ቴዲ በታሰረ በ415ኛው ቀን ከ1900፡45፡15 ሰዓት በዕለተ ቅዳሜ ተተየበ

ዳኛቸው ቢያድግልኝ This email address is being protected from spambots. You need JavaScript enabled to view it.

የዘመናት የህዝብ ብሶትን ያጨናገፈውና ሀሳዊ ድመሲዕ ሆኖ መጣሁላችሁ ብሎ በወርሃ ግንቦት የመጣብን የትግራይ ነፃ አውጪ እንደ ጠፉ ጎልያዶች ይጠፋል። እንደ ጥንብ ክርፋት በስብሶ ሲያልቅ ይረሳል። የፍቅር መንፈሥ፣ የአንድነት ዝማሬ፣ የሕብረት ፍካሬ ግን የትውልድ ዘመናትን እየተሸጋገረ በብርታት ላይ ጉልበት፣ በእውቀት ላይ ብልህነት እያከለበት ይኖራል። ፍቅርን የዘከሩ ሰዎች ሊያልፉ ይችላሉ። ፍቅር ሲያልፍ ግን ዓለምም ይጠፋል። ሰማይና ምድር በፍቅር ተዘርግተዋልና!!

 

ፍቅር ከናፍቆት፣ ከመፈላለግ፣ ከመሰሰትና ከመሳሳት (መራራት) ጋር ይጣመራልf። መለያየት የፍቅር ፈተና ነው። በአንድ ላይ ያለመሆን ለማሰብና ለመመዘን ያግዛል። እንደዋዛ የተመለከትነው ፍቅር ሲለየን ጣዕሙ ይታወቀናል፣ ዋጋው ይገባናል። በአለፍን በአገደምን ቁጥር ስለዚህ እንድናስብ እንገደዳለን። ፍቅርን መርሳት አይቻልም ከፍቅር ወደ ፍቅር መሸጋገር እንጂ!!

 

ቴዲንም እንዲሁ በተከፋን ጊዜ እናስበዋለን፣ በደስታችንም ጊዜ አብሮን ነው። ቴዲ ቢኖር ኖር ይህን እንዲህ ያዜመው ነበር እያልን እንኳን የሚያደርገውን የማያደርገውን ሁሉ ለርሱ እንሰጠዋለን። የምንወደው ስለወደደን ነው፣ ሀገሩን ስለወደደ ነው። ያከበርነው ከሀገሬ ተለይቼ ሕይወት የለኝም ስለአለን ነው። የኮራንበት እኛ ደፍረን ያልተነፈስነውን እርሱ በአደባባይ ሲያዜም ስለተመለከትነው ነው። ፍቅር ሰጥቶን ነው ፍቅራችንን የተቀበለ።

 

ፍቅር ደግሞ መንፈሥ፣ እሳቤ፣ ግንዛቤ ነው። በደም በስጋ በአጥንት ውስጥ ይገለጽ እንደሁ እንጂ በራሱ አካለ-ሥጋ ኖሮት አይኖርምና እግር ቆርጦ ዓይን ኣጥፍቶ ፍቅርን መቀነስ አይቻልም። ቴዲንም አስሮ ፍቅርን መንጠቅ አይቻልም። በአደባባይ ሲያዜም በልባችን ዜማው ጠልቆ ገብቶአል። የዜማ ቃናችን ለሰሚ ባይመችም በግላችን እንናጎራጉራለን። ለቴዲ ያለንን ፍቅር በሃሳብ በሚያገናኙን መንፈሣዊ መንገዶች ሁሉ እንነግረዋለን። አዝመራውን እያየ ፈገግ እንደሚል ገበሬ ከእስር ቤቱ ጉረኖ ውስጥ ሆኖ ልቡ የኩራት አታሞ ትደልቃለች። ተመስገን የፍቅር አዝመራዬ አማረልኝ እያለች።

 

የፍቅር አዝመራን በአረም መሙላት ደግሞ ወያኔያዊ ኢህአዲጋዊ መንገድ ነው። ስልኩን፣ ፖስታውን፣ ኢንተርኔቱንና ሌሎች የመገናኛ መንገዶችን በማነቅ የፍቅርን እድገት መግታት እችላለሁ የሚል ግብዝ ነው። ግለሰቦችን ወደ እስር ቤት በመወርወር ፍቅርን ማገት ይቻላል ብለው የሚያስቡ ማሰቢያቸውን ማስፈተሽ ይገባቸዋል። ምክንያቱም ፍቅርን ከከተቡን በሁዋላ ቢታሰሩ ባይታሰሩ ጥላቻ ሊያሳውረን አይችልም። መልዕክቱ ተዋህዶናላ!! የግንኙነት አካላዊ መንገድ ብቻ ነው የሚደናቀፈው፤ የፍቅር መንፈሥ ግን ሁሌም የናፍቆት አዲስ መንገድ ይቀዳል። መናፈቅ መመኘት ነው። የተመኙትን ለማግኘት ደግሞ የሚከፈለው ሁሉ ይከፈላል።

 

ጥላቻ የፍቅር ተቃራኒ ነው። ከጥላቻ ፍቅር አይወለድም። ክፋትን ፈጽሞ ፍቅርን መሻት ግብዝነት ነው። በመከፋፈል፣ በማጣላትና ቅራኔን በማጋጋል ሊገኝ የሚችለው ፀብ፣ ጦርነት፣ እልቂትና ስር የሰደደ ጥላቻ ነው። ወያኔዎች ይህንን አምርተዋል፣ የክፋትን ትርፍ ዝቀውታል። እንኳን ለራሳቸው ቆምንልህ ለሚሉት የትግራይ ህዝብም ክፋት እየሰፈሩለት ነው። ከየመንደሩ እየለቀሙ በሥልጣን እያምነሸነሹ ጥርስ እያስነከሱባቸው ነው።

 

የክፋት ጽዋው እየሞላ የሚፈስ እንባ ሲዥጎደጎድ ወያኔዎችን የምናመሳስለው ከእርኩስ መንፈሥ ነው። እርኩስ መንፈሥን ደግሞ አርባ ክንድ ያርቁታል። ስለዚህም የወያኔ መሪዎች ተደብቀውና ተሹለክልከው የአይጥ ኑሮ እንዲኖሩ ሆነዋል። ከዘሩት ክፋት ፍርሃትን አጭደው ሰው መሃል ሳይቆሙ፣ ያጠፉዋቸው ነብሶች እንቅልፍ እየነሱአቸው ወደ ዲያቢሎስ አባታቸው መሄጃቸው ደርሶአል። የሚያቆዩት ክፋት ግን ብዙ የዋህና ሆድ አደሮችን ይዞ ይጠፋል።

 

ሆድ አደር የወያኔ አገልጋዮች አንገታቸው ላይ ገመድ እንደታሰረላቸው በዳረጎት የሚኖሩ ውሾች ናቸው። እንቅስቃሴአቸው በታሰረላቸው የገመድ እርዝማኔ የሚለካ። ‘ተነሱ!’ ሲሉአቸው የሚነሱ፣ ‘ጃስ!’ ሲሉአቸው የሚናከሱ፣ ሰብዕናቸው የዘቀጠ እንደ ሰው በሁለት እግር የሚራመዱ እንስሶች ናቸው። ዕድሜና ተሞክሮ ካሉበት እልፍ ካላደረጋቸው እንዴት ብለን ሰው እንበላቸው? በእናታቸው ሞት እልል ብለው የሚጨፍሩ፣ በወገናቸው ሞት የዕለት ጉርሳቸውን የሚያገኙ ከጥንብ አንሳ በምን ይለያሉ?? ጥንብ አንሳ ሌላ አውሬ የገደለውንና ከርሱ የተረፈውን ለመቦትረፍ የሚበር በራሱ ግዳይ የማይጥል የወፍ ዘር ነው። እንደ ውሎው ሁሉ መልከጥፉም ነው። እኒህ በፍርፋሪ የሚያድሩና አገልግሎታቸውን ሲጨርሱ እንደዛገ እና የዶለዶመ ገጀራ ራቅ አርገው የሚጥሉአቸውን ሰዎች በአካል ከማየት ያፈቀሩትን እያሰቡ መልካሙን እየተመኙ መኖር ምንኛ ደስ ይላል።

 

እንደ ቴዲ ሁሉ ሰብዓዊ ፍጡርን እናክብር፣ ፍቅርን ዘርተን ደስታን እናምርት። ሰብዓዊ ክብራችንን ለሆዳችን ስንል ወደ እንስሳነት አናሳንሰው። አንድ ጊዜ ብቻ በምንኖርባት ዓለም ክብር አልባ ጦልጧላ ሆነን ለልጆቻችን የሚተርፍ ያደፈ ታሪክ አቆይተን አንለፍ። እንደ ተበጣጠቀ አሮጌ ጆንያ ሞልቶ የማይሞላ ከርስ የያዙ ሆዳሞችን የቴዲ የፍቅር፣ የአንድነት፣ የሕብረት መንፈሥ ይጎብኛቸው።

 

የቴዎድሮስ ካሣሁን የፍቅር መንፈሥ አዕምሮአችንንና ልባችንን በደስታ ይሞላዋል። ፍቅር በአካልም ይገለጻል እንዳልኩት በሰለሜ ቅላጼ ክብ ሠርተን እጅ ለእጅ፣ ትከሻ ለትከሻ፣ ወገብ ለወገብ ተያይዘን እንወዛወዛለን። እንደ ቀስተደመና የሕብረቀለማት ፍንጥቅጣቂዎች በልዩነታችን መካከል ያለው አንድነታችን ደምቆ ያበራል። ቴዲ በእስር ቤትም እንኳ ሆኖ የዘራውን የፍቅር አዝመራ ማየት ይችል ዘንድ የሚጠራጠር የፍቅር መንፈሥ ያልጎበኘው ብቻ ነው። ለእኛ ሠርቶልናልና ፍቅራችን ላምባዲና ሆኖ የተዘጉ ጉሮኖዎችን በሙሉ የተስፋ ብርሃን ይሙላባቸው።


 

ዳኛቸው ቢያድግልኝ   This email address is being protected from spambots. You need JavaScript enabled to view it.

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!