Temesgen Desalegne and his mother

ለኢትዮጵያ ሰብዓዊ መብት ኮሚሽን
አዲስ አበባ

ጉዳዩ፡- የልጄ የተመስገን ደሳለኝን ጤንነትና የጉብኝት ሁኔታን ስለማወቅ

የልጄ ተመስገን ደሳለኝን ጉዳይ ይዤ እናንተው ጋር መመላለስ የግድ ሆኖብኝ ዛሬም ከደጃችሁ መጥቻለሁ። ባሕሌና አስተዳደጌ ያስተማረኝ፤ አንድ ቦታ ለአንድ ጉዳይ መመላለስ ለችግሩ ባለቤትም ሆነ ለመፍትሔ ሰጭው አሰልቺ መሆኑን ነው። እውነት ለመናገር ዛሬም ወደ በራፋችሁ ስመጣ እንደው እነዚህን ሰዎች ሥራ እያስፈታኋቸው ይሆን ከሚል ሃፍረት ጋር ነው። ግን ምን ላድርግ? ጉዳዩ ልጅን የሚያኽል የስጋ ክፋይ ነገር ሆነብኝ። እንድትረዱልኝ የምፈልገው እኔም ተቸግሬ እያስቸገርኳችሁ መሆኑን ነው። በተጨማሪም ጭንቀት እረፍት ስላሳጣኝና ጤናዬንም እየፈተነኝ በመሆኑ የመፍትሔ ያለህ እያልኩ አለሁ።

ከዚህ ቀደም እናንተ መ/ቤት ብቅ ያልኩት ልጄን ለመጎብኘት ፈቃድ እንዳገኝ ትተባበሩኝ ዘንድ ነበር። በወቅቱ የተሰጠኝ ምላሽ እጅግ እንዳስደሰተኝ በአደባባይ መናገሬን ማንም ያውቀዋል። አንጀቴ እንደራሴም ሁሉም ተረድቶታል። ዛሬም በድጋሜ ስመጣ በባለፈው መፍትሔ ተበረታትቼ ነው። ይህን ሳልናገር ማለፍ በእኔ ዕድሜ ለሚገኝ ሰው መልካም አይሆንም። እንደ ከዚህ ቀደሙ ሁሉ የዛሬውም አቤቱታዬ ተመሳሳይ ምላሽ እንደሚኖረው በሙሉ ልቤ ተስፋ አደርጋለሁ።

በዝዋይ ማረሚያ ቤት በእስር ላይ የሚገኘው ልጄ ተመስገን ደሳለኝ፤ ከታሰረ ሁለት ዓመታት አለፉ። በዚህ ግዜ ውስጥ የወገብ ሕመምና የጨጓራ በሽታ እየባሰበት መምጣቱን በተደጋጋሚ ሰምቻለሁ። አንደኛው ጆሮውም ስቃይ እየፈጠረበት መከራውን እንዳባሰበት እሱን ባየሁበት ወቅት ለማወቅ ችያለሁ። ይባስ ብሎም የማረሚያ ቤቱ አስተዳደር አለፍ አለፍ እያለ ያለመጎብኘት እገዳ ይጥልበታል። ይኽን ታዲያ ምን ትሉታላችሁ? በእስር ላይ ሌላ እስር አይደለምን? እነዚህና መሰል ተደራራቢ ችግሮች እየከፉ መምጣታቸው በእኔና በተቀሩት ጎብኝዎቹ ዘንድ ከፍተኛ ስጋትና ጭንቀትን ፈጥሮብናልን።

ከሳምንታት በፊት ኅዳር 28/2009 ዓ.ም. የዝዋይ ማረሚያ ቤት ሰዎች ልጄ የት እንዳለ አናውቅም በማለታቸው፤ ለአስር ቀናት እምጥ ይግባ ስምጥ ሳላውቅ በእየእስር ቤቱ ከሚንከራተቱት ልጆቼ ጋር ልጄን ፈለኩት። አለገኘሁትም። የወለደ አንጀት አላስችል ቢለኝ "እርሜን ላውጣ" እያልኩኝ ልጄን ስል ሰነበትኩኝ። መቼም አምላክ ሰሚ ነውና በአስረኛው ቀን ታህሳስ 7/2009 ዓ.ም. በዝዋይ እስር ቤት ተመስገን ተገኘ አሉኝ። ደስም አለኝ። ግን ምን ዋጋ አለሁ ይኼን ደስታ ማቅ የሚያለብስ ሌላ ወሬ ደረሰኝ። ”የልጄን ዓይን አያለሁ” ብዬ በተነሳሁ ውዬ ሳላድር በድጋሜ የክልከላው ዕጣ እኔኑ ገጠመኝ።

ከዚህም አልፎ ሕመሙ እንደ ባሰበትና ከእስር ቤቱ ቅጥር ውጭ ወደሚገኘው ባቱ ሆስፒታል እንዳደረሰው ልጆቼ ቢደብቁኝም ስለጉዳዩ የሚያውቁ ሰዎች ነግረውኛል። ይህን ከሰማሁ ጀምሮ ተመስገን ስል ዛሬም አለሁ።

ብቻ ተባበሩኝ፤ እርዱኝ። ይኼን መከራ ብቻዬን ለመወጣት አቅም የለኝም። የምታግዙኝ ነገር እንዳለ ስለተረዳሁ ነው የእናንተንም ደጅ የምጠናው። እገዛችሁ ልጄን የማየት ምኞቴንና እርሱም የሚያስፈልገውን የሕክምና እርዳታ በአፋጣኝ እንደሚያስገኝለት ሙሉ ዕምነት አለኝ። እስኪ ለሁሉም ፈጣሪ ይርዳን።

ከሰላምታ ጋር

ወ/ሮ ፋናዬ ይርዳቸው

ግልባጭ

  • ለጠቅላይ ሚኒስቴር ጽ/ቤት
  • ለተወካዮች ምክር ቤት አፈ-ጉባዔ ጽ/ቤት
  • ለተወካዮች ምክር ቤት የሕግ፣ ፍትሕና አስ/ር ጉዳዮች ቋሚ ኮሚቴ
  • ለጠቅላይ ዐቃቤ ሕግ ጽ/ቤት
  • ለሰብዓዊ መብቶች ጉባኤ (ሰመጉ)
  • ለሕዝብ ዕምባ ጠባቂ ተቋም
  • ለኢትዮጵያ ቀይ መስቀል ማኅበር
  • ለሚዲያዎች

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!