W/o Azeb Mesfin ወ/ሮ አዜብ መስፍን (ማክሰኞ ግንቦት 21 ቀን 2004 ዓ.ም. May 29, 2012)፦ በቅርቡ በቡራዩ ከተማ በከንቲባ ኩማ ደመቅሳ በተመራው ሙሰኞችን የማጋለጥ ስብሰባ ላይ “ወ/ሮ አዜብ መስፍን ያለ አግባብ በወንድማቸው ስም መሬት ወስደዋል” ብሎ ያጋለጠው የማዘጋጃ ቤቱ ሠራተኛ መታሰር በከተማው መነጋገሪያ መሆኑን የከተማው ነዋሪዎች ለፍኖተ ነፃነት ጋዜጣ ሪፖርተር መግለጻቸውን ጋዜጣው ዘገበ።

 

የጋዜጣው ሪፖርተር ያነጋገራቸው እነዚሁ የአካባቢው ነዋሪዎች እንደሚሉት “መድረኩ የተዘጋጀው በቡራዩ አካባቢ የመሬት ቅርምት ተፈጽሟል፤ በመንግስትና በህዝብ መሬት ግለሰቦች አላግባብ በልጽገዋል፤ ከፍተኛ ሙስና ተፈጽሟል ተብሎ ነበር” ይላሉ።

 

ሆኖም ግን ይላሉ የጋዜጣው ምንጮች፤ የመድረክ አመራሩ ተሰብስበው በአካባቢው ኃላፊዎችና ከቁጥር በማይገቡ ሙሰኞች ላይ ብቻ ጣቱን እንዲቀስር እንዲያጋልጥ ግፊት ይደረግ ነበር። ይህንን የተገነዘበው አቶ ኃይሉ ንጉሴ የተባለው የማዘጋጃ ቤቱ የፋይናንስ ሠራተኛ ተነስቶ ”ትኩረቱን ለምን በትንንሾቹ ብቻ ታደርጋላችሁ። ሙስናን በቁርጠኝነት የምትታገሉ ከሆነ ወደ ላይም ተመልከቱ። በዚህ በከተማችን ወ/ሮ አዜብ መስፍን በወንድማቸው ስም መሬት ወስደዋል። ለምን አይጣራም? ለምን እሳቸውም አይጠየቁም?” ብሎ ተናግሯል።

 

በወቅቱ ስብሰባውን የሚመሩት ከንቲባ ኩማ ደመቅሳ፤ “ጥቆማው አንድና አንድ ነው። ጥቆማው በማስረጃ መረጋገጥ አለበት። ዝም ብሎ መጠቆም አይደለም።” እያሉ ጥቆማውን ለማጣጣልና ለማንቋሸሽም ሞክረዋል።

 

የአካባቢው ነዋሪዎች ”ይህ ሲገርመን በቅርቡ ጠቋሚውን በሙስና ትፈለጋለህ ተብሎ ታስሯል። መንግስት በተለይ የኦሮሚያ ክልላዊ መንግስት ሙስናን ለመዋጋት ያለውን ቁርጠኝነትና ጥያቄ ውስጥ የሚከት ከመሆኑም በላይ በመንግስት ላይ ያለን እምነት እየተሸረሸረ ነው።” ሲሉ ሥጋታቸውን ገልፀዋል።

 

አቶ ኃይሉ ንጉሴ በገፈርሳ ቡራዩ ውስጥ ሊቀመንበር ሆኖ ያገለገለ ሲሆን፤ በአሁኑ ወቅት በቡራዩ ማዘጋጃ ቤት የፋይናንስ ሠራተኛ ነው። የጠቅላይ ሚኒስትር መለስ ዜናዊ ባለቤት የሆኑት ወ/ሮ አዜብ መስፍን በአሁኑ ጊዜ በአገራችን ያለአግባብ ከፍተኛ ሀብት አፍርተዋል ተብሎ ከሚታሙት ግለሰቦች ውስጥ አንዷ መሆናቸው ይታወቃል። (ፍኖተ ነፃነት ጋዜጣን ሙሉ ዕትም ለማንበብ እዚህ ይጫኑ!)

አዲስ ቪዲዮ

ዜና እና ፖለቲካ

ኪነ-ጥበብ

ቪዲዮ

መጻሕፍት

ስለእኛ

ይከተሉን!