ፈቃዱ በቀለ (ዶ/ር)

“በገሃነም ውስጥ እጅግ የሚያቃጥለው ቦታ የተያዘላቸው፤ የሞራል ቀውስ በሚታይበት ወቅት ለህዝብ ወገናዊነትን ለማያሳዩ ሰዎች ነው።” Dante

Bereket Simon

መግቢያ

ሰሞኑን ወያኔ የሚያወናብደው ራሱን ለማደስ እንደተዘጋጀና ጊዜም እንደሚያስፈልገው ነው። በአገዛዙ ውስጥ የአስተዳደር ብልሹነት አለ፣ የኪራይ ሰብሳቢነት ባህል ተስፋፍቷል፣ ሙስና ለቢሮክራሲው ማነቆ በመሆን ሥራ አላሠራም በማለት የሀገርን ዕድገት እየጎተተ እንደሆነ እየመላለሰ ይነግረናል። እነዚህንና ሌሎች የአስተዳደር ብልሹዎችን በየስብሰባውና በቴሌቪዥን “የውይይት መድረከ” ላይ የሚያወሩልን የአገዛዙ የመሪ ቁንጮዎች በሽታዎቹ ከሰማይ እንደወረዱ እንጂ እነሱ ለአጋዛዛቸው እንዲያመቻቸው ሆን ብለው የፈጠሩትና ከተበላሸ ኢ-ሳይንሳዊና ሀገር አፍራሽ የአሠራር ዘዴ ጋር እንደተያያዘ አድርገው አይደለም የሚያቀርቡት።

በሌላ አነጋገር፣ ለከፋፍለህ ግዛ እንዲያመች በፌዴራሊዝም መልክ ተዋቀረ የሚባለውና “የብሔረሰቦችን መብት የሚያስከብረው”፣ በመሰረቱ ግለሰብዓዊ ነፃነትን በማፈን በክልል መልክ በተዋቀረው ውስጥ የሚኖሩ ዜጎችን አቀጭጮ የሚያስቀረው አስተዳደር ለሙስናና ለአስተዳደር ብልሹ፣ እንዲያም ሲል ለአጠቃላይ ዕድገት ከፍተኛ እንቅፋት እንደሆነ ወያኔ በፍጹም ሊያምን አይፈልግም። ከዚህም ባሻገር፣ ይህ ዐይነቱ የግለሰብ ነፃነትን አፋኝና ፈጠራ እንዳይኖር ያደረገው ሥርዓት በየክልሉ ራሳቸውን ያደለቡ ዋር-ሎርዶችን እንደፈጠረና ለሁለ-ገብ ዕድገት እንቅፋት እንደሆነ ወያኔ በፍጹም የተገነዘበ አይደለም።

በሁለተኛ ደረጃ፤ በዓለም አቀፍ ኮሙኒቲው ግፊት ወያኔ በ1993 ዓ.ም. ተግባራዊ ያደረገው የተቅዋም መስተካከል ዕቅድ (Structural Adjustment Program) የሚባለው፣ አብዛኛውን ህዝብ በማደኽየት ጥቂቶችን የሚያደልበው የኒዎ-ሊበራል የኢኮኖሚ ፖሊሲ በሀገሪቱ ውስጥ የተዛባ ዕድገት ማምጣቱ ብቻ ሳይሆን፣ ሀገሪቱን የቆሻሻ መጣያ በማድረግ እንደ አንድ ሕብረ-ብሔርና እንደ ሕብረተሰብ እንዳትገነባ የሚያደርገው ፖሊሲ ዛሬ በሀገራችን ምድር ውስጥ ለሚታየው አጠቃላይ ኢኮኖሚያዊም ሆነ ማኅበራዊ ቀውስ ተጠያቂ እንደሆነ ወያኔ በፍጹም ሊረዳ አይችልም።

በሦስተኛ ደረጃ፤ የኢኮኖሚውን ቁልፍ ቁልፍ መስኮችን ለመቆጣጠርና ሀብት ለመዝረፍ እንዲያመች በአዲስ መልክ የተዋቀረው የመንግሥት የመጨቆኛ መኪናና፣ በየጊዜው ፋሺሽታዊ መልክ እንዲይዝ እየተጠናከረ የሄደው የአገዛዝ መሣሪያ በዓለም አቀፍ ደረጃ ከተዘረጋው የሚሊታሪ-ኢንደስትሪያል ውስብስብና (Complex) የፊናንስ ካፒታል ጋር በመቆላለፍ በሀገራችን ምድር ታይቶ በማይታወቅ ሁኔታ ነፃነትን ማፈኑና፣ ለእውነተኛ ዕድገትና ሕብረተሰብዓዊ ውህደትና ጥንካሬ ከፍተኛ እንቅፋት እንደሆነ አገዛዙና ካድሬዎቹ በፍጹም የተገነዘቡት አይመስልም። ከዚህ ስንነሳ የብልሹ አስተዳደርና ሙስና ከላይ የተጠቀሱት፣ የክልል አስተዳደር፣ የኢኮኖሚው ፖሊሲና የመንግሥቱ መኪና አወቃቀር ዕይንታዎች (Manisfestations) ወይም ውጤቶች እንጂ በራሳቸው እንደ ዋና ምክንያት ሊታዩ የሚችሉ አይደሉም።

ስለሆነም በሀገራችን ምድር አማራ በመባል በሚታወቀውና በኦሮምያ ክልል የሚካሄዱትና በየቦታው እየተስፋፉ የመጡት ህዝባዊ እንቅስቃሴዎች በመሰረቱ የነፃነት ጥያቄዎች ሲሆኑ፤ ወደ ውስጥ ገባ ብለን ስንመለከት ደግሞ ላይ በተዘረዘሩት መልክ በተዋቀረው ዘራፊና (Predatory State) ፋሺሽታዊ አገዛዝ ስር አንገዛም፣ ይህ ዐይነቱ አወቃቀር የአንድነታችን፣ የኢኮኖሚ፣ የባህልና የማኅበረሰብ ዕድገታችን፣ የህልውናችን፣ የብሔራዊ ነፃነታችን ፀር በመሆን ታሪክ እንዳንሠራ የሚያግዱን ናቸው በማለት የተነሱ ህዝባዊ አመጾች ናቸው። ስለሆነም ይላል ጠቅላላው የኢትዮጵያ ህዝብ፣ ወያኔና ካድሬዎች የውጭ ኃይሎች ተጠሪዎች በመሆን የውክልና ጦርነት በማካሄድ እንደ ማኅበረሰብና እንደ ሀገር እንዳንኖር እያደረጉን ነው፤ የውጭ ኃይሎች ገብተው እንዲፈተፍቱ መንገዱን በማዘጋጀት ርስ በርሳችን እንድንጨራረስ ሊያደርጉን ነው በማለት ነው በአገዛዙ ላይ በአንድነት ከዳር እስከዳር የተነሱበት። ይህንን ሀገር አፍራሽ ሂደቱን ግን ወደ ተራ የአስተዳደር ብልሹነት በመቀየርና ለማስተካከል ይችል በማስመሰል ህዝቡን በማወናበድ ላይ ይገኛል። ከዚህ ስንነሳ ተሃድሶ የሚለውን ሳይንሳዊና ፍልስፍናዊ አባባል ጠጋ ብለን እንመልከት። በእርግጥ ወያኔ እንደሚለው ራሱን ማደስ ይችላል ወይ? ፅንሰ-ሃሳቡ በየጊዜው እየተደጋገመ በመሰማቱ አብዛኛው ህዝብ ተሃድሶ ማለት ምን ማለት እንደሆነ እንዲረዳው ትንሽ ማተቱ የሚከፋ አይመስለኝም።

ተሃድሶ ማለት ምን ማለት ነው?

በመሰረቱ ተሃድሶ ማለት ቀድመው የነበሩ ነገሮችን በአዲስ መልክ ከአንድ ሁኔታ ጋር በማቀናጀት ለአንድ ሕብረተሰብ ልዩ ዕምርታን መስጠት ማለት ነው። ተሃድሶ የሚባለው ፅንሰ-ሃሳብ ቃል በቃል ሲተረጎም ሬናሳንስ ሲሆን፣ ለመጀመሪያ ጊዜ በጣሊያን ምድር በ15ኛው ክፍለ-ዘመን ተግባራዊ የሆነና፣ የግሪክን ፍልስፍና፣ የማቲማቲክስን፣ የሳይንስን፣ የአርክቴክቸርና ሌሎችንም ግኝቶች ወይም ፈጠራዎች መሰረት ያደረገ ሁለ-ገብ የሆነ ምሁራዊ እንቅስቃሴ ነው። ጸንሳሺዎቹም በ14ኛው ክፍለዘመን መጨረሻ ላይ ኮንስታንቲኖፕል የሚባለውና ዛሬ ኢስታንቡል በመባል የሚታወቀው ከተማና ዛሬ ቱርክ የሚባለው ግዛት ሲወረር ሸሽተው ወደ ጣሊያን የሄዱ ቄሶችና ፈላስፋዎች፣ ወይም ደግሞ ኒዎ-ፕላቶናውያን (Neo-Platonic) በመባል የሚታወቁ ምሁሮች የአዳበሩትና የአስፋፉት ሰፋ ያለ የጭንቅላት እንቅስቃሴና ተግባራዊም የሆነ ነው።

ይህ አዲሱ መንፈስን በማደስ የተጀመረው ምሁራዊ እንቅስቃሴ እነ ዳንቴ ካዳበሩት እንደ የአምላኮች ኮሜዲ ከመሳሰሉት ሊትሬቸሮች ጋር በመዋሃድ ልዩ ዕምርታን በማግኘት በዚያን ጊዜ በጣሊያን ምድር የተዘረጋውን አስከፊ ሥርዓትና ብልሹ የሆነ የህዝብ የአኗኗርን ስልት በመቀየር የህዝቡን ጭንቅላት በማደስ ኋላ-ቀር ከሆነው አስተሳሰቡ በመላቀቅና ራሱን በራሱ በማግኘት ዕውነተኛ ነፃነትን እንዲጎናጸፍ በማድረግ ሁለንታዊ ዕድገት እንዲመጣ በር የከፈተ ሰፋ ያለ ሕብረተሰብዓዊ እንቅስቃሴ ነው። የዚህ ውጤት እነ ጋሊሊ፣ እነ ዳቪንቺና ሚካኤል አንጀሎና፣ እንዲሁም በሺህ የሚቆጠሩ ሳይንቲስቶችና የኦፔራ ሰዎችና ሰዓሊዎች ብቅ እንዲሉ ያደረገ ነው። በሌላ አነጋገር፣ ሬናሳንስ ወይም ተሃድሶ የሚባለው መንፈስን ከዕውነተኛ ዕውቀት ጋር በማገናኘትና በማደስ የሰው ልጅ ዕውነተኛ ነፃነቱን በመጎናጸፍ ራሱን በልዩ ልዩ መልክ እንዲገልጽና፣ አንድ ማኅበረሰብ እንዲመሰርትና በሰላምና በስምምነት እንዲኖር ያደረገና የሚያደርግ ሳይንሳዊና ፍልስፋናዊ ሂደት ነው። የሬናስን አፍላቂዎችና በመቀጠልም ያዳበሩትና ልዩ ዕምርታን የሰጡት ምሁሮች በመሰረቱ ምንም ወንጀል ያልሠሩና፣ መንፈሳቸውን ከእግዚአብሔር ጋር በማቀራረብ በኮስሞስ በማስመሰል በምድር ላይ ዕውነተኛ ገነትን ሊመሰርቱ የቻሉና፣ ማቴሪያላዊ ዓለምን ከመንፈሣዊ ጋር በማዋሃድ የሰው ልጅ በአርቆ አሳቢነት እየተመራ ሚዛናዊና ጥበባዊ ኑሮን እንዲኖር ሁሉን ነገር ያዘጋጁና ተግባራዊ ያደረጉ ታላቅ ምሁራን ናቸው።

በሌላ አነጋገር፣ እንደ ወያኔ ከፋፋይ፣ ጨፍጫፊ፣ ህዝብን ከህዝብ ጋር በማጣላት አንድ ህዝብ በዘለዓለማዊ ትርምስ ውስጥ እንዲኖር ያደረጉ አይደሉም። በዘራፊነትና ባልተስተካከለ ዕድገትም የሚታሙ ሳይሆን፣ ለመጀመሪያ ጊዜ ዕውነተኛና ሃርሞኒየስ የሆነ የአርክቴክቸር ሥራን ተግባራዊ እንዲሆን ያደረጉና፣ ለጠቅላላው የምዕራብ አውሮፓ ሥልጣኔ መሰረት የጣሉ ናቸው። ከዚህም በመነሳት ነው በኋላ ካፒታሊዝምና የኢንዱስትሪ አብዮት ተግባራዊ መሆን የቻሉትና፣ በምዕራብ አውሮፓ ምድር ውስጥ ሕብረ-ብሔሮች እንዲመሰረቱና እንዲጠናከሩ የተደረገው። ይሁንና ግን የሬናሳንስ መልዕክት ካፒታሊዝምን ማስፋፋት ሳይሆን፣ የየግለሰቦችን ዕውነተኛ ነፃነት በማወጅ በልዩ ፈጠራ ዘዴ ሚዛናዊ ዕድገትን ማምጣት ነው። የካፒታሊዝም በአሸናፊነት መውጣትና የሬናሳንስ መሰረተ-ሃሳቦች ቀስ በቀስ መደምሰስ ወይም መቀልበስ ከኃይል አሰላለፍ ለውጥ ጋር የተያዘ ነው ማለት ይቻላል።

ወደ ወያኔው ተሃድሶ ስንመጣ ግን፤ በመጀመሪያ ደረጃ በድርጅቱ ውስጥ የተጠቃለሉት ግለሰቦች ከጦር ሜዳ ጀምረው በደም የተጨማለቁና የሰው ልጅ ሕይወትም ቅንጣት የማይሰጣቸው ሰይጣናዊ ባህርይ የተዋሃዳቸው ናቸው ማለት ይችላል። በዓለም ታሪክ ውስጥ በሰው ልጅና በሕብረተሰብ ዕድገት ታሪክ ውስጥ ያልታየን ድርጊት የፈጸሙና ድርጊታቸው በሙሉ ሕብረተሰብን ማከረባበትና ሀገርንም ማውደም ነው። ታሪክን ማፈራረስና፣ አንዱ የሕብረተሰብ ክፍል ከሌላው ጋር እንዳይገናኝና እንዳይግባባ ልዩ ልዩ ፊደሎችን በመቅረጽ ቅጥ ያጣ ኑሮ እንዲኖር ባህላዊ ያደረጉና ፀረ-ዕድገትን ያስፋፉ ናቸው። በሌላ ወገን ግን እነ ዳንቴ በአስራ አራተኛው ክፍለ-ዘመን ያደረጉት በዚያን ጊዜ የኢጣሊያን ህዝብ በተለያየ ዲያሌክት ይነጋገር ስለነበርና መግባባትም ስላልነበር፣ አንድ ሁሉንም ሊያግባባ የሚችል ሰዋሰውና ቋንቋ በመፍጠር ለጣሊያን ዕድገት ዕምርታን የሰጡ ናቸው። ይህም ማለት የወያኔው አካሄድ የዚህ ተቃራኒና የአንድን ህዝብ መተሳሰር በማፍረስ በእንግሊዞች የቋንቋ ምሁራን፣ በመሰረቱ ተንኮለኞች በመታገዝ በሀገራችን ምድር ተግባራዊ ያደረገ እጅግ አደገኛ አካሄድ ነው።

ውጤቱ እንደምናየው፣ በተበላሸ ሁኔታ ወይም የአኗኗር ስልት፣ በተዝረከረከ የከተማ አወቃቀር፣ በአንድ የኢኮኖሚ ዘርፍ ላይ ብቻ በመመካት በተለያየ የምርት ውጤት ሊገለጽ የሚችል የሥራ-ክፍፍል እንዳይኖር ያደረገና፣ ብቃትነት ያላቸው ኢንስቲትዩሽኖች እንዳይመሰረቱ በማድረግ በየአካባቢው የሰውና የተፈጥሮን ሀብት በማንቀሳቀስ በሳይንስና በቴክኖሎጂ ላይ የተመሰረተ ዕውነተኛ ህዝባዊ ሀብት (National Wealth) እንዳይፈጠር ያደረገ ነው። በዚህም መሰረት በአንድ አካባቢና በሀገሪቱ ምድር ውስጥ ሥርዓት ባለው መልክ በኢንዱስትሪ ተከላ ላይ የተመሰረተ፣ ከሌሎች መስኮች ጋር የተያያዘ የውስጥ ገበያ (Home Market) እንዳይዳብር ያደረገ ነው። በሳይንስና በቴክኖሎጂ ላይ የተመሰረተ የኢንዱስትሪ እንቅስቃሴ በሌለበት ሀገርና፣ የውስጥ ገበያም እንዳይዳብር ከውጭ ኃይሎች ጋር በመቆላለፍ ሻጥር በሚሠራበት ሀገር ውስጥ አንድ ጠንካራ ሀገር ወይም ሕብረ-ብሔር መመስረት በፍጹም አይቻልም። የወያኔም ተልዕኮ ይህ ሲሆን፣ ከበስተጀርባ ሆነው የሚበውዙት፣ የእንግሊዝ፣ የአሜሪካንና የጀርመን የስለላ ድርጅቶችና፣ በተራድዖ ስም የሚንቀሳቀሱት መንግሥታዊና መንግሥታዊ ያልሆኑ ድርጅቶች ናቸው። ሐቁ ይህ ሆኖ ሳለ በዚህ ዐይነት ሁኔታ ውስጥ ምን ዐይነት ተሃድሶ ማካሄድ ይቻላል?

ጭፍጨፋና ተሃድሶ እዚያው በዚያው ወይስ ማጭበርበር!

እንደምንከታተለው ወያኔ በአንድ በኩል ራሴን ለማደስ ዝግጁ ነኝ፣ በዚህም ላይ ዕቅድ በማውጣት ላይ ነኝ ይላል። እዚያው በዚያው ደግሞ እጅግ በሚያሰቅቅ ሁኔታ ምስኪኑን ህዝባችንን ይጨፈጭፋል። በየቦታው የኣግአዚ ወታደሮችን በመላክ ፋሺሽታዊ ጭፍጨፋውን ተያይዞታል። በዚያው መጠንም ሌሎች እምቢ ያሉትን ሰላማዊ ዜጎችን በማፈናቀልና ሀብታቸውን በመቀማት የቁም ስቅላቸውን ያሳያቸዋል። በሌላ አነጋገር፣ የወያኔ አገዛዝ በየቦታው እየጋለ የመጣውን ህዝባዊ ብሶትና ቆራጥነት የተሞላበትን ትግል በውጭ የስለላ ድርጅቶች በመታገዝና በመመከር ጭፍጨፋውን በየቦታው እያካሄደ ነው። ይሁንና ቆራጡ የጎንደርም የሆነ የኦሮሞ ወንድማችንና ሌሎችም የሕብረተሰብ ክፍሎች ዕምቢተኛነታቸውን በማስተጋባት ለአንዴም ለመጨረሻም ጊዜ እየተፋለሙት ይገኛሉ። በአንዳንድ አካባቢዎችም ድልን እየተጎናጸፉ ነው።

በዚህ ዐይነት መልክና ቁልፍ ቁልፍ የኢኮኖሚ ዘርፎች እንደ አንድ ኩባንያ በተደራጀ መልክ ከአንድ ብሔረሰብ በተውጣጡ፣ ሰውነታቸው በደም በታጠበ ግለሰቦች በተያዘበት ሀገርና፣ በግለሰብ ላይ የተመሰረተ የኢኮኖሚ እንቅስቃሴ በሌለበት ሀገርና፣ መሰረታዊ ለውጥ ለማምጣት እንዳይቻል አንድ አገዛዝ በውጭ ኃይሎች እየታገዘ መንግሥታዊ መኪናውን ፋሺሽታዊ በሆነ መልክ ባዋቀረበት ሀገር እንዴት አድርጎ ተሃድሶን ማምጣት ይቻላል? በፍጹም የማይታለምና የማይቻልም ነው። አንድ በኮሜዲ መልክ የቀረበ ጥንቆላ፣ አንዷ ታማ ጠንቋይ ቤት ትሄዳለች። ጠንቋይዋ የመንፈስ በሽታ የተናወጣትን ለማዳን ያልሞኮረችው ነገር የለም። በመጨረሻ የደረሰችበት ድምዳሜ ከአቅሟ በላይ እንደሆነና መፈወስም እንዳማይቻል ነው። የወያኔም የጭንቅላት በሽታ እንደዚህ ነው። አጥፍቼ ልጥፋ በሚለው እርኩስ አስተሳሰብ የተለከፈ ስለሆነ መፈወሻ የሚገኝለት አይደለም። መፈወሻውም በዕውቀት ላይ የተመሰረተ ስትራቴጂያዊ ህዝባዊ እንቅስቃሴና በሱ ላይ የተመሰረተ በማያዳግም መልክ የሚያወድመው ርብርቦሽ ነው። በሌላ ወገን የወያኔን ነፍስ ለመዝራት በልደቱ አያሌው የሚመራው ኢዴአፓና አንዳንድ ግለሰቦችና ድርጅቶች ነን ባዮች የማያደርጉት ሽር ጉድ የለም።

ልደቱና ሌሎች ግለሰቦችና አንዳንድ ድርጅትን እንወክላለን የሚሉት በሀገራችን ምድር ውስጥ እንደዚያ ያለ ጭንቅላትን የሚዘገንንና እንቅልፍ የሚያሳጣ ድርጊት በህዝባችን ላይ እየተፈጸመ ባለበት ወቅት፤ ወያኔ በጠራው “የመወያያ ስብሰባ” ላይ መገኘታቸው የቱን ያህል የህዝባችን ሁኔታ እንደማይመለከታቸው ነው የሚያረጋግጠው። እነዚህ “ተቃዋሚ” ነን የሚሉ ኃይሎች እንደዕውነቱ ከሆነ ባለፉት ሃያ አምስት ዓመታት በሀገራችን ምድር ምን እንደተካሄደ የገባቸውና የተገነዘቡም አይመስልም። ለመረዳትም የሚፈልጉ አይደሉም። የዲሞክራሲንና የነፃነትን ጉዳይ ከተራ ምርጫና ፓርላሜንት ውስጥ ተቀምጦ ከመዘባነን ጋር ነው የሚያያይዙት። በዚህም መሰረት ማንም ውክልና ሳይሰጣቸው አሜሪካና አውሮፓ እየመጡ የዓለምን ህዝብ (International Community) እንወክላለን ለሚሉት የሚያሰሙት እሮሮ በመሰረቱ የህዝባችንን የዕውነተኛ የነፃነት ትግል የሚያጨናግፍ ነው። አካሄዳቸው በሀገራችን ምድር ውስጥ ዕውነተኛ ዕድገት እንዳይመጣ የሚያደርግ ነው። እነዚህ ተቃዋሚ ነን ባዮች የዓለም ፖለቲካ አወቃቀርና ብወዛ በፍጹም የገባቸው አይመስልም።

ያም ሆነ ይህ፣ ወያኔ ተሃድሶ እያለ የሚያናፍሰው ወሬና የሚያካሂደው የእነወያይ ስብሰባ ማዘናጊያና ራሱን ማጠናከሪያ ዘዴ ነው። አገዛዙ የሚታደስም የሚታከምም አይደለም። ህፃናትን ሳይቀር በስናይፐር የሚገድልና ሴትን ቤንዚን በማርከፍከፍ አሰቃይቶ የሚገድል አገዛዝ በፍጹም ሊታደስ አይችልም። ዕውነተኛ ተሃድሶ ሊመጣ የሚችለው ከዚህ አገዛዝ ባሻገር በሐቀኛ ሀገር ወዳዶችና በተገለጸላቸው ምሁራን አማካይነት ነው። ይህም ቢሆን ከህዝብ ትግል ጋር መዋሃድና የህዝቡን ኃይልነት የሚያበስር መሆን አለበት። ከዚህም ጋር ተያይዞ የመንግሥቱ የመጨቆኛ መሣሪያ እንዳለ በመንኮታኮት ለዕድገት በሚያመች መልክ ከማንኛውም የውጭ የስለላ ድርጅት ነፃ በሆነ መልክ መደራጀት አለበት። ከህዝብ ጋር የሚሄድና የሚዛመድ እንጂ በህዝቡ ላይ ጠበንጃውን የሚቀስር አገዛዝ አይደለም ህዝባችንና ሀገራችን የሚመኙት። ከዚህም ባሻገር ዕውነተኛ ተሃድሶ በሁለ-ገብ የትምህርት ዘመቻ የሚታገዝ ሲሆን፤ የኢኮኖሚ ፖሊሲውም በመንግሥትና በህዝብ መሀከል በመደጋገፍ ላይ የተመሰረተ ሁለ-ገብ (Holistic Economic Policy) የኢኮኖሚና የማኅበራዊ ፖሊሲ ተግባራዊ የሚሆንበት ነው። በሌላ አነጋገር፣ አገዛዙ እስካሁን ድረስ የሚመራበትን የኢኮኖሚ ፖሊሲና የዓለም አቀፍ ኢንስቲትዩሽኖችን ምክር በመጣል ርስ በርሱ የተሳሰረ የውስጥ ገበያን ሊያስገነባ የሚያስችል የኢንዱስትሪ ተከላና የቴክኖሎጂ ምጥቀትን የሚያመጣ ፖሊሲ የተሃድሶ መሰረተ-ሃሳብ ናቸው።

በመጀመሪያ ግን ይህን አገዛዝ ገርስሶ በመጣል፣ ህዝባችንን ለሥራ በማንቀሳቀስ መሰረታዊ ፍላጎቶቹን (Basic Needs) ሊያሟላ የሚችልበትን ሁኔታ ማደራጀት አለብን። በዚህ መልክ ብቻ ነው ወደ ፊት መግፋትና ቀስ በቀስም ህዝቦቿን ማስተናገድ የምትችልና የተከበረች ኢትዮጵያን መገንባት የሚቻለው። ይህንን የተቀደሰ ዓላማ ተግባራዊ ለማድረግ በየቦታው በተሰበጣጠረ መልክ የሚካሄደው እንቅስቃሴ በአንድ የአስተሳሰብ ክልል ውስጥ (Unity of Thought) መካተት አለበት። ሁሉም በየፊናው ለሥልጣን መታገሉን አቁሞ፤ በአንድ ማዕከላዊ አመራር ስር በመመራት ወደ ድል ለማምራት መዘጋጀት አለበት። እየተሰበጣጠሩ መታገልና፣ የሚሆን የማይሆን ሰበብና ተንኮል እየፈጠሩ ዝናን ለማግኘትና ለመታወቅ መሞከር የህዝባችንን ሰቆቃ ያራዝመዋል። የሀገራችንን መበታተን ያፋጥነዋል። ይህ ደግሞ የማንኛችንም ምኞትና ፍላጎት አይደለም። ስለዚህ ከመሰባሰብና ተወያይቶ በአንድ ሃሳብ ዙሪያ ከመታገል በስተቀር ሌላ አማራጭ ሊኖር አይችልም።

ፈቃዱ በቀለ (ዶ/ር)
This email address is being protected from spambots. You need JavaScript enabled to view it.
ጥቅምት 17፣ 2016

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!