Ethiopia Zare (ማክሰኞ ነሐሴ 19 ቀን 2001 ዓ.ም. August 25, 2009)፦ የደምወዝ ታክስ የሚቆረጥባቸው የመንግሥት ሠራተኞች፤ በአዲስ መልክ የተጀመረው የታክስ መክፈያ ማረጋገጫ የጣት አሻራ መስጠት ጉዳይ የደህንነት ሥጋት እየፈጠረባቸው መሆኑን ለኢትዮጵያ ዛሬ ገለጹ።

 

ከቅርብ ጊዜ ወዲህ የጣት አሻራ ማናቸውም የመንግሥት ሠራተኞች እንዲሰጡ የተወሰነና ተግባራዊ መሆን የጀመረ ሲሆን፣ በተለያዩ የማኅበረሰብ ክፍሎች የተለያዩ ጭንቀቶችንና ጥርጣሬን መፍጠሩን ለማወቅ ተችሏል።

 

በአዲስ አበባ ዩኒቨርሲቲ የሚያገለግሉ መምህር “ይህ የታክስ መክፈያ ማጣሪያ አሻራ እስካሁን የተሠራበት ለነጋዴዎች ነበር። አሁን ደግሞ በመንግሥትም፣ በግል ድርጅቶችም እየተተገበረ ይገኛል፤ ይህ የአሻራ አሰጣጥ ሠራተኛውን ቀደም ሲል ያላማከረ፣ ጥቅሙና ጉዳቱ በግልጽ ያልታወቀ ነው። በሀገራችን አሻራ መሥጠት ከወንጀል ተግባር ጋር የተያያዘ በመሆኑም አሁን የተፈጠረብን ሥጋት አሻራችን በእርግጥ ለታክስ አገልግሎት ብቻ ነው የሚውለው የሚለውን ጥያቄ ያስነሳል። የፖለቲካ ችግርና ያለመረጋጋት የሚታይበት መንግሥት፤ ያልፈለጋቸውን ዜጐች የሚፈርጅበት መንገድ ቢኖርስ?” ብለዋል።

 

የባንክ ባለሙያ የሆኑት ሌላ አስተያየት ሰጪ ደግሞ፤ “የሁለቱም እጆቻችን አመልካች ጣቶች አሻራ ከመውሰድ በተጨማሪ ፎቶግራፋችንም ተያያዥ እንዲሆን የተደረገበት አሠራር ለምን እንደተፈጸመ የምንጠይቀውን ሰው እንኳን አላገኘንም። አሻራ እና D.N.A ማለት የሰው ልጅ ብቸኛ መለያው ነው፤ በቂ መግለጫ ሊሰጠን ይገባል መንግሥት ወጥመድ ውስጥ ማስገቢያ ይሆናል የሚል ጥርጣሬም ጭሮብናል” ብለዋል።

 

በሌላ በኩል አሻራ መስጠቱ “ጥቅምም ጉዳትም አለው” የሚሉ ወገኖች ከመኖራቸውም ሌላ፤ “ጉዳቱ አሻራው ለፖለቲካ መጠቀሚያ ሲባል ለማይገባ ጥቅም (አቢዩዝ) ሊደረግ ይችላል” የሚል ሥጋት ያለው መሆኑን የገለጹ ሲኖሩ፤ “ጥቅሙ ደግሞ ማንኛውም ታክስ ከፋይ አሻራው ገቢዎች ባለሥልጣን ቢሮ ውስጥ ስለሚገኝ የሥራ ልምድ መ/ቤቱ አልጽፍልህም ቢለው እንኳ ገቢዎች መ/ቤት በአሻራው ምክንያት ሊጽፍለት ይችላል” ብለዋል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!