ትግራይ ዴሞክራሲያዊ ትብብር (ት.ዴ.ት./TAND)

ትግራይ ዴሞክራሲያዊ ትብብር (ት.ዴ.ት./TAND)

ትግራይ ዴሞክራሲያዊ ትብብር (ት.ዴ.ት./TAND)

ታሕሣሥ 2017

ቀውሱ ከባድ ነው፣ አገርን ሊያፈራርስ፣ ሕዝቦችን እርስበርስ ሊያዳም የሚችል አደገኛ ቀውስ ለመሆኑ በየቀኑ ከምንሰማቸው ዘግናኝና አሳዛኝ ድርጊቶች መገንዘብ ይቻላል። ይህ አስጨናቂ ክስተት በአንድ ወቅት ብቅ ያለና በቀላሉ የሚያባራም አይደለም። ሲከማች የቆየና ስር ያለው ነው፣ ቢሆንም በዘመነ ሕወሓት/ኢሕአዴግ ጭራሽ እንዲያንሰራራ በመቻሉ አምባገነኖቹ ከሚያደርሱት አረመንያዊ ግድያ ሌላ ሕዝቡ ለእርስበርስ እልቂት እንዲዳረግ አድርገውታል። ስለዚህም የቀውሱ ነባር እና ጊዚያዊ መንሰኤዎች በውል ታውቀው፣ ተመጣጣኝ መፍትሔው ተነድፎለት፣ ተግባር ላይ ካልዋለ የፈራነው ሊደርስ ይችላልና ሳንቀደም በጋራው መፍትቴ ላይ እናተኩራለን።

እነሆ ት.ዴ.ት. ከተመሰረተ 1995 ዓ/ም/ፈ. ጀምሮ (ከ22 ዓመታት በፊት መሆኑ ነው)፣ ይህ በጉልበት ሥልጣን ላይ የወጣው የሕወሓት/ኢሕአዴግ ገዢ ቡድን የኢትዮጵያን ሕዝብ አመኔታ ስለሌለውና ለሕዝቡ ጥቅም ስላልቆመ በጉልበት ብቻ ሳይሆን መሰሪ ስልቶችም በማከል፣ ሕዝቡን አፍኖ እንደሚገዛ ደጋግመን ስንገልጽ፣ ከነመፍትሔው ጭምር ነበር። ይህ ገዢ ቡድን በስታሊናዊ አምባገነንነት የተለከፈ ስለሆነ ማንኛውም ገንቢ ጥያቄ ይሁን ትችት፣ አስተያየት ይሁን ተቃውሞ፣ ባጠቃላይ መብት ነክ ጉዳይ የማይቀበል ብቻ ሳይሆን፣ ለየት ያለ ሐሳብ አቅራቢውን እንደጠላት ፈርጆ የሚያሳድድ፣ የሚያፍን፣ የሚያስር፣ አሰቃይቶ የሚገድል ለመሆኑ ከሁሉም የኢትዮጵያ ክፍለ-አገራት አብነቶች እያጣቀስን አስረድተናል፣ ጽፈናል፣ በየመድረኩ ጮሆናል። የዚህ ሁሉ በደል ቤተ-ተመኩሮ ደግሞ የትግራይ ሕዝብ ለመሆኑ ካሉት የዋሻ ድብቅ እስር ቤቶችና እየታፈነ ከሚገደለው ወጣት፣ በየዓመቱ ከሚያንሰራራው ድርቅና ከሚያልቀው ወገን፣ ለስደትና ለልመና ከሚሰማራው ሴትና ወንድ፣ ወዘተ. መገንዘብ እንደሚቻል አስረድተናል። አሁንም በተለያየ ምክንያት የትግራይ ሕዝብ መከራ ያልገባቸው ካሉ ሐቁ ይኸው መሆኑ በአጽንኦት እንገልጻለን።

ወደ መፍትሔው ስንመጣ ደግሞ፣ ይህ አምባገነን ኃይል የአገሪቱን ሀብትና ጉልበት በመቆጣጠር፣ እንዲሁም  ከውጭ አጋሮቹ ዙርያ-መለሽ ድጋፍ በማሰባሰብ ተደራጅቶ እንደሚገዛን ሁሉ፣ እኛም በዛው መጠን ተደራጅተንና አንድ ማእከል ፈጥረን ይህን አምባገነን ቡድን በማስወገድ ለጋራ ዴሞክራሲያዊ ሥርዓት መፈጠር ስንታገል ነው የሚል ነበር። ለዚህም ነው ሕብረት እንዲፈጠር ያላሰለሰ ጥረት ስናደርግ የቆየነው። አሁንም ከዚሁ የመፍትሔ መርህ ስለማንወጣ፣ ሸንጎ የተሰኘው የጋራ ድርጅት በጋራ መስርተን በሕብረት መታገል ላይ የምንገኘው። ሸንጎው ያሰባሰበው ዓቅም እፊታችን ከተደቀነው ውስብስብ ትግል አንጻር ሲመዘን ግን በቂ ጉልበት ስላይደል፣ ሰፊ አድማስ ያለው ሕብረት ተፈጥሮ ውጤታማ እንዲሆን የሁሉንም ግብአት አስፈላጊ መሆኑ እንገነዘባለን፣ በተያያዘ መልኩም ሌላውን ለማስገንዘብ እንወዳለን። 

ስለ መፍትሔ ከተነሳ ላይቀር፣ ገዢው ቡድን እንደሆነ አንዴ መቀሌ ሌላ ጊዜ አዲስ አበባ በመኮፈስ፣ “በስብሰናል እንታደስ” እያለ የማያልቅ ስብሰባ በማካሄድ፣ አዳዲስ መሰሪ ስልቶችም በመቀመር አገዛዙን ለማጥበቅ ይጨነቃል እንጂ የሕዝቡን ብሶት ተሰምቶት የመፍትሔ ፖሊሲ ይዞ ይወጣል ማለት ‘’ከእባብ-እንቁላል እርግብ’’ የመጠበቅ ያህል የማይሆን ነገር ነውና የመከራችን መፍትሔ ከሕዝባዊ ማዕበል እንደሚፈልቅ በመተማመን ተደራጅቶ መስራት ይጠይቃል።

በጣም የሚያሳዝነው፣ መሰሪነቱ ወደ ሰፊው ሕዝቡ ሰርጾ እንዲገባ በማስደረግ፣ በደጉም በክፉውም ቀን ተባብሮ የኖረውን ሕዝብ አሁን እርስበርሱ እንዲተላልቅ ማቀነባበሩ ነው። በሌላ በኩል ደግሞ፣ ለዚህ መሰሪ ቅንብሩ ተባባሪዎች የሆኑ፣ በስሜት የሚነዱ “አክቲቪስቶች” “ፖለቲከኞች” “የሚዲያ ተቋሞች” መኖራቸው አውዳሚ ሁኔታው እንዲጋጋልና የመሰሪዎቹ ውጥን እንዲሳካ ማገዛቸው እጅግ ያሳስባል። ቀደም ሲል በበደኖ፣ በጋምቤላ፣ በጉራፈርዳ፣ ... ወዘተ፣ አሁን ደግሞ በአምቦ፣ በጨለንቆ፣ በዓዲግራት፣ በወልዲያ፣ ... ወዘተ፣ የምናያችው እርባና-ቢስ መተላለቅ የገዢው ቡድን ሰንካላ ፖሊሲና መሰሪ ቅንብር ድምር ውጤት መሆናቸው እየታወቀ፣ በሰበብ-አስባቡ ሃላፊነት ከማይሰማው ዜጋ በኩል የሚረጩት አፍራሽ ድምጾች ማንኛውንም ሕዝቡን ሰለባ እስካደረጉ ድረስ ከመሰሪዎቹ ጎን መፈረጃቸው የማይቀር ለመሆኑ ግልጽ ማድረግ ያስፈልጋል።

የአገራችንን አንድነት በታኝ፣ ሕዝቦቻችንን እርስበርስ አጨፋጫፊ ዋናው ስራአስኪያጅ የሕወሓት/ኢሕአዴግ ማፍያዊ ቡድን ሆኖ እያለና ይህንን መዥገርት ለመንቀስ የጭቁኑ ሕዝብ ማዕበል ፈጥሮ መንቀሳቀስ ሲገባ፣ በቁንጽል አስተሳሰብ ተነሳስተው ያ መፍትሔ የሚሆነው ሕዝባዊ ማዕበል እንዳይፈጠር የሚያሰናክሉ ወገኖችን እርማትም ማስጠንቀቂያም እንዲደርሳቸው ያስፈልጋል። ተወደደም ተጠላ፣ በማወቅም ይሁን ባለማወቅ፣ ማዕበሉ እንዳይፈጠር ምክንያት እየሆኑ የአገዛዙን ዕድሜ ያስቀጥላሉና!!!

ከምንገኝበት ከባድ ቀውስ መውጫው አንድ በር ብቻ ነው ያለው። ይኸውም ተባብሮና ተቀናጅቶ፣ የጋራ ምእኩል ግንባር ፈጥሮ፣ ሕዝባዊ ማዕበል ቀስቅሶ አምባገንኑ አገዛዝ ማስወግድና በቦታው መጀመርያ ሁሉንም ኢትዮጵያዊ በእኩልነት የሚያስተናግድ የጋራ መንግሥታዊ ሥርዓተ-ሕዝብ (መንስህ) መመስረት ነው። ቀዋሚ መሰረት የሆነው፣ ይህ ሥርዓት ተዋቅሮ ከቦታው ስለሌለ ነው፣ ማንም ቡድን እንደምንም ሥልጣን ላይ እየወጣ እንዳሻው ረግጦ የሚገዛን። ማፍያዊው ቡድን ከተወገደ በኋላም ያንኑ ዓይነት ቡድን ተመልሶ  እንዳይወጣብን አስቀድመን ሥርዓቱን በጠንካራ መሰረት ላይ ማኖር ያስፈልገናል።

ይህን ዘላቂ የጋር መፍትሔ እግቡ ለማድረስ፣ ት.ዴ.ት. በሸንጎ በኩል ተደራጅቶ እንደሚታገለው ሁሉ ሌሎቻችንም በሰፊ ሕብረት ተቀናጅተን መድሃኒታችን የሆነውን ሕዝባዊ ማዕበሉ እንድንፈጥር መተባበር ይጠበቅብናል። ይህ ካልሆነ መከራችን እንደሚንዛዛና ካሁኑ የባሰ አደጋም መጋበዝ መሆኑን ልናስገነዝብ እንወዳለን።        

በመጨረሻም ለትግራይ ሕዝብና ልጆቹ አጭር መልእክት ማስተላለፍ እንፈልጋለን።

የትግራይ ሕዝብ ሆይ! ቀደም ሲል ያካሄድከው ትግል ከጎስቋላው ኑሮ ተላቀህ በእኩልነት፣ በአንድነት፣ በሰላም ለመኖር ነበር። ሆኖም ትክሻህን ረግጦ ሥልጣን ላይ የተቆናጠጠው ማፍያዊ ቡድን፣ በስምህ እየነገደ መላው የኢትዮጵያ ሕዝብን የመከራ አረንቋ ውስጥ መክተቱ ብቻ ሳይሆን እርስበርሱም እንዲተላለቅ እያደረገ ነው። ይህ መተላለቅ በራስህ ላይም እየደረሰ ለመሆኑ ነጋሪ አያስፈልግህም። ምንጩ ባንተ ላይ የሚዝተው የዋህ ወይም ግልብ ዜጋ ሳይሆን እነዛ ለብዝበዛ የተሰማሩ ጨካኝ ገዢዎቹ ናቸው።

ክፋታቸው በዚህ አያቆምም፣ ይህን እነሱ ሆን ብለው የፈጠሩት ግጭት ምክንያት በማድረግ የመገንጠል መፍትሔ እንድታቀነቅን እያሴሩብህ ነው። ዓላማው ሰፊው የኢትዮጵያ ሕዝብ እየበዘበዙ ሲያላገጡበት ከነበረው ሥልጣን ሲባረሩ፣ አንተውኑ ምሽግ በማድረግ የለመዱት ማላገጥ እንዲቀጥሉብት በመፈለግ ነው። ስለዚህ ይህን አደገኛ ሴራ ለማክሸፍና አፈና የሌለበት ሰላማዊ የጋራ ኑሮ ለመኖር፣ ብዙ ሰው ያልገባው ድርብርብ አፈና ቢጫንብህም ቅሉ፣ እንደምንም ተጋፍጠህ፣ ከታሪካዊው ወገንህ ከአብዛኛው የኢትዮጵያ ሕዝብ ጎን ተሰልፈህ ማዕበሉ ውስጥ ግባ። በውትድርና የተሰለፉት ልጆችህንም አስረዳቸው።የዘላቂው መፍትሔ አቅጣጫ ይህ ብቻ ነው። ከሸንጎ ጀምሮ ያሉት ኢትዮጵያውያን ዴሞክራቶችና ምንጊዜም አጋርህ ሰፊውና  ጭቁኑ ሕዝብ ከጎንህ እንደሚሰለፉ እርግጠኞች ነን፣ እኛም ለዚህ የተቀደሰ ዓላማ አብረን ተባብረን እየሠራን ነው።

በጋራ ትግል ኢትዮጵያ ታብባለች፣ ሕዝቧም ተፋቅሮ ባንድነት ይኖራል!!!

ት.ዴ.ት. / TAND

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!