EMF -- የኢትዮሜዲያ ድረ-ገጽ "Bad news for Meles Zenawi spies in the U.S." ብሎ ባሰፈረው ዜና የቨርጂኒያው መሃመድ አናስ ሱኢድ ለሶሪያ አንባገነን መንግሥት ሲሰልል ተይዞ መታሰሩን ገልጾ፤ ይህም በዩናይትድ ስቴትስ ዜግነት ካገኙ በኋላ ለአቶ መለስ ዜናዊ አስተዳደር ለሚሰልሉ የገዢው ፓርቲ አገልጋዮች ከፍተኛ ማስጠንቀቂያ እንደሆነ አስፍሯል።

 

 

የ47 ዓመቱ የሶርያ መሃመድ አናስ አሜሪካዊ ዜግነት ያለው ነው።

 

መሃመድ አናስ ሱኢድ በውጭ የሚኖሩ ሶርያውያንን የፖለቲካ እንቅስቃሴና ተቃውሞ ሰልፎችን በስዕል እና በድምፅ በመቅረጽ፤ በማስፈራራት እና በልዩ ልዩ ዘዴዎች በማወክ፤ ሽብር በመፍጠር፤ እና መረጃዎችን ለባሻር አል አሳድ መንግሥት በማቀበል ሲሠራ እንደነበር በአሜሪካ መንግሥት ተደርሶበታል። ግለሰቡ ሊታሰር የቻለውም ጉዳዩን ይከታተሉ የነበሩ የሶርያ ተወላጆች ባደረጉት ክትትል እና ጥቆማ ነው።

 

እንደ ኢትዮሜዲያ ድረ-ገጽ ዘገባ በዩናይትድ ስቴትስ ለተመሳሳይ ሥራ የተሰማሩት የአቶ መለስ ሰላዮች፤ በመጀመሪያ በፖለቲካ ጥገኝነት የመኖርያ ፈቃድ (ግሪን ካርድ) ያገኛሉ፤ አዚያም ዜጋ ይሆኑና የስለላ ሥራቸውን ይጀምራሉ። ይህንን ሲያደርጉ ጥገኝነት ሲጠይቁ የገቡትን ቃለ-መሃላ እንደዋዛ ችላ በማለት እንደሆነ ድረ-ገጹ ዘግቧል።

 

የአንድን ሀገር ዜግነት ይዞ፤ በሚኖርበት ስፍራ ለሌላ ሀገር መሰለል እስከ በዕድሜ ልክ እስራት እና በሞት ቅጣት የሚያስፈርድ ከባድ ወንጀል ነው።

 

የአቶ መለስ መንግሥት በሰሜን አሜሪካ ብቻ ሳይሆን በአውሮፓ፤ በአውስትራሊያ እና በአፍሪካ ሀገሮችም በሚሊዮን ዶላር በጀት በመመደብ ሰላዮቹን እንዳሰማራ ከኮበለሉ የኢትዮጵያ ኤምባሲ ሠራተኞች ያገኘነው መረጃ ይጠቁማል።

 

ከአውሮፓ የኮበለሉ ከፍተኛ የኤምባሲ መልዕክተኞች በተለይ በቤልጂየም እና በሆላንድ ነዋሪ ኢትዮጵያውያንን እየሰለሉ ያሉትን ሰዎች ስም ዝርዝር ለዝግጅት ክፍላችን ልከዋል።

 

የእነዚህን ሰላዮች ስም ዝርዝር ከሕግ ባለሞያዎች ጋር ተማክረን ይፋ እናደርጋለን። ሰላዮቹ በከፊል በስደት ስም ወደ አውሮፓ የተላኩ ሲሆን፤ ሌሎቹ ደግሞ በአዲስ አበባ የመኖርያ ቤት ቦታ ለማግኘት ሲሉ በዚህ ሥራ እንደተሰማሩ የኤምባሲ ምንጮች ጠቁመዋል።

 

እንደሶርያውያን ሁሉ ኢትዮጵያውያንም በስደት ከሚኖሩበት ሀገር የሚያውቋቸውን ሰላዮች ማጋለጥ እና ሕግ ፊት ማቆም አለባቸው። ይህንን ለማድረግ ሁለት ነገሮች መሠራት አለባቸው። አንደኛ፤ እነዚህን ሰላዮች የሚከታተልና የስም ዝርዝራቸውን የሚሰበስብ አንድ አካል ማቋቋም፤ እና በሁለተኛ ደረጃ ሰላዮቹን ለሚመለከተው የፍትህ አካል የሚሰጥ የባለሞያዎች ቡድን መመስረት።

 

ኢ.ኤም.ኤፍ. በዚህ ዘገባ ላይ አስተያየት መስጫ መድረክ የከፈተ ሲሆን፤ አስተያየት ለመስጠት እዚህ ይጫኑ!

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!