Dr. Eng. Seleshi Bekele

የኢትዮጵያ የውኃ መስኖና ኢነርጂ ሚኒስትር ዶ/ር ኢንጅነር ስለሺ በቀለ

ኢትዮጵያ አልተቀበለችውም

ኢዛ(ሐሙስ መስከረም ፰ ቀን ፳፻፲፪ ዓ.ም. September 19, 2019):- ግንባታው ከተጀመረ ሰባት ዓመታትን ባስቆጠረው በታላቁ ህዳሴ ግድብ ዙሪያ ግብጽ አዲስ አነጋጋሪ የሆኑ ጥያቄዎች ይዛ ብቅ ያለች ሲሆን፣ ይህንን ያልተጠበቀ ነው የተባለ የግብጽ ጥያቄ የኢትዮጵያ መንግሥት እንደማይቀበለው በይፋ አሳወቀ።

ሁለቱን አገሮች ሙግት ውስጥ ይከታል ተብሎ የተገመተው አዲሱ ጥያቄ በግድቡ ዙሪያ የግብጽ መንግሥት እንዲተገበር እሻለሁ ብሎ አዲሱን ጥያቄ ያቀረበው ካይሮ ላይ ሲካሄድ በቆየው የኢትዮጵያ የግብጽና የሱዳን ከፍተኛ ባለሥልጣናት በመከሩበት መደበኛ ስብሰባ ላይ ነው።

ኢትዮጵያን በመወከል በካይሮው ስብሰባ ላይ የነበሩት የኢትዮጵያ የውኃ መስኖና ኢነርጂ ሚኒስትር ዶ/ር ኢንጅነር ስለሺ በቀለ ከግብጽ ከተመለሱ በኋላ፣ ትናንት ከሰጡት መግለጫ መረዳት እንደሚቻለው፤ ግብጽ ከግድቡ መጠናቀቅ በኋላ ከውኃ አለቃቀቅ ጀምሮ አጠቃላይ የውኃው ፍሰት እንዴት መሆን እንደሚገባው የሚያመለክትና ይህም የግብጽ ሐሳብ መተግበር ይገባዋል የሚል ይዘት እንዳለው ነው። “ግብጽ በመድረኩ ላይ ይዛ የቀረበችው አዲስ ምክረ ሐሳብ፣ ኢትዮጵያን የሚጐዳና አላስፈላጊ ግዴታ ላይ የሚጥል ነው” ያሉት ሚኒስትሩ፤ ይህ የግብጽ ሐሳብ ግን በኢትዮጵያ በኩል ተቀባይነት የለውም ብለዋል።

ግብጽ ከኢትዮጵያና ከሱዳን ስምምነት ውጭ ያቀረበችው አዲስ ሐሳብ ግድቡ ወደ ሥራ ከገባ በኋላ መፈፀም አለበት ብላ ያቀረበችው ምክረ ሐሳብ ጊዜውን ያልጠበቀ ነው።

የውኃው ፍሰት ሳይቀንስ መለቀቅ አለበት በሚለው ሐሳብ ዝርዝር ነገሮችን አካታ የቀረበችው ግብጽ፤ ይህ አካሄዷ የግድቡን የውኃ አለቃቀቅ ለመቆጣጠርም ፍላጐት ያላት ስለመሆኑ የሚያመላክት ተደርጐ ተወስዷል።

ይህ የግብጽ አዲስ አጀንዳ በአገሮቹ መካከል ይደረግ ከነበረው የውይይት አጀንዳ ያፈነገጠም ነው ተብሏል። ግብጽ በቆረጣ ያስገባችው አዲስ አጀንዳ እስካሁን በሦስቱ አገራት መካከል ሲካሄድ የቆየውን ድርድር ይጐዳል ተብሎ ይገመታል።

ሆኖም ከሚኒስትሩ መግለጫ መገንዘብ እንደተቻለው ግን፤ አንድ ገለልተኛ የባለሙያዎች ቡድን የቀረበውን የግብጽ አጀንዳ ገምግሞ በቀጣዩ የሦስቱ አገራት ቋሚ የምክክር መድረክ ላይ እንዲቀርብ ተወስኗል።

ኢትየጵያ እንዲህ ያለ ግዴታ ውስጥ ሊከታት የሚችለውን ሐሳብ እንደማትቀበለው የገለፀች ሲሆን፣ ይህንንም በይፋ አሳውቃለች። ከዚህ ድምዳሜ ላይ የደረሰችም የግብጽ ሐሳብ የኢትዮጵያን ሉዓላዊነት የሚገፋ ጭምር መሆኑንም አስታውቃለች። (ኢዛ)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!