Habtamu with his daughter

(ቢቢኤን) ባለፈው ዓርብ ኅዳር 23 ቀን 2009 ዓ.ም. ከተከሰሰበት የሽብር ክስ በነጻ የተሰናበተው አቶ ሀብታሙ አያሌው ወደ ውጭ ሔዶ እንደሚታከም ገለጸ። የቀድሞ አንድነት ፓርቲ የሕዝብ ግንኙነት ኃላፊ የነበረው አቶ ሀብታሙ፣ ሆሞሮይድ በተባለ በሽታ በጽኑ ሲታመም እንደሰነበተ ይታወቃል። ውጭ ወጥቶ ለመታከም በተደጋጋሚ ለፍርድ ቤት አመልክቶ በተለያዩ ሰበቦች ማመልከቻው ውድቅ ሲደረግበት የቆየው አቶ ሀብታሙ፣ በጠቅላይ ፍርድ ቤት ነጻ መባሉን ተከትሎ ውጭ ሔዶ ለመታከም ማቀዱን አስታውቋል።

“ሁሉም ሰው እንደሚያውቀው እጅግ የተንዛዛ እና የተጓተተ ፍትሕ ነው።” ሲል በፍርድ ቤቱ የደረሰበትን መንገላታት የገለጸው አቶ ሀብታሙ፣ አያይዞም “በከፍተኛው ፍርድ ቤት አንድ ዓመት ከሁለት ወራት አካባቢ ፈጅቶ ነው ውሳኔ ላይ የደረሱትና በነጻ ለማሰናበት የወሰኑት። ከዚያ በኋላ ደግሞ የጠቅላይ ፍርድ ቤቱ ችሎት በአጼ ኃይለሥላሴ ዘመን የወጣውን እና እስካሁንም ያልተሻሻለውን የሥነ ሥርዓት ሕግ አንቀጽ 288/5ን በተዛባ መልኩ ተርጉሞ በእስር ቆይተው ይግባኙን እንዲከታተሉ ብሎ አቃቤ ሕግ ይግባኝ ሲያቀርብ፤ የጠቅላይ ፍርድ ቤቱ ችሎት ያንን ተቀብሎ በእስር ቤት እንድንቆይ ተደረገ።” ሲል የነበረውን ሁኔታ አስታውሷል።

በአገር ውስጥ በሚደረግለት የማስታገሻ ሕክምና አሁን ላይ መጠነኛ ማገገም ያሳየው አቶ ሀብታሙ፤ በጽኑ በታመመበት ወቅት የነበረውን ሁኔታ ሲያስታውስ “በሰበር ሰሚ ችሎት ይግባኝ ጠይቀን ከእስር ከተፈታንበት ጊዜ ጀምሮ ባለፈው ዓርብ ውሳኔ እስከተሰጠበት ጊዜ ድረስ የተለያዩ ተደጋጋሚ ጥያቄዎች አቅርበናል። በከፍተኛውም ሆነ በጠቅላይ ፍርድ ቤት እና በሰበር ሰሚ ችሎት የተከራከርንባቸው ጉዳዮች ሲታዩና እንደዚህ ዓይነት የጤና እክል ገጥሞኝ እኔን ከእነ ቤተሰቤና መላውን የአገራችንን ህዝብ ጭንቀት ላይ ጥሎ ቆይቷል” ብሏል።

አቶ ሀብታሙ አክሎም “ፍርድ ቤቱ መዝገቡን ዘግቶ በነጻ ያሰናበተኝ በመሆኑ ሕክምናዬን ከአገር ውጭ ሔጄ መከታተል እችላለሁ።” ብሏል። “እስካሁን ሕክምና ላይ በነበርኩበት ወቅት ከፍተኛ ወጭ ጠይቆኛል።” ያለው ሀብታሙ፣ “ከዚህ በኋላም ቢሆን ከፍተኛ ወጭ እንደሚጠይቀኝ ይታወቃል። ይህንን ወጭ እኔ የቻልኩትን ያህል ከሞከርኩ በኋላ የተለያዩ ወዳጆቼ ባደረጉልኝ ድጋፍ ነው ሕክምናውን የማደርገው” ሲል ተናግሯል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!