Prof. Merera Gudina

ኢትዮጵያ ዛሬ (ኀሙስ ታህሳስ ፳ ቀን ፳፻፱ ዓ.ም. Dec. 29, 2016)፦ ባለፈው ኅዳር ፳፩ ቀን ፳፻፱ ዓ.ም. በአውሮፓ ሕብረት ስብሰባ ላይ ተገኝተው አዲስ አበባ ሲገቡ ቦሌ አውሮፕላን ማረፊያ ላይ በኮማንድ ፖስቱ የታሰሩት የኦሮሞ ፌዴራሊስት ኮንግረስ ሊቀመንበር የሆኑት ፕ/ር መረራ ጉዲና በሽብር ወንጀል ሊከሰሱ ነው።

መንግሥት ያሰርኳቸው አስቸኳይ አዋጁን ጥሰው ስላገኘዋቸው ነው በማለት በሽብር ያልጠረጠራቸው መሆኑን ተናግሮ የነበረ ቢሆንም፤ ዛሬ ፖሊስ ፕ/ር መረራን ፍርድ ቤት አቅርቦ ከሽብርተኝነት ወንጀል ጋር በተያያዘ ምርመራ እያካሄድኩ ስለሆነ በሚል የሃያ ስምንት ቀናት ቀነ ቀጥሮ እንዲሰጠው ጠይቋል።

ዛሬ ረፋዱ ላይ በዋለው በዚሁ ችሎት ፍርድ ቤቱ ጉዳዩን በዝግ ችሎት የተመለከተው ሲሆን፣ የፕ/ር መረራ ቤተሰቦች፣ ዲፕሎማቶችና ጉዳዩን ሊከታተሉ የሄዱ ወገኖች ወደ ችሎቱ እንዳይዘልቁ ታግደዋል።

ፖሊስ አዋሽ ባንክ የሚገኘውን የፕ/ር መረራ የሂሳብ አካውንት ሁናቴ እንዲገልጽለት መጠየቁ የተነገረ ሲሆን፣ ፕሮፌሰሩ ከአሸባሪ ቡድኖች ገንዘብ ይደርሳቸዋል የሚል ውንጀላ ለማቅረብ እንደተጠቀመበት ለማወቅ ተችሏል።

የአውሮፓ ሕብረት በብራስልስ ባደረገው ስብሰባ ላይ ኢትዮጵያውያኖችን ጋብዞ ባነጋገረበት ዕለት (ረቡዕ ጥቅምት ፴ ቀን ፳፻፱ ዓ.ም. November 9, 2016) ፕ/ር መረራ ተጋባዥ ተናጋሪ የነበሩ መሆናቸውንና፣ በዚያው ስብሰባ ላይ ፕ/ር ብርሃኑ ነጋ እና አትሌት ፈይሳ ሌሊሳም ንግግር አድርገው እንደነበር መዘገባችን አይዘነጋመ።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!