Ethiopia Zare (ኀሙስ ሚያዝያ 2 ቀን 2000 ዓ.ም. April 10,2008)በትናንት በስቲያ በኦሮሚያ ክልል በባሌ ዞን በሚገኘው ሮቤ ከተማ በሚገኘው የመዳ ወላቡ ዩኒቨርሲቲ በጎሣና በቋንቋ ምክንያት በተፈጠረ ረብሻ በርካታ ተማሪዎች መጎዳታቸውንና የዩኒቨርስቲውን ቅጥር ግቢ ለቅቀው እስከመውጣት ተገደዋል።

 

መጋቢት 29 ቀን 2000 ዓ.ም. ጠዋት የዩኒቨርሲቲው ተማሪዎች በትምህርት ቤቱ ካፊቴሪያ የሚቀርብላቸው ምግብ ከቀን ወደ ቀን እየተበላሸ በመምጣቱ ለመወያየት ተሰብስበው ነበር። የውይይታቸው አጀንዳ የትምህርት ቤቱ የምግብ ጉዳይ ነበር።

 

በዩኒቨርሲቲው ከተለያዩ የሀገሪቱ ክፍሎች የተውጣጡ ተማሪዎች የሚገኙ ሲሆን፣ ውይይታቸው ወቅት አንድ ተማሪ እየተወያዩበት በነበረው የአማርኛ ቋንቋ ሳይሆን በኦሮምኛ ቋንቋ አስተያየት ይሰጣል። በዚህን ጊዜ አንድ ሌላ የትግራይ ተወላጅ የሆነ ተማሪ "ሁላችንንም ሊያግባባ በሚችል ቋንቋ እየተነጋገርን ባለበት ወቅት ለምን በኦሮምኛ ቋንቋ ትቀላቅላለህ?" የሚል ጥያቄ ይሰነዝራል።

 

ስብሰባው በዚህ ምክንያት ተረብሾ በዚያው ይቋረጣል። በተማሪዎቹ መሃከል አለመግባባትን ጭሮ ያልፋል።

 

የዚያን ዕለት አመሻሹ ላይ ቋንቋ የቀላቀለው ብሔር ተማሪዎች ድንጋይ በመወርወራቸው ምክንያት አለመግባባቱ ወደ ግጭትና ረብሻ ሊያድግ ችሏል።

 

በዚህም ምክንያት የተማሪዎች መተኛ ክፍሎች መስታወቶችና በሮች በከፍተኛ ሁኔታ ተሰባብረዋል። በርካታ ተማሪዎች ተፈነካክተዋል። በተለይ የአንደኛ ዓመት ተማሪዎች ማደሪያዎችና ተማሪዎቹም በብዛት ተጎድተዋል።

 

ብጥብጡ እስከትናንት በስቲያ ከሰዓት በኋላ ረፋዱ ላይ የዘለቀ ሲሆን፣ በርካታ ተማሪዎች የዩኒቨርሲቲውን ቅጽር ግቢ ለቅቀው ለመውጣት ተገድደዋል። በአካባቢው ዘመድና ቤተሰብ ያላቸው ወደ ዘመዶቻቸው ቤት ሲሄዱ፤ ሌሎች ደግሞ ሆቴል ለማረፍ ተገድደዋል። ለሆቴል አቅማቸው ያልፈቀደ ደግሞ በመስጅድና በቤተክርስቲያና እስከ ዛሬ ድረስ መጠለላቸውን ለማረጋገጥ ችለናል።

 

የዩኒቨርሲቲው ባለሥልጣናት ተማሪዎቹን ለማግባባትና ሠላም እንዲፈጠር የተቻላቸውን ቢጥሩም ይህንን ዜና እስካጠናከርንበት ጊዜ ድረስ ግን አብዛኞቹ ተማሪዎች ለሕይወታቸው በመስጋትና የባሰ ችግርና ብጥብጥ ይነሳል በሚል ጥርጣሬ ግቢውን ለቅቀው መውጣታቸው ታውቋል።

 

በዛሬው ዕለት በአካባቢው የሚገኘው የፌዴራል ፖሊስ ግቢውን እየጠበቀ የሚገኝ ሲሆን፣ ጥቂት ተማሪዎች ገባ ወጣ ሲሉ መታየታቸውን ለማወቅ ችለናል።

 

የመዳ ወላቡ ዩኒቨርሲቲ ባለፉት ሁለት ዓመታት ውስጥ ከተከፈቱት 13 አዳዲስ ዩኒቨርሲቲዎች ውስጥ አንዱ ሲሆን፣ ትምህርታቸውን እየተከታተሉ የነበሩት ተማሪዎች የአንደኛ እና የሁለተኛ ዓመት ተማሪዎች ነበሩ።

 

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!