የላትቪያው - በግርማ ደገፋ ገዳ Yelativiaw by Girma Degefa Gedaደራሲ፡ ግርማ ደገፋ ገዳ

ገጽ፡ 496

ዋጋ፡ 20 ዶላር

“የላትቪያው” በፍቅር፣ በፖለቲካ፣ በሰብአዊ መብቶችና በሀገራዊ እውነታዎች ዙሪያ የሚያውጠነጥን፤ 496 ገጾች ያሉት፣ ስፋትና ቁመቱ አነስ ተደርጎ ለየት ባለ ሁኔታ የታተመ ልብወለድ መጽሐፍ ነው። መጽሐፉ፤ የተለያየ አመለካከት ያላቸውን ግለሰቦች እይታ በጉልህ የሚያሳይ ከመሆኑ ባሻገር፤ አንባቢያንን እያስገረመ፣ እያሳዘነና እያስደሰተ ከገጽ ወደ ገጽ ይዞ የሚሄድ ነው።

 

 

መጽሐፉን በአራት መንገዶች በእጅዎ ማስገባት ይችላሉ፦

  1. ይህንን ኢሜይል በመጠቀም:- This email address is being protected from spambots. You need JavaScript enabled to view it.
  2. በአካባቢዎ ከሚገኝ የሀገር ልጅ ግሮሰሪ ጎራ በማለት
  3. www.facebook.com ላይ Yelatviaw በማለት እና
  4. ስልክ ቁጥር 682-503-3002 በመደወል

በኢትዮጵያ ፖለቲካ ውስጥ የመሳተፍ ፍላጎት በሌለው አንድ የተማረ ወጣት ላይ የሚደርሰውን በደልና፣ ወጣቱም ዜጋዊ መብቱን ላለማስነካት በሚያደርገው ግላዊ ትግል ላይ መሰረት ተደርጎ የተጀመረ፣ ግን እየሰፋ ሄዶ፤ የኢሕአዴግን የደኅንነት ሚኒስቴር መስሪያ ቤት ከፍተኛ ባለሥልጣናትን ባህሪ፣ የተራ ገዳይ ስኳድ ሰዎችን ጽኑ ገዳይነት፣ እንዲሁም በዲፕሎማቲክ ዘርፍ ኢትዮጵያን ወክለው የሚገኙ ዲፕሎማቶች ምን እንደሚሰሩና የኢሕአዴግ ባለሥልጣናት ምክንያት እየፈለጉ በኢትዮጵያ ሕዝብ ገንዘብ እንዴት እንደሚደንሱ ይተርካል።

 

የላትቪያው - በግርማ ደገፋ ገዳ Yelativiaw by Girma Degefa Gedaበድብቅ ቀለበት ያሰረላትን እጮኛዋን ትታ፣ ልቧን የመነተፈውን አንድ ወጣት፣ የኢሕአዴግ መንግሥት የደህንነት መዋቅር ቢቀማት፤ የት እንዳደረሰውም ለማወቅና ለማስፈታት ያደረገችው ጥረት ያመጣባትን መዘዝ ችላው፣ እሱን ፍለጋ ከከተማ ከተማ የምትንከራተት አንዲት ቆጅዬ ወጣት ለፍቅር የምትከፍለውን ከፍተኛና በፍጹም ሊታመን የማይችል ዋጋን ያሳያል።

 

ልብወለድ ታሪኩ፤ አንባብያንን ወደ ትንሿ ሀግስበርገን፣ ዋሽንግተን ዲሲ፣ ፎርጎትንላንድ፣ አዲስ አበባ፣ ቴልአቪቭ፣ ሃሮዲና፣ ናይሮቢ፣ ሞምባሳ፣ ናዝሬት፣ ኦታዋ፣ ሀዋሳ፣ ሞያሌ፣ ቀርሳ፣ ሞዬ እና ወደ ሌሎች ቦታዎችም በምናባቸው እንዲጓዙ ያስገድዳል። የኢሕአዴግ መንግሥት፣ ዜጎችን ተራ በሆነ ነገር ሁሉ ሲያስመርራቸው፤ ዜጎችም በፋንታቸው በኢሕአዴግ መንግሥት ተማረው የሚመርጡትን ፖለካዊ መሥመር በማያሻማ መልኩ በጉልህ ያንጸባርቃል። “ፖለቲካ አናውቅም!” የሚሉ ዜጎችን “ፖለቲካ እናውቃለን!.....ፖለቲካ አሁን ገብቶናል!” እንዲሉ የሚያስገድዳቸው ምክንያት ምን እንደሆነ፤ ከፖለቲካ ጋር ምንም ዓይነት ግንኙነት የሌላቸው ዜጎች በሌሎች ምክንያቶች እንዴት በኢሕአዴግ እንደሚነጩና በሰላም ከቤታቸው ወጥተው ሳይመለሱ እንደሚቀሩ የመጻፉ ታሪክ ይገልጻል።

 

ምስራቅ ሸዋ ውስጥ በሚገኝ አንድ ግድብ ላይ፣ ከሌላ ዓለም የመጡ ፍጡራን ሊያደርሱ ያቀዱትን አደጋ አስመልክቶ፤ የኢሕአዴግ መንግሥት፣ የተቃዋሚ ፖለቲካ ድርጅቶች፣ በውጭ ሀገርና በሀገር ቤት የሚገኙ ዜጎች እንዲሁም የጎረቤትና ወዳጅ ሀገራት፤ አፋጣኝ ምላሽ ምን እንደሆነ ያዩበታል። የኢሕአዴግ መንግሥት ለናዝሬት ቴክኒካል ኮሌጅ በኤሌክትሪክና ኤሌክትሮኒክስ ዲፓርትመንት አማካሪነት የቀጠረው አንድ ጃፓናዊ፣ ናዝሬት ቴክኒካል ኮሌጅ ውስጥ ቁጭ ብሎ ቀጣሪው ኢሕአዴግን እንዴት እንደሚጫወትበት፣ ዋና ጽ/ቤቱ ናሚቢያ የሆነና ኢፐልፕ የተባለ የተቃዋሚ ድርጅት ዋና ሰላይ (የላትቪያው ኢንጂነር) ኢትዮጵያ ውስጥ ሆኖ የኢሕአዴግን የደኅንነት ሚኒስቴር መሥሪያ ቤት መከራውን ሲያሳየውና ጨርቁን ሲያስጥለው ይደነቁበታል።

 

ይህ መጽሐፍ በአንባብያን ዘንድ የተለያየ ትርጓሜ ሊሰጠው ይችል ይሆናል። በመጽሐፉ አዘጋጅ ዓይን ግን፣ ከተራ የልብወለድ ታሪክነት ያለፈ ምንም ዓይነት ተልእኮና ምስጢር የለውም።

 

የመጽሐፉ ደራሲ ኢትዮጵያ ውስጥ በነበረበት ወቅት፣ የናዝራዊ ነጻ ጋዜጣ ሪፖርተርና ቀጥሎም የናዝሬት ጋዜጣ ዋና አዘጋጅ ነበር። ሁለቱ ነጻ ጋዜጦች የተመሰረቱት ከሀገሪቱ ዋና ከተማ ወጣ ብላ ለምትገኘው ለናዝሬት/አዳማ እና አካባቢዋ ድምጽ ሆነው ለማገልገል ነበር። ጋዜጣዎቹ ለሁለት ዓመት ለሚሆን ጊዜ ቆይተው፣ በአካባቢው በሚገኘው መንግሥትና የራሳቸው የሆነ የተለያየ ጥቅም ባላቸው ቡድኖችና ግለሰቦች ትጽእኖ ምክንያት ሕትመታቸውን ለማቋረጥ ተገደዋል። በስደት ዓለም፣ ደራሲው አልፎ አልፎ ወቅታዊ ጉዳዮች ላይ የሚያተኩሩ ጽሁፎቹን ዋና ዋና በሚባሉ የኢትዮጵያ ድረ ገጾችና ጋዜጦች ላይ ያስነብባል። ደራሲው በአሜሪካ የሚኖር ሲሆን “የላትቪያው” ልብወለድ መጽሐፉ ቀድሞ ለህትመት የበቃ እንጂ የመጀመሪያ ሥራው አይደለም።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!