Ethiopian airlines

የኢትዮጵያ አየር መንገድ በ2011 በጀት ዓመት የገጠመውን የአውሮፕላን አደጋ በመቋቋም 8.9 ቢሊዮን ብር አተረፈ

- ትርፉን ያገኘው በበጀት ዓመቱ የገጠመውን የአውሮፕላን አደጋ በመቋቋም ነው

- በያዝነው በጀት ዓመት 19 ቢሊዮን ብር ለማትረፍ አቅዷል

ኢዛ (ሐሙስ መስከረም ፳፪ ቀን ፳፻፲፪ ዓ.ም. October 3, 2019):- ኢትዮጵያን በመላው ዓለም በማስተዋወቅና ውጤታማ ከሚባሉ ኩባንያዎች ውስጥ አንዱ የኾነው የኢትዮጵያ አየር መንገድ በተጠናቀቀው 2011 ዓ.ም. ከግብር በፊት 8.9 ቢሊዮን ብር አተረፈ። በ2012 ዓ.ም. ትርፉን ከእጥፍ በላይ በማሳደግ 19 ቢሊዮን ብር ለማትረፍ አቅዷል።

የመንግሥት የልማት ድርጅቶች ይዞታና አስተዳደር ኤጀንሲ እንደገለፀው የኢትዮጵያ አየር መንገድ ይህንን ትርፍ ያገኘው ከመንገዶች እና ዕቃ በማጓጓዝ እንዲሁም፣ በተጓዳኝ አገልግሎቶችን በመስጠት 114.6 ቢሊዮን ብር ገቢ በማግኘቱ ነው።

ከ114.6 ቢሊዮን ብር ከሚደርሰው ገቢ ውስጥ ያገኘው ትርፍ 8.9 ቢሊዮን ብር ነው። የኤጀንሲው ተጨማሪ መረጃ እንደሚያመለክተው፣ አየር መንገዱ ካገኘው ጠቅላላ ገቢ ውስጥ 3.9 ቢሊዮን ዶላር በውጭ ምንዛሪ የተገኘ ነው።

አየር መንገዱ በ2012 ዓ.ም. በጀት ዓመት ከተለያዩ አገልግሎቶቹ 155 ቢሊዮን ብር ገቢ ለማግኘት ማቀዱንና ከግብር በፊት ለማግኘት ያቀደውም ትርፍ በ2011 ካገኘው ከእጥፍ በላይ ለማድረግ እየሠራ ነው። ይህም ከግብር በፊት 19 ቢሊዮን ብር ለማትረፍ እንደሆነ የኤጀንሲው መረጃ ይጠቁማል።

የኢትዮጵያ አየር መንገድ በ2011 በጀት ዓመት ያገኘው ትርፍ በበጀት ዓመቱ የገጠመውን የአውሮፕላን አደጋ በመቋቋም እንደኾነ የተወሳ ሲሆን፤ አደጋው ተፅዕኖ ሳይፈጥርበት በአትራፊነት በመወጣቱም በኤጀንሲው ተወድሷል ተብሏል።

የኢትዮጵያ አየር መንገድ በመንግሥት እጅ የሚገኝ ግዙፍ ኩባንያ ሲሆን፣ መንግሥት የተወሰነውን ድርሻውን ለመሸጥ ከያዛቸው ኩባንያዎች ውስጥ አንዱ ነው። ሆኖም ይህንን ኩባንያ መሸጥ እንደማይገባ የተለያዩ ወገኖች ድምፃቸውን እያሰሙ ነው።

በቅርቡ የመንግሥት ተቋማትን ወደግል ይዞታ ለማዛወር እየተደረገ ባለው እንቅስቃሴ ዙሪያ በተዘጋጀ የውይይት መድረክ ላይም ይህ ሐሳብ ተንፀባርቋል። መንግሥት የዚህን ኩባንያ ሽያጭ ፕሮግራም ወደመጨረሻው ላይ ያደረገው ሲሆን፤ በጥቂት ዓመታት ውስጥ ይሸጣል ተብሎ እንደማይጠበቅም ለኢትዮጵያ ዛሬ የደረሱ የተለያዩ መረጃዎች ይጠቁማሉ። ኢዛ

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!