ኢትዮጵያዊ ብሔርተኝነት ይለምልም!

ኢትዮጵያዊ ብሔርተኝነት ይለምልም!

በቀለ ደገፋ (ከኦስሎ)

ከሁለት ዓመት በፊት በኢሕአዴግና በተቃዋሚ ቡድኖች መካከል ሲደረጉ የነበሩ ክርክሮች ከሞላ ጎደል በዴሞክራሲ፣ ፍትሕና ልማት ዙሪያ ያጠነጠኑ ነበሩ። አሁን አሁን ግን ፖለቲካችን መጀመሪያውም መጨረሻውም የማንነት ፖለቲካ ሆኗል። እንደዚህ ዐይነት የፖለቲካ አካሄድ ከ40 ዓመት በፊት ማርክሲዝምን እንደ ሃይማኖት በተቀበሉ ተማሪዎች የተጀመረና በገዥው ፓርቲም እንደ ብቸኛ ማደራጃና ማታገያ መንገድ የተያዘ ከመሆኑ አንጻር፤ አሁን ያለንበት ቀውስ ብዙዎችን አያስገርምም። ምናልባትም እንደ ትንቢት እያንዳንዱ ነገር ከታቀደለት ጊዜ ሁሉ ቀድሞ እየተደረገ ያለ ነው የሚመስለው።

ከዋናው ብሔርን ብቻ ያማከለ ፌደራሊዝም ከማቋቋም፤ እስከ ግለሰቦችን፣ መኪኖችንና የንግድ ተቋማትን ሳይቀር በብሔር ማንነታቸው እንዲገለጹ በማድረግ በመንግሥት ደረጃ ከፍተኛ ሥራ ተሰርቷል። እንዲያውም በሕዝቡ መካከል ለብዙ ዘመናት የዳበረ አብሮ የመኖር ባህል ጠብቆን እንጅ፤ እንደ መንግሥታችን ሥራማ ቢሆን ኖሮ እስከ አሁንም በሰላም ባልቆየን ነበር። ለሁሉም ልክ አለውና፤ ሕዝቡም ለ26 ዓመታት በኢሕአዴግና በአክራሪ ብሔርተኛ ተቃዋሚዎች ተገፍቶ ተገፍቶ፤ የብሔር ካርዱን በየአጋጣሚው እንዲመዝ ተደርጓል። የሠለጠኑ ሕብረብሔራዊ የሆኑ አገሮች በብሔር የተደራጀ ፖለቲካን በሕግ እስከመከልከል የደረሱት፤ መጨረሻው እንደማያምርና በዚህ መንገድ ዴሞክራሲያዊ ሥርዓት መገንባት እንደማይቻል ጠንቅቀው ስለሚያውቁ ነው።

እስከ ቅርብ ጊዜ ድረስ ባለው የኢትዮጵያ ታሪክ፤ ሥልጣን የያዘ ቡድን ሕዝቡን ይጨቁናል ወይንም የሆነ ብሔር በተለየ ተበድሏል የሚል ወቀሳ እንጂ፤ አንዱ በአንዱ ላይ ጥቃት ያደረሰው በኢሕአዴግ ዘመን የብሔሮችን መብት አስከብረናል እየተባለ በሚደሰኮርበት ጊዜ ነው። ወይንስ የብሔሮችን እርስ በእርስ በጥላቻ ላይ የተመሰረተ የመናከስ መብትን ነው እንዴ ያጎናጸፉን? በአንዳንድ አከባቢዎች በብሔሮች መካከል ከአሁን በፊትም ግጭት ነበረ፤ አዲስ ነገር አይደለም፤ ምናልባትም አሁን ሁሉንም ነገር መስማት ስለቻልን ነው እንጅ የሚል መከራከሪያ የሚያቀርቡም አልጠፉም። አዎ! ግጭቶች ነበሩ፤ ነገር ግን ግጭቶች መሰረት ያደርጉ የነበሩት በብሔር ማንነት ላይ ሳይሆን፤ አጎራባች አካባቢ የሚገኙ የውኃ፤ የግጦሽና የእርሻ መሬት አጠቃቀም ላይ ነበር። እንደዚህ ዐይነት ግጭት በአንድ ብሔር አባላት መካከልም ተደጋግሞ ይከሰታል። አሁን የሚያሳስበው የእነዚህ ብሔር ተኮር ግጭቶች መደጋገም እንደተለመደ ነገር ተወስዶ ወደ መፍትሔ የሚኬድበትን መንገድ ጭምር እንዳያጨልመው ነው። ከዚህ በተጨማሪ የችግሩ መንሥኤ (ብሔርን ብቻ ያማከለ ፖለቲካው) መፍትሔ ፍለጋው ላይም ተጽኖ መፍጠሩ ነው። ለምሳሌ አንዱ ቡድን በብሔር ማንነቱ ብቻ ጥቃት ሲደርስበት የሌሎች ዝምታን መምረጥና ነግ በእኔ ብሎ ጠንካራ የተባበረ ተቃውሞ እንዳያሰማ አድርጎታል።

በጣም የሚያሳዝነው ደግሞ ጽንፈኛ ብሔረተኞች የብሔር ፌደራሊዝሙ ምን ያክል ሕዝቡንና አገሪቱን አደጋ ላይ እንደከተተ እንኳን እያዩ ሁሉንም ነገር ሕወሓት ላይ እያላከኩ የብሔር ፖለቲካው ምንም ችግር እንደሌለበት ለማሳየት መሞከራቸው ነው። አወዳይና ኤሊባቡር በተከሰተው ዘግናኝ ድርጊት የሕወሓት እጅ እንዳለበት ብዙ ምልክቶች ቢኖሩም፤ በድርጊቱ ላይ የተሳተፉ ሰዎችንና እንደዚህ አይነት ድርጊት እንዲፈጸም የጥላቻ ቅስቀሳ ሲያካሂዱ የነበሩ ቡድኖችም እኩል ተጠያቂዎች ናቸው። እንዲያውም የኦሮሞ ጽንፈኛ ብሔረተኞች አገሪቱ ውስጥ የሚፈጠር ማንኛውም ብሔር ተኮር ቀውስ የኦሮሞ ብሔር ተወላጆችን ጭምር ቢጎዳ እንኳን የእነሱን የወደፊት ዓላማ ለማሳካት የሚከፈል የአጭር ጊዜ መሰዋትነት እንጂ አሳሳቢ ችግር አይደለም። ኦሮሞው በሌላው ብሔር መጠቃቱ ወይንም ሌላው ብሔር ላይ ጥቃት ማድረሱ ለእነሱ ኦሮሞው ከሌላው ኢትዮጵያዊ ጋር ተከባብሮ የመኖር ተስፋው እስከተዳከመ ድረስ የሚፈለግ አካሄድ ነው። ከዚያ ልክ የሃውዜን ጭፍጨፋ (ማንም ያድርገው ማን) የትግራይ ሕዝብን ሕወሓት መዳፍ ውስጥ መሉ በሙሉ እንዳስገባው ሁሉ፤ እነዚህም አዳኝህ እኛ ብቻ ነን በእንደዚህ ያለ ሁኔታ አብሮ መኖርም አይቻልም ብለው ብቅ ይላሉ። ጽንፈኛ ብሔርተኞች እድሉን ካገኙ ከዚህም የባሰ ማድረጋቸው ስለማይቀር የአገርን ህልውና ማዳኑ በኢትዮጵያዊ እኩልነት በሚያምኑ ላይ ብቻ ወድቋል። የአገራችን ህልውና አደጋ ላይ የወደቀው ሕወሓት ሥልጣን ላይ የወጣ ቀን ቢሆንም፤ አሁን የደረሰችበት ሁኔታ ግን ወደፊት የሚሆነው በማያሻማ መልኩ ሁሉም ዓይኑን ገልጦ እንዲያይ አድርጓል። በኢትዮጵያዊ እኩልነት የሚያምን በሙሉ ብላቴናው እንዳለው የአገር ጉዳይ እንዲህ ቢሆን ተብሎ የሚተው የምርጫ ጉዳይ ሳይሆን፤ የህልውና ጉዳይ መሆኑን ተገንዝቦ የተቻለውን ሁሉ ማድረግ አለበት።

ኢትዮጵያዊ ብሔርተኝነት ይለምልም!

በቀለ ደገፋ (ጥቅምት ፲፭ ቀን ፳፻፲ ዓ.ም.፣ ከኦስሎ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!