ሳሚታ ተፈራ

Irrecha protest, 2nd Oct 2016

እኔና ጓደኛዬ በስልካችን ምስልና ቪዲዮ እየቀረፅን ስለምንጓዝ ጉዟችን ቀርፋፋ ነበር። በምንሄድበት መንገድ የወታደሩ ቁጥር፤ መሣሪያ የደገኑ ወታደራዊ ተሽከርካሪዎች እጅግ ብዙ ከመሆናቸውም በተጨማሪ ደንበኛ ጦር ሜዳ በሚያስመስል መልኩ በመሬት ታንክ እና በሰማይ ላይ ደግሞ የጦር ተዋጊ ጄት ከ4:00 ሰዓት ጀምሮ በማንዣበብ ህዝቡን ሲያሸብሩ ነበር። እኛም ወደ ሆራ አርሰዲ በተጠጋን ቁጥር የህዝቡ ብዛት እና የህዝብ ጥያቄ የሚያስተጋቡ ዜማዎችና መፈክሮች ጠንከር ባለ መልኩ በዚያ አካባቢ በነበሩ የበዓሉ ታዳሚዎች በሙሉ ይስተጋባ ነበር።

Irrecha protest, 2nd Oct 2016

ከመፈክሮቹ በጥቂቱ፦
- ነፃነት እንፈልጋለን!
- ጠላታችን ወያኔ እንጂ የትኛውም ህዝብ አይደለም። ጥያቄአችን የትኛውም ህዝብ ላይ ያነጣጠረ አይደለም!
- በወያኔና ተላላኪዎቹ አንተዳደርም!
- የወንድሞቻችንና የእህቶቻችን ደም በከንቱ ፈሶ አይቀርም!
- የአማራ ህዝብ፣ የኮንሶ ህዝብ፣ የሶማሌ ህዝብ፣ የሱርማ ህዝብ፣ የጋምቤላ ህዝብ እና ሌሎችም ወንድሞቻችን ስለሆኑ እንወዳቸዋለን!

ከሁሉም ጎልቶ የሚሰማውና ሁሉም የሚቀባበልው Didnee! Didnee! Didnee! (እምቢ! እምቢ! እምቢ!) የሚለው መፈክር ነበር።

Irrecha protest, 2nd Oct 2016

ያለመግባባቱ መንስዔና ጅምላ የዘር ፍጅቱ

Irrecha protest, 2nd Oct 2016ተቃውሞው ፍፁም ሰላማዊና እጅን ከጭንቅላት በላይ በማጣመር መፈክር ማሰማት ነበር። በዚሁ መሃል ኦፒዲኦ (ኦህዴድ) መልምሎ ያስቀመጣቸው የወያኔ ጀሌ የሆኑ አንድ የቀድሞ አባገዳ (ለገሰ?)፤ የቱለማ አባገዳና የኦሮሚያ አባገዳዎች ሰብሳቢ በየነ ሰንበቶ እያሉ መድረኩን ተቆጣጥረው ንግግር ለማድረግ ይሞክራሉ፤ በበዓሉ ላይ አይታይም የተባለው የፓርቲው (የኦፒዲኦ) ባንዲራም ይታያል። በዚሁ መሰረት ወጣቶች ባህላችን የፓርቲ ንብረት አይደለም፤ በህዝብ የተመረጠው አባገዳ እንጂ የናንተ ተላላኪ ንግግር አያደርጉም በሚል መድረኩን በመያዝ መፈክር ማሰማት ጀመሩ። በዚህን ጊዜ ለባለሥልጣኖችና ለአባገዳዎች መቀመጫ ታስቦ የተሠራው ባለ ደረጃ ጥላ/ትሪቡን ሁሉም ስላፈገፈጉ ባዶ ቀረ። በዚህን ጊዜ ወጣቶች ባዶ ቦታው ላይ መቀመጥ ይጀምራሉ። እነዚህን ልጆች ወታደሮቹ ከሌላው ህዝብ በመቁረጥና በመክበብ መደብደብና ለማሰር መጎተት ሲጀምሩ፤ ወጣቶች በተቃውሞ ጩኸት ለመከላከል ሞከሩ። በዚህ ቅጽበት ተኩስ ተጀመረ። ከላይ ሄሊኮፕተር የጭስ መወርወር ጀመረ። መሬት ላይ ያሉትም ወታደሮች ወደ ሰው በቀጥታ ሲተኩሱ ነበር።

Irrecha protest, 2nd Oct 2016

ራቅ ብዬ አጥር ጥግ ጉብታ ነገር ላይ ሆኜ ወደ ፖዲየሙ ፊት ለፊት እመለከታለሁ፤ ሁኔታውንም ስከታተልና በተቻለኝ መጠን በሞባይሌ ቪዲዮ ስቀርፅ ነበር። ተኩሱ ሲጀመር ህዝቡ ወደ እኛ መሮጥ ጀመረ። መጥቼ እዚያ ጥላ ስር ስቆም ዛፎች ስር ገደል ነገር አይቼ ስለነበር ወደዚያ ላለማፈግፈግ ጥረት አደረኩኝ። ሆኖም ጥረቴ አልተሳካም ከብዙ ሰዎች ጋር ተያይዘን ገደል ገባን። ከሁሉም ከህሊናዬ በፍፁም ሊፋቅ የማይችለው ወደ ገደሉ ስንገባ አንድ በግምት ዘጠኝ ወይ አስር ዓመት የሚሆነው ትንሽ ልጅ አባቱ ”ወይኔ ልጄን! ወይኔ ልጄን!” እያለ በሚጮህበት ሰዓት ልጁ ገደሉ አፋፍ ደርሶ ነበር። ገደሉ ውስጥ ሊገባ እንደሚችል እገምታለሁ። መጨረሻውን አለማወቄ አዕምሮዬን ይቆጠቁጠኛል። ወደ ገደሉ ስንገባ ብዙ ሰው ሆነን ነው ተያይዘን የገባነው። ከላይም ሰው እላያችን ላይ ሲወድቅ ነበር። ገደሉ ከስድስት እስከ ስምንት ሜትር ከፍታ ያለው ሲሆን፤ መሬት ላይ ረዘም ብሎ በዛፎች የተሸፈነ ነው። ለምን እንደዚያ እንደተቆፈረ ባላውቅም ውስጡ በጣም ይሸታል።

Irrecha massacre, 2nd Oct 2016

የመጀመሪያ ደቂቃዎች ላይ ስለነበር በኋላ ላይ እንደተከሰተው ጉድጓዱ ውስጥ ሰው ባይሞላም አጠገቤ ብቻ ወደ አምስት የማይንቀሳቀሱ ሰዎች ነበሩ። ለመሞታቸው እርግጠኛ ነኝ። በእንዲህ ዓይነት ሁኔታ እራስን ማትረፉ የግድ ስለሆነ ገደሉ ውስጥ በእግር መቆም የቻልነው ሐረግና የዛፎች ሥር በመያዝ ወደ ላይ መውጣት ቻልን። ከገደል ስንወጣ የወጣነው ወደ ማኔጅመንት ኢንስቲትዩት ግቢ ነበር። በጣም በሚያስደንቅ ሁኔታ ግቢው ውስጥ የነበሩ የግቢው ጠባቂዎች፤ የፅዳት ሠራተኞች የሕንፃ ኃላፊዎች እየተቀበሉን በጭቃ የተለወሰውን መላ አካላችንን ከነ ልብሳችን በአትክልት ማጠጫ የውሃ ጎማ ሲያጥቡን ነበር። በጣም ለተጎዱት የታሸገ ውሃ አምጥተው ሲያጠጡ እና ዓይናቸውና ጭንቅላታቸው ላይ ውሃ ሲያፈሱ ነበር። በአትክልት ማጠጫ ጎማ ከነ ልብሴ ሻወር ከወሰድኩ በኋላ ነው አንዳንድ የተላላጡ የሰውነቴን ክፍሎች ያየሁት። ዓይኔ በጣም እያቃጠለኝ ነበር። ጉሮሮዬ ውስጥም ያቃጥለኛል። የሚኮሰኩሰኝና የሚያቃጥለኝ አፈሩ/ጭቃውና ገደሉ ውስጥ ያለው ቆሻሻ ውሃ መስሎኝ ነበር። የጭስ ቦምቡ ጉዳይ የታወቀኝ ቆይቶ ብዙ ሰዎች ከወጡም በኋላ ተዝለፍልፈው ሲወድቁ ሳይ ነው።

Irrecha protest, 2nd Oct 2016

ልብሴ ትንሽ ጠፈፍ እንዲልልኝ ሰዎቹን ለምኜ ትንሽ ከቆየሁ በኋላ፤ ከማኔጅመንት ኢንስቲትዩት ወደ ዋናው መንገድ ወጣሁ። ያየሁት ለማመን ተቸገርኩ። ሰው በየጥጋጥጉ ተዝለፍልፎ ተኝቷል። አንዳንዱ ለብቻው ነው። የተወሰነው ከአጠገቡ ሰው ነበር። ከማስታውሰው አንድ በሰላሳዎቹ ዕድሜ ክልል የሚገኝ ሰው ሲያጣጥር ነበር። እህቱ ትሁን ጓደኛው ሰዎች አንስተው እርዳታ ወደ ሚሰጥበት ቦታ እንዲወስዱላት ትማፀናለች። እዚያ አካባቢ ከነበረው ሰው እንደዚያ አይነት አቅምና ሞራል ያለው ሰው አልነበረም። መጨረሻውን አላየሁም ተነስቼ ሄድኩ። ስለ ወንድሞቼ ሳስብ በነበረበት ሰዓት መንገድ ላይ አንዱን ወንድሜን አግኝቼው ከአንዱ ወንድማችን ስልክ በስተቀር የሦስቱን እንዳገኘና ብዙ አስከሬኖች ወደ ቡሾፍቱ ሆስፒታል እየተወሰዱ ስለሆነ እዚያ ሄደን እንይ አለኝ።

Irrecha massacre, 2nd Oct 2016

ሆስፒታሉ ውስጥ የተደረደሩትን አስከሬኖች ሳይ አጥወለወለኝ። ወንድሜን እንዲያይ ነግሬው እኔ ፈጥኜ ወጣሁ። ወንድሜ እንደነገረኝ በመጀመሪያዎቹ ደቂቃዎች ብቻ ከሰማኒያ በላይ አስክሬኖች እንደተደረደሩና ብዙዎቹ በጭቃ የተለወሱ መሆናቸውን፣ ጥቂት የማይባሉ በጥይት የተመቱ መሆኑንና በጥይት የተመቱትን ወደ ሌላ ቦታ ለመውሰድ ለብቻ እየለዩ መሆኑን ነገረኝ። ወንድማችን እዚያ ውስጥ የለም። በዓይን የምናውቀውንም እያየ ስለነበር የሚያውቀው ሰው እንደሌለ ነግሮኝ ተያይዘን ወጣን። በዚህን አጭር ጊዜ ይህን ያህል አስክሬን ተሰብስቦ ከመጣ፤ በየጥጋጥጉ፣ በገደሉና ውሃ ውስጥ ያሉ የሞቱ ሰዎች ብዛት ሳስብ ዘገነነኝ። በዚያ ላይ በየመንገዱ ሲያጣጥሩ የነበሩና የሕክምና እርዳታ ማግኘት ያልቻሉ ሰዎች ዕጣቸው ምን መሆን እንደሚችል ካሰብን ከአዕምሮ በላይ ይሆንብናል። ይህንን ይተቀነባበረ የህወሓት ሴራ በአጋጣሚ የተፈጠረ ነው ብለን ካሰብን ሞኞች ነን። ይህ ሆን ተብሎ በአንድ ላይ የተገኙትን የኦሮሞ ምሁራንና ቄሮዎችን ለመጨፍጨፍ የታቀደ ስለመሆኑ ምንም ጥርጥር የለኝም።

ከጓደኛዬ ጋር ብንጠፋፋ ብለን ጧት የተቀጣጠርንበት ቦታ ሄድኩና ምንም ሳይሆን ጧት እንደነበረ አገኘሁት። የዕድል ጉዳይ ገረመኝ። ብዙዎቹ ከአጠገባችን እስከ ወዲያኛው አሸልበዋል። ገሚሶቻችን የሞት አፋፍ ላይ ደርሰን ተመልሰናል። እንደ ጓደኛዬ ያሉት ደግሞ ምንም ነገር ሳይደርስባቸው አምልጠዋል። እኔም ዋቃ አትርፎኛልና በወንድሞቼና እህቶቼ እልቂት ከመብሰልሰል ውጪ ስለ ራሴ ምንም ቅሬታ የለኝም። የወገኔ ደም በከንቱ ፈሶ እንደማይቀር ደግሞ እርግጠኛ ነኝ። በአምቦ፣ በመቂ፣ በባቱ/ዝዋይ፣ በቡሌ ሆራ፣ በሻሸመኔ፣ በኮፈሌ፣ በአወዳይና ሐረር፣ በምዕራብና ምስራቅ ወለጋና ሌሎችም ቦታዎች እንደታየው የወገን ደም ፈሶ እንደማይቀር ማሳየትና ይህንን አረመኔ ቡድን ማስወገድ ነገ ሳይሆን ዛሬ፤ ዛሬ ሳይሆን አሁን መሆን አለበት።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!