Ethiopian Transitions: At Home and Abroad (by Kebede Haile) / የኢትዮጵያውያን ሽግግር - በሀገር ውስጥና በውጭ ሀገር (ከበደ ኃይሌ)አዲስ መጽሐፍ በገበያ ላይ ዋለ

የመጽሐፉ ርዕስ፡- Ethiopian Transitions: At Home and Abroad (የኢትዮጵያውያን ሽግግር - በሀገር ውስጥና በውጭ ሀገር)

ፀሐፊ፡- ከበደ ኃይሌ

ቋንቋ፡- እንግሊዝኛ እና አማርኛ

ዋጋ፡- 32.99 የአሜሪካ ዶላር (ጠንካራ ሽፋን)

የገጽ ብዛት፡- 286

አሳታሚ፡- ኦልራይት ፐብሊሺንግ

ገበያ ላይ የዋለው፡- መስከረም 14 ቀን 2008 ዓ.ም. / ኦገስት 24 ቀን 2015 (እ.ኤ.አ.)

ደራሲና ፀሐፊ ከበደ ኃይሌ በቅርቡ እንግሊዝኛ እና በአማርኛ ቋንቋ የጻፉት “Ethiopian Transitions: At Home and Abroad” (የኢትዮጵያውያን ሽግግር - በሀገር ውስጥና በውጭ ሀገር) የተሰኘው መጽሐፍ በቅርቡ በገበያ ላይ መዋሉን ለኢትዮጵያ ዛሬ በላኩት ኢ-ሜይል ገለጡ።

በዚሁ ኢ-ሜላቸው ላይ አባሪ አድርገው በላኩልን መልዕክት ላይ ስለእርሳቸው፣ በተለይም ስለአዲሱ መጽሐፋቸው ይዘት፣ የት ማግኘት እንደሚቻል አብራርተዋል። ሙሉ መልዕክቱን ለድረገጹ እንዲመች አድርገን ከዚህ በታች አቅርበነዋል።

ስለመጽሐፉ

ደራሲና ነጻ ፀሐፊ ከበደ ኃይሌ በማኅበራዊ፣ በኢኮኖሚዊ፤ በፖለቲካዊ፤ በኃይማኖታዊ፤ በሠራተኛ ግንኙነትና በኮሚኒቲ ተቋማቶች ወዘተ ... በተሰኙት ርዕሶች ላይ ከአሁን ቀደም መጽሐፍትን በአማርኛና በእንግሊዝኛ ቋንቋዎች ጽፎ አስነብቧል። አሁን ደግሞ ለሕብረተሰቡ ይጠቅማሉ ብሎ ያመነባቸው የተለያዩ ርዕስ ያላቸውን ጥናቶች በዚህ መጽሐፍ ውስጥ አስገብቶ በሁለት ቋንቋ አዘጋጅቶ አዲስ መጽሐፍ አውጥቷል።

ከደራሲው የረጅም ጊዜ የአሜሪካ ኑሮው ተሞክሮ፤ ከሕብረተሰቡና ከባለሙያዎች የተሰነዘሩትን አስተያየቶች እንዲያቅፉ አድርጓል። መጽሐፉ ያቀፋቸው ሃሳቦች ለአንባብያን አዲስ ላይሆኑ ቢችሉም፤ መሠረታዊ ዓላማው በአሜሪካና በኢትዮጵያ ውስጥ የማኅበራዊና የኮኖሚያዊ ጉዳዮች ከቀድሞው ሥርዓት አሁን ወደ አለበት 21ኛው ክፍለ ዘመን ሽግግር መተላለፍን የሚያመለክቱ ጉዳዮችን ለአንባቢያን ለማቅረብ ነው።

ጽሑፎቹ በጊዜያቸው አንገብጋቢ ርዕሶች ሆነው ይታዩ ስለነበር፤ ዛሬም ሆነ ነገ ሁናቴዎች መከሰታቸው ስለማይቀር፤ ለታሪክና ለወደፊት ትውልድ ጥናት ለማካሄድ ይረዱ ዘንድ በእነዚህ ወቅታዊ ነጥቦች ላይ አተኩሮ በማጠንጠን ሕብረተሰቡን በሚስብና በሚጠቅም ሁኔታ ተመቻችቶ ቀርቧል። ለዚህም አስፈላጊ መረጃዎችን ከየአቅጣጨው ተሰባስቦ ትንተና ተድርጎባቸዋል፤ ለሕብረተሰቡ ይጠቅማሉ ተብሎ በተገመተባቸው ነጥቦች ላይ ጎጂና ጠቃሚ ጎኖች ላይ አስምሮባቸዋል።

ዓመታትን ያስቆጠረው በኢትዮጵያ መንግሥትና በተቃዋሚ ፓርቲዎች መካከል ስላሉት ያለመጣጣም ፖለቲካዊ ዋና ዋና የውዝግብ ነጥቦች አንድ ምዕራፍ ተመድቦ ተብራርቷል። የማኅበራዊ ችግሮች ጨርሶ ባይወገዱም የሚሻሻሉበትን መንገድና ቀስ በቀስ የሚወገዱበት ዘዴዎች ተጠቁሟል። በርዕሶቹ ላይ ትኩረት ተሰጥቶበት ለተረዳው ታሪክን፤ ባህልን፤ ማንነትን ለቀጣዩ ትውልድ ለማውረስ እያንዳንዱ ሕብረተሰብ መወጣት ስለሚገባው ብሔራዊ ኃላፊነት ስላለ ከሚከፋፍሉ ጉዳዮች መራቅ እንደሚገባ ይዘረዝራል።

በውጭ ሀገር የሚኖረው ወጣቱ ትውልድም እንዲሁ የተመኘውን ሙያ ለመቅሰምና ሠርቶ የመኖር ዕድሉ የሰፋለት ቢሆንም፤ የወላጆቹን ሀገርና በኮሚኒቲ ማኅበራት ውስጥ ተሳትፎ በማድረግ የማጠናከር ድርሻውን እንዴት መወጣት እንደሚችል የሚያበረታታ መረጃዎችንም በጥቂቱ አዝሏል።
የውጭ የመጽሐፉ አካል ከላይ እንደሚታየው፤ የመጽሐፉን ርዕስ ትርጉም በሚያመላክት ምስልና ዓይን ሳቢ የቀለማት ቅብ ያለው በጠንካራ ሸፋን ተጠርዞ የታተመ መጽሐፍ ነው።

መጽሐፉን amazon.com በመግባት ይገኛል፣ እንዲሁም በአሜሪካን ሀገር በተለያዩ የኢትዮጵያውያን ሱቆች ውስጥ ይገኛል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!