Ethiopian flagይገረም አለሙ

ከአሥራ አምስት ዓመት በፊት ነው ኢዴፓ በቅሎ ቤት በሚገኘው ጽ/ቤቱ ዕለተ ግንቦት 20ን አስመልክቶ አንድ ፕሮግራም አዘጋጅቶ ተገኝተናል። ከተናጋሪዎቹ አንዱ የነበሩት የወቅቱ የፓርቲው ሊቀመንበር ዶ/ር አድማሱ ገበየሁ ባደረጉት ንግገር ውስጥ፤ “መፍራትና መጠንቅ ካለብን ሰንደቅ ዓላማ ለብሰው እኛኑ መስለውና ተመሳስለው ሀገር የሚያፈርሱትን በመካከላችን የሚገኙትን ነው” የሚለው አረፍተ ነገር በአእምሮየ ተቀርጾ አብሮኝ ይኖራል።

ከሰፊው ኢትዮጵያዊ ማዕድ ይልቅ በትንሽ ገበታ መብላት አስመኝቶአቸው፤ ይህንኑ ያሳካልናል ባሉት መንገድ የሚደነቃቀፉትም ሆኑ፤ ዛሬ እየሞተ ካለው ወገናቸው ሞት ይልቅ የዛሬ መቶ ዓመት ተፈጸመ የሚሉት በፈጠራ ድርሰት የተቀባባ በደል የሚያማቸውና በዛን ዘመን ተፈጸመ ለሚሉት ዛሬ ማንን እንደሚበቀሉ ባይታወቅም፤ ለበቀል ያሰፈሰፉ፣ ለመለየት የሚጣደፉ፣ ሌሎች ሰበቦችንና ምክንያት እየፈጠሩ ኢትዮጵዊነትን የሚያኮስሱና፤ ከቻሉም ሊያጠፉ የሚከጅሉ ወያኔን ጨምሮ በንግግራቸውም በተግባራቸውም ይታወቃሉና ሀገር የማፍረስ አደጋቸው አምብዛም ነው።

የእነዚህ አደጋ ሊከፋም ሊሰፋም የሚችለው ኢትዮጵያን የሚለው ወገን እነዚህን ወገኖች በደንብ ለይቶ አውቆና ተጠንቅቆ ተባብሮና ተጠናክሮ ሕልማቸው እንዳይሳካ መሥራት ካልቻለ ብቻ ነው። ከላይ የተጠቀሱት ቅዱስ አስተሳሰብ የራቃቸው ወጎኖች በቁጥር ትንሽ፣ ራዕያቸው ጠባብ፣ ፍላጎታቸው ከራስ ጥቅም መሻት ያልዘለለና እንወክለዋለን የሚሉትን የሕብረተሰብ ክፍል እንኳን የማያማክል በመሆኑ፤ ኢትዮጵያን የሚለው ወገን ካልተዘናጋና እሱም ርስ በርሱ መስማማት ተስኖት ምቹ ሁኔታ ካልፈጠራላቸው በስተቀረ በምንም መልኩ ሕልማቸው ሊሳካ ቀርቶ ስጋት ሊሆኑ አይችሉም።

በወያኔ አብዮት ማግሥት በተፈጠረ የፖለቲካ ስካር፤ አሁን ከምንሰማቸው የባሱ ነገሮች በመንግሥት መገናኛ ብዙኃን ሳይቀር ሲነገሩ ሰምተናል፤ ተጽፎ አንብበናልም። ግና ስካሩ ሲበርድ እንኳን ንግግሩ ተናጋሪዎቹ በቦታቸው አልተገኙም። እናም አንድ ነገር በተከሰተ ቁጥር ፍላጎታቸው የሚሳካ የሚመስላቸው ቅዠታሞች በየመድረኩ ቅዠታቸውን ቢናገሩና መሰሎቻቸው ቢያጨበጭቡላቸው፤ እነርሱንም ሆነ ተከታዮቻቸውን ይበልጥ እንድናውቃቸውና ቀይ መስመር ውስጥ እንድናስቀምጣቸው ይረዳናል እንጂ፤ ስጋት ሊሆኑን አይችሉም። እንደውም እንዲህ አይነቶቹን ሌሎቹንም ሰዎች ይበልጥ እንዲታወቁ በየመድረኩ እየጋበዙ ማናገር ነው። አበው ሆድ ያባውን ብቅል ያወጣዋል እንዲሉ የፖለቲከኛ ሆድ ያባውን የሚያወጣው ጭብጨባ ነውና የውስጣቸውን አንድም ሳያስቀሩ እንዲናገሩ በጭብጨባ ማሰከር ነው። ከዛ በደንብ እናውቃቸዋለን፤ ባወቅናቸው መጠንም እንጠነቀቃቸዋለን፤ እንጠብቃቸዋለን። ሰው የሚያስቸግረው ማንነቱና ምንነቱ እስኪታወቅ ነው ይባል የለ!

ይልቅ በንቃት መከታተል ቃል ከተግባር እየመዘንን መለየት ያለብን ዶ/ር አድማሱ ገበየሁ ከአሥራ አምስት ዓመት በፊት እንደተናገሩት፤ ሰንደቅ ዓላማ ለብሰው ሀገር ለማፍረስ ውስጥ ውስጡን የሚያደቡትን። እንደዚህ አይነቶቹ ሰዎች ወገኔ ተበደለ፣ ሀገሬ ተጠቃች፣ ብለው እንባ ለማንባት የሚገዳቸው አይደሉም። ሰንደቅ ዓላማ ለብሶ ለመፎከር ወያኔን ጥንብ ርኩሱን እያወጡ ለመስደብ ወደር አይገኝላቸውም።

ይህን አድራጎታቸውን እያየንና እየሰማን፤ ከእነርሱ ወዲያ ሀገር ወዳድ ለአሳር፣ ከእነርሱ በላይ ታጋይ ከየት ሊገኝ ወዘተ በማለት አድናቆታችንን እየገለጽን ከሆኑት አይደለም ፈጽሞ ሊሆኑት ከሚችሉት በላይ እያሞገስንና እያወደስን፤ እውነተኛ ማንነታቸውን ለመደበቅ ከሚለብሱት ሰንደቅ ዓላማ በላይ ከፍተኛ ሽፋን እንሰጣቸዋለን። እናም ሳናውቅ እየተከተልናቸው ብቻ ሳይሆን፤ እየደገፍናቸው ሀገር ለማፍረስ፣ ይህም ባይሆን የኢትዮጵያ ህዝብ ከአገዛዝ እንዳይላቀቅ ለሚፈጽሙት ድብቅ ዓላማቸው አባሪ ተባባሪ ስንሆን ኖረናል፣ አሁንም እንደዛው ያሉ ብዙዎች ይኖራሉ።

እስቲ ዛሬ በዚህ ወሳኝ ወቅት ሳንደባበቅ ደፈር ብለን ለመነጋገር እንሞክር። ሰንደቅ ዓላማ ለብሶ የሚፎክረው፣ በወያኔ ላይ የውግዘት የቃላት ናዳ የሚያወርደው፣ ወያኔ ዜጎችን በገደለ ቁጥር ያዙኝ ልቀቁኝ የሚለው ወዘተ ሁሉ በርግጥ ለሀገር ነጻነትና ለዴሞክራሲያዊ ሥርዓት ግንባታ የሚታገል ቢሆን ኖሮ፤ ዛሬ በምንገኝበት ሁኔታና ደረጃ እንገኘ ነበር።

በእውነት ሰንደቅ ዓላማ ለብሶ ኢትዮጵያዊነትን የሚዘምረው ሁሉ ሃያ አምስት ዓመታት በህዝብ ላይ የተፈጸመው ይቅርና፤ በዚህ አንድ ዓመት የተፈጸመው ግድያ፣ እስራትና ማሰቃየት የሚያመው ቢሆን ኖሮ፤ ተቀዋሚዎች አሁን በዚህ ወቅት በሚገኙበት ደረጃ ላይ መገኘት ነበረባቸው።

ሰንድቅ ዓላማ ለብሰው የምናያቸው ፖለቲከኞች በቃላት እየደለሉ፤ በተግባር ግን ከሚናገሩት ተቃራኒ ዓላማ የሚያራምዱ ካልሆኑ፤ በአደባባይ ለሚናገሩት ለአንዲት ኢትዮጵያ ነጻነትና ሁሉንም በእኩልነት የሚያስተዳድር ዴሞክራሲያዊ ሥርዓት ለመመስረት ይህን ያህል ፓርቲ/ድርጅት ያስፈልግ ነበር። በአንድ ብሔር ስም ሦስት አራት ድርጅት፣ ተመሳሳይ ሀገራዊ ፕሮግራም ጽፎ በሰዎች ምክንያት ሦስት አራት ፓርቲ መመስረት ይገባ ነበረን፤ ይህን አድርገው ደግሞ መልሰው የእኛ አንድ አለመሆን ነው የወያኔን ዕድሜ ያራዘመው በማለት ያደነቁሩናል። በዚህም ፕሮፓጋንዳ ራሳቸውን ተባብሮ የመሥራት ፈላጊ አድርገው በሌሎች ላይ ጣት ለመቀሰር ቅድሚያውን የሚወስዱትና በድፍረት የሚናገሩት እነዚሁ በዶ/ር አድማሱ ገለጻ ሰንደቅ ዓላማ ለብሰው ሀገር የሚያፈርሱ የተባሉቱ ናቸው።

ያላችሁት በዝታችኋል፣ በተናጠልም መጠናከር ተስኖአችኋል፣ የምትነግሩን የምታምኑበትን ከሆነ ኮከባችሁ የሚገጥም እየተመራረጣችሁ ተባበሩ ተብሎ ልመናም ጫናም ተደርጎ፤ ሕብረት ፈጠርን፣ ቅንጅት መሰረትን ይሉና፤ የዚህም መሪ ተዋናይ እነርሱ እንደሆኑ አድርገው ከተግባሩ ፕሮፓጋንዳውን አግዝፈው ይነግሩንና፤ ውለው ሳያድሩ ወደ እምነታቸው ተመልሰው የተገናኘውን ሲያለያዩ፣ የተባበረውን ሲያፈርሱ ይገኛሉ። እነርሱ ያልገቡበት ሕብረት ከተፈጠረም ከዳር ሆነው ውግዘታቸው፣ ትችታቸው፤ ሲብስም ውንጀላቸው አያድርስ ነው። ደጋፊዎቻቸውም የሚነገራቸውን ለመስማት እንጂ የሚሠራውን ለማየት ዓይናቸውን አይገልጡምና፤ እገሌን ያላከተተ ሕብረት፣ እነ እገሌ የሌሉበት ቅንጅት ወዘተ በማለት መሪዎቻቸውን ተከትለው የቃላት አረራቸውን ይተኩሳሉ። ተረዳድተውም ለማደናቀፍ ይሠራሉ።

በአንድ በኩል ብዙዎችን ወደ ጥቂቶች ለመቀነስ ሲደከም፤ በሌላ በኩል ደግሞ አንዳንዶች አንድ ፓርቲ የነበሩት እንደ አሜባ ራሳቸውን እያባዙ፤ አንዳንዶች ደግሞ እኛስ ከማን እናንሳለን በሚል ስሜት በሚመስል አዲስ ፓርቲ እየፈጠሩ ልዩነቱን ያሰፉታል፣ ችግሩን ያባብሱታል። ትግሉ ወደ ፊት ከወያኔ ጋር መሆኑ ይቀርና፤ ሰበብ ምክንያት እየተፈጠረ የጎንዮሽ ይሆናል።

ወያኔ ተንገዳግዶ ላለመውደቅ የመጨረሻ አማራጭ ያለውን የአስቸኳይ ግዜ አዋጅ ባወጀበት በዚህ ወቅት፤ በተቃውሞ ጎራ የተሰለፉት ወገኖች ሁሉም ለሀገር ነጻነትና ለዴሞክራሲዊ ሥርዓት ከሆነ ትግላቸው፤ ወያኔ ከተንገዳገደበት መልሶ እንዳይቃና እነርሱም ትግላቸውን ማቀናጀት፣ ካልሆነም የጎንዮሹን ትግል ማቆም የሚያስችል ለስድስት ወራት የሚቆይ የአስቸኳይ ግዜ አዋጅ/ስምምነት ማውጣት በቻሉ ነበር። ግን ሰንደቅ ዓላማ ለብሰው ሀገር ለማፍረስ የሚሠሩ፣ የነጻነት ታጋይ መስለው ለወያኔ ዕድሜ መርዘም የሚጥሩ፣ የዴሞክራሲ ናፋቂ መስለው ከራስ በላይ የማያስቡ አሉና በሺዎች የሚቆጠሩ ወገኖቻቸንን ሞት በየመድረኩ እየደሰኮሩ፤ እነርሱ ግን ከነበሩበት አንድ ርምጃ ወደ ፊት መራመድ አልቻሉም።

ኢትዮጵውያን ከወያኔ አገዛዝ እንዳንላቀቅ የሚያደርጉን ከዚህም አልፎ እኔ ከሌለሁ ኢትዮጵያ ትበታተናለች የሚለው የወያኔ ማስፈራሪያ እውን የመሆን አጋጣሚ እንዲያገኝ የሚሠሩ፣ ኢትዮጵያ ትበታተን ብለው በአደባባይ የሚነግሩን ሳይሆኑ ሰንደቅ ዓላማ ለብሰው ሳይታወቅና ሳይነቃባቸው ሀገር የማፍረስ ተግባር ላይ የተሠማሩት ናቸው። ስለሆነም ከፍሬያቸው ታውቁዋቸዋላችሁ ተብሎ እንደተጻፈው ሰንደቅ ዓላማ ለብሰው በመታየታቸው ወይንም በማራኪ ቃላቶቻቸውና በአዞ እንባቸው ሳንታለል በተግባራቸው እንመዝናቸው፣ እንለያቸው፣ እንወቃቸው። ሳናውቃቸው የእኩይ ተግባራቸው ተባባሪ በመሆን ከኋላ ጸጸትና የአብሮ ተጠያቂነት ለመዳን መፍራትም መጠንቀቅም ያለብን በአደባባይ ወጥተው ቅዠታቸውን የሚነግሩንን ሳይሆን፤ ሰንደቅ ዓላማ ለብሰው ከእነርሱ በላይ ሀገር ወዳድ ታጋይ የሚባልላቸውን ነው።

አዲስ ቪዲዮ

Excavators move earth as rescuers work at the site of the landslide at the landfill.
ኤክስካቫተሮች የተደረመሰውን በማንሳት ላይ ሳሉ (ፎቶ፣ ZACHARIAS ABUBEKER/AFP/Getty Images)
...

በቆሼው አደጋ መትረፍ የ…

Discussion on the role of the diaspora
የዲያስፖራው ተሳትፎ ምን ይሁን? በቀጥታስ ሆነ በተዘዋዋሪ መሳተፍ አለበት
...

በኢሕአዴግና በተፎካካሪ …

Dr. Berhanu Mengistu on Forum 65
ዶ/ር ብርሃኑ መንግሥቱ ከፎረም ፷፭ ጋር ያደረጉት ቃለምልልስ
...

ዶ/ር ብርሃኑ መንግሥቱ ከፎረም ፷፭ ጋር ያደረጉት ቃለምልልስ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!