Ethiopia Zare (ረቡዕ ግንቦት 6 ቀን 2000 ዓ.ም. May 14, 2008)ዶ/ር ብርሃኑ ነጋን ጨምሮ አምስት የቀድሞ የቅንጅት የላዕላይ ምክር ቤት አባላት ስላቋቋሙት "ግንቦት 7 የፍትህ፣ የነፃነትና የዴሞክራሲ ንቅናቄ" በተሰኘው አዲስ የፖለቲካ ፓርቲን አስመልክቶ በኢትዮጵያ ቴሌቭዥን ኔትዎርክ (ኢ.ቲ.ኤን.) መግለጫ ሰጡ።

 

የንቅናቄው መስራቾች  የሆኑት የቀድሞ የቅንጅት ለአንድነትና ለዴሞክራሲ ፓርቲ የላዕላይ ምክር ቤት አባላት የነበሩት ዶ/ር ብርሃኑን ጨምሮ በቅርቡ ከቀድሞው ቅንጅትም ሆነ ከአሁኑ አንድነት ፓርቲ ራሳቸውን ማግላላቸውን ያሳወቁት አቶ አንዳርጋቸው ፅጌ፣ አቶ መስፍን አማን፣ አቶ ዳንኤል አሰፋ እና አቶ ቸኮል ጌታሁን ናቸው። (ጋዜጣዊ መግለጫውን በፒ.ዲ.ኤፍ. አስነብበኝ)

 

በኢ.ቲ.ኤን. በአካል ተገኝተው የድርጅቱን መመስረት በኦፊሴል ጋዜጣዊ መግለጫ በመስጠት ያሳወቁት ዶ/ር ብርሃኑ ነጋ እና አቶ ዳንኤል አሰፋ ሲሆኑ ሌሎቹ ከአውሮፓ በስልክ ኮንፈረንስ ተቀላቅለዋቸው ነበር።

 

የንቅናቄው አመራሮች በጋዜጣዊ መግለጫው ላይ በአካል መገኘት ከቻሉት ጋዜጠኞች ሌላ በስልክ ኮንፈረንስ ከተለያዩ ዓለማት ተካፍለው ለነበሩ ጋዜጠኞች ለተሰነዘሩላቸው ጥያቄዎች ምላሽ ሰጥተዋል።  

 

ንቅናቄው በየሣምንቱ የሚወጣ "የግንቦት 7 ድምጽ" የተሰኘ ልሳን የሚኖረው ሲሆን፣ www.ginbot7.org (ግንቦት 7 ዶት ኦርግ) የተሰኘ ኦፊሴላዊ ድረ ገጽ እንደሚኖረው ታውቋል። ይህንን ዜና በምናጠናክርበት ወቅት የድርጅቱ ድረ ገጽ መሥራት የጀመረ ሲሆን፣ "የግንቦት 7 ድምጽ" የተሰኘው ልሳን ልዩ ዕትምም ተሰራጭቷል።

የግንቦት 7 ድምጽ ልሳን ኤዲቶሪያል ቦርድ አባላት ዶ/ር ብርሃኑ ነጋ፣ አቶ አንዳርጋቸው ጽጌ፣ አቶ መስፍን አማን እና አቶ ቸኮል ጌታሁን ሲሆኑ፣ አዘጋጆቹ ደግሞ አቶ ፋሲል የኔዓለም የቀድሞ የአዲስ ዜና ጋዜጣ አዘጋጅ እና አቶ ደረጀ ኃ/ወልድ የቀድሞ የነፃነት ጋዜጣ አዘጋጅ መሆናቸው ታውቋል።

 

ልሳኑ በዚህ የመጀመሪያው ልዩ ዕትሙ "ነፃነት የቀደምቶቻችን ውርስ፣ ዴሞክራሲ የዜግነት መብት እንጂ የአምባገነኖች ችሮታ አይደለም" በሚል ርዕስ ባቀረበው ርዕሰ አንቀጹ፤ "... ግንቦት 7 ስንሰኝ፣ ለአስርተ ሰዓታት ላንቃቸው በውሃ ጥም ደርቆ፣ በብብታቸው የምርጫ ካርዳቸውን ደብቀው፣ የአዲስ ቀን ተስፋ ሰንቀው፣ ለለውጥ እግራቸው እስከሚዝል የተሰለፉትን አረጋውያንና ባልቴቶች፣ ሲቪሎችና ወታደሮች፣ ወጣቶችና ሴቶችን የተስፋ ስነቃችሁ ተቀምቶ አየቀርም ለማለት ነው። ...

 

"... አዎን! ባለፉት ሦስት ዓመታት፣ ብዙዎች የተስፋቸውን ውጤት ሳያዩ ከሕይወት ተለይተውናል። ያለፉቱ፣ ለሰዓታት በመዎም ታሪክ በሠሩበት ቀን፣ በግንቦት 7 ስም በመሠረትነው ሕዝባዊ ንቅናቄ፣ የዕብሪተኞችን ተራራ ልንደረምስ መነሳታችንን ልናበስራቸው ቆርጠናል። ግንቦት ሰባት የፍትህ፣ የነፃነትና የዴሞክራሲ ንቅናቄ እምቢ ለእብሪት፣ እሺ ለሁሉም ዴሞክራሲያዊ ኃይሎች ሕብረት፣ እሺ ለሁለገብ የትግል ስልት፣ እሹ ከብልጣብልጥነት ነፃ ለሆነ፣ የዜጎችን መብት ከምር ለተቀበለ፣ ሀገራዊ ድርድርና ስምምነት ይላል። ዓላማው ቀና፣ ጥሪው ሀገራዊ ነው" ሲል "የግንቦት 7 ድምጽ" በርዕሰ አንቀጹ ላይ አስፍሯል።

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!