ክንፉ አሰፋ

Ras Dashin mountain. ራስ ዳሸን ተራራ

ራስ ዳሸን ተራራ ከትግራይ "ክልል" ካርታ የመውጣቱ አሲዮ ቤሌማ በብሔራዊ ቴሌቪዥን ሲነገር፤ "ደፍረውናል! ንቀውናል! ብታምኑም ባታምኑም በቁም ሞተናል!" የሚለው የኮሎኔል መንግሥቱ ንግግር በጆሮዬ ላይ አቃጨለ። ድፍረቱ እና ንቀቱ እንዳለ ሆኖ፣ በቁም የሞቱት ግን እኛ ሳንሆን እነሱ መሆናቸውን የሚያበስር የዜና እወጃ ነበር።

ነገሩ እንጂ ሁሉም የተለመደ ነገር ነው። ውሃ ይጠፋል፣ መብራት ይጠፋል፣ ስልክ ይጠፋል፣ ገንዘብ ይጠፋል፣ ኮንዶሚንየም ሕንጻም ይጠፋል። ይህ በህወሓት ፖለቲካ ጥርሳቸውን ላልነቀሉትም አዲስ ነገር አይደለም። ዘረፋም ለነሱ አዲስ አይደለም። መንግሥት ሆነው ከተቀመጡ በኋላ እንኳን 10 ቶን ቡና ሰርቀዋል፣ የመብራት ጀነሬተሮች ሰርቀዋል፣ ከብሔራዊ ባንክ ወርቅ ሰርቀዋል ... የህዝብን ድምጽም በተደጋጋሚ ሰርቀዋል። ተራራ ተሰርቆ ሲመለስ ግን የመጀመሪያው ነው።

ከኢትዮጵያ አንደኛ፣ ከአፍሪካ ደግሞ በከፍታ 4ኛው ተራራ ነው ራስ ዳሸን። ከሰሜን ጎንደር ከየዳ ወረዳ ተሰርቆ ለ25 ዓመታት ሙሉ ትግራይ ክልል ገብቶ ነበር። ወንጀሉ ወደ ትግራይ "ክልል" መግባቱ ብቻ አይደለም። አንድ ትውልድ እና በስነ-ምድር ሣይንስ በውሸት ታሪክ እንዲታነጽ መደረጉ እንጂ!

በነገራችን ላይ በመላው ሀገሪቱ መስከረም 2 ላይ መጀመር የነበረበት ትምህርት እስካሁን አልተጀመረም። ምክንያቱም ግልጽ ነው። ተማሪዎች እየተካሄደ ያለውን አመጽ መጨረሻው ደረጃ ያደርሱታል በሚል ስጋት ነው። በሁለተኛው ዓለም ጦርነት ግዜ እንኳን ትምህርት አልተቋረጠም ነበር። ሂትለር ትምህርት እንዳይቋረጥ አዝዞ ነበር። ጦርነት እየተካሄደም፣ ትውልድ እንዳይጠፋ ውስጥ ለውስጥ ትምህርት ይሰጥ ነበር። የኛዎቹ ጉዶች ግን ለአራት ወይንም አምስት ሰዎች ሥልጣን ጥማት ሲባል "ትምህርት ገደል ይግባ" ያሉ ይመስላል።

ለመሆኑ ማን ነው ወንጀለኛው? መምህሩ፣ ህዝቡ ወይንስ ሥርዓቱ? በመማሪያ ካሪኩለም ውስጥ ራስ ዳሽንን ትግራይ ካርታ ውስጥ አስገብተው፣ መጽሐፍም አሳትመው ሲያበቁ፤ የንግድ ድርጅቶቻቸውን ዳሽን ባንክ፣ ዳሽን ቢራ ... እያሉ የሰየሙት የ"አማራው" ተወካዮች ከዶሮ ያልተሻለ ጭንቅላት ይዘው፣ ስብዕናቸውን እና ማንነታቸውን ጥለው ፓርላማ የተባለው ጉረኖ ውስጥ ተሰግስገዋል።

አንድ ትውልድን በዘረኝነት መርዝ ብቻ ሳይሆን፤ በዚህ አይነት ውሸት ከመረዙ በኋላ ይቅርታ መጠየቁ ምን ይበጃል? በፈተና ግዜ ራስ ዳሽን ተራራ የሚገኘው በሰሜን ጎንደር ነው ብለው የወደቁትስ የአዕምሮ ካሳ ሊከፈላቸው ነው? የህወሓት ሰዎች አፍ እንጂ ጆሮ ስለሌላቸው ጥያቄዎች እንጂ አንድም መልስ አናገኝም።

ለመጀመሪያ ግዜ ከህወሓት አንደበት ይቅርታ የሚል ነገር ሰማን ልበል? አንድ የፖለቲካ ተንታኝ በአንድ ወቅት ሲናገር የበታችነት ስለሚሰማቸው ይቅርታን ከሌላው ይሿታል እንጂ ፈጽሞ አይሏትም እንዳለ ትዝ ይለኛል። ይህ አንደኛው መጨረሻውን ጠቋሚ መሆኑ ነው። በመጨረሻም እንዲህ ይሆናል። የፖለቲካ እስረኞች ይፈታሉ። ይቅርታ ማለት ይጀምራሉ። አጠር ያለች ረጅም የአብዮት ትንታኔ!

ይህ ይቅርታ ከመባሉ ሣምንታት በፊት፣ ሰላሳ ሚሊዮን አማራን ማጥፋት የሚችል ኃይል እንዳላቸው ደብረጽዮን በፌስ ቡክ ገጻቸው ጽፈውልናል። "አባ በጠጡ አቃቢቱን ..." እንዲሉ ይህንን የደብረጽዮን ጽሑፍ ኃይለማርያም ተቀብለው ሲያበቁ በመገናኛ ብዙኀን ቀርበው አንቦርቅቀውታል። "አብዮታዊ ሠራዊቱ ህዝቡን እንዲገድል ትዕዛዝ ሰጥቻለሁ!" ያሉ መሰለኝ። ለማመን እስኪከብድ ሂትለራዊ ቀረርቶ እና ፉከራም ሳይቀር አሰምተውናል። እነ አቦይ ስብሃት ታዲያ ጥጋቸውን ይዘው፣ በጨበጡት ብርጭቆ ሰንጥቀው እየመነጠሩዋቸው "ደፋር!" ሳይሏቸው አልቀረም። "ስልብ፣ በጌታው ብልት ይፎክራል!" ይላሉ አበው።

ህዝብን ለመጨረስ ትዕዛዝ አስተላልፈናል ያሉበት አንደበታቸው ገና ሳይዘጋ ከጎንደር የሰረቅነውን ተራራ መልሰናል። ይህንን ተራራ ትግራይ ላይ አኑረነው ስለነበር ይቅርታ! ብለው መናገራቸው ጨዋታ የመቀየር ስልት መሆኑ ነው። ህዝብ ቀድሟቸው ባይሄድ ኖሮ ሊሸውዱት ይሞክሩ ነበር። የተለመደ ነጠላ ዜማ፣ በተመሳሳይ ግጥም - በተመሳሳይ ዜማ ይዘው መከሰታቸው ግን ከእንሰሳ እንኳን ያልተሻሉ መሆናቸውን የሚያሳይ ነው። ህዝቡን የሚያዩበት መነጽር አሁንም አልቀየሩትም።

ራስ ዳሽንን ከይቅርታ ጋር ለባለቤቱ መልሰናል ብለዋል። ከዚህ ቀደምም የኦሮሞ ህዝብ ጥያቄ ተገቢ ነው ብለውናል። የኦሮሞ ህዝብ ጥያቄ ተገቢ መሆኑን የባነኑት የአማራ ህዝብ ሲነሳ መሆኑ ግን፤ የፖለቲካ ጨዋታውን ቀልድ አስመስሎታል። በዚህ አላበቁም፤ ለፈሰሰው የወገናችን ደም ካሳ እንደሚከፍሉም ተናግረዋል። የሰው ልጅን ሕይወት እንደ ዕቃ ቆጥረው ሲያበቁ፤ በገዛ ራሱ ገንዘብ ሊክሱት ቃል መግባታቸው የባሰ ያሳምማል። የሕይወት ካሳ አለ እንዴ? ለመሆኑ የአንድ ሰው ነብስ ስንት ያወጣል?

የራስ ዳሽን መመለስ ኢትዮጵያ አሁን የገባችበትን ችግር አይፈታውም። የህወሓትን ማንነትን ግን የበለጠ ይፋ አድርጎታል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!