"ኢትዮጵያ ኬኛ፣ ጣና ኬኛ!"

ነቢዩ ሲራክ

* "ጣና ኬኛ!" መልዕክቱ ከእንቦጭ አረሙ በላይ ነው
* የመለያየትና የመፈራረስን አደጋ ያከሸፈ መንፈስ

ከኦሮሚያ "ጣና ኬኛ!" እያለ የተመመው ወጣት ክፉውን የእንቦጭን ዐረም ነቃቅሎ እንደማያስወግድ ግልጽ ነው። ጥቂት ወጣቶች ተሸክመውት ጎጃም የገቡት ዋናው መልዕክት የኢትዮጵያዊነት፣ የአብሮነትና የ"አንድ ነን" እንጂ፤ የእንቦጭ ተራ ዐረም አልነበረም። ኢትዮጵያን የመታደግ የታመቀ ታላቅ መንፈስ ያለው መልዕክት ነበር። ዛሬ ያየሁት ፍቅር፣ ዛሬ ያየሁት የአብሮነት፣ የሕብረትና የአንድነት መንፈስ ከሰፊው የጣና እንቦጭ ዐረም በላይ ነው።

"ጣና ኬኛ!" ብሎ ጎጃም የገቡትን ወጣቶች አደግድጎ በክብር ኩራት፣ በአባት አደር ወጉ ወገኖቹን ከደብረማርቆስ እየተቀበለ ተመልክተናል። ይቀጥልና እስከ ባህር ዳር ቄጠማ እያነጠፈ ለመቶ እንግዶቹ እልፍ አዕላፉ ለአቀባበሉ የሚያሸረግድ፤ እንግዶቹን የሚቀበልበት ምክንያት ከጣና እንቦጭ በላይ የኢትዮጵያዊ መንፈስ ትንሳኤን ሲያበስረን መሆኑ ዛሬ በፈንጠዝያው መካከል ካልገባን፣ ነገ እውነቱ ሲገለጥልን ይገባናል።

"ጣና ኬኛ፣ ኢትዮጵያ ኬኛ" ይልሃል፣ ለዓመታት ጀግናው ብርቱው ወገን ... የተሸረበበትን የመነጣጠል መለያየት፣ የአድልኦ መንፈስ አሽቀንጥሮ፣ እንደ ስፖርቱ በአንዲት አገር ባንዲራ ማዕቀፍ ተከባብረንና ተዋደን እንኖር ዘንድ፤ ሕዝብ መናገር፣ መመስከርና ማበሩን አላቆመም። የጎጃም ወገናቸው በነቂስ ወጥቶ ድጋፉን መስጠቱን የመመልከቱ ድንቅ የሕብረት መንፈስ ትርጉሙ ከፍ ያለ አገራዊ መልክ አለው። በእርግጥም ለ200 ኢትዮጵያውያን የኦሮሚያ በጎ ፈቃደኛ ወጣት ተጓዦች፣ የጎጃም ወጣት፣ ሽማግሌ በነቂስ ወጥቶ በክብር የተቀበለበትን ሚስጥሩን ለፈታው ግዙፍ ነው። ለእኔ ኢትዮጵያዊው ኦሮሞውና አማራው ለዓመታት በክፉዎች ከጫፍ እስከ ጫፍ የተረጨበትን የመለያየት መርዝ ስለማክሸፉ ምልክት ነው።

ባህላዊ ጭፈራ

በሕዝቦች መካከል ያለው፣ የቆየ የመደጋገፍ መንፈስ ይታይ ዘንድ ከጣናው የእንቦጭ ዐረም ከፍ ባለ ደረጃ ዛሬ ታይቷል። ክፉዎች ተስፋ ይቆርጡ ዘንድ ኢትዮጵያዊው ኦሮሞ "ጣና ኬኛ" ዘመቻ እያለ ጎጃም ሲገባ፤ ሕዝቡ በክፉ በደጉ እንደ ማይለያይና ሕብረትና አንድነቱን ናፋቂ መሆኑን ማሳያ ሆኖናል። በእርግጥም ጥቂት ወጣቶች በአሸናፊነት መንፈስ ከኢትዮጵያ የኦሮሚያ ግዛት ተመው ጎጃም ሲገቡ ኢትዮጵያዊው የጎጃም አማራ በአንጻሩ መልዕክቱ ደርሶታል። ጎጃሜው ታጥቆ አሸርግዶ የኦሮሞ ወጣት ወንድም እኅቱን በክብር በባህላዊ እስክስታ፣ ሆታና ጭፈራ ተቀብሏል። የአቀባበሉ መንፈስ ደግሞ የኢትዮጵያውያን አንድነት፣ የኢትዮጵያውያን የሕብረት አብሮነት ፍላጎት ማሳያ ግልጽ መልዕክት ይመስለኛል።

ይህ የአብሮነት መንፈስ ደግሞ እነሆ የኢትዮጵያን ትንሳኤ መልክት ነው። ተስፋችን በሚሰራው ስራ ብን ብሎ ሲጠፋ "ኢትዮጵያ እንደሁ አትጠፋም!" የምንለውን አራቂ መንፈስ አስታውሶ፤ ኢትዮጵያ በልጆቿ ሕብረት እንደማትጠፋ በእውን ያሳየን መልዕክት ነው! የኦሮሞ ወጣቶች በጎ መንፈስና የጎጃም አማራው የአቀባበል ደስታ ፌሽታ ሥነሥርዓትን ላስተዋለው፤ የኢትዮጵያዊነት፣ የሕብረትና የአንድነቱን መንፈስ እንመሰክር ዘንድ ያስገድደናል። ይህ ግዙፍ መንፈስ ጣናን ከወረረው እንቦጭ በላይ ስለከበበንና ስለወረረን በጎ ተስፋ ሰጭ መንፈስ ይናገራል! ለዓመታት ያንዣበበብንን የመለያየት የመፈራረስ አደጋ፤ ዛሬ በ200 በጎ አድራጊ ኢትዮጵያዊ ኦሮሞ ወጣቶች የከሸፈ ያህል ተደስተናል። ብቻ "በጣና ኬኛ" ድንቅ ዘመቻ ነበር! ነፍሴ ከፍ ያለ ደስታን አግኝታለች!

"ኢትዮጵያ ኬኛ፣ ጣና ኬኛ ...!" ድንቅ መንፈስ!

ኢትዮጵያ ለዘላለም ትኑር!

ነቢዩ ሲራክ
ጥቅምት 3 ቀን 2010 ዓ.ም.

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!