የሁለት ምርጫዎች ወግ Yehulet Mirchawoch Wogአዲስ አድማስ ጋዜጣ

- አቶ በረከትና ሼኽ መሐመድ አሊ አልአሙዲ የተደናነቁበት ምሽት

- አቶ መለስ፣ ኢህአዴግና አልአሙዲ ተወድሰዋል

- ኢህአዴግ “የሕዝብ ፍቅር ያለው ፓርቲ” ተብሏል

- በመጽሐፉ ተቃዋሚዎች ክፉኛ ተተችተዋል - በተለይ ዶ/ር ብርሃኑ ነጋ

የኢህአዴግ ነባር ታጋይ፣ የቀድሞው የማስታወቂያ ሚኒስቴር፤ አሁን ደግሞ የኮሙዩኒኬሽን ጉዳዮች ሚኒስትር እንዲሁም በምርጫ 97 ጉልህ ስፍራ የነበራቸው አቶ በረከት ስምኦን ጻፉት የተባለውን መጽሐፍ ለማንበብ በጉጉት ስጠባበቅ ነበር። ባለፈው ማክሰኞ በመጽሐፉ ምረቃ ላይ ለመታደም ወደ ሸራተን አዲስ ሆቴል ያመራሁትም ከዚህ ጉጉት በመነጨ ስሜት ነው።

 

 

የአቶ በረከት መጽሐፍ የምረቃ ሥነ ሥርዓት የሚካሄደው ሸራተን ሆቴል ካሉት አዳራሾች በጣም ሰፊው እንደሆነ በሚነገርለት “ላሊበላ” አዳራሽ እንደሆነ የጥሪ ካርዱ ላይ ስለተጠቆመ ወደዚያው አመራሁ። አዳራሹ በሰዎች ተጨናንቋል። ደራሲዎች፣ ድምፃውያን፣ ቲያትረኞች፣ የፊልም አክተሮች፣ ሰዓሊያን፣ የማስታወቂያ ባለሞያዎች፣ ጋዜጠኞች፣ ባለሃብቶች፣ የኢህአዴግ ባለሥልጣናት እና ሌሎች ተጋባዦች አዳራሹን ሞልተውታል። አዳራሹ በርካታ ሰዎችን እንዲይዝ ታስቦ ይመስላል መቀመጫዎቹ በሙሉ ተነስተው እድምተኛው ቆሞ የዝግጅቱን መጀመር ይጠባበቃል። የሸራተን አስተናጋጆችም በፈገግታ ተሞልተው መጠጥ ለታዳሚው ለማስተናገድ ይዘዋወራሉ። “በሸራተን ምን ጠፍቶ” በሚያስብል ሁኔታ ተበልቶ አይደለም ተደፍቶ የማያልቅ ምግብም ተዘጋጅቷል። በአጠቃላይ ድግሱ እጅግ የተዋጣለት የሚባል ነው - የአቶ በረከት መጽሐፍ ምርቃት።

 

የአቶ በረከት የመጽሐፍ ምርቃት ዝግጅት የአንዲት ነባር ታጋይ የመጽሐፍ ምርቃት ዝግጅትን አስታውሶኛል። ነባር ታጋይና የአቶ ገብሩ አስራት ባለቤት የሆኑት የወ/ሮ የውብማር አስፋው የመጽሐፍ ምርቃት። ወ/ሮ የውብማር የሕወሓት ሴት ታጋዮችን የትጥቅ ትግል ታሪክ የሚተርክ “ፊንክስዋ ሞታም ትነሳለች” የተባለ መጽሐፋቸውን ያስመረቁት በኢምፔሪያል ሆቴል ነበር። ያኔ ግን እንዲህ ሞልቶ የተረፈ ሰው አላየሁም። እንዲህ ሞልቶ የተረፈ ምግብ እና መጠጥም አልነበረም። በእርግጥ ነባር ታጋይዋ ሥልጣን ላይ እንዳልነበሩ አውቃለሁ። መጽሐፉን ያሳተሙላቸው ሼኽ መሐመድ አላሙዲም አልነበሩም። ከምሽቱ 12 ሰዓት ገደማ የተጀመረው የምርቃት ሥነ ሥርዓቱ፣ አቶ በረከት ለቤተሰባቸው በተለይም ለልጆቻቸው ያላቸውን ፍቅር ባደነቁት በመድረኩ መሪ አቶ ሴኮ ቱሬ ነበሩ።

 

በርካቶች በትወና ችሎታዋ የሚያደንቋት አርቲስት ሐረገወይን አሰፋ በዘመናዊ ልብስ ተውባና ፊቷ እንደ ፀዳል አብርቶ ወደ መድረኩ ብቅ አለችና፤ በጣም ወደድኩት ያለችውን የአቶ በረከትን “መቼስ ምን እንላለን” የሚለውን ግጥም አነበበች። በኋላ ላይ በሸገር ሬዲዮ ጣቢያ ግጥሙ ከመጽሐፉ የተቀነጨበ እንደሆነ ሲነገር ሰማሁ። አርቲስቷ ራሷ በምታቀርበው ሌላ የሬዲዮ ፕሮግራምም፤ “አቶ በረከትን ግጥሙን ለማቅረብ አስፈቀድኳቸው” ስትልም አደመጥኩ። “መቼስ ምን እንላለን” የሚለው የአቶ በረከት ግጥም ግን ጋብቻ ተከልክሎ በነበረበት የትጥቅ ትግል ወቅት አቶ በረከት በ33 ዓመታቸው በ1977 ዓ.ም በለስ ላይ ቁጭ ብለው ለአሁኗ ባለቤታቸው የጻፉት ነበር። ይኸው ግጥምም በወቅቱ የነበረው የታጋዮች ግጥም እና የፍቅር ደብዳቤዎች በኅዳር ወር በ1998 ዓ.ም ታትሞ በወጣበት “ሶረኔ” በተባለው መጽሐፍ ላይ ተካትቷል። አርቲስት ሐረገወይን አቶ በረከትን ማስፈቀድ አያስፈልጋትም ነበር። ሸገር እንዳለውም በአዲሱ የአቶ በረከት መጽሐፍ ውስጥ የተካተተ ግጥም አልነበረም።

 

ሐረገወይን ግጥሙን ካቀረበች በኋላ የአቶ በረከት ስምኦን “የሁለት ምርጫዎች ወግ” የተሰኘው መጽሐፍ ገጽ ተከፈተ። መድረክ መሪው አቶ ሴኮም የአርቲስቶቹን ስም ተራ በተራ እየጠራ “የወደድኩት፣ የሳበኝ፣ የመረጥኩት” ያሉት ነው በማለት እያስተዋወቀ ወደ መድረክ ጋበዛቸው። እነሱም የመጽሐፉን ገፆች እየገለጡ የሳባቸውን አነበቡ። አርቲስት ሐረገወይን አሰፋ፣ አርቲስት እመቤት ወ/ገብርኤል፣ አርቲስት ፍቃዱ ተክለማርያም፣ አርቲስት ደበሽ ተመስገን፣ አርቲስት ባዩሽ አለማየሁ እና አርቲስት መሆኑን ባላውቅም የቀድሞው የሬዲዮ ፋና ጋዜጠኛ እና የ”50 ሎሚ” ፕሮግራም አዘጋጅ የነበረው ደግአረገ ነቃጥበብ በየተራ አነበቡ።

 

ፕሮግራሙ ቀጠለ። የዕለቱ የክብር እንግዳ የትምህርት ሚኒስቴር ሚኒስትሩ አቶ ደመቀ መኮንን፤ ተመራማሪዎችና የተለያዩ ተቋማት በኢትዮጵያ ዲሞክራሲያዊና የልማት ተቋማት ላይ ለመመራመር እና የዳበረ ሐሳብ ለማምጣት የአቶ በረከት መጽሐፍ መነሻ ሊሆናቸው እንደሚችል እምነታቸው እንደሆነ ገለፁ።

 

የመጽሐፉ፤ መታሰቢያነት ለትግሉ ባለቤቶች፣ ታጋዮች፣ የልጅነት ዕድሜያቸውን ለሠላምና ለዴሞክራሲ በተለይ በትግሉ ወቅት ላሳለፉት ታላቅ ከበሬታ የሰጠ እና ለማስታወስ ያለመ ነው አሉ - አቶ ደመቀ። እኔም ንግግሩን ተከትዬ መታሰቢያ የተጻፈበትን ገጽ ገለጥኩ “መታሰቢያነቱ ለወንድሜ ካሳሁን ገብረህይወት” ይሁንልኝ ብቻ ይላል። አቶ ደመቀ የገለጿቸው ታጋዮች በአቶ በረከት መጽሐፍ የቱ ጋር እንደተጠቀሱ ፈልጌ ማግኘት አልቻልኩም።

 

ቀጠሉና አቶ በረከት ወደ መድረክ ወጡ። በምርጫ 97 ወቅት ዋና ተዋናይ ስለነበሩ ስለሁለቱ ምርጫዎች ለመጻፍ እንደማይበዛባቸው ገለፁ። ኢህአዴግ የተሃድሶ እንቅስቃሴ ባካሄደባቸው 10 ዓመታት የቀድሞዋ ኢትዮጵያ እየተናደች፣ አዲሲቷ ኢትዮጵያ እየተገነባች መሆኑንም አወሱ። “ኢትዮጵያ እየተጓዘችበት ባለችበት የልማት ጐዳና ቀጥላ ውጤታማ ለመሆን 30 እና 40 ዓመታት ያስፈልጋታልም” አሉ።

 

ምርጫ 97ን በሚመለከት ተቃዋሚዎች ጊዜ ስለነበራቸው በወቅቱ ብዙ መጻሕፍትን እንደጻፉ የጠቀሱት አቶ በረከት፤ በኢህአዴግ ወገን ያለውን ለማያውቁ እውነታውን ለማካፈል ይጠቅማል በሚል እርሳቸው በተራቸው ይሄን መጽሐፍ መጻፋቸውን አብራሩ።

 

ማንም ሰው በቀላሉ ዕድሉን የማያገኘውን የኢትዮጵያን የፖለቲካ ዳይናሚክ እርሳቸው እንዲያውቁት እና ልምድ እንዲያገኙበት ዕድሉን የሰጣቸውን ኢህአዴግን አመሰገኑ። “ኢህአዴግ አስተዋይ እና አገሪቷን ከእንቅልፏ የቀሰቀሰ ድርጅት ነው” በማለትም ፓርቲያቸውን አሞካሹ።

 

“መለስ ለእራሱ ከባድ ሥራ ወስዶ ለሰውም ከባድ ሥራ እየሰጠ የሚያሠራ መሪ ነው” በማለት ሙገሳቸውን እና ምስጋናቸውን ለአቶ መለስም የቸሩት አቶ በረከት፤ ከምስጋናው ሁሉ ረጅሙን ሰዓት በወሰደባቸው በሼኽ መሐመድ አልአሙዲን ምስጋና ውዳሴያቸውን አጠናቀቁ።

 

“የእኔ ሥራ መጽሐፉን መጻፍ ብቻ ነበር። የእኔን እና በቅርቡ የአቶ መዝሙር ፈንቴ (የባለቤታቸው ወንድም) የተረጐሙትን መጽሐፍ አልአሙዲ እንዲያሳትመው መመሪያ ብቻ ነው የሰጠሁት። ደወልኩ እና እነዚህን መጻሕፍት ታሳትማቸዋለህ አልኩት” በማለት መጽሐፉን ከኢትዮጵያ ውጪ ከማሳተም ጀምሮ እንዲያ ባለ በደመቀ ሥነ ሥርዓት እንዲመረቅ የማድረግ ወጪውን ሼኹ እንደሸፈኑ ገለፁ።

 

እኔ ግን አቶ በረከትን አንድ ጥያቄ መጠየቅ ፈልጌ ነበር። “አንድ ከፍተኛ ባለሥልጣን አንድን ባለሃብት ደውሎ እንዲህ ያለውን ትዕዛዝ መስጠት እና ተፈፃሚ ማድረግ ሙስና ነው አይደለም?” የሚል። ልብ አድርጉ ይሄ ጥያቄ ነው። የማላውቀውን ብጠይቅ ችግር ያለው ስላልመሰለኝ ነው። ግን ደግሞ አንድ ነገር አውቃለሁ። አቶ ስየ በሙስና ተጠርጥረው በታሰሩበት ወቅት ከቀረቡባቸው ማስረጃዎች አንዱ፤ አንዱን የባንክ ኃላፊ ደረጃ ላይ አግኝተው ጀርባውን ቸብ - ቸብ በማድረግ “ጐረምሳው ተባበረው” በማለት ለወንድማቸው ትብብር ጠይቀዋል የሚል ነበር። ምናልባት ሁለቱ አይገናኙም ልባል እችላለሁ። እውነትም ላይገናኙም ደሞ ይችላል።

 

ቀጣዩ ንግግራቸው የሁለቱን ቅርበት የሚጠቁም ነበር - የአቶ በረከትንና የአልአሙዲንን። “በምርጫ 97 ማግስት ከምርጫው ጋር ባልተያያዘ ሁኔታ ሕመም ገጥሞኝ ደቡብ አፍሪካ ለሕክምና በሄድኩ ጊዜ እዛ ድረስ መጥቶ ጠይቆኝ ነበር። የልብ ወዳጆች ነን። አሊ አልአሙዲ ወሬኛ ነው። ጨዋታ ይወዳል ውጭ አገርም ሄዶ ቢሆን ሦስት ቀን አያድርም፤ ይደውላል፤ ደውሎም ቀልድ አዋቂ ነው ተሳስቀን ነው የምንለያየው። አሊ አልአሙዲ ሣቅ እና ዕድሜህን ያብዛልህ” በማለት ምርቃቱን አዥጐደጐዱት።

 

ጐንደር ልማት ማኅበር (ጐልማ) ሆስፒታል ማስገንባት በፈለገ ጊዜ አቶ በረከት የከተማዋ ተወላጅ በመሆናቸው እርዳታ እንዲሰጡ ሲጠየቁ አል አሙዲን ጋር ቀርበው 5 ሚሊዮን ብር መጠየቃቸውንና 50 ሚሊዮን ተደርጐ እንደተሰጣቸው፣ የደራሲያን ማኅበር የአፍሪካ ደራሲያንን በጋበዙ ጊዜ ሼኹ እርዳታ ማድረጋቸውን በመግለፅ “አላሙዲንን ጠይቄው አሳፍሮኝ አያውቅም” በማለት የባለሃብቱና የእርሳቸውን ቅርበት የት ድረስ እንደሆነ አብራርተዋል።

 

የመጨረሻው ተራ የባለሃብቱ የሼኽ ሙሐመድ ነበር - እሳቸውም ጨዋታውን ቀጠሉ። “አንዳንድ ሰዎች ኢህአዴግን ትወዳለህ ይሉኛል። አዎ! እወዳቸዋለሁ አራት ነጥብ። በምርጫ 97 ወቅት ከተሰደቡት ሰዎች አንዱ እኔ ነኝ፤ ሳይቸግረኝ የአረብ ሳተላይት አስገብቼ በየቀኑ ሰዎቹን እሰማቸው ነበር፤ በረከትም በሩን ብርግድ አድርጐ ሰጣቸው” አሉ ሼኽ ሙሐመድ “በሩን ብርግድ …” ማለታቸው ቴሌቪዥኑን እና በምርጫ 97 የተደረገውን ክርክር ነበር። ለምርጫ ክርክር በሩን ከፍቶ መስጠት የዲሞክራሲያዊ ሥርዓት ባህርይ እንጂ የአቶ በረከት መልካም ፈቃድ እንዳልሆነ አላብራሩም።

 

“ለምን እንደተሰደብኩ አላውቅም እኔን እንኳን አፌን አልከፈትኩም ነበር። ግን የንብ ቲሸርት ለብሼ ከአውሮፕላን ወረድኩ። አቶ መለስና አቶ በረከት እንኳን ለምን ሳታማክረን ለበስክ ብለው ተቆጥተውኝ ነበር። አላማክራችሁም አልኳቸው ምክኒያቱም ባማክራቸው እንዲህ አድርግ … እንዲህ አታድርግ ስለሚሉኝ ነበር ያላማከርኳቸው” በማለት የምርጫውን ወቅት ትዝታቸውን ለታዳሚው አወጉ።

 

ስለ አቶ በረከት ቀጠሉ፤ “አቶ በረከት እንዳለው ደቡብ አፍሪካ ሄጄ ጠይቄዋለሁ፤ የጠየኩት ግን አመፀኛ እና ልውጣ ብሎ ስለሚያስቸግር ነው። ታከም፣ እረፍ ሲባል እሺ አይልም። እኔ ደቡብ አፍሪካ ሄጄ መጀመሪያ ያደረኩት ክፍሉን በሴኪዩሪቲ ማስከበብ ነበር። እሱ ግን በኋላ የብአዴን 25ኛ ዓመት በዓል ላይ ካልተገኘሁ ብሎ አስቸገረ ቃል አስገብቼ ይዤው መጣሁ። በ48 ሰዓት ውስጥ አንጠልጥዬ መለስኩት፤ እኔን የሚያሳስበኝ የጤናቸው ጉዳይ ነው።” በማለት ሚስጥራቸውን አጫወቱን። ከዚህ ጨዋታቸው አልአሙዲ ለኢህአዴግ ባለሥልጣናት የጤና ጉዳይ እንደሚጨነቁ ተገነዘብኩ። በአቅም ማነስ ሕክምና ሳያገኝ ጤናው የሚታወክ ባለሥልጣን አይኖርም ብዬ ደስ አለኝ። የባለሥልጣናትን የጤና ጉዳይም ለባለሃብቱ ተውኩላቸው።

 

ሼኽ መሐመድ ቀጠሉ፤ “ከዋናው ሰውዬ ጀምሮ ወዳጆች ነን፤ ተግባብተን እና ተቻችለን ነው የምንኖረው፤ እኔ ግን አንድ ቀን እንዲህ ሆንኩ ብዬ ቅሬታ አቅርቤላቸው አላውቅም፤ እንደውም እነሱ እንደኔ ሁሉንም የሚጭኑበት ሰው የለም” አሉ። እውነት ከሆነ ኢህአዴግ ምን ነካው ያስብላል። ወይስ ከባለሃብት ጋር መሞዳሞድ እንዳይመስልበት ፈርቶ ይሆን?

 

በመጨረሻም ሼኽ መሐመድ “እስከ ህይወት ፍፃሜ ድረስ አብረን ነን” ሲሉ ማሉ። አቶ በረከትም በጭብጨባ መሐላውን አፀኑላቸው። ታዳሚውም አጨበጨበ። አጨብጭቦም ወደ ቤቱ አልሄደም። “ምን ጠፍቶ” የተባለለትን የሸራተንን ድግስ እስኪበቃው ተቋደሰ። የ”ሁለት ምርጫዎች ወግ” በወፍ በረር ቅኝት …

 

የ”ሁለት ምርጫዎች ወግ” የሕትመት ደረጃውን የጠበቀ፣ 314 ገፆች ያሉት መጽሐፍ ነው። ጽሑፉ ያልተጨናነቀ፣ ዘርዘር ብሎ የተቀመጠና ለማንበብ ምቹ ነው። “የብራ መብረቁ የኤርትራ ወረራ” በሚል ርዕስ የቀረበው የመጽሐፉ የመጀመሪያ ምዕራፍ፤ የኢትዮ - ኤርትራ ጦርነት አጀማመር እና አጨራረስን በ48 ገፆች ይተርካል።

 

የኢትዮ - ኤርትራ ጦርነት የተጀመረው በኤርትራ መንግሥት በአቶ ኢሳያስ አፈወርቂ ትንኮሳ መሆኑን በመጥቀስ፤ “የኢሳያስ መንግሥት ከጦርነት በስተቀር ለሠላም ፈፅሞ ዋጋ የማይሰጥ መሆኑ እየተረጋገጠ በሄደ ቁጥር ነገሮች ወደ ነበሩበት ለመመለስና ጦርነቱን በአጭር ለመቋጨት የሚያስችሉ ጠንከር ያሉ ወታደራዊ ርምጃዎችን ወደመውሰድ ተሸጋገርን” ይላሉ። ቀጠል አድርገው የመከላከያ ሠራዊቱ ባድመን ማስመለሱን ገልፀው በዚህም የኤርትራ መንግሥት ወደ ድርድር የመምጣት አዝማሚያ አሳይቶ እንደነበር አውስተው ወረድ ይሉና፤ “ይሁንና ዛላምበሳንም ነፃ ለማውጣት የነበረንን እቅድ ተግባራዊ ለማድረግ በፆረና ግንባር የከፈትነው ሌላ ማጥቃት እንዳሰብነው ሳይሄድ በመቅረቱ የኢሳያስ የጦረኝነት ልክፍት እንደገና ማገርሸት ጀመረ” በማለት ጦርነቱ በኢሳያስ የጦረኝነት ልክፍት ግፊት ምክንያት መቀጠሉን እንዲሁም ጦርነቱ በኢትዮጵያ እና በኤርትራ መካከል ያለ ውዝግብ መሆኑን ይጠቅሳሉ።

 

ከዚያም ሲቀጥሉ፤ “ወደ ጦርነቱ መገባደጃ የአቋም ልዩነቶች እየተሸጋሸጉ ከሄዱ በኋላ ግን በአንድ በኩል ሁሉም ነገር ወደ ጦር ግንባር ብለው ጦርነቱን ለማራዘም የሚፈልጉት የእነ አቶ ተወልደ ወልደማርያም እና አቶ ስየ አብርሃ ወገን፣ በሌላ በኩል ደግሞ ጦርነቱ በአጭሩ ተቋጭቶ ፊታችንን ወደ አገራችን ልማትና የኢህአዴግ ውስጣዊ ችግሮች ወደ መፍታት ማዞር አለብን የሚለውን የአቶ መለስ ዜናዊን ሐሳብ የሚጋሩ ወገኖች በለየለት የአቋም ልዩነት የሐሳብ ትግል ውስጥ ገቡ። አቶ ስየ በርከት ባሉ አጋጣሚዎች መሳሪያና ተተኳሽ ለመሸመት ወደ ቀድሞዋ ሶቭየት ሕብረት አካባቢ ይመላለስ የነበረ ይሁን እንጂ በኢህአዴግ ውስጥ በተነሳው ልዩነት “ጦርነቱ የወሰደውን ጊዜ ይውሰድ ኤርትራን ለማንበርከክና ከተቻለም አሰብን ቆርሰን ለማምጣት ልንቆጥበው የሚገባ ህይወትና ሃብት ሊኖር አይገባም” የሚለውን አቋሙን ለማራመድ እና በዚህ አቋሙ የተቧደነ አንጃ ለመፍጠር የሚሆን ከበቂ በላይ ጊዜ ግን ነበረው።” በማለት እርሳቸው አስቀድመው “ጦረኛ” ያሏቸውን የኢሳያስ መንግሥትን እስከመጨረሻው እንዋጋ የሚል ሐሳብ እንደነበራቸው በተዘዋዋሪ ያረጋገጡልንን እነ አቶ ስየን የጦረኝነት አስተሳሰብ ያላቸው በማለት ይተቿቸዋል።

 

የኤርትራ መንግሥት የኢትዮጵያን መሬት መውረሩን፣ ፀረ ሠላም መሆኑን፣ ጦረኛ አስተሳሰብ ያለው መሆኑን ያልካዱት አቶ በረከት፤ ይህን ኃይል እስከ መጨረሻው ሄደን እንውጋው ያለውን ቡድን ግን “የጦረኝነት አስተሳሰብ ያለው፤ ጀብደኝነት የተጠናወተው” ማለታቸው እርስ በርሱ የሚጣረስ ሆኖብኛል። “የኢሳያስ መንግሥት መሸነፉን ሲያውቅ በወቅቱ የተባበሩት መንግሥታት ዋና ፀሐፊ ለነበሩት ኮፊ አናን በእኩለ ሌሊት ደውለው የሠላም አማራጭ ለመቀበል ዝግጁ መሆናቸውን በማሳወቃቸው ጦርነቱ ሙሉ ለሙሉ መቆሙን ያወሱት አቶ በረከት፤ ከጦርነቱ በኋላ ያለውን ጊዜ ኢህአዴግ ከጥገኛ ዝቅጠት ወጥቶ ወደ ተሃድሶ የገባበት የሽግግር ወቅት እንደነበር በመጠቆም የምርጫ 97 ወጋቸውን ቀጥለዋል። የአቶ በረከት የምርጫ 97 ወግ በሚጀምርባቸው የመጀመሪያ ገፆች “የቀለም አብዮት” ያሉትን የምርጫ 97 ተቃውሞ “ለብዙ ኢትዮጵያውያን የመጀመሪያው የቀለም አብዮት ጠንሳሽ ቅንጅት የሚመስላቸው ቢሆንም፣ የየፓርቲዎቹን ፈለግ ለተከተለ ሁሉ የመጀመሪያው የአመፅ ስትራተጂ ቀያሽ ሕብረት እንደነበር ለመገንዘብ አያዳግትም” በማለት ሕብረትን በመተቸት ይጀምራሉ።

 

“ቅንጅት” እና “ሕብረት”ን እንደ ፓርቲ በግለሰብ ደረጃ ደግሞ ዶ/ር ነገደ ጎበዜ፣ ፕሮፌሠር በየነ ጴጥሮስ፣ ዶ/ር ብርሃኑ ነጋ፣ ኢንጅነር ግዛቸው እንዲሁም አንዴ ወጋ ሌላ ጊዜ ደግሞ ወዳጅ በሚመስል ሁኔታ ኢ/ር ኃይሉ ሻውል እና አቶ ልደቱ አያሌውን እና ሌሎች የተቃዋሚ ፓርቲ አባላትን፣ የአውሮፓ ሕብረት አመራርን እና የአውሮፓ ሕብረት የምርጫ ታዛቢ ቡድን መሪ አና ጎሜዝን በጠንካራ ትችት የሚያነሳው መጽሐፍ፤ በምርጫ 97 ተቃዋሚ ፓርቲዎች ሕግ ጥሰው ሕዝቡን ለአመጽ የቀሰቀሱ፣ የማይረቡ፣ ሥልጣን የተጠሙ፣ አገሪቷን የማያባራ ቀውስ ውስጥ ለመክተት ያለሙ፣ እርስ በርሳቸው የማይስማሙ እንደሆኑ በመግለፅ ክፉኛ ይተቿቸዋል። አቶ በረከት በወቅቱ የነበረ ሂደት ነው ያሉትን ሲተርኩ፤ ኢህአዴግ ሠላማዊ ፓርቲ እንደሆነ እና ምርጫው ሁለት ዓመት እስኪቀረው ጊዜ ድረስ የተሃድሶ ወቅት ላይ በመሆኑ የምርጫ ሥራ ካለመሥራቱ ውጪ ፓርቲውን “የመላዕክት” ያህል ንፁህ፣ ሕዝቡን ወዳድ የምርጫውን ውጤት በሠላም የተቀበለ ፓርቲ አድርገው ስለውታል። ከምርጫ 97 በፊት ያለውን ሁለት ዓመት እና ከምርጫ 97 እስከ 2002 ዓ.ም. ድረስም በሚገባ በመሥራቱ በኢትዮጵያ ሕዝብ የተወደደ እና የተፈቀረ ፓርቲ በመሆኑ ሕዝብ መርጦት ሥልጣን ላይ መውጣቱን ተርከዋል።

 

በመጽሐፉ ምዕራፍ ሦስት ላይ፤ በምርጫ 97 ግንቦት ሰባት ምርጫው ሳይጠናቀቅ ኢንጀነር ኃይሉ ሻውል ድርጅታቸው በአዲስ አበባ ምርጫ እንዳሸነፈ ነገር ግን ኢህአዴግ ምርጫውን እንዳጭበረበረ መግለፃቸውን ከባድ ድፍረት በማለት ይተቹና፤ “ድምፅ የመስጠቱ ሂደት እንደተጠናቀቀ አቶ መለስ እሁድ ምሽት በቴሌቭዥን ቀርቦ ምርጫው በጥሩ አኳኋን እንደተካሔደ ከገለፀ በኋላ የተጋጋለው ስሜት እንዲበርድ እና ሕዝቡ የምርጫውን ውጤት በሰከነ አዕምሮ አመዛዝኖ እንዲቀበለው ለማድረግ በማሰብ መንግሥት ለአንድ ወር ሠላማዊ ሰልፍ እንዲታገድ መወሰኑን አስታወቀ” ከማለት ውጪ አቶ መለስ በቴሌቪዥን ቀርበው ኢህአዴግ ምርጫውን ማሸነፉን ስለመናገራቸው አንድም ቦታ አይጠቅስም፤ እሳቸውንም አይወቅስም።

 

አቶ በረከት ከተቃዋሚ ፓርቲ አመራሮች ጋርም ሆነ ከአውሮፓ ሕብረት መሪዎች ጋር የነበራቸውን ውይይት ሲጠቅሱ፤ “አስጠነቀቅናቸው፣ በወንጀል እንደሚጠየቁ ነገርናቸው፣ ጠንከር ያለ ስምምነት እንዲፈርሙ አደረግናቸው” የሚሉ የድርድር ሳይሆን የኢህአዴግን የበላይነት የሚያሳይ የማስፈራራት ሂደት እንደነበር የሚያሳይ መጽሐፍ ነው።

 

ዶ/ር ብርሃኑ ነጋ ላይ የሚጨክነው የአቶ በረከት መጽሐፍ፤ “ከንቲባነትን በቆረጣ” በሚል በተቸበት ርዕስ ስር ከምርጫ 97 በኋላ ያለውን ሂደት፤ “ለዶ/ር ብርሃኑ የሁሉም ነገር ማጠንጠኛው የከንቲባነት መንበሩን መቆናጠጥ ስለነበር፣ ለእርሱ ቅንጅትም ሆነ ቀስተ ደመና፣ መኢአድም ሆነ ኢዴፓ የቼዝ ጠጠሮች ናቸው። በእንያንዳንዱ እርምጃው እንደ አመቺነቱ በተናጠል ወይም በቡድን የላቀ ችሎታ ባለው ኃይል ፊት ያጋፍጣቸዋል። ሲፈልግ ሰድቦ ለሰዳቢ ይሰጣቸዋል። ኢንጂነር ኃይሉን የሚፈልጋቸው ተሸክመው ወደ መንበረ ከንቲባነቱ እንዲያመጡት ስለነበር በአንድ በኩል እየተለማመነ፣ በሌላ በኩል ግን ገንዘብና መረጃ እየሰጠ በሚያሰማራቸው “ቤዛ”ን በመሳሰሉ የግል ጋዜጦች ይሰድባቸዋል። የቅንጅት ሚስጥሮች፤ በተለይም ኢንጂነር ኃይሉን የሚመለከቱና በየጋዜጠው ይወጡ የነበሩ ውስጣዊ መረጃዎች ከዶክተር ብርሃኑ የሚፈልቁ እንደነበሩ በአንድ አጋጣሚ ያገኘሁትና ዶ/ር ብርሃኑ እንዲህ ብለህ ጻፍ እያለ መረጃ፣ ምክርም ገንዘብ ይሰጠው እንደነበር ያጫወተኝ በግል ጋዜጣ ውስጥ ይሠራ የነበረ ጋዜጠኛ ነው” ይላል።

 

እዚህ ጋር ግን መረጃ ተጣርሷል። አቶ በረከት ዶ/ር ብርሃኑ “ቤዛ”ን በመሳሰሉ ጋዜጦች ላይ ያጽፍ ነበር ያሉት ከምርጫው በኋላ ባለው ወቅት ሲሆን የጠቀሱት “ቤዛ” ጋዜጣ የተዘጋው ግን በሚያዝያ ወር 1992 ዓ.ም. ነበር። በተጨማሪም አቶ በረከት አንድ ጋዜጠኛ ነገረኝ በሚል የ2002 ምርጫ ሁኔታን በጻፉበት ምዕራፍም፤ “አዲስ ነገር” ጋዜጣ በቀድሞው የአሜሪካ አምባሳደር ዶናልድ ያማማቶ እርዳታ በአሜሪካ ኤምባሲ የገንዘብ ድጋፍ መቋቋሙን ገልፀው ይህንንም “በግሉ ፕሬስ ውስጥ የሚሠሩ ጋዜጠኞች ናቸው የነገሩኝ” በማለት ጽፈዋል። እንዲህ ያሉ ነገሮችን ለመጻፍ በማስረጃ ላይ የተደገፈ እርግጠኝነት የሚያስፈልግ ሲሆን ጋዜጠኞች ነገሩኝ በማለት ብቻ እንዲህ እያሉ መጻፍ ትዝብት ውስጥ የሚጥል ጉዳይ ይመስለኛል - ያውም ከአንድ ከፍተኛ የኢህአዴግ ባለሥልጣን። በመጨረሻም መጽሐፉ በአቀራረቡ፣ በአተራረኩ እና በታሪክ አወራረዱ የአቶ በረከትን የመጻፍ ችሎታ የማያሳማ ሆኖ አግኝቼዋለሁ። ይዘቱ ምንም ሆነ ምንም መጽሐፍ መጻፋቸው በራሱ ሌሎች እንዲጽፉ የሚገፋፋ፣ በጽሑፉ ላይ እንዲወያዩ እና ወደ እውነት እንዲጠጉ በር የሚከፍት በመሆኑ አቶ በረከት “የሁለቱ ምርጫዎች ወግ”ን በመጻፋቸው ሊመሰገኑ ይገባል እላለሁ። በተረፈ ያነበቡት ደግሞ ሐሳባቸውን ቢያጋሩ ለመማማር ይጠቅመናል። ይበረታታልም።

 

ምንጭአዲስ አድማስ ጋዜጣ

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!