እሸቱ ሆማ ቀኖ

METEC

ጉደኛው ኢሕአዴግ በስኳር ፋብሪካዎች ላይ ያለውን አቋም መሰረታዊ በሆነ መልኩ መቀየሩን የዛሬው የፋና ዜና ገልጿል። የስኳር ፋብሪካዎች ግንባታ መጓተት ያስከተለውን ምስቅልቅል ሜቴክም ሆነ ኢሕአዴግ ሊደብቁት ከማይችሉበት ደረጃ ደርሷል።

የስኳር ኮርፖሬሽኑ ቃል አቀባይ እንደሚሉት ከሆነ ለግንባታዎቹ መጓተት ምክንያቶቹ ሁለት ናቸው። 1ኛው የኮንትራት አስተዳደር ችግር፣ 2ኛው ደግሞ የፋይናንስ አቅርቦት ችግር። የነዚህን ፕሮጀክቶች ሂደት ከመጀመሪያው ጀምሮ ለተከታተልን ሰዎች እነዚህ ሁለት ምክንያቶች እጅግ በጣም አስቂኝ አናዳጅና ሲበዛ የሚያስቆጩ ናቸው።

ዛሬ ችግሩ የኮንትራት አስተዳደር ነው የሚሉት የኮርፖሬሽኑ ኃላፊዎች፤ ከሰባት ዓመት በፊት የግንባታ ሥራው ለሜቴክ ያለምንም ጨረታ በተሰጠበት ወቅት አሠራሩ ሕገወጥ ነው ስንል “ፀረ ልማት” የሚል ስም ሰጥተውን ነበር። ዛሬ የኮንትራት ችግር ማነቆ ሆነብን የሚሉት የኮርፖሬሽኑ ኃላፊዎች ባለፈው ዓመት ፓርላማ ቀርበው ፕሮጀክቶቹ ቢጓተቱም የሜቴክ ጀነራሎችን ደፍሮ መናገር አይቻልም በማለት እንባ እየተናነቃቸው ሲናገሩ ሰምተናቸው ነበር። የኮንትራት ችግሩን የፈጠረው ሜቴክ ቢሆንም፤ አሁንም ደፍሮ ተጠያቂ ያደረገው የለም። ይልቁንም ለሌላ ዙር ዘረፋ ይመች ዘንድ የሽርክና አሠራር የሚል ሌላ ማወናበጃ ሃሳብ ይዘው ቀርበዋል።

የሚገርመው ፕሮጀክቶቹ በመንግሥት ባለቤትነት ይገነባሉ የተባልነው ካላቸው ስትራቴጂክ አገራዊ ጠቀሜታ አኳያ ወሳኝ በመሆናቸውና የግል ባለሀብቶች ብዙ ፍላጎት ያላሳዩባቸው በመሆኑ በመንግሥት መሠራት ያለባቸው ናቸው በሚል ነበር። አሁን ደግሞ ጭንቅ ውስጥ ሲገቡና ማጣፊያው ሲያጥራቸው የግል ባለሀብቶች ሽርክና አስፈላጊ ነው ተባለ። አጃኢብ እኮ ነው!!!!

ሌላው ገራሚው ነገር ፕሮጀክቶቹ የፋይናንስ አቅርቦት ችግር ገጥሟቸዋል መባሉ ነው። ልብ በሉ፣ ይህንን የሚሉት እስካሁን ለፕሮጀክቶቹ ተብሎ ከ77 ቢሊዮን ብር የሚበልጥ ገንዘብ ወጪ መሆኑን ሳይክዱ ነው። ይህ ሁሉ ብር የት ገባ? የሚለውን ጥያቄ እኛ እንጂ እነሱ መጠየቅም ማንሳትም አይፈልጉም። ባለፈው ዓመት እኮ 25% እንኳን አፈፃፀም ላላሳየ ፕሮጀክት፣ ሜቴክ 96% ክፍያ መውሰዱን ራሳቸው የኮርፖሬሽኑ ሰዎች ሲያወሩ ነበር። ያው እነሱ ቢረሱትም እኛ እናስታውሳለን። ከዚህ በፊት ከቻይናና ከሌሎች የተወሰደው ብድር የት እንደገባ ሳይናገሩ የመክፈያው ጊዜ ስለደረሰ ሽርክና ያስፈልገናል ሲሉ ትንሽ እንኳ ሽክክ አይላቸውም።

ለማንኛውም እንደዚህ ጭምልቅልቁ በወጣ ፕሮጀክት ውስጥ ሽርክና ለመመስረት የሚፈልገውን ባለሀብት ለማየት እንጓጓለን።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!