Feyisa Lelisa

ኢትዮጵያ ዛሬ (ቅዳሜ ታህሳስ ፩ ቀን ፳፻፱ ዓ.ም. Dec. 10, 2016)፦ አትሌት ፈይሳ ሌሊሳ ባለፈው ክረምት በሪዮ ዲጄኔሮ ኦሎምፒክ ማራቶን ውድድር ላይ የብር ሜዳሊያ ከመቀዳጀቱም በላይ በአገሩ ኢትዮጵያ ውስጥ የሚታየውን የሰብዓዊ መብት ጥሰት በመቃወም እጆቹን አጣምሮ በዓለም አደባባይ ላይ ካሳየ ወዲ የመጀመሪያው የሆነውን ውድድር ሊያደርግ በዝግጅት ላይ ነው።

አትሌት ፈይሳ ከውድድሩ ፍጻሜ እንደተናገረው በአገሩ ውስጥ ያለው አስተዳደር ሕዝብን ነጻነት በመንፈግ ከፍተኛ የሰብዓዊ መብት ጥሰት በማድረግ ላይ መሆኑን ለዓለማቀፍ ሚዲያ ከተናገረ በኋላ፤ "ከእንግዲህ ብመለስ ወህኒ ይወረውሩኛል" በሚል ጉዞውን አሁን ወደ ሚኖርባት አሜሪካ ማቅናቱ የቅርብ ጊዜ ትዝታ ነው።

ከዚህ ኹነት በኋላም አትሌት ፈይሳ አርፎ አልተቀመጠም። የኢትዮጵያ ጉዳይ ለውይይት በቀረበባቸው መድረኮች ሁሉ በመገኘት ሃሳቡን የገለጠ ሲሆን፣ በቅርቡም በአውሮፓ ሕብረት ፓርላማ ከግንቦት ሰባት ሊቀመንበር ፕ/ር ብርሃኑ ነጋ እና ከኦሮሞ ፌደራሊስት ሊቀመንበር ከሆኑትና አሁን ወህኒ ከተወረወሩት ፕ/ር መረራ ጉዲና ጋር ቀርቦ የአገሩን ወቅታዊ ጉዳይ አብራርቷል።

የ26 ዓመቱ አትሌት ፈይሳ ሌሊሳ በጥቂት ሳምንት ውስጥ ሆኖሉሉ ማራቶን የሚሳተፍ ሲሆን፣ ለዚህም ከፍተኛ ልምምድ እያደረገ ቢሆንም፤ ካለበት ከፍተኛ ጫና የተነሳ ሩጫው ሳይከብደው እንደማይቀር ተገምቷል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!