Muluken Tesfaw

ጋዜጠኛ ሙሉቀን ተስፋው

ሸንቁጥ አየለ

ጥቅል ሃሳብ

የሞተው ወገን መከፋት ሲገባው ሞትህ በመነገሩ ለምን ትንፍሽ ትላለህ ብሎ ሰውን መውቀስ አስደማሚ ነው። ገዳይ እና አስገዳይን መውቀስ እና መገሰጽ ቢቻልም ተባብሮ ለፍርድ ማቅረብ ሲገባ ለምን የሞተው ሰው ተገደለ ብለህ ትናገራለህ ብሎ ስለፍትሕ የሚጮህን ሰው መክሰስ አስደናቂ ብቻ ሳይሆን፤ በዓለም ላይ የመጨረሻው የግፍ ግፍ ነው። አማራ ሕዝብ ላይ ከሚደረገው የግድያ ወንጀል የበለጠው ግፍ ለምን የአማራ ሕዝብ ሞት ተዘገበ ብሎ በድፍረት መናገር ነው።

ሰሞኑን ከማስተውላቸው አስገራሚ ነገሮች የአማራ ሕዝብ በየቦታው ሲታረድ ለምን ታረደ፣ ተገደለ እያላችሁ ትዘግባላችሁ የሚል ነው። በተለይም ጋዜጠኛ ሙሉቀን ተስፋው ጊዜውን ሰጥቶ የአማራን ሕዝብ በየቦታው መታረድ እና መገደል እየዘገበ ሰነበተ። እናም ዘይገርም የሚባለው ነገር የሚከተለው ታዲያ ይሄኔ ነው። የአማራ ሕዝብ ሞቱ መዘገቡ ዘረኝነት ነው፣ የኢትዮጵያን አንድነት ለማናጋት ነው የሚል ትችት በብዛት ይደመጣሉ። የአንድ ሕዝብ መገደል፣ መታረድ እና መሰደድ አለመዘገቡ ለአገር አንድነት ፍቱን መድኃኒት እንዴት ሊሆን እንደሚችል ደጋግሜ ባስበውም ጠብ የሚል ምክንያት አላገኘሁም።

የዛሬ አራት እና አምስት ዓመት በአንድ ቀን ግማሽ ሚሊዮን አማራ ከጉራ ፋርዳ ሲባረር እና ሲገደል አንድ ሺህ ገጽ መረጃ አዘጋጅተን የተለያዩ የተቃዋሚ ፓርቲዎች እና ነጻ ነን የሚሉ ሐሰተኛ ነጻ ሚዲያዎች መግለጫ እንዲያወጡበት አሰራጭተን ነበር። ሁሉም በአንድ ድምጽ የተነጋገሩ እስኪመስል ጸጥ ብለው ነበር። መኢአድ፣ ሰማያዊ ፓርቲ እና ከግል ጋዜጦች ደግሞ በተመስገን ደሳለኝ የሚመራው ጋዜጣ ብቻ መግለጫ አወጡ። ሌላው ቀርቶ በውጭ መንግሥታት የሚንቀሳቀሱ የሬዲዮ ጣቢያዎች እንኳን ተፈናቃዮች እንዲያነጋግሯቸው ሲጠየቁ እስከ ሦስት ሺህ ብር ክፍያ እንደጠየቁ ትዝ ይለኛል። ተፈናቃይ እና ተሳዳጅ ወገንህን ሦስት ሽህ ብር ስትከፍለኝ ነው ሞትህን እና ብሶትህን እምዘግብልህ ማለት መሆኑ ነው። እንዲህ ያደረጉ ጋዜጠኞችን ዝርዝር አስተማማኝ ቀን እና ሁኔታ ሲመጣ በወንጀል መክሰስ ተገቢ መሆኑን ግን በልባችን ዘግበነዋል። በሕዝባችን ጉዳይስ እጅግ ቂመኞች ነን። በሕዝባችን ላይ የስድብ ቃል የተናገረ ሁሉ በልባችን እያንዳንዷን ቃል እንደምንከትባት ሊያውቅም ላያውቅም ይችል ይሆናል።

ከሁሉም በወቅቱ እስካሁን የሚገርመኝ ነገር አንድነት የሚባለውን ፓርቲ ስለ አማራ ሕዝብ መግለጫ እንዲያወጣ ሲጠየቅ፤ መግለጫ አላወጣም ሲል የሰጠው መልስ ነበር። እኔም አንዳንድ የፓርቲው አባላትን ለምንድን ነው መግለጫ የማታወጡት? የሚል ጥያቄ አቅርቤ ነበር። የሰጡኝ መልስ ደግሞ ይበልጥ አስደማሚ ነበር። ከሰጡኝ መልስ ውስጥ ታዲያ አንድነት የአማራ ፓርቲ እንዲባል አንፈልግም የሚል መልስ ነበር። እኛም ስለ አማራ ሕዝብ ሞት መግለጫ ማውጣት እንዴት አድርጎ ነው የአማራ ፓርቲ የሚያስብላችሁ? የሚል ጥያቄ አቅርበን ነበር። በወቅቱ እነ አስራት አብርሃም ከአረና ፓርቲ ወጥተው ወደ አንድነት ፓርቲ እንዲገቡ እግዚዮታ ተይዞ ነበር። እናም የአማራ ሞቱ በአንድነት ፓርቲ በኩል መዘገቡ እነ አስራት አብርሃምን እንዳያስቀይም ተብሎ እነ ስየ አብርሃን እንዳያስቀይም ተብሎ አንዘግብም ሲባል ነበር። ግን እውን የአማራ ሕዝብ የትግራይ ፖለቲከኞችንና ምሁራንን እንዲህ በጥልቅ ጠላትነት እንዲፈርጁት የሚያበቃ በደል አድርሶባቸው ይሆን? እኔ እንጃ። እኔ ትግሬ ስላልሆንኩ በነዚህ የትግራይ ፖለቲከኞች እና ምሁራን ቦታ ሆኜ ምንም መናገር አልችልም። ሆኖም የልባቸው ጭካኔ እና ጥጣሬ ግን ሁሌም ያስገርመኛል። እጅግ በጥልቁ። ከትግራይ ፖለቲከኞች በላይ የሚያስደምመኝ ግን አስራት አብርሃም እንዳይቀየም ብለው የአስራት አብርሃምን ወዳጅነት ለማትረፍ ሲሉ የአማራን ሞቱን አንዘግብም የሚሉት የአማራ ፖለቲከኞች ናቸው። የነዚህኞቹ ጉዳይ ደግሞ እራሱን የቻለ አንድ መጽሐፍ ይወጣዋል።

አማራ ከታረደና ከተፈናቀለ ከዓመት እና ከሁለት ዓመት በኋላ ግን፤ የአንድነት ፓርቲ የአማራ ፖለቲካ አትራፊ መሆኑን ሲያውቅ የመግለጫ ጋጋታ ማውጣት ጀመረ። በስሜት ከመግለብለብ የዘለለ እውነታዎችን አጣርቶ ማየት የማይችለው ዲያስፖራም ... እዚህ ጋ ነገር ልቁረጥ መሰለኝ። ሃሃሃ ... አዎን ቆረጥቁት።

እናም ለመተዛዘብ ያበቃን ዘንድ ሰሞኑን ሦስት የትግራይ ሰዎች በወለጋ ተጎዱ ተባለ። እናም እነ አስራት አብርሃም በንዴት ግለሰባዊ እና የፓርቲ መግለጫ ጋጋታ ማውጣት ጀመሩ። ግማሽ ሚሊዮን አማራ ሲታረድ፣ ሲገፋና ሲገደል መግለጫ ማውጣት እንደ ነውር ሲቆጥር የነበረ፤ እንዲሁም አስራት እንዳይቀዬም የአማራ ሞቱ አይዘገብለት ሲባልለት የነበረ ሰው የሦስት ሰው መጎዳት ግን ወደ መግለጫ እንዲገባ አስገድዶታል። የትግራይ ሰው ተጎዳ፣ ተገደለ፣ ተሰደደ ሲልም ምሬቱን ለኢትዮጵያ ሕዝብ አቅርቧል። እኔም ንጹህ የሆነ የትግራይ ሰው አንድም እንኳን እንዲጎዳ አልፈልግም። በፖለቲካው ውስጥ የሌለ ንጹህ የትግራይ ሰው በምንም መልኩ መገደል የለበትም። ምን በወጣው?

ሆኖም ምንም የማያውቀው እና ንጹሁ ግማሽ ሚሊዮን አማራ ሲገደል እና ሲሰደድ አትዘግቡ፣ መግለጫ አታውጡ ሲል የነበረ ሰው የሦስት ሰው ሞት ወደ መግለጫ እንዲያመራ እንዴት ሊያስገድደው ይችላል? የዘር ነገር ነዋ። ይሁን ዘሩን ይውደድ። ግን ኢትዮጵያውያን ሁሉ አንዱ ሲጎዳ አንዱ ስለሌላው ለመጮህ እንዲህ ልቡ የጨከነው እንዴት ነው?

በተለይም አስገራሚው ነገር የሚከሰተው በአማራ ጉዳይ ላይ ሲሆን ነው። የአማራ ሞቱ ሲዘገብ ወንጀል ነው። አማራ ሲገደል፣ አማራ ሞተ ማለት ወንጀል ነው። አማራ ተፈናቀለ ማለት የኢትዮጵያን አንድነት ያናጋል የሚል ሐሰተኛ ማላዘን ይከሰታል።

ለምታስተውሉ ሰዎች እኔ ግን እንዲህ እላለሁ። ኢትዮጵያ የእግዚአብሔር አገር ነች። እግዚአብሔር የሚወደው ሕዝብ ነው ስንል ደግሞ እያንዳንዱን ሰው ነው። እያንዳንዱ ኢትዮጵያዊ ሲታረድ፣ ሲገደል፣ ሲፈናቀል መግለጫ ሊወጣለት ይገባል። አማራም ቢሆን፣ ኦሮሞም ቢሆን፣ ትግሬም ቢሆን፣ ሶማሌም ቢሆን፣ ... ወይም ከኢትዮጵያውያን ወይም ከሰው ዘር ውስጥ አንዱ ሰው በማንነቱ እና ያለወንጀሉ ሲጎዳ ዜና ሊሠራለት እና ሞቱም ለአዳም ልጆች ሊነገርለት ለሰብአዊ እርዳታም ወገኖቹ እንዲደርሱለት ጥሪ ሊቀርብለት ይገባል። መበደሉ እና መገፋቱ በዝርዝር ሊነገርለት ይገባል። በስፋት ሊዘገብለት ይገባል። እንዲህ የሚያደርጉ የሕዝብን እና የሰዎችን በደል የሚዘግቡም ሰዎችም ሊመሰገኑ ይገባል። የእግዚአብሔር ሕዝብ የሆነውን ኢትዮጵያዊ የሚያገለግሉ ተብለውም ሊሞገሱ ይገባ ነበር።

ነገሩ ወደ አማራ ሕዝብ ሲመጣ ግን አስደማሚ ብቻ ሳይሆን ጥልቅ አርምሞ ውስጥ ይከታል። ሁሉም ሚዲያ ስለ አማራ ሕዝብ ላለመዘገብ፣ መጽሐፍ ላለመጻፍ በወሰነበት ወቅት፤ የአማራን ሕዝብ መከራ በመጽሐፍ አዘጋጅቶ፣ እንዲሁም ሚዲያ አቋቁሞ ሕዝቡ ላይ እየተደረገ ያለውን ግፍና መከራ ለመዘገብ ደፋ ቀና የሚል አንድ ሰው ድንገት ብቅ ቢል፤ በዚህ ሰው ላይ ውግዘቱ ለጉድ ቀጥሏል። የሚያስደንቀው ውግዘቱን የሚያዘንቡበት ደግሞ እራሳቸው አማራ ነን የሚሉት ጭምር መሆናቸው ነው። ለምን የአማራን ሞት ዘገብክ። ዘረኛ ነህ። አማራ ሲታረድ ዝም በል። ምን አገባህ። የወያኔ ቅጥረኛ ነህ በማለት ጋዜጠኛ ሙሉቀንን መከራውን ያበሉታል።

የሞተው ወገን መከፋት ሲገባው ሞትህ በመነገሩ ለምን ትንፍሽ ትላለህ ብሎ ሰውን መውቀስ አስደማሚ ነው። ገዳይና አስገዳይን መውቀስና መገሰጽ ሲቻልም፣ ተባብሮ ለፍርድ ማቅረብ ሲገባ፤ ለምን የሞተው ሰው ተገደለ ብለህ ትናገራለህ ብሎ ስለፍትሕ የሚጮህን ሰው መክሰስ አስደናቂ ብቻ ሳይሆን በዓለም ላይ የመጨረሻው የግፍ ግፍ ነው። አማራ ሕዝብ ላይ ከሚደረገው የግድያ ወንጀል የበለጠው ግፍ ለምን የአማራ ሕዝብ ሞት ተዘገበ ብሎ በድፍረት መናገር ነው።

ይሄን ሁሉ አስተውዬ ወደ ጥልቅ አርምሞ እገባና ኢትዮጵያውያኖች መካከል እውነትና ሐሰት፣ ግፍና ፍትሕ፣ ሰብአዊነትና ኢሰብአዊነት እንዴት እንደሚመዘን በማንሰላሰል ዝምታን እመርጣለሁ። ዝምታ ግን ምንም አይፈይድም። ዝምታ እውቀትን ለወገን አያካፍልም። እናም እውነትንና እውቀትን ለመመርመር ለምትተጉ ወገኖቼ ቢያንስ ጥያቄ ላቅርብላችሁ። የአማራ ሕዝብ ሞቱ ሲዘገብ እንዴት ሆኖ ነው ወንጀል የሚሆነው? ጋዜጠኛ ሙሉቀንስ የአማራን ሞቱን በመዘገቡ ወንጀሉ ምንድን ነው? እንዴት ሆኖ ነው ዘረኝነት የሚሆነው? በምን መልክስ ነው የኢትዮጵያን አንድነት የሚያናጋው? የኢትዮጵያ አንድነት ሲባልስ ምን ማለት ነው? አንዱን በሞቱ እንኳን እንዳይተነፍስ ማፈን ሌላውን በአንቀልባ ማንዘልዘል ማለት ነው?

ሃሃሃ ... ድከም ብሎኝ ነው ለካ። ማንም ይሄን ጥያቄ የሚመልስልኝ የለም። ግን ጥያቄ መጥየቅ ለተጋ መልስ ባይሆንም ለእውቀት ፍንትውታ መነሻ ሊሆን ይችላል ብዬ ይሄን ጥያቄ አቀርብሁላችሁ። 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!