Ethiopia Zare (ሐሙስ ነሐሴ 14 ቀን 2001 ዓ.ም. August 20, 2009)፦ ሁለት ዓመት ለፈጀውና 80 ሺህ የሚሆን የሰው ልጆችን ሕይወት ለቀሰፈው ጦርነት መንስዔ የሆነውን ችግር ለመቅረፍና የሁለቱን ሀገሮች “ጦሰኛ” መንግሥታት ለመገላገል ችሎት የተቀመጠው የሔጉ ካሣ ኮሚሽን ለኢትዮጵያ መንግሥት 10.5 ሚሊዮን ዶላር ካሣ ይገባዋል! ይህንንም ኤርትራ ትክፈል ሲል ነሐሴ 11 ቀን 2001 ዓ.ም. ፍርድ ሰጥቷል።

 

የሔጉ ካሣ ኮሚሽን ባለፈው ማክሰኞ ነሐሴ 12 ቀን 2001 ዓ.ም. ኤርትራ ለኢትዮጵያ መንግሥት የ174 ሚሊዮን ዶላር ካሣ እንድትከፍል የወሰነ ሲሆን፣ ኢትዮጵያ ደግሞ ለኤርትራ መንግሥት 161 ሚሊዮን ዶላር እና ለኤርትራውያን ግለሰቦች 2 ሚሊዮን ዶላር እንድትከፍል ወስኖባቸዋል። በዚህም መሠረት ወደ ሁለቱ ሀገራት አንዳቸው ለአንዳቸው ከሚከፍሉት ካሣ ላይ ተቀናንሶ አስር ነጥብ አምስት ሚሊዮን ኤርትራ ለኢትዮጵያ እንድትከፍል ኮሚሽኑ ወስኗል።

 

ከኮሚሽኑ ውሳኔ በኋላ በሻዕቢያ የምትመራው “ኤርትራ” ውሳኔውን የተቀበለችው ሲሆን፣ በአንፃሩ በኢህአዲግ የምትገዛው ኢትዮጵያ በውሳኔው ያላትን ቅሬታ ገልጻለች። ኢትዮጵያ ቃል አቀባይ ዋህደ በላይ የተወሰነው ካሣ በቂ ባይሆንም “የኤርትራን አጥፊነትና ጠብ ጫሪነት የሚያመለክት ከመሆኑ አኳያ ክፋት የለውም” ብለዋል።

 

እንደሳቸው አባባል ምንዛሪ ከሆነ የኢህአዲግ አገዛዝ የአንድ ቢሊዮን ዶላር ካሣ ጠይቆ የነበረ ቢሆንም፣ 10.5 ሚሊዮን ዶላር ብቻ መፈረዱ በጣም የሚያንስ መሆኑ ተጠቁሟል።

 

የኮሚኒኬሽን ሚኒስትሩ አቶ በረከት ስምዖን ነሐሴ 14 ቀን 2001 ዓ.ም. በሰጡት መግለጫ የካሣ ኮሚሽኑ ውሣኔ “ኢትዮጵያ በአሰብና በምፅዋ ወደቦች የተዘረፉባትን ንብረቶችና በጦርነቱ ያጋጠማትን ውድመት … ግንዛቤ ውስጥ ያላስገባ ነው” በማለት ተቃውሟቸውን አሰምተዋል።

 

በዚሁ ብልህ መሪዎችን በማጣት በተቀሰቀሰው የኢትዮ-ኤርትራ ጦርነት እስካሁን የተፋጠጡት ሁለቱም ሀገራት አንዱ ያንዱን ተቃዋሚዎች በመርዳት እንደሚገኙ የሚታወቅ ሲሆን፣ በጦርነቱ ሕይወታቸው ላለፉ አስር ሺዎች ቤተሰቦች ተገቢ ካሣ ካለመክፈላቸውም በላይ የልጆቻቸውን መሞትና መኖር ያላወቁ በርካቶች መኖራቸው ይታወቃል።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!