ነፃነት ዘለቀ

አንድ ሚሊዮን
አንድ ሚሊዮን ስንት ነው?

ይሄ የቁጥር ነገር አልገባኝ እያለ መቸገሬን የምገልጥላችሁ አገሬ ውስጥ በምታዘበው የሙስና ግዝፈት እያፈርኩና እያረርኩም ነው። ትንሹም ትልቁም ከመሬት እየተነሣ “አንድ መቶ ሚሊዮን ከባንክ ተበድሬ ...፣ አምስት መቶ ሚሊዮን ብር ከባንክ ተበድረን ስናበቃ ...፣ ለእገሊት 30 ሚሊዮን አበድሬያት ...” እያለ ሲያወራ አንደበቱን ያዝ እንኳን አያደርገውም።

ስለዚህ ቁጥር እኔ ማይም ነኝ ወይም እነሱ የጣሱት አኃዛዊ ሕግና ሥርዓት መኖር አለበት። እንጂ የ18 ዓመትና የ20 ዓመት ታዳጊ ወያኔ የ5 ሚሊዮን ብር መኪና ሲነዳ ማየት ባልተቻለ ነበር፤ ኢትዮጵያ ውስጥ የሚታዩ ብዙ ነገሮች አውሮፓና አሜሪካ ቢሆን ኖሮ ዕድሜ ልክ ዘብጥያ ያስወርዳሉ። “ከየት አመጣኸው?” ብሎ የሚጠይቅ እኮ የለም። ካጠገብህ ተነስቶ ላጥ ይልና በአንዲት ቀን አዳር ሚሊዮኔር ሲሆን ታየዋለህ። በትብታብ ይሁን በጥንቆላ ወይም ሠርቶ ይሁን ሰርቆ የሚታወቅ ነገር የለም - ተሠርቶ ደግሞ በቅጽበት ጠሀብ ጫፍ አይደረስም፤ ሕግና ሥርዓት ከሌለ በስተቀር። ንግድ ዱሮም ነበር - ያኔ ተያይቶ ነበር ሰው የሚናገደው እንጂ እንዳሁኑ በደረቅ ምላጭ - በባልጩት - አይለጫጭም ነበር። ብቻ አነዳዱን እንኳን ላያውቅበት፣ አበላሉንና አጠጣጡን ሳይቀር ላያውቅበት በአንዴ የከበርቴዎችን ቡድን ሲቀላቀል ትታዘባለህ - ከዘሩ ውጪ ደግሞ የምታውቅለት የተለየ ሥራም ይሁን የንግድ ተሰጥዖ የለውም። አጥፍቶ ጠፊ የኢኮኖሚ አልቃኢዳዎችና አይሲሶች ወርረውን እንደትኋን እያንገበገቡን ናቸው።

ሚሊዮንን ዱሮ የማውቀው በሰው ስምነቱ ነበር። አሁን ግን በተለይ ወያኔዎች ጢባጢቤ የሚጫወቱበት የብር መጠን መግለጫ ሆኖኣል። ባለፈው ሰሞን የጎላጉል ሕንፃ ባለቤት ለአንድ ጨረታ ይቀርባል አሉ። ከዚያም ባንክ የመሠከረለት ቢያንስ ሦስት ሚሊዮን ብር የሚደርስ ተቀማጭ ገንዘብ እንዳለው የሚያሳይ ማስረጃ እንዲያቀርብ ይጠየቃል። ያ ወያኔ - እንዳትደነግጡ - ከአንድ ባንክ ብቻ ያመጣው የባንክ ደብተር 350 ሚሊዮን ብር ይነበብበታል። ይህቺ እንግዲህ ጥቂቷ ናት። ወያኔዎች ወሬያቸው ሚሊዮንንም አልፎ ቢሊዮን ከገባ ቆይተዋል። እኛ ለምደነዋል። የኔን ኪስ ሸረሪት ያደራበታል፤ የነሱን የባንክ ደብተር ዶላርና ብር ይዝመነመንበታል። ሆዳም ማይም ሲገኝ እንዲህ ነው።

ኢትዮጵያ ጉዷ ፈላ። ኢትዮጵያውያን ጉዳችን ተንተከተከ። ወያኔዎች መሬቱንም፣ የመንግሥትን የገቢ ምንጭም፣ የሀብት መገኛ የኢኮኖሚ አውታሮችንም ጥርግርግ አድርገው ለራሳቸው ወስደው ሌላውን ሙልጭ አውጥተውታል። አዲስ አበባ የትም ግባ ሕንፃና ቪላው በአብዛኛው የትግሬ ወያኔዎች ነው። ከጠቅላላው የአገሪቱ የሕዝብ ቁጥር ስድስት መቶኛ የሚሆነው ማኅበረሰብ በምን ምትሃትና ተዓምር ይህን ሁሉ የአገርና የሕዝብ ሀብት በ25 ዓመታት ውስጥ ሊቆጣጠር እንደቻለ ሲያስቡት ያስደነግጣል። ሆቴሉ፣ ሱፐርማርኬቱ፣ ነዳጅ ማደያው፣ ባንኩና ኢንሹንሱ፣ ኮንዶምኒየሙ፣ ሪል ኢስቴቱ፣ መስጂዱ፣ ቤተስኪያኑ፣ የመንግሥት ሥልጣንና የጥቅም ቦታዎች ሁሉ ... ምን አለፋችሁ ... ኢትዮጵያ እንዳለች በወያኔ ተይዛ ሌላው መለመላውን ቀርቶላችኋል - መለመላውን።

ምን ዓይነት ጉድ ነው? እነዚህ ሰዎች ሌላው ቢቀር ፈጣሪን ረሱት ማለት ይሆን? ይህ የአሁን አልጠግብ ባይነት ወደፊት ሲያስታውካቸው / ሲያስመልሳቸው እንደሚያድር ጠፍቷቸው ነው ልበል? የዶሮን የሚያህል አንጎል ያለው አንድ ትንሽ ሰው እንኳ የዚህን አፀያፊ ተግባራቸውን የዞረ ድምር ማሰብ አያቅተውም። ምን ዓይነት ጥርሱን ያገጠጠ ገብጋባነትና ስስታምነት ነው? እንዴ? ወያኔን ያጀበ ትግሬ በልቶ ሲያድር ሌላው በርሀብ ይለቅ ብሎ ያወጀው የየትኛው ሰማይ አዛዥ ነው? ኧረ እየተስተዋለ ይሁን! ኧረ አሁንና ዛሬ በ11ኛው ሰዓት ላይም ቢሆን እናንት ወያኔዎች ሶበር በሉ - በሆድ እያሰባችሁ ዘመነ መንግሥታችሁን ትጨርሱት? አንጎላችሁ እንዲሠራ በቻይና አኩፓንክቸርም ቢሆን ወጋ ወጋ አድርጉት፤ አኩፕሬዠርንም ጨምሩበትና ዓይነ ኅሊናችሁን አሸት አድርጉ - ምናልባት የምትሠሩት ግፍ የሚያስከትልባችሁ የኋላ ጠንቅ ቢገለጥላችሁ። አሁን በተዘረፈ ሀብት ስለጠገባችሁና አዕምሯችሁን የጥጋብ ሞራ ስለሸፈነባችሁ ያላችሁ ይመስላችኋል እንጂ ሞታችኋል እኮ።

“ከገዳይና ከሟች ማንኛቸው ናቸው የሞቱ?” የሚለውን ፍልስፍና ነክ ጥያቄ ደግሞ ለጥቂት ጊዜ አስቡት። ያኔ እኛን ገደልን ብላችሁ በባዶ ሜዳ ከምትፎክሩት ከእናንተና በእናንተ “ከተገደልነው” ከኛ ማንኛችን እንደሞትን ታውቃላችሁ። ከዚህ ቂልነታችሁ አሁኑኑ ካልባነናችሁና ወደሰውነት ደረጃ ካተመለሳችሁ፤ የምትሰምጡበት አዘቅት ከቬርሙዳም የጠለቀ ነው። ይህን እውነት መናገር ነቢይነትን አይጠይቅም - ሦስተኛዋን ዐይን ገርበብ ማድረግ ብቻ በቂ ነው፤ ያ ዐይን ደግሞ ጨፍናችሁት ወይም አፍርጣችሁ ጥላችሁት ይሆናል እንጂ እናንተም ጋ አለ። ከሰው ማሕጸን ነዋ የተገኛችሁት!

ሙስና

ይህችን አገር - ኢትዮጵያን - መቀመቅ እየከተታት ያለው ሌላው ነገር - ከዘረኝነቱ ቀጥሎ - ሙስና ነው። ሙስና ብሎ መጠራቱም ያንሰዋል። ለአገራችን የሙስና ደረጃ ይህ የሦስት ፊደላት ቅምር - ሙስና - የሚል ቃል አይመጥነውም። ሙስና እግር አውጥቶ ሲሄድ የሚታየው በኢትዮጵያ ውስጥ ብቻ ነው። ሙስና ግም ነው፤ ግማቱ ደግሞ አይጣል ነው። ሰውን ወደ ጅብነት የሚለውጥ ክርፋት። እንዴት እንደምንጸዳ እግዜር ይወቅ።

አንድም ሥራ - በተለይ የመንግሥት ሥራ - ካለሙስና አይሠራም። ሙስና ውስጥ የማይገባ ሰው በመንግሥት መሥሪያ ቤት ሥፍራ የለውም - ሥርዓቱ ይተፋዋል። ለምን ቢባል - ሙሰኞችን ያደናቅፋልና። አብረህ ካልበላህ ያጠፉሃል - እንዲያውም በነሱ ብሶ በሙስና ሲከሱህ አያፍሩም።

የዱሮው ሙስና ይሉኝታ ነበረው። የዱሮው ሙስና በአገር ፍቅር ስሜት የታሸ ነበር - ብዙም አይጨክንም። ለምሣሌ መቶ ብር ቢወጣ አምስቷ ወይ ስድስቷ ብር ነበረች በአዩኝ አላዩኝና በልመና በሚገኝ ሰነድ የምትሰረቀው። አሁን ግን ያ ዓይነቱ ሙስና የፋራ ነው። እውነት ነው የምላችሁ - በዚህ ዘመን ሙስናው ከ60 እና ከ70 በመቶ በላይ ነው። በገንዘባዊ ምሣሌ ቢገለጽ - አንድ የመንግሥት ፕሮጀክት በመቶ ሚሊዮን ሊሠራ ነው እንበል። ከዚህ ገንዘብ ውስጥ 60 እና 70 ሚሊዮኑ ብር ከላይ እስከታች ያሉ ባለሥልጣናት እንደየደረጃቸው ይቃረጡትና ቀሪው 40 ወይ 30 ሚሊዮን እንደነገሩ ለዚያ ፕሮጀክት ማስፈጸሚያነት ይውላል - ያውም ከተሠራ ነው - ገንዘቡ ተበልቶ ከናካቴው ፕሮጀክቱ ላይሠራም ይችላል። ጠያቂ የለም፤ ተጠያቂም የለም። ምክንያቱም ሁሉም ሌባና ሙሰኛ ነውና።

በዚያ ላይ የጥራት ነገር አይነሳ። ሥራዎች የሚከናወኑት ከደረጃ በታች በሆኑ ግብኣቶች መሆኑ በውጤቱ ይታወቃል። ለምሣሌ ግምባታ ሲከናወን የስሚንቶውና የአሻዋው ተመጣጥኖ፣ የአርማታ ብረቱ ጥራትና ውፍረት፣ የአርማታ መድረቂያና ውኃ መጠጫ ጊዜ፣ ወዘተ. መመጣጠን ሲኖርበት ይህን መሰሉን ሣይንሳዊ የግንባታ ሂደት ያላለፈ አንድ ሥራ ቢውል አያድርም፤ ቢያድር አይውልም፤ ፈራሽ ነው - የድምቡሽት ላይ ቤት እንዴት ይጸናል?

በዚህ ዘመን ስለሀገር ማን ይጨነቃል? ማን ስለነገው ትውልድ ያስባል? የጨረባ ተዝካር። ያባትህ አገር ሲወረር አብረህ ውረር። የሚታየው ዛሬ መክበር እንጂ የነገ የአገሪቱ ዕጣ ፋንታ እንጦርጦስ መውረድ መሆኑ ለማንም ደንታ አይሰጠውም። የምንገርም ዜጎች ፈልቀናል። መንገዱ ከመመረቁ ይቦዳደሳል፤ ድልድዩ ከመመረቁ ይዘብጣል፤ ሕንፃው ከመመረቁ ይሰነጣጠቃል፤ ማሽኑ ከመተከሉ ኃይሉ ይዝላል፤ “ምሁሩ” ከመመረቁ “ሀሁ”ን ከ”ለሉ”ና ትንሹዋን “a,b,c,d” ከትልቁ “A,B,C.D” መለየት ያቅተዋል፤ የሕክምና ዶክተሩ ከመመረቁ የሕክምና መርፌን ከልብስ መስፊያ መርፌ መለየት ይሳነዋል፤ ... በየሆቴሉ የምንመገበው ነገር ከየት እንደሚመጣና የምን ሥጋ እንደሆነ አይታወቅም። ዘይቱና ቅቤው አርቲፊሻልና ጤንነትን ከሚጎዱ ባዕዳን ነገሮች የሚሠራ ነው። ጀሶና አፈር ጤፍን ተክተዋል። የሽምብራ ዱቄት በካፕሱል እየታሸገ ቴትራሣይክልንና አምፒሲሊንን አሳርፏል። በዚያ ላይ የሕክምና ውድነቱ ጠበሎችንና የጠንቋይ ቤቶችን ጠጠር ቢወረወር ማረፊያ እንዳይኖራቸው አድርጓል። የኑሮው ውድነቱ ደግሞ ሰማየ ሰማያትን ካለፈ ቆይቷል - ሁሉም ነገር ድሃ አይነካሽ ሆኖ ብዙዎቻችን የኗሪ አኗኗሪ ሆነናል። የቻይና ጫማና ካልሲ ከታች፣ ወያኔና ፀሐይቱ ከላይ ሆነው አቃጥለውና ለብልበው ሊፈጁን ነው። ወይ ጉዳችን - ጉዳችን እኮ ተዘርዝሮ አያልቅም። ምን ይዋጠን? “What swallow us?” ብዬ በ‹ቆንጆ› እንግሊዝኛ ባስፈግጋችሁስ ምን ይለኛል?

ሙስና ባህል ሆኗል። የማይሞስን የድህነቱ ጎርፍ አጥለቅልቆት እንደሚሞት ይታመናል። ስለሆነም አለመሞሰን የሚያስመሰግን ሳይሆን የሚያሰድብ እየሆነ ነው። አዲስ ማኅበራዊ “ኖርም” እያዳበርን ነው። የምሥራች!

ሙስና በዓለማዊ ብቻም ሣይሆን በእምነት ቦታዎችም የእስትንፋስ ያህል ነው። ከአንድ አነስተኛ ደብር ወደ ትልቅ ደብር ለመዛወር ለአገረ ስብከቱ ባለሥልጣናት እስከ 80 ሺህ ብር ጉቦ እንደሚከፈል ሰምቻለሁ። አለበለዚያ በዚያው አነስተኛ ደብር እያከኩ መኖር ነው። ብዙ የሙስና ሥራ በቤተ ክርስቲያን ውስጥ ሲካሄድ እግዜሩም ታዝቦ ቁጭ እንጂ፤ አንዳችም የሚፈጠርቅ መቅሰፍት አይልክም - ዱሮ ግን ቀልድ የለም፤ ቤቱን የሚደፍርን ባለጌ ካህን በመብረቅ ይሰነጥቀው ነበር - ዛሬ ግን ስንቱን ፈጥርቄ እዘልቀዋለሁ ብሎ ሳይል አይቀርም፤ ትቶታል - ሒሣባቸውን ባንዴ እንዲያወራርዱ ፈቃዱ የሆነ ይመስለኛል። ምን ያለ ዘመን ውስጥ ገባን ግን ጎበዝ! (መሴሰኑን፣ መዋሸቱን፣ ሙዳየ ምጽዋት መገልበጡን፣ የሰው ሚስት ማባለጉን ... ይህን ይህን “ተራ ወንጀል”ና ኃጢኣትማ ተዉት - ሆድ ይፍጀው)። እንደአገርም እንደማኅበረሰብም በቁም ሞተናል።

እግዚአብሔር ካልተፈራ፣ የአገር ፍቅር ስሜት ከጠፋ፣ ሰብዓዊነት ተንጠፍጥፎ ካለቀ፣ የሞራልና የባህል ክሮች ከተበጣጠሱ ሰው ዐውሬ ነው - ከዐውሬም የባሰ እንዲያውም። ዕውቀት ደግሞ ብቻውን ምንም አይሠራም። ማወቅማ ከፓትርያርካችን የበለጠ ዐዋቂ አለ እንዴ? የእግዚአብሔርን ቤት የሚደፍር እኮ የሚያውቃትና ብዙ ዕውቀትም ያለው ነው - ሊቀ ሣጥናኤል እኮ ከቤተኛነትም አልፎ የመላዕክት አለቃ ነበር። ግን ማወቅ ብቻውንና በራሱ ዋጋ ስለሌለው ይህ መልአክ ከመረገምና የጨለማውን መንግሥት ከመውረስ - ወርሶም ርዕሰ-መስተዳድሩ ከመሆን - አላመለጠም።

እኛም አገር ውስጥ ብዙ መኳንንትና መሣፍንት እንዲሁም በኃይማኖቱም ረገድ በርካታ ካህናትና ሊቃነ ጳጳሣት የዚሁ የጨለማው መንግሥት አጋፋሪዎችና የመንግሥቱ ወራሾች ናቸው - በጊዜው ንስሃ ካልገቡ። ወዮ ለቀኑ በሉ! ቀኑ ደርሷል። ምርትና ግርድ ሊለይ፣ ንፋሹ በሲዖላዊ የዘላለም እሳት ሊቃጠል ጊዜዋ ቀርባለች። ያወቀና የተመለሰ ዳነ፤ ያላወቀና የተዘናጋ አልዳነም። ይብላኝ አዕምሯቸው ለደነበሸ ትግሬ ወያኔዎችና አጫፋሪዎቻቸው። ... ሰላም እጆቿን ወደፈጣሪዋ ለዘረጋችው ኢትዮጵያ።

ለአስተምህሯዊ አስተያየት - This email address is being protected from spambots. You need JavaScript enabled to view it.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!