Jawar Mohammed. ጃዋር መሐመድ

ቅድመ ንባብ ማስታወሻ:-

ይሄን የጃዋርን ንግግር በጥንቃቄ ተርጉመው ያደረሱን ለአንዲት ኢትዮጵያ ህልውና የታመነ ልብ እና የጸና ዓላማ ያላቸው፤ ብሎም ዲሞክራሲያዊት ኢትዮጵያ እንጂ መፈጠር ያለባት ኢትዮጵያ ህዝብ መከፋፈል የለበትም ብለው በታላቅ ሀገራዊ ተጋድሎ ውስጥ ያሉ የኦሮሞ ልጆች ናቸው። መጀመሪያ እነሱን በኢትዮጵያ ህዝብ ስም አመሰግናለሁ። ቀጥሉም ሁሉም ኢትዮጵያዊ ይሄን የጃዋርን ንግግር እንዲያነበው እጋብዛለሁ። መልካም ንባብ!

ለጊዜው ሁላችንም ስሜታዊ ነን። መለስ ብለን ስናይ በውጭ ሀገር መሠራት የሚገባቸው ሁለት ነገሮች አሉ። አንዱ የፖለቲካ ማኅበረሰባችን ማለትም በየደረጃው ያሉ የፖለቲካ መሪዎቻችንና ምሁሮቻችን ሊሰባሰቡ፣ ሊደማመጡና መግባባት ላይ ሊደርሱ ይገባቸዋል። ቀጥሎ ሀገር ቤት በመደረግ ላይ ላለው ትግል በየዘርፉ ድጋፍ ማደረግ ያስፈልጋል። ሥራ እየተሠራ ነው። ይሄ ሥራ ተጠናክሮ መቀጠል አለበት።

አንድ የፖለቲካ መሪዎቻችንን የመሸምገልና የማቀራረብ ሥራ ሙሉ በሙሉ ባይሳካም ጅማሮው በራሱ አንድ ነገር ነውና ተጠናክሮ መቀጠል አለበት። ነገር ግን ከፊት ለፊቴ ቁጭ ያላችሁ መሪዎች ቀልዱን አቁሙ። ካሁን በኋላ ቀልዱን ልናስተናግድ አንችልም። ወያኔ ህዝባችንን ገድላ፣ ይቅርታ ጠይቃን፣ ለቅሶ ቁጭ ብለውልን እየቀለዱብን ነው። እናንተም ህዝባችንን አንድ እናደርጋለን እያላችሁ እየለያያችሁ ነው። ይሄን ቀልድ ከእንግዲህ የምንቀበለው አይደለም። ቀልዱን አቁሙ።

በሙሁሮቻችን በኩል ሥራዎቻችንን በሦስት ደረጃ ከፍለን እየሠራን ነው። አንደኛ ይሄ መንግሥት ሊወድቅ ነውና የሽግግር መርሃ ግብር ሊኖረን ይገባል። በዚህ ረገድ ዓለማቀፍ የኦሮሞ ሕግ ባለሙያዎች ማኅበር እየሠራበት ነው፣ የተለያዩ ሰነዶችን እያዘጋጁ ነው። በዚህ ወር መጨረሻ በ23 ይመስለኛል ለንደን ላይ ኮንፈረንስ ይኖረናል። እኛ ሁላችንም እንሳተፋላን። አብረን እንሄዳለን ማለት ነው።

የሽግግሩ ሰነድ ኦሮሚያ በሽግግሩ ወቅት ምን መምሰል አለባት፣ ምን አይነት መንግሥት መገንባት ትፈልጋለች፣ ምን አይነት ግንኙንት ሊኖራት ይገባል የሚለውን ሁሉ ይመልሳል። ሁለተኛው በውጭ ሀገር የሚገኘው ማኅበረሰብ አመራር ማለትም አመራር ስንል የማኅበር፣ የዕምነት፣ እና የተለያዩ ተቋማት ፖለቲካል እና ሲቪክ ሶሳይቲ መሃከል መግባባት መፍጠር ነው።

ሁለተኛውን ትልቁ ችግራችንን ልንገራችሁ። የሚሞቱትን መቼም ባብዛኛው ከእናንተ እኔው ነኝ ቀድሜ የምሰማውና በጣም ዘግናኝ ነው። መሞታቸው ብቻ አይደለም የሚያሳዝነው። የሚሞቱትን መርዳት አለመቻላችን ያሳዝናል። ለመርዳት አቅም ማጣታችን ብቻ አይደለም እንዳንረዳቸው ያደረገን። ለመርዳት የሚሆን ሀብት ኖሮንም መርዳት አልቻልንም። ሰው በየቀኑ እየደወለልኝ "ገንዘበን መስጠት እፈልጋለሁ፣ መኪናየን፣ ቤቴን ሽጨ መርዳት እፈልጋለሁ እንዴት ልርዳ" ብለው ይጠይቁኛል። እኔም አላቅም ብየ እመልሳለሁ። ምክንያቱም ይሄንን የሚተገብር ተቋም የለንም። አንዳንድ ነገር እዚያም እዚያም ብየ ትንንሽ ነገር አደርጋለሁ። ይሄ ግን የተበታተነ ስለሆነ አንድ በናሽናል ደረጃ የተማከለ ነገር ያስፈልጋል። የኦሮሞ እርዳታ ማኅበር (Oromo Relief Assocciation) ያስፈልገናል።

ሌላው የዲፕሎማሲው ሥራ ለጉድ እየተሠራ ነው። ኢንክሬደብል (Incredible)! እኛንና አበሾቹን አነጻጽራችሁ ብታዩ፣ እነሱ እንደ ኤሊ እየተንፏቀቁ ነው። እኛ ደግሞ እንደ ድኩላ ፈጥነን እየሮጥን ነው። በዚህ ልትኩራሩበት ይገባል። በመሪዎቻችሁ ልትኩራሩ ይገባል። በታሪካችን ውስጥ ለመጀመሪያ ግዜ የዓለም መሪዎች እያዳመጡን ነው።

በተጨማሪም ወታደራዊና ደህንነት ተቋማትን፣ ሕግ አውጭዎችን፣ ሰብዓዊ መብት ተቋማትን የምናገኝበት መንገድ በደንብ እየተከፈተ ነው። ይሄ ጥሩ ነው፤ ግን በቂ አይደለም። ለምን? ግራ እጅ የሚሠራውን ቀኝ እጅ ካላገዘ፣ የዲፕሎማሲ ሥራችንን ካላስተባበርን፣ የዲያስፖራውን እንቅስቃሴ ካላስተባበርን፣ ሥራ በአውሮፓ እና በአውስትራሊያ ሆነው ለሚሠሩ ኃይሎች በቂ ገንዘብ ካልተመደበ እና አሰራሩ ካልተማከለ (Centralized) ውጤታማ መሆን አንችልም።

በለንደን ከሚዘጋጀው የሽግግር ሰነድ ቀጥሎ በአትላንታ ጆርጂያ የተጋድሎአችን አንደኛ ዓመት ላይ የኦሮሞ መሪዎች ጉባዔ (Oromo Leadership Conference) ይኖረናል። በዚህም የፖለቲካ፣ የማኅበራዊና እምነት ተቋማት መሪዎቻችን በሙሉ ይሳተፋሉ። በዚህ ጉባዔ ላይ መሰረታዊ የኦሮሞ ነጻነት ቻርተር (Oromo Basic Freedom Charter) እና ለዲፕሎማሲ ሥራ እና ግብረሰናይ ተቋማት ለማግኘት መርኅ የስትራቴጂ ሰነድ ይዘጋጃል። ይሄ በተጨባጭ እየተሠራ ነው። እየሠራን ነው። እኛም የምንሳተፈው በዶ/ር አሰፋ ጃላታ መሪነት ዓለማቀፍ መልክ ያለው ሁሉንም የኦሮሞ ፖለቲካ መሪዎቻችንንና ተቋማትን ያቀፈ ተቋም ዕውን እንዲሆን ነው። እየሠራን ነው። ዋናው ችግራችን ግን መሬት ላይ ያለው ተጨባጭ ሁኔታ በጣም በፍጥነት እየሄደ ነው። እኛ ግን መድረስ እያቃተን ነው። እናም በፍጥነት መጓዝ ያስፈልጋል።

እየኮረኮረቻችሁ ያለች እኔ እስካሁን ያልተናገርኳት አንድ ነጥብ አለች። እስካሁን የሠራናቸው ሥራዎች በሙሉ ነገ ኦሮሚያን የምናበጅባት ማለትም የኦሮሞ ነጻነት ትግል ማለት ነው። ልክ ቤት ያለ ምሰሶ መቆም እንደማይችል፣ የሰው ልጅ ያለ አጥንት መንቀሳቀስ እንደማይችል፣ የምንሠራቸው ሥራዎች ዲፕሎማሲ በል፣ የመገናኛ ብዙኃን ሥራ በል፣ የምሁራን ሥራ በል ያለ ወታደራዊ ኃይል ወደፊት ሊጓዙ አይችሉም። ወያኔን ጫፍ ላይ አድርሰናታል። ከፍተኛ መስዋዕትነት እየከፈልን ነው። እስከ መቼ እንሞታለን? መግደል ነው እንጂ! ግን ሞትን ድል ነስተናል። ይሄን እንዳትረሱ። ንዴትና በቀላችንን መወጣት ቢያቅተንም በስልታዊ አካሄድ ብዙ ድሎችን አግኝተናል። ይሄ ሥርዓት የዛሬ አስር ዓመት ካለበት የለም። በርግጥ ዛሬ የትናንቱ ቦታ ላይ አይደሉም። አዳክመናል ከመሬት ማድረስ እንችላለን።

ሁላችሁም መርሳት የሌለባችሁ የኦሮሞ ህዝብ ትግል ወያኔን ለመጣል አልተጀመረም። የኦሮሞ ህዝብ ትግል የነፍጠኛውን ሥርዓት ለመጣል አልተጀመረም። የኦሮሞ ህዝብ ትግል ማንኛውንም ዓይነት አፋኝ ሥርዓት ገርስሶ የበለጸገች ከራሷና ከህዝቧ ጋር የታረቀች፣ ሰላም ሰፍኖባት መታረዝ፣ ሞትና ስደት የሌለባት ኦሮሚያን መገንባት ነው ግቡ።

ይሄን ለማድረግ የዲፕሎማሲ እና የብዙኃን መገናኛ ሥራ አስፈላጊ ነው። እንዲሁም በመሃከላችን መከባበር ብሎም በውጭም እራሳችንን ማስከበር ወሳኝ ነው። ለዚህም በደንብ የታጠቀና የተደራጀ ወታደራዊ ኃይል ያስፈልገናል። ይሄኛውን ጉዳይ እንደ ሌሎቹ ፍርጥርጥ አርጌ ማውራት አልፈልግም።

ለአንድ ነገር ግን ራሳችሁን ማዘጋጀት አለባችሁ። የህዝባችን ትግል መቀጠል አለበት። ተቋማዊ እና ስልታዊ በሆነ መንገድ ህዝባችን ራሱን የመከላከል አቅም እያጎለበት መሣሪያ እየነጠቀ እጁ እያስገባ፣ እራሱን እያደራጀ ሄዶ የራሱን የኦሮሚያ መከላከያ ሠራዊት መገንባት ይጠበቅብናል።

ይህ በአንጃባ አይሆንም። ይሄ ሁለት ነገር ይጠይቃል። ሀገር ውስጥም ውጭ ሀገርም ያለው አቅም ያለው ወጣታችን ወደ ትጥቅ ትግል መሄድን ይጠይቃል። ጃዋር ሴንትራል አቬኑ ውስጥ ቁጭ ብሎ ሠራዊት መገንባትና መምራት አይችልም። ወታደር በሁለት ምክንያት ይዋጋል። አንድ አዛዡን ስለሚፈራ። ሁለት በአዛዡ ስለሚመካ። ስለዚህ በደንብ እናስብበት።

በኦሮሚያ ውስጥ ወደ አምስት መቶሽ የጦር መሣሪያ አለ። ይሄ ሁሉ የኛ ነው። በልጆቻችን እጅ ነው ያለው። ሆኖም ግን አንድ ችግር ልንገራችሁ። ይሄ የወያኔ ወታደር ከድቶ መውጣት አቅቶት ይመስላችኋል? በየቀኑ ከጀነራል እስከ አስር አለቃ ያገኙኛል። እዛው ሁኑ ነው የምላቸው። የት ነው የምወስዳቸው ታዲያ? ወጥተው እንዲያልቁ ማዘዝ አለብኝ? አላስፈላጊ መስዋዕትነት ማስከፈል ተገቢ አይደለም። ከኋላ ወያኔ ከፊት ለፊት የኦሮሞ ወጣቶች ግድ ሆኖባቸው የሚችሉትን ወጣቱን እየገደሉ ነው። እናም ይሄ ኃይል መጠለያ አግኝቶ ተመልሶ ሥርዓቱን የሚዋጉበት ነገር ላይ መሠራት አለበት። ይሄን ለማዘጋጀት ለሚያስፈልጉት ቁሳቁስና ገንዘብ ልትዘጋጁ ይገባል።

 

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!