ነቢዩ ሲራክHabtamu Ayalew with his daughter. ሀብታሙ አያሌው ከልጁ ከህፃን ኤማንዳ ሀብታሙ ጋር

* እንኳንም ተወለድሽ ህፃን ኤማንዳ ሀብታሙ

ዛሬ የወጣቱ አባዎራ ሀብታሙ የአብራክ ክፋይ ህጻን ኤማንዳ ሀብታሙ 4ኛው ዓመት የልደት ቀን መሆኑን ስሰማ ከልብ የመነጨ መልካም ምኞቴን ለመግለጽ፣ ብሎም በሕግ ሽፋን በአባቷ ላይ እየተፈጸመ ያለውን ግፍ በማውገዝ እንደ ዜጋ ማለት የምለውን ማለት ፈለግኩ!

በሠለጠነው በእኛ 21ኛ ክፍለ ዘመን፣ በእኛ ሀገር፣ ለሀገራቸው መጻኤ ሕይወት ለፍትህና ዴሞክራሲ መከበር ተግተው መጨረሻቸው መሳደድ፣ መታሰር መገረፍና መሞት እጣ ፈንታቸው የሆነ ትንታግ ዜጎች እውቃለሁ። ይህን ሁሉ አደጋ እየተመለከቱ ጥቂቶች የወጣትነት ለጋ ዕድሜያቸው በቀሰሙት እውቀት ለመደገፍ ሽተው ተደናቅፈዋል፣ እየተደናቀፉም ነው። እንደ ሰው ሀብት ንብረት ከማካበት የወጣት ጎልማሳነት ዕድሜያቸውን ለፍትህ ነጻነት ሲታገሉ ከባድ መስዋዕት ሲከፍሉ ከቤተሰብ ኃላፊነት ባሻገር የሀገርና የህዝባቸውን ነገር አንገንግቧቸው "እኔም ለሀገሬ" በሚል የከፈሉትንና እየከፈሉት ያለው የከበደ መስዋዕትነት የሚዘነጋ አይሆንም!

ከምንም በላይ ለዘመናት የሀገርና የህዘብን ኑሮ እንደ ግመል ሽንት ወደ ኋላ እየጎተተው ያለውን የሀገራችን በአንባገነኖች የሚዘውር ፖለቲካ ለመቀየር ትግል ከተጀመረ ከራረመ። ውጤቱ አመርቂ ባልሆነው ፖለቲካውን በሰላማዊ መንገድ ለመቀየር የሚደረገው ትግል ውስብስብ በሆነበት ሰዓት መድረሳችን ያሳዝናል! መሣሪያ ሳያነግቡ ሃሳባናቸውን በአደባባይ በመግለጽ የተሰለፉት ወገኖች እየደረሰባቸው ያለውን ጫና ለመረዳት ብዙ ርቆ መሔድ አያስፈልግንም። የቅርብ የዛሬ ህያው ምክስራችንና ዋቢያችን በወህኒ ቆይታው በጠና ታሞ የሚንከላወሰው ወጣቱ ፖለቲከኛ ሀብታሙ አያሌው ይጠቀሳል ...

ዛሬ ህጻን ኤማንዳ የ4ኛ ልደቷን ስታከብር እንደ ህጻናት አባቷና እናቷ አጅበዋት ሻማ ለማብራት አልታደለችም፣ ኤልማንዳ አባቷ ሀብታሙ አንድ ልጁን ከጎኗ ሆኖ ማድመቁ ቢቀር እሷ ስትደሰት እሱ ሕመም ስቃዩ ፈውስ አግኝቶ "እንኳን አደረሰሽ!" ለማለት አልታደለም፤ እናም ኤማልዳ በአባቷ ሕመም በኀዘን ተሞልታ የዛሬ ልደት የምታከብር ምንዱብ ሆናለች፣ የሀገሬ ፖለቲካ፣ የሀገሬ አምባገነኖች አባቷን የሚቀልዱበት የኢትዮጵያ ተገፊ ህጻን ኤማንዳ፤ ታሳዝናለች፣ እኛም እናሳዝናለን!

እንደ ሀብታሙ ሁሉ ለሀገራችንና ለህዝባችን ያገባናል ያሉ ዜጎች ግፍ በሚፈጸምባቸው ዜጎች ቁጥር የትየለሌ እየሆነ መምጣቱ ያማል፤ ልጆችና ቤተሰብ ደግሞ የግፉ ዳፋ ቀማሾች ሆነዋል! የግል ጥቅምን ከማስቀደም ሀገሬ ብለው ያስተማራቸውን ወገንና ሀገር ለመታደግ በተነቃቁ፣ ተምረው ተመራምረው ለሀገራቸው እድገት ግብኣት የሚሆን ሕልም በሰነቁ፣ ጥቂት የማይባሉ ዜጎች ፍትህ ተነፍጓቸዋል፣ ብዙዎች በፍርደ ገምድል የፍትህ አሰጣጥ ዓመታትን በወህኒ ያሳልፉ ዘንድ ግድ ሆኗል! የትንታግ ወጣት ጎልማሶችና አባት ፖለቲከኞች መጨረሻቸው ስቃይ፣ መከራና መገፋት ሆኗል ...

ወጣቱ አባዎራ ሀብታሙ ከሀገር ወጥቶ ሕክምና እንዲያገኝ ተወትውቶ የተሰየሙት የፍትህ አካላት ጉዳዩን የሚያዩበት ዓይን አሳዛኝ ሆኗል። ወጣቱ የቤተሰብ ኃላፊ በሕመም ተቀስፎ እየተሰቃየ የዳኞች አለመሟላት ፌዝ ይመስላል፣ የቀጠሮው መደራረብም ወጣቱን ፖለቲከኛ ሀገሬው "ፖለቲካ ኮረንቲ ነው!" ብሎ እንዲርቅና ሀብታሙን መቀጣጫ ለማድረግ የተወጠነ የፖለቲከኞች የበቀል ሴራ ካልሆነ መልካም ነው!

ዛሬ በዚህች ቀን ፍትህ ባይዘገይ ኖሮ በፍትህ ሥርዓት ሀብታሙ አቅርብ ያለውን የዶክተሮች ምስክርነት ተቀብሎ ወደ ውጭ በላከው ነበር፣ ስብዕና ቀድሞ፣ ፍትህ በተግባር ማየት እውን ቢሆን ኖሮ ሀብታሙ በውጭ ሀገር ሕክምናውን ከውኖ ለልጁ መልካም ምኞቱን ለአውሮፖ ይሁን ከእስያ ባንዱ የዓለም ክፍል "ልጀ ኤልማዳ እነሆ ተሽሎኝ እያገገምኩ ነው! ስላንችና ስለ ቀሩት የሀገሬ ቀጣይ ትውልድ ሰላማዊ ተጋድሎየን እቀጥላለሁ! ያኔ ልደትሽ ደምቆ ከኢትዮጵያ ጋር ይከበራል!" ይላት እንደነበር ሳስበው በዘገየው ፍትህ አዝናና ነፍሴ በኀዘን ትታወካለች።

በዘገየው ፍትህ ተስፋ ያልቆረጠው ጀግና ግን ዛሬም ይናገራል ... በልጁ ልደት ዋዜማ በሚጠዘጥዘው የቁስል ሕመም የሚሰቃየው ወጣቱ ተገፊ ፖለቲከኛ ሀብታሙ እኩለ ሌሊት ላይ ሊጠይቁት ለሄዱት ወዳጆቹ ለእነ አይታክቴው ጋዜጠኛ ኤልያስና ዳንኤል እንዲህ ነበር ያላቸው "ለእኔ ከሀገር ወጥቼ እንዳልታከም እንዲህ በኢህአዴግ የተጨከነብኝ የውክልና ሞት ስለተፈረደብኝ ነው። በእኔ ላይ እየተፈጸመ ያለው ግፍ፣ በእኔ ብቻ ሳይሆን በሚሊየኖች ላይ ያነጣጠረ እንደሆነ ይገባኛል።" ነበር ያለው፣ እሱ ስለ እውነትም እንደሚሰራበት ደባ ሀብታሙ ግን በሕይወት ይኖራል፣ አልጠፋም፣ ይህ በፈጣሪ የተጣለ ተስፋችን ነው፣ በፈጣሪ እንጠበቃለንና!

እየሆነ ያለው ሁሉ ቢያምም፣ ሕመሙ እንደ ታማሚው ወንድም ጠዝጥዞን እንደ ዜጋ ያማል፣ ያማል ብንልም ዳሩ በሀብታሙና በቤተሰቡ ላይ የሚፈጸመው በደል አያልፍ የለም ያልፋል! እሱም በተባ አንደበቱ እንዳለው እመኑኝ እንኳንስ ኢህአዴግ ደርግም ወድቋል!

አዎ! ፍትህ በተግባር የምናይበት ብሩህ ቀን ናፍቆናል፣ ዛሬ መካከል ፍንጣቂ ብርሃን እያየን የሰላማዊው ትግል ጀግና አርበኛው የሀብታሙ አያሌው ልጅ ኤማንዳና የመሰሎቿ ግፉዕ ዜጎች ልደት በአርበኝነት ታጋድሎ እየተወደሰ ደምቆ ይከበራል እያልን ምኞታችን እንገልጻለን! እስከዚያው ግን ጨቋኝ አገዛዝ በነገሰበት ሰማይ ስር ጊዜው የፈቀደው የጀግና ልጅ ልደቱ የሚከበረው እንዲህ በኀዘንና በመከራ ሆኗል፣ የጀግና ልጆች ልደታችሁ ዛሬ በኀዘን፣ ቁጭት በመለያየት የታጀበ ቢሆንም ነገም ሌላ ቀን ነውና ጨለማው ይነጋል፣ ከፍ ያለው ዝቅ ይላል፣ ሁሉም አላፊ ነው፣ ያልፋል! ይህ እስኪሆን ከጀግኖችና ከቤተሰባቸው ጎን ሰፊው ህዝብ ክብር ይቆማል፣ ኤልማዳ እኛ ኢትዮጵያን የምንወድ አባትሽ ስለከፈለልን የመስዋዕትነት እዳ ከአንችና ከመሰሎችሽ ጎን ነን! ዛሬ እንኳን ተወለድሽ የምንልሽ በዚያ ህዝባዊ መንፈስ ነው፣ እመኝኝ! ዛሬ አባትሽና መሰል አርበኞች በከፈሉና በሚከፍሉት የከበደ መራራ መስዋዕትነት የነገን ብሩህ ቀን ተስፋ ይመጣል!

ብቻ እንኳንም ተወለድሽ ህጻን ኤማንዳ ሀብታሙ!

ነቢዩ ሲራክ

ሐምሌ 21 ቀን 2008 ዓ.ም.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!