Adama Barrow and Yahya Jammeh

ኢትዮጵያ ዛሬ (ቅዳሜ ታህሳስ ፩ ቀን ፳፻፱ ዓ.ም. Dec. 10, 2016)፦ ባለፈው ሣምንት በምርጫ መሸነፋቸውን በፀጋ መቀበላቸውን አሳውቀው የነበሩትና ጋምቢያን ላለፉት ሃያ ሁለት ዓመታት የመሩት የጋምቢያው ፕሬዝዳንት ያህያ ጃሜይ፤ በዛሬው ዕለት የምርጫውን ውጤት አልቀበልም አሉ። ድጋሚ ምርጫ መካሄድ አለበት ማለታቸው ተደመጠ።

በምርጫው ወቅት ተቀባይነት የሌላቸው ትክክልና ግልጽ ያልሆኑ ክስተቶች በመከሰታቸው ማዘናቸውን ገልጠው፤ የምርጫውን ውጤት ውድቅ ማድረጋቸውን አሳውቀዋል። በመሆኑም አዲስ ግልጥና ፍትሐዊ ምርጫ እንዲካሄድ አሳስበዋል።

የፕሬዝዳንቱን አቋም አስመልክቶ የተለያዩ አገራት ተቃውሟቸውን አሰምተዋል። ከእነዚህም ውስጥ ዩናይትድ ስቴትስ ኦፍ አሜሪካ እና ጎረቤት አገርዋ ሴኔጋል ውግዘታቸውን አሰምተዋል። የአፍሪካ አንድነት ድርጅት በበኩሉ፤ ”ሠላማዊ እና ፍትሐዊ የሥልጣን ሽግግር” እንዲካሄድ አስገንዝቧል።

ፕሬዝዳንት ያህያ ጃሜይ እ.ኤ.አ. 1994 በመንግሥት ግልበጣ ሥልጣን ከያዙ ጀምሮ፤ የምዕራብ አፍሪካዊቷን አገር ጋምቢያን ላለፉት 22 ዓመታት ሲመሩ መቆየታቸው ይታወቃል። ባለፈው ኖቨምበር በአገሪቱ በተካሄደው ምርጫ አዳም ባሮው ከ43% በላይ ድምፅ አግኝተው ፕሬዝዳንት ያህያን ማሸነፋቸው ይታወሳል።

ፕሬዝዳንት ያህያ፤ በምርጫ ያሸነፏቸውን አዳማ ባሮውን ስልክ ደውለው ”እንኳን ደስ ያለህ!” በማለት መሸነፋቸውን በፀጋ መቀበላቸውንና በቅርቡ እንዲገናኙ ጥያቄ ሲያቀርቡ የሚያሳየው ቪዲዮ በዓለም የመገናኛ ብዙኃን ተሰራጭቶ ነበር። በዚህም ፕሬዝዳንቱ ከፍተኛ ድጋፍና አክብሮት ተችሯቸው ነበር። ሠላማዊ የሥልጣን ሽግግር በአፍሪካ ያልተለመደ በመሆኑ ብዙኀንን አስደምሞ የነበረ መሆኑ ይታወሳል። ቪዲዮውን ለመረጃ ከዚህ በታች ይመልከቱ።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!