራታቸውና ከደደቢት ህልማቸው ንቅንቅ አለማለታቸው ብቻ ሳይሆን፤ ከውድቀታቸው በፊት በሚነገራቸው ተመክረው፣ ከሚያደርሱትና ከሚደርስባቸው ተምረው የማይመለሱ መሆናቸው ነው። እነርሱ ሥልጣናቸውን ከሚያጡ ኢትዮጵያ ብትፈራርስ የሚመርጡ በመሆናቸው ውድቀታቸው ሀገርንና ህዝብን ለጉዳት ይዳርጋል። ለዚህም ነው ለለውጥ የሚታገሉ ኃይሎች ወያኔን ከሥልጣን ማውረዱን ብቻ ሳይሆን የእሱ መውረድ ሊያደርስ የሚችለው አደጋ አነስተኛ እንዲሆን ለማድረግ ማሰብና መሥራት የሚኖርባቸው።

በእያንዳንዱ ርምጃቸውም ገደልን ብለው የሚፎክሩ፤ ማረክን ብለው የሚያቅራሩ፤ ድል አደረግን ብለው የሚኩራሩ መሆን የለባቸውም፤ ይህን ካደረጉ ከወያኔ አልተሻሉምና ድል ቢቀናቸው አዲስ ንጉሥ እንጂ ለውጥ መቼ መጣ የሚለው ዜማ ለእነርሱም የሚዘፈን ይሆናል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!