President of Oromia Regional State, Mr. Lemma Megersa.

የኦሮምያ ክልል ፕሬዝዳንት አቶ ለማ መገርሳ

ፊልጶስ

የትላንቱ እንቅፋት፣ ዛሬም ይመታናል

የትላንቱ ገመድ፣ ዛሬም ይጠልፈናል፤

ሰምተንም - አልሰማን፣ ሳሰማም ሰምተናል

ዓይተንም - ዓላየን፣ ሳናይም ዓይተናል

ላለመማር - መማር እኛ ተምረናል።

አሁን … አሁን ”ከልሂቃኑ እስከ ኢ-ልሂቃኑ” ድረስ፤ ቀድም ብሎ ሙሰላዊያንና ሂተለራዊያን፤ ካለፉት ሃምሳ ዓመታት ወዲህ ደግሞ ሻዕቢያውያንና ወያኔያዊያን እንዲሁም ኦነጋውያን ከባንዳ አያቶቻቸውና አባቶቻቸው የተቀበሉትን የፈጠራና የጥላቻ ታሪክ ስላወሩትና የሥልጣን ኮርቻውን ስለተፈናጠጡት፤ የሚንናገሩትና የሚጽፉት ሁሉ እንድ ዕውነት ተቆጥሮ፤ “በኢትዮጵያ ሕዝብ መኻል ጥላቻ፣ በደልና ቂም-በቀል አለ!” መባሉ ነው።

ሌላውን ሁሉ ትተን ባለፉት 26 ዓመታት ብቻ ሻዕቢያውያን፣ ወያኔያዊያንና ኦነጋዊያን የሰሩትን ግፍና በደል፣ የዘሩትን ጥላቻና በቀል ብናስብ፤ የኢትዮጵያ ሕዝብ 'ርስ-በርሱ ተበላልቶ አይጨራረስም ነበር? የኢትዮጵያ ሕዝብ ከአብራኩ በተከፈሉ ዜጎቹ እንዲተላለቅ ያልተቆፈረለት ጉድጉድ፤ ያለተሸረበበት ሴራ፣ ያለተነገረው የፈጠራ ታሪክ፣ ያለተወረወረበት ቦምብ፤ የለተኮሰበት ጥይትስ አለ ወይ? የኢትዮጵያ ሕዝብ እንዳልሰማ ሰምቶና እንዳላየ አይቶ ስንቱን ፈታና አልፉል? አሁንስ ለአንድነቱና ለነጻነቱ እየታገለ ያለው በመሃከሉ ጥላቻና ቂም በቀል ወይም በደል ስላለ ነው? የጥላቻውም ሆነ የፈጠራ ታሪክ ተራኪዎቹ ነጻ አውጭ ነን የሚሉት ራሳቸውን የሾሙ ድኩማኖች አይደሉምን?

በኢትዮጵያዊያን መኻል ጥላቻም ሆነ በደልና ቂም-በቀል የለም። ወደድንም ጠላንም ሀቁ ይህ ነው። እኛ ኢትዮጵያኖች እንደ ሸማ ድር ተሸምነን፤ ልዩነታችን እንድነታችን፣ አንድነታችን ልዩነታችን፣ ልዩነታችን ውበታችን፤ ከምንም በላይ ደግሞ በሰውነታችን መከራውንና ደስታውን አብረን ለዘመናት ያሳለፋን መሆናችንና ወደፊትም በአንድነታችን ጸንተን እንደምንቀጠል፤ በዚች ሰዓት እንኳን ለተጠራጣሪዎች አይደልም፤ ለወያኔያዊያን፣ ኦነጋዊያንና ከምድረ-ገጽ መጥፋታችን እንደማለዳ ጸሃይ ለሚናፍቁ ሀሉ እያስተማርናቸው ነው።

ትላንትም ሆነ ዛሬ ያለው እውነታ፤ ጥላቻ፣ በደልና ቂም በቀል ያለው፤ ...

1ኛ- ከታሪካዊ የአገሪቱና የሕዝቧ ጠላቶች ኢትዮጵያን የማፍረስ ዓላማ እውን ለማድረግ በተሰለፉ ባንዳዎች መንደርተኞች፤

2ኛ- የሥልጣን ኮርቻ ለመፈናጠጥ አቋራጭ መንገድ በሚፈልጉ መሃይማንና ተማርን ባይ ጉልበተኛ ቡድኖችና ግለሰቦች፤

3ኛ- ምንም ዓይነት አገራዊ ሆነ ወገናዊ ስሜት ባልተፈጠረባቸው በግል ጥቅም በታወሩ ግለስቦችና ቡድኖች መኻል ነው።

እውነታ ይህ ሆኖ ሳለ፤ ለማ መገርሳ ባህርዳር ሂዶ ገዱን ስለጎበኘ፤ ኢትዮጵያዊነትን የሚተርክ በቴሌቭዥን ስለታየ፤ እርቅ እንደወረድና ወያኔም ችግር ላይ እንደወደቁ ተደርጎ ይሰበካል። የወያኔም ተራ ማታለል፣ እኛም መታለል ችሎታችን ሆኖ የሚቀጥለው እስከመቼ ነው? ዕድሜ ልካቸውን ውሸት ሲናገሩ የነበሩ ሰዎች ዛሬ ላይ ለፖለቲካ ፍጆታ በወያኔ ት'ዛዝ፣ የነበረንና ያለን እውነታ ስለተናገሩ እንዴት እንደታ’ምር ሊቆጠር ቻለ? እስከዛሬስ የት ነበሩ? እስቲ ሳምንታት ባልሞላ ግዜ ውስጥ ወያኔ ዘወር ብሎ ከጎንደር ሕዝብ ጋር እርቅ ፈጠርኩ ብሎ “ሲቀረሻብን” ምን ታዘብን? እነ ለማ መገርሳ ባህርዳር ሄዱ ብለን ስንፈነድቅ፤ በጓሮ በር ፕ/ር ሕዝቄየል የተባላ ግለሰብ ነጭ "የኢትዮጵያን ወዳጆችን" ሰብስቦ ”አማራ" ትላንትም፣ ዛሬም፣ ነገም፣ ጠላታችን ነው እያለ በጀርመኖች የተሰበከለትን ሲደነፋብን ለምንድነው እንደ አዲስ ነገር ያዙኝ! ልቀቁኝ የምንለው?

”... በስምንተንኛው ሺ፣ በያዝነው ዘመን

ውሸት ገኖ አዘዘው፣ ሰው መስሎ ሰውን። ...” አሉ አሉ ወሎየው ።

- በመጀመሪያ ደረጃ ማንና ማን ነው የተጣለውና ያጣለው?

- ለማና ገዱስ ማንን ነው የሚወክሉት? ማንስ ነው የወከላቸው?

- እነዚህ ሰዎች በወያኔ አዝማችነት በአገርና በሕዝብ ላይ ስንት ጉድ ሠርተዋል? አሁንስ ምን እያደረጉ ነው?

- ለመሆኑ ለማና ገዱ እንዲገናኙ ማን ፈቅዶላቸው ነው ? ከወንበሩስ ያስቀመጣቸው ማ ነው?

- ግድያውም ሆነ የጥላቻ ሰበካውና ሐውልት ማቆሙ የሚካሂደው ”ቦለቲከኛ” ነን በሚሉት እንጅ በየትኛው የሕዝብ መኻል ነው?

- ወያኔ ማጠፊያ ሲያጥረው አቅጣጫ ለማስለውጥና ለማታለል መሆኑ እሩብ ዓመታት አሳልፈንም እንዴት ግንዛቤ እናጣለን?

ተደራጅቶ የሚታገለው ያጣው ወያኔ፣ የሕዝብ አመጽ ግን ግራ እያጋባው፣ ትቢያና አቧራ እየላሰ መነሳቱ ከ'ኛ ይልቅ እየገረመው የመጣው ለራሱ ለወያኔ ነው።

ታዲያ ወያኔ ወጥመድ ውስጥ እንዳለች አይጥ ሆኖ በሚሰራው ድራማ፤ እኛ ደግሞ ታዳሚዎች በመሆንአብረን እናጭበጭባለን። ”ወያኔ ተከፋፈለ! ... አዜብ 'ረግጣ ወጣች! ... ኦህዴድና ብአዴን እንዲህ አሉ ... እንዲህ ሆኖ ... የጡት አባታቼውን ወያኔን ተጋፉ! ... ኦነጋዊያንና ጃዋራዊያን እንዲህ አሉ! ...” እያልን የወያኔንና የሱን ተከታይ መንደርተኞች እሥስታዊ ባህሪ እናዳምቃለን። ግን ለምን? ለምንድ ነው ከትላንቱ - ካለፈው የማንማረው? ...

በወያኔና በኦነጋዊያን ቦይ መፍሰሳችን አቁመን፤ ስለአንደነት እያወራን አንደነት አተን 'ርስ-በርስ መቆራቆሳችን ወደ ጎን ትተን የራሳችን የቤት ሥራ መሥራት፤ በወሬ ሳይሆን በተግባር ኢትዮጵያዊ ነኝ ከሚል ዜጋ የሚጠበቅ ነው። ግዜው ደግሞ ነገ ወይም ከነገ ወዲያ አይደለም፤ ዛሬ እንጅ። የኢትዮጵያ ሕዝብ ደግሞ ለድል የሚያበቃ መሪና አደራጅ አ’ቶ እንጅ መከፈል ከሚገባው በላይ መስዋትነቱን እየከፈለ ነው። እናም ...

“እንዳትረግጡት ... የኢትዮጵያን ዐፈር - መሬት! ”

‘ባካችሁ ... ’ባካችሁ ...

እናንት በምድረ - ኢትዮጵያ ያላችሁ፤

"አትሂዱ … በ'ግራችሁ ..."

ከቻላችሁ ... "ብረሩ ክንፍ አው’ታችሁ።”

ግን … አደራ …

አንዳትረገጡት … መሬቱን

እንዳታዩት … አፈሩን፤

ብታርሱት ... አትዘሩበት

ብዘሩበት ... አይበቅልበት፤ ...

ደም ነውና - የትላንና- የዛሬ - የአሁን፣ ትኩስ … የፈሰሰበት

አጥንት ነውና ያልደረቀ፣ "አጸደ-ሕይወት" የወደቀበት

እናንተም ከእንግዲህ፣ ”ዐጽም - 'ርስቴ” የማትሉት፤ …

ያውም ...

የባቶቻችሁ፣ … የናቶቻችሁ

ያውም ...

የወንድሞቻችሁ፣ … የህቶቻችሁ

ያውም ...

የእቦቀቅላወቹ፣ … የታዳጊዎቹ፣ ... የልጆቻችሁ፤

ዓይናችሁ እያየ፣ … እየሰማ ጆሮ'ችሁ

የተመቱ! ... የቆሰሉ! ... የተወጉ! ... የተፈነከቱ! ...

የተቀጠቀጡ! ... የተዘለዘሉ! ...! … የተረሸኑ!

… በገዛ ወገኖቻችሁ …

ያውም … ”ወገን እኮ ነን” እያላችሁ።

በደመዋ ልባችሁ …

“ኤሉሄ ... ላማ ሰበቅተኒ!” ... ብላችሁ

ወሰን - ድንበር ለሌለው ሰቆቃችሁ

ብትነግሩትም “ለሰማይ አባታችሁ”፤

ግን ... ለምንም - ለማንም አይመችም

ኀዘናችሁ መልክ የለውም...

ያልተነገረ እንጅ፣ ያልተፈጸመባችሁ ግፍ የለም።

ብትጎጉጡ፣ ደም አልቅሳችሁ፣ ... እየየ … ብላችሁ

ቢያዳርስም ዓለም … ሲቃ - ዋይታችሁ ...

መቼም- መቼም ቢሆን፣ ምንጩ አይደርቅም የ'ምባችሁ።

እናማ ...

ሰላም፣ ፍትሕ፣ እኩልነት - ሳታሰፍኑ - በመኻከላችሁ

አንድነትን ሳታነግሱ - በምድራችሁ

ይቅር ሳትባባሉ፣ ‘ርስ - በርሳችሁ

ሳይመለስ ክብራችሁ፣ ጠፈር - ድንበራችሁ

የድል ችቦው - ከፍ ሳይል፣ ክብር ሰንደቅ ዓላማችሁ፤. ..

የወገናችሁን ደምና- አጥንት እንዳትረግጡት

“ይወጋችሁልና እሾኽ ሆኖ፣ የኢትዮጵያ ዐፈር - መሬት!”።


ፊልጶስ

፳፻፲ ዓ.ም.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!