ገለታው ዘለቀ

We build ONE Ethiopia!

በቅርቡ በአንድ የኦሮሞ ወገኖች ስብሰባ ላይ አንድ ሰውየ፤ “ኦሮምያ ሰላም የምታገኘው ኢትዮጵያ ስትፈራርስ ነው፤ ኢትዮጵያ መፍረስ አለባት” አለ ተብሎ ሲራገብ እያየን ነው። እኔ በግሌ የዚህን ሰው ተልዕኮ ለመረዳት ቅንጣት ጊዜ አልወሰደብኝም። ከራሱ ከወያኔ በቀጥታ መልዕክት እየተቀበለ የሚሠራ የወያኔ ተቀጣሪ ነው፤ ወይም እያጃጃሉ በስልት የሚጠቀሙበት ሰው ነው። አለቀ።

ይህንን ለማለት ያስቻለኝ ነገር እንደሚታወቀው ይህ መንግሥት ገና ሲመሰረት ጀምሮ በሥልጣን ላይ ለመቆየት የሚያስችለው መሳሪያ ህዝባዊ ድጋፍ አይደለም። በዚህ ጎጠኛ የፖለቲካ አስተሳሰቡና በሙስና ድር በተፈጠረ ሥርዓት ምን ጊዜም ሰፊ ህዝባዊ ድጋፍ አገኛለሁ ብሎ አያስብም። ይህንን መንግሥት በሚገባ ያውቃል። ይህን ሥርዓት ዕድሜ ይቀጥልለታል ተብሎ የሚታሰበው ስልት ቅራኔ ነው። ለዚህም ነው መንግሥት ከሕገ መንግሥቱም በላይ አብዮታዊ ዴሞክራሲን የሚያራግበው። ምክንያቱ ቅራኔዎችን እየፈጠረ፤ በእነዚያ ቅራኔዎች መሃል ነው ሥርዓቱ ሕልውና የሚያገኘው። በኢትዮጵያ ውስጥ ቅራኔ ሲፈልጉ ደግሞ በአሁኑ ሰዓት የመደብ ቅራኔን ማንሳት ስለማይችሉ ቅራኔውን የመሰረቱት በአለፈ የሀገሪቱ መጥፎ ትዝታዎዥ (past bad memories) ላይ ነው።

ያለፈውን የታሪክ ትውስታ በነባራዊው እውነት ላይ እየጨማመሩና እያራገቡ፤ ሲያስፈልግም እንደ አኖሌ አይነት ሐውልት እያቆሙ ቅራኔን ማራገብ ነው። በዚህ ጊዜ ፖለቲካው በብሔር ላይ ስለቆመ ያለፈ የታሪክ ግድፈት ለቅራኔ መሰረት ሲሆን፤ ያን ያለፈ ችግር ወደ አንድ ብሔር በማላከክ ቅራኔው ሲራገብ አቅጣጫው በቀጥታ ወደ ብሔር ግጭት ይሄዳል። በዚህ መሰረት ወያኔዎች ቅራኔውን ሲያራግቡ፤ በተለይ ሁለቱ ብዙ የሰው ኃይል ያላቸው አማራና ኦሮሞ ቅራኔ ውስጥ ይገባሉ የሚል ስልት ይዘው ነው። የታሪክ ቅራኔው በብሔር ፖለቲካ ከባቢ ውስጥ ሲግል፤ ይህ ቅራኔ በቀጥታ ወደ ብሔር ግጭት ይዞራልና ነው። ይሄ ስልት የወያኔ የሥልጣን መሰረት ተደርጎ የሚወሰድ ነው። በሌላ በኩል ያለው ቅራኔ ደግሞ መድብለ ፓርቲውን የአንድነት ኃይልና የብሔር ኃይል በመፍጠር እነዚህን ኃይላት ማናቆር በየብሔሩ አክራሪ ብሔርተኞችን በማፍራት ከአንድነት ኃይሉ ጋር እንዲናቆሩ ማድረግና የየብሔሩ አክራሪ ኃይላት እርስ በርስ እንዲነቃቀፉ ማድረግ ነው። እነዚህ ኃይላት በቀላሉ ስለማይገናኙ ይህ የፖለቲካ ቅራኔ የሥልጣን መሰረቴ ነው ብሎ ህወሓት/ኢህአዴግ በጣም ያምናል። ቅራኔዎች በብሔርና በመድብለ ፓርቲው አካባቢ ሲበዛ ከእኔ ላይ ገለል ይላሉ ነው ስልቱ።

መንግሥትን ህዝባዊ መሰረት የሚያጎናፅፈው ተመራጭ የፖለቲካ አስተሳሰብ ባይኖረንም ግን፤ ቅራኔ መብዛቱ አንድን ጠባብ ቡድን በኢኮኖሚው ዘርፍ እስክንለውጥ ድረስና የበላይነቱን እስክናቆናጥጥ ጊዜ ይሰጠናል ብለው የሥርዓቱ ዋናዎች በኃይል ያምናሉ።

ታዲያ ይህ ስልት ባለፉት ዓመታት የተጠቀሙበት ቢሆንም በቅርቡ የተነሳው ህዝባዊ ንቅናቄ የዚህን መንግሥት የሥልጣን መሰረት የሆነውን የብሔር ቅራኔ መቀመቅ እያወረደው ነው። አማራውና ኦሮሞው ማዶ ለማዶ እየሆኑ፤ ደምህ ደሜ፣ ጉዳትህ ጉዳቴ ነው እያለ አስገራሚ ሕብረት ሲያሳዩ፤ መንግሥት እጅግ ደንግጧል። ለምን ካልን ከፍ ሲል ያልነው ሥርዓቱ በቅራኔዎች ላይ የተመሰረተ ሲሆን፣ ህዝቡ እነዚህን መሰረቶች መናድ ስለጀመረ ነው። ስለዚህ ይህ ህዝባዊ ድጋፍ የሌለውና ቅራኔዎች ላይ ተንጠልጥሎ ያለ መንግሥት አስቸኳይ ስብሰባ ጠርቶ ሊወያይ የሚችለው ነገር ይህን ቅራኔ እንዴት እናድስ? የሥልጣናችን መሰረት እየተናደ ነውና እንዴት እንደገና ቅራኔውን እናራግብ የሚል ነው። ያለ ጥርጥር በቅርቡ በኦሮሞ ተወላጅ ወገኖቻችን ስብሰባ ላይ ያንን ከሃዲ ቀስቅሰው ኢትዮጵያን እናፈርሳለን በል ሲሉ፤ ያ ሰው ይህንን ሲል ቀበል ብለው መነጋገሪያ እንዲሆን አደረጉ። አንዳንድ የዋሆች ወያኔን ትተው ወይኔ የሚፈልገውን ቅራኔ ወዲያው ያዙለት። ወያኔ ይህ ቅራኔ ሲነሳ እፎይ እላለሁ፣ አስቀየስኩ (divert አደረኩ) ይላል።

የሚገርመው አንዳንድ የዋሆች ሰውየው የሚናገረውን መንፈስ እንኳን ላይመረምሩ ይችላሉ። እርግጥ ነው ባለፉት ጊዜያት ወያኔዎች ያልሆኑ አንዳንድ የኦሮሞ ተወላጆች ሪፈረንደም ያስፈልጋል ይሉ ነበር። ይህ ሰው የሚለው እኮ ኦሮምያ ሰላም ትሆን ዘንድ ኢትዮጵያ መፈራረስ አለባት መበታተን አለባት ነው። ይህን ቃል በማየት ብቻ ንግግሩ የሆነ ኃይል ከኋላው እንዳለ ያሳያል። በመገንጠል የሚያምኑም እንዲህ አይናገሩም። ቃሎቹ ራሳቸው ለሶሻል ሚዲያ ዋና ጉዳይ እንዲሆኑ በወያኔ የተቀመሙ ናቸው። ይህንን መገምገም አለብን። በሌላ በኩል ይህ ሰው ሲናገር ጭብጨባ ነበር። የወያኔን ስልት ከ25 ዓመት በኋላ ያልተረዳ ካለ ያሳዝናል። በየመድረኩ ህዝብ የማይወደውን ነገር መናገር ሲሹ በስብሰባው መሃል እዚያና እዚያ ፈንጠር እያሉ ጥግ እየያዙ ካድሬዎች ይቀመጡና ጭብጨባና ፉጨቱን ያግሉታል። ይሄ ብዙ ጊዜ የሚያደርጉት ነገር ነው።

በአጠቃላይ ይህ ኮንፈረንስ ብዙ የኦሮሞ ልጆች በሐቅ ለአገራቸው መላ ለመሻት የኦሮሞን ህዝብ ትግል ለመደገፍ የተነሱ ሰዎች እንዳሉበት ሁሉ፤ ወያኔም ጥሩ መድረክ ያገኘበት ጉባኤ ነበር። ስብሰባው ዴሞክራሲያዊ መሆን እንዳለበት አምናለሁ፤ ነገር ግን እንዲህ አይነት አገር አፈርሳለሁ የሚል ወንበዴ ሲነሳ፤ ይሄንን ሰው አውጥቶ መጣል እንጂ፤ ዝም ማለት አይገባም። ወያኔዎች ውጭ አገር ሲመጡና ስብሰባ ሲጠሩ ለምን ስብሰባቸውን አክቲቪስቶች ይበጠብጣሉ? አገር እያፈረሳችሁ ነው በሚል አይደለም? እንዲህ አይነቱ የወያኔ ቅጥረኛ በአንድ ስብሰባ ኢትዮጵያን እናፈርሳለን ሲል እንዴት ዝም ይባላል?። አንድ መዘንጋት የሌለብን ነገር በሚመጣው ህዳር ወር ላይ በሚኖረው ስብሰባ ላይ እንዲሁ ኢትዮጵያ ትፍረስ የሚሉና የሚያጨበጭቡ ካድሬዎች መዘጋጀታቸውን እንጠብቅ። አዘጋጆቹም ሃሳብ በነፃነት እንዲንሸራሸር ማድረጉን ሳይዘነጉ ለፍተው ያዘጋጁትን መድረክ የወያኔ መፈንጫ እንዳያደርጉ መጠንቀቅ አለባቸው። ሌላው መሰረታዊ ነገር መታወቅ ያለበት ዲያስፓራው ያለው ሚና አገር ቤት ያለውን ትግል መደገፍ ነው። ህዝቡ ሕብረትና ትብብርን ሲያሳይ፤ ኢትዮጵያን እናፈርሳለን የሚል ኃይል ከመጣ ከወያኔ ሌላ ከቶ ማን ይሆናል። ዲያስፓራው ይህንን ሕብረት ማየትና በገንዘቡ፣ በዲፕሎማሲው መደገፍ እንጂ፤ የህዝቡን ትግል ለማናጋት ቢሠራ ተቀባይነት አያገኝም።

በተረፈ እነዚህ ኢትዮጵያን እናፈርሳለን የሚሉ ኃይላት ከወያኔም በላይ የምንዋጋቸው መሆናቸው መታወቅ አለበት። በስንት የኦሮሞ ጀግኖች ደምና አጥንት የተገነባችን አገር፣ በአባቶች መቃብር ላይ ቆሞ ኢትዮጵያን አፈርሳለሁ የሚል ኃይል የኦሮሞ ልጆችን መሳደብ ነው። ሁላችንን መሳደብ ነው። ከዚህ በተረፈ የወያኔን ስልቶች ሁል ጊዜም አንዘንጋ። ለምን ዝንጉ እንሆናለን?። እነሱ እኮ ሥራቸውን እየሠሩ ነው። አንድ ጊዜ የጉዳይ ማስቀየሻ ስልታቸውን ካወቅን በኋላ እንደገና መታለል የለብንም። የቅራኔ መሰረቶቻቸውን በሕብረት መስበራችንን መቀጠል አለብን። እነሱ በየጊዜው እያጠኑ የሚሠሩልንን የማስቀየሻ ጉዳዮች ስናብጠለጥል፤ እነሱ ጊዜ አገኙ ማለት ነው። ለወያኔ መንግሥት ውሎ ማደር ወሳኝ ነው። ራዕይ የላቸውም። ነገር ግን ትግሎች በዘገዩ ቁጥር የጀመሩት ቢዝነስ ይዳብራል ከሚል ነው። ተቃዋሚውን፣ ህዝቡን፣ ትግሉን ማዘግየት ዋና የሥልጣን ዘመን ማራዘመያ መሳሪያዎች ናቸውና ኢትዮጵያውያን በሕብረት፣ በፍጥነት ትግላችንን እንቀጥል። አሁን የተቋቋመው ኮማንድ ፖስት በውጭ አገር በሚኖረው ትግል ላይ የሚኖረው ሴራ እንደዚህ አይነት ድራማዎችን እየሠሩ ኃይልንና ሕብረትን መበተን ነው። ይህንን አንዘንጋ። የኦሮሞ ወገኖችም የሚመጣው ስብሰባችሁ የተሳካ እንዲሆን እመኛለሁ።

እግዚአብሔር ኢትዮጵያን ይባርክ!

ገለታው ዘለቀ
This email address is being protected from spambots. You need JavaScript enabled to view it.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!