የኢትዮጵያ ሕዝብ የጋራ ትግል ሸንጎ (ሸንጎ)

ሚዳቋ ወዲህ፤ ቅዝምዝም ወዲያ እንዲል ያገራችን ሰው፤ የሰሞኑ የኢሕአዴግ መንግሥት አካሄድም ከሕዝብ ፍላጎትና ከሕዝብ ጥያቄ ጎን ሲለካ ወዲያና ወዲህ ሆኖ አግኝተነዋል። ሕዝብ የሚጠይቀውና የሚፈልገው አንድ ነገር፤ መንግሥት አደርጋለሁ የሚለው ሌላ ነገር። ይህም በተለይ ባለፈው ሳምንት ጠቅላይ ሚኒስትሩ በሁለት ዐበይት ጉዳዮች ላይ ያሰሙትን መግለጫ ይመለከታል።

በርካታው የአገራችን ሕዝብ ምንም እንኳን የጠቅላይ ሚኒስትሩን የውሳኔ አሰጣጥ ስልት ትክክለኛ ነው ብሎ ባይቀበልም፤ የሚያሰሟቸው ንግግሮችና እስካሁን የወሰዷቸው እርምጃዎች፤ አገራዊ ፋይዳ ያላቸው መሆናቸውን በመገንዘብ ድጋፍና አድናቆት ሲሰጣቸው ቆይቷል። የተቃዋሚውም ጎራ፤ ሸንጎን ጨምሮ ለፈጸሙት መልካም ድርጊት ሁሉ ድጋፍና ማበረታቻ አልነፈጋቸውም። እስካሁን ከተወሰዱት እርምጃዎች፤ ለምሳሌ ታዋቂ እስረኞችን መፍታት፤ የአስቸኳይ ጊዜ አዋጅን ማንሳት ወዘተ ... እሰይ የሚያሰኙ ውሳኔዎች ቢሆኑም፤ አሰራሩ በበጎ አድራጊነት መንፈስ ላይ የተቃኘ ስለሚመስል፤ የጎደለው ነገር እንዳለ ያሳብቃል። በሌላ አነጋገር በጎ አድራጊው ሰው ወይም ቡድን ከመድረኩ ላይ ዞር ካለ፤ ነገሮች በቅጽበታዊ ፍጥነት ቀድሞ ወደ ነበሩበት ይዞታ እንዳይመለሱ የሚያግዳቸው ሥርዓት አልተበጀም ማለት ነው። ያም ሆኖ መልካም ሥራ ሁልጊዜም መልካም ነውና፤ በመልክ በመልኩ ሊወደስ ይገባል።

ባለፈው ሳምንት ጠቅላይ ሚኒስትር ዐቢይ እንዲያው እንደዋዛ ስለ አልጀርሱ የድንበር ውሳኔና በመንግሥት ቁጥጥር ስር ስለሚገኙ ትልልቅ ኩባንያዎች መሸጥ፤ የኢሕአዴግ አመራር ኮሚቴ ውሳኔ ነው ብለው ያስተላለፉት መግለጫ፤ እስካሁን ስለ እርሳቸው ያለውን የሕዝብ እይታ በእጅጉ የሚቀይረው ይሆናል ብለን እንገምታለን። በኛ አስተያየት አሁን፤ ዛሬ በሁለቱም ጉዳዮች ላይ ውሳኔ እንዲሰጥ የሚያስገድድ ሁኔታ ባለመኖሩ፤ ኢሕአዴግ በዚህ ላይ ወደፊት ከመግፋት እንዲያቆም በጥብቅ እናሳስባለን። ከዚህም አስተያየት ላይ እንድንደርስ የገፋፉን በርካታ ምክንያቶች አሉ።

  • ሁለቱም ጉዳዮች እጅግ ግዙፍ የአገር ጉዳዮች በመሆናቸው ሕዝብ ሊመክርባቸው ስለሚገባ
  • አሁን ያለው መንግሥት፤ በነጻና ፍትሃዊ ምርጫ የተመረጠ፤ እንዲህ ዓይነት ውሳኔዎችን ለመውሰድ ውክልና የሌለው በመሆኑ፤ ውሳኔው አዲስ መንግሥት እስኪመረጥ መጠበቅ ስላለበት፤
  • በተለይ የድንበሩ ጉዳይ በጣም አወዛጋቢና በርካታ የታሪክ፤ የጂኦግራፊና የባህል ጥያቄዎችን የሚያስነሳ በመሆኑ፤ ሰፋ ያለ ምክክርና ውይይት የሚያስፈልግ በመሆኑ፤
  • ከሁሉም በላይ ግን ያአልጀርሱ ስምምነት ፍትህ የጎደለውና ያኢትዮጵያን ጥቅም የማያሰከብር ስለሆነ ልንቀበለው አይገባም፤
  • ገና ከጅምሩ የሕዝብ ንብረት ሆነው የቆዩ፤ አገሪቱን የሚያስጠሩ፤ አትራፊ ኩባንያዎች፤ በከፊልም ሆነ በሙሉ መሸጥ ምናልባት ቢያስፈልግ እንኳን፤ እንዲህ በችኮላ መሆን ስለሌለበት፤
  • በአሁኑ ሰዓት ይሸጡ ቢባል እንኳን፤ ማን ሊገዛቸው እንደሚችል ግልጽ ስለሆነ - ከኢትዮጵያ ሕዝብ ሰርቀው ለደለቡ ሌቦች፤ ተጨማሪ የአገር ንብረት በህጋዊ መንገድ መስጠት አግባብ ስለማይሆን፤
  • መንግሥት ያጋጠመውን የውጭ ምንዛሪ እጥረት፤ በሌላ መንገድ ማቃለል ስለሚችል - ሀ/ ሌብነትንና የውስጥ ንቅዘትን በማጽዳት፤ ለ/ ከውጭ ካሉ የኢትዮጵያ ዜጎች ጋር አስቸኳይ እርቅና የተለየ ጥሪ በማድረግ፤

ሸንጎ በተደጋጋሚ እንደጠየቀው ሁሉ አሁንም ደግመን የምንጠይቀው፤ አገሪቱን ወደ ዘላቂ መረጋጋትና ሰላም የሚወስዳት አንድ ሰፊ የአገራዊ መግባባትና ብሄራዊ እርቅ ጉባኤ ጠርቶ ሁሉንም ባለድርሻ አካላት ማወያየት ሲቻል ነው። በዚህ ላይ ዶክተር አቢይና መንግሥታቸው በአፋጣኝ ቢሰሩ ለችግሮቻችን ሁሉ መፍትሔው እየተገኘ ይሄዳል። ሕዝባችንም በአገሩ ጉዳይ ላይ ወሳኝ ይሆናል።

የሕዝብ ተሳትፎ የሌለበት ውሳኔ፤ መፍትሔ አያመጣም!!

የኢትዮጵያ ሕዝብ ትግል ያሸንፋል!!

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!