Assefa Chaboአሰፋ ጫቦ (Dallas Texas USA)

የፈረንጅ ገና ዋዜማ ዕለት በሆንኩት ልጀምር። ሁለት ወዳጆቼ፤ አንደኛው ከዚሁ ከቨርጂኒያ፤ ሌላው ከሳሳከችዋን፤ ካናዳ ደውሎ ስለበዓሉ ትንሽ ተነጋገርን። እነሱም የሚሰማቸውን እኔም የሚሰማን ያዝ ለቀቅ አደርገነው። “ዞሮ ዞሮ ከቤት!” እንዲሉ ያው ሁሌም ሚዛኑ የኢትዮጵያ ዓመት በዓላት ናቸው። “ባሻ አሸብር ባሜሪካ” መሆንናችን መሰለኝ።

ከካናዳ የደውለው የቁጫ ልጅ ነው። ቁጫ ጋሞ ውስጥ አንድ ወረዳ ነው። እኔ እስከማውቀው ዝነኛነቱ በቅቤ ነበር። አሁን፤ በዚህ “ዙሪያችሁን አጥር እጠሩና ተካለሉ” በተባለው መሠረት ይመስለኛል “እኛ ቁጫ እንጅ ጋሞ አይደልንም!” አሉ ተባለ። ያ እንደፍጥርጥሩ! እኔ የገረመኝ አምና ይሁን ሀች አምና፤ አዲስ አድማስ ጋዜጣ ላይ “ቁጫ የራሱን ዕድል የመወሰን መብቱ መከበር አለበት!” የሚል ጽሁፍ አንድ ሁለት ይሁን ሦስት ጊዜ ያነበብኩ ይመስለኛል። ያንን ጽሁፍ አቅራቢ ደግሞ “አገር አቀፍ ፓርቲ” ተብሎ ከተመዘገቡትና ተቃዋሚ ድርጅቶች ከሚባሉት ውስጥ አንዱ ነበር። ተለዋጭ አስተያየት አልተሰጠበትምና የሚቃወሙት ያው ወያኔን ነው ብዬ አስባለሁ።

አገር ሁሉ የሚቃወመው፤ ወይም ከሚቃወማቸው የወያኔ ፖለቲካ ዋንኛው “ይህንን በብሔረሰብ ከፍሎ ማባሉትን አቁሙ!” ነው። አገር አቀፍ ፓርቲ ይህንን ሲደግፍ ደግሞ ነገረ አለሙ አልገባኝ ይሆን? ወደማለት ወሰደኝ። ምኑን እንደሚደግፉ፤ ምኑንስ እንደሚቃወሙ አልገባኝም ለማለት ነው። በዚህ አጋጣሚ አስታወስኩት። ከነሱ ጋር ዝርዝር ውስጥ አልገባንም እንጂ፤ እኔ ይህንን የፈረንጅ በዓላት፤ በተለይም ኃይማኖት ነክ የሆኑትን መንፈሴ አልተላበሰውም። ሙሉ ለሙሉ አልተላበሰውም ማለት ይሻላል። ምራቄን አጣጥሜ ከዋጥኩ በኋላ ከአገሬ ስለወጣሁ፤ አዲስ ስር ማቆጥቆጥ አልቻልኩምና ሊሆን ይችላል።

ይህ አንደኛው ምክንያት ቢሆንም፤ ሌሎችም የሚያጣ አይመስለኝም። ለምሳሌ ያክል ይህንን የገና በዓል እንውሰድ። ፈረንጅና ተከታዮቹ የሱስ፤ እስልምና ተከታዮች ኢሳ፤ ኢትዮጵያዊያን ደግሞ እየሱስ የሚሉት ልደት ነው። በየትኛውም ቅላጼ ይጠራ እየሱስ እናት አለው ማለት ነው። ልደት የተባለው “ተወለደ!” ለማለት ነውና! እናቱ ደግሞ ማርያም ነች። ኦርቶዶክሶቹ ”ድንግል በሕሊናክ ወድንግል በሥስጋኪ!” ይሏታል። ሐዋሪያው ሉቃስም በወንጌሉ ምዕራፍ አንድን ለማርያም ብቻ ያደርገዋል። ተራ-ተርታው የኢትዮጵያ ኦርቶዶክስ ተከታይ (The average laity) ማርያምን እንደቤተሰብም፤ እንደጎረቤትም፣ ሲበዛም በግል እንደሚያውቋት አስመስለው ሲጠሯትና ሲያሞካሽዋት ማየትና መስማት የተለመደ ነው።

በዚህ ውስጥ ያደገው አሌክስ “ደብባዳቤ ለእግዜር!” በሚለው ግጥሙ መደምደሚያ ላይ፦

“ኧረ እግዜር በናትህ
በጭንቅ አማላጇ
ባዘለህ ጀርባዋ ባቀፉህ እጆቿ
ወይ ዝናብ ላክልን
ወይ ዝናብ ሁነህ ና
ሙቀት ገደለና!” ይላል።

አባ ህርያቆስ የሚባሉ መንኩሴ ደግሞ “ጎሣ ልብዬ ቃለ ሠናዬ!” የሚል የማርያም ቅዳሴ ደርሰዋል። ቅዳሴ ምስጋና ማለት ነው። ቀደሰ አመሰገነ ነውና! ሶርያዊ ሳይሆኑ አይቀሩም። እኔ አልፎ አልፎ “ጎሣ ልብዬ”ን አዳምጠዋለህ። የድርስቱ ጥልቀትና ምጥቀት ይገርመኛል! ማርያምም በዚሁ በሉቃስ ምዕራፍ አንድ ውስጥ “ከእንግዲህ ትውልድ ሁሉ ያመሰግኑኛል” ትላለች። ትውልድ ስትል የሰው ዘር ሁሉ ማለት ባይሆንም፤ ክርስቲያን የሆነውን ሁሉ ማለቱ ይመስለኛል። ከሆነም ደግሞ ፈረንጁም እዚያው ትውልድ የሚለው ውስጥ ይጠቃለላል። ካልተጠተቃለለ ደግሞ ትውልድ አይደለንም ማለታቸው ይሆን? ወይም የሉቃስን ወንጌል ምዕራፍ አንድን አላየንም! አልሰማንም! ማለት ይሆን? ፈረንጅ በማርያም አካባቢ ድርሽ አይልም! ካቶሊኮችን አይጨምርም። ነገሩ “ማን ይመራመር!?” ውስጥ የሚገባ መስለኝ።

አንድ ቀን “ክርስትና በአሜሪካ!” የሚል መፃፌ የሚቀር አይመስለኝም። ይህ ሁሉ ነገርን ነገር ያነሳዋል በሚል እንጅ እምነት ውስጥ ገብቼ ለመዘባረቅ አይደለም። ልገባ እንኳን ብፈልግ እዚያ የሚተራመሰው፤ የሚያተራምሰው ብዙ ስለሆነ ክፍት ቦታ የማገኝ አይመስለኝም።

* * * * * * *

ከውዳጆቼ ጋር ስልኩን ከዘጋሁ በኋላ አንድ ቦታ ለመሔድ Malcom X እና Baylor Hospital ያለው ባቡር ጣቢያ ቆሚያለሁ። የባቡሩ ጣቢያ መነፋሻም (Park) ጭምር ያለው ስለሆነ አልፎ አልፎ መናፈሻው ውስጥ ተቀምጬ አነባለሁ ወይም እቆዝማለሁ። ዛሬ ያለወትሮው ጭር ብሎ ነበር።

እንደቆምኩ SUB አንድ ትልቅ ፈረንጅ የሚነዳውና አጠገቡ የ15 ዓመት የሚሆነው ወጣት የተቀመጠበት ፊት ለፊት ቀጥ ብሎ ቆመ። በኔ በኩል ያለው ወጣቱ ነው። ፊቱ ላይ ፈገግታ አለው። መስኮቱን ከፍቶ እጁን ወደኔ ዘረጋ። ገርሞኝ ልጨብጠው እጄን ስዘረጋ በጁ የያዘውን ሰጠኝ። የሰው እጅ ያልነካው ሁለት ባለ $20 ነው። አልተዘጋጀሁበትና እንኳን አደረሳችሁ (Merry Chistmas) የመሳሰለውን ስል ጉዙፉ አባት ወይም አያት ወጥቶ አቀፎ እንኳን ለገና አደርሰህ (Merry Chirstmas) ተባባልን። ብዙ ጊዜ አይቸው የማላውቀው አዲስ ከፓኮ የወጡ፤ የዚህ አካባቢ የማይመስሉ ፈረንጆች ነበሩ!

* * * * * * *

ከሰዓት በኋላ ይህንን ለልጆቼ ለእመቤት አሰፋና ለቡርቱካን ሚደቅሳ ነገርኳቸው። ለእመቤት ደውዬ ነው። ቡርቱካን “እንኳን አደረሰህ !” ለማለት ደውላ ነው። ሁለቱም ተቀራራቢ መልስ የሰጡኝ ይመስለኛል። አንተ መንፈሴ አልተላበሰውም ስትል ይኸው “ወዴት ገሽሽ ገሽሽ! ብሎ መልዕከተኛ መጣብህ” የሚል ቃና ያለው መሰለኝ። ከሆነ ደግሞ “ማን ይመራመር?” አይነት ሊሆን ነው

“ማን ይመራመር፤ ማን የመራመር፤
ያንተን ሥራ ያየንተን ግብር፤
ማን ይመራመር?” ይላል መዲናና ዘለሰኛው።

እኔም እስማማለሁ! ብቻ ይህንን “ያንተን ሥራ! ያንተን ግብር! ማን ይመራመር!?” የሚለው አንድምታም ያለው ይመስለኛል። በአንድምታው ከሔድን ደግሞ “ያንተ ሥራ!” የሚለው ፈጣሪን ማለት ሳይሆን፤ ወይም ፈጣሪን ብቻ ማለት ሳይሆን ተፈጥሮን ብሎ መተርጎም የሚቻል ይመስለኛል። ተፈጥሮ አምቃ የያዘችውን ምስጢር ለማወቅ ጥረቱ ገና በሩን በማንኳኳት ላይ ያለ ይመስላል። እና ልጆቼ ያሉትን በዚያ ትርጉም ጭምር ተቀብያለሁ ለማለት ነው።

* * * * * * *

ሌላው የዚህ ሰሞን ዜና “ከፍተን ብናየው! የኢሳይያስ አፈወርቂና የኦነግ መስተፋቅር” ብዬ ያጻፍኩት በየድረገጹም በአዲስ አድማስም ወጥቶ ነበር። አንዱ በራዲዮም ያነበበውን በUtube ለጥፎ ነበርና ይህንን በምጽፍበት ጊዜ 148,000 ሰው አዳምጦታል ይላል። ይህ Facebook፤ በአዲስ አድማስና በድረገጻት ያነበበውን ሳይጨምር ማለት ነው። እንደሚነገረኝ ከአንባቢዎችና አድማጮች ውስጥ ብዙ ኤርትራውያን እንዳሉበት ነው። ይህ፣ ለኔ፣ ማኅበራዊ ገጽ የሚባለው የሚሠራውን ትንግርት የሚነገረኝ ነው።

የማኅበራዊ ገጽ ነገር ከተነሳ አይቀር ኢትዮጵያ ለተወሰኑ ወራት ተዘግቶ ነበር። ጠቅላይ ሚኒስትራቸው አቶ ኃይለማርያም ደሳለኝ የማኅበራዊ ገጾች አደገኝነት ለተባበሩት መንግሥታት አባላት አገሮችም ያስረዱት መሰለኝ።

አቶ ኃይለማርያም ደሳለኝ እውነታቸውን ነው። ሊፈሩትም ሊዘጉትም ተገቢ ነበር! በአንጻራዊ አመለካከት ማለቴ ነው። ይህንን “የዐረብ ጥቢ!” Arab Spring ያተባለውን፤ ከጥቂት ዓመታት በፊት ብዙ መሪዎችን ያናወጠው ትዝ ብሏቸው ሊሆን ይችላል። የቱኒዚያው የቀድሞ ፕሬዚዳንት ዚን ኤል ኣብዲን በን አሊ ዛሬ በሕይወት አሉ ወይስ እዚያው ሳዑዲ እንደተወሸቁ ናቸው? የግብጹስ ሁስኒ ሙባረክን በወያኔ ቋንቋ “ኪራይ ሰብሳቢዎች”፤ ማለትም ዘራፊዎቹ ዛሬ የት ነው ያሉት?

አሁን ወደ ጦሴና ጥንቡሳሴ ልግባ

ፕሮፌር አየለ በክሪ አንድ የግዕዝ ማዕከል የጎበኘውን CNN ታሪካዊ ብሎ አቀረበው። እኔ፤ ያንን Utube በFacebook ግርግዳዬ ላይ ለጠፍኩት። ብዙ ወዳጆቼ ጎበኙት! አደነቁ አስተያየትም ሰጡ! ከነዚህ ውስጥ አንዱ፣ ዳግማዊ ተሾመ የተባለ ”ባይሆን አርፈህ ስለጨንቻ ብትጽፍ አይበቃህም?” የሚል አስተያየት ሰጠ። ሁለት የጥያቄ ምልክትም አድርጓል። የFacebook ጥሩነነቱ ”ወዳጅ Friend” መስሎ የመጣውን “ቅርብኝ (Unfriend) ማለት ሴኮንዶች ነው የሚወስደው። በዚህ መሠረት ዳግማዊ ተሾመን “ቅርብኝ!” አልኩት።

ሳስበው ስሙ አይመስለኝም። የዚህ አዲሱ Facebook ላይ ከተፈለፈሉት ”የአማራ ነጻ አውጭ!” ነን ከሚሉት፣ ወደዘመነ መሣፍንት ተጓዦች አንዱ ሳይሆን የሚቀር አይመስለኝም። ”ግዕዝ የኛ ነውና ለአንተ ምንህ ነው?” እንደማለት። “የአክሱም ሐውልት ለዎላይታው ምኑ ነው?” እንዲል መለስ ዜናዊ። ከ2009 እስከ 1855 ዘመነ መሣፍንት ድረስ መጓዝ አልችልምና ዳግማዊ ተሾመን “እዚያ ይሙቅህ!” ብዬ አሰናበትኩት። ቴክኖሎጂ ጥሩ ነገር! ውጣ ውረድ ይግባኝ የሌለበት!

* * * * * * *

ሌላው በዚህ “ከፍተን ብናየው ...!” ብዬ በጻፍኩት ላይ አንዱ “ሽማግሌና ሕጻን አንድ ነው!” የሚል አስተያየት ሰጠ። “ቅርብኝ (Unfriend)” ልበለው አልበለው ስል ብዙዎች መልስ ሰጡበት። አንደኛው አረካኝ። “ልክ ነህ! ሸማግሌና ሕጻን አንድ ነው! ልክ እንደወረደ እውነቱን ይናገራል!” አለ። ይህን አይቼ “ቅርብኝ!” አላልኩትም።

* * * * * * *

የፈረንጅ አዲስ ዓመት ዋዜማ ዘወትር ቅዳሜና እሁድ እንደማደርገው ፕሌኖ (Pleno) የምትባል ከተማ ለመሔድ ባቡር ተሳፈርኩ። እዚያ ሰውም አገኛለሁ። ጋዜጦችም የማገላብጥበት መጻሕፍት ቤትም ቁጭ ብዬ የማነብበት Starbucks አለ። አንድ የማነበው The Orgin of Amharic የሚል የዶክተር ግርማ ደመቀን መጽሐፍም ይዣለሁ። ከባቡሩ ስወርድ ረስቼው ወረድኩ። ሁለትን ይሁን ሦስት ወር ሙሉ አንዴ በብጫ ሌላ ጊዜ በሰማያዊ ሳቀልመው (Highlight)፣ አናቱ፣ እጎኑና ግርጌው ላይ ሁሉ ስጽፍበት የከረምኩት ጠፋ! ጠፋ!። ዶክተር ግርማ ዛሬ እልክለሐልህ ብሏል።

ይሁንና ይህንን ነው ”ጦሴን ጥንቡሳሴን ይዞት ይሂድ! ያልኩት።

ማሳረጊያ

ከዚህ ከረዘመ “እንኳን አደረሰን!” ሳይሆን ንዝንዝ የሚሆን መሰለኝ! ለዘንድሮ ገና ይኸው ይብቃና!

“ገና” ላልቶ ሲነብብ “ገና!” ማለትም ነው።

የተሻለ ነገም አለ ማለት ነው!

ለተሻለ ነገ ያብቃን!

ከፋፋዮችን፤ ከሐዲዎችን፤ ያትንንልን! ያብንንልን!

ኢትዮጵያ በነፃነትዋ ለዘለዓለም ትኑር!

አዲስ ቪዲዮ

Excavators move earth as rescuers work at the site of the landslide at the landfill.
ኤክስካቫተሮች የተደረመሰውን በማንሳት ላይ ሳሉ (ፎቶ፣ ZACHARIAS ABUBEKER/AFP/Getty Images)
...

በቆሼው አደጋ መትረፍ የ…

Discussion on the role of the diaspora
የዲያስፖራው ተሳትፎ ምን ይሁን? በቀጥታስ ሆነ በተዘዋዋሪ መሳተፍ አለበት
...

በኢሕአዴግና በተፎካካሪ …

Dr. Berhanu Mengistu on Forum 65
ዶ/ር ብርሃኑ መንግሥቱ ከፎረም ፷፭ ጋር ያደረጉት ቃለምልልስ
...

ዶ/ር ብርሃኑ መንግሥቱ ከፎረም ፷፭ ጋር ያደረጉት ቃለምልልስ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!